Ezequiel 25 - Li Santil hu

Raylal ta̱cha̱lk saꞌ xbe̱neb li jalanil tenamit

¹ Li Ka̱cuaꞌ quia̱tinac cuiqꞌuin ut quixye cue:

² —At ralal cui̱nk, ilon cuanqueb cuiꞌ li ralal xcꞌajol laj Amón ut ta̱ye resil li raylal li ta̱cha̱lk saꞌ xbe̱neb.

³ Ta̱ye reheb cheꞌrabihak li cꞌaꞌru ninye la̱in li nimajcual Dios: La̱ex quisahoꞌ saꞌ e̱chꞌo̱l chirilbal nak queꞌxmux ru lin templo. Quisahoꞌ saꞌ e̱chꞌo̱l nak lix naꞌajeb laj Israel quicana chi ma̱cꞌaꞌ cuan chi saꞌ ut eb laj Judá queꞌcꞌameꞌ chi pre̱xil saꞌ jalan tenamit.

⁴ Xban nak quisahoꞌ saꞌ e̱chꞌo̱l, joꞌcan nak la̱in tincanabeb chi numta̱c saꞌ e̱be̱n eb li tenamit li cuanqueb saꞌ li este. Teꞌxyi̱b lix muheba̱leb saꞌ le̱ naꞌaj ut aran teꞌcua̱nk. Aꞌaneb chic teꞌtzaca̱nk re li ru le̱ racui̱mk ut eb aꞌan chic teꞌucꞌak re le̱ leche.

⁵ La̱in tinsukꞌisi le̱ naꞌaj Rabá chokꞌ xnaꞌajeb li ni̱nki xul camello. Ut tinsukꞌisi lix naꞌajeb laj Amón chokꞌ xnaꞌajeb li carner. Ut riqꞌuin aꞌan la̱ex te̱qꞌue retal nak la̱in li Ka̱cuaꞌ Dios.

⁶ Joꞌcaꞌin naxye li nimajcual Dios: —La̱ex xepokꞌpokꞌi le̱ rukꞌ ut xexpiscꞌoc xban xsahil e̱chꞌo̱l xban li raylal li queꞌxcꞌul laj Israel.

⁷ Joꞌcan nak la̱in tintakla li raylal saꞌ e̱be̱n ut texincanab saꞌ rukꞌeb li xicꞌ nequeꞌiloc e̱re. Eb aꞌan teꞌxmakꞌ che̱ru li cꞌaꞌru e̱re. La̱in tinsach e̱cuanquil re nak incꞌaꞌ chic ta̱ru̱k texcua̱nk joꞌ tenamit. Ut riqꞌuin aꞌan la̱ex te̱qꞌue retal nak la̱in li Ka̱cuaꞌ Dios.

⁸ Aꞌan aꞌin li naxye li nimajcual Dios: —Eb laj Moab ut eb laj Seir queꞌxye nak eb li tenamit Judá juntakꞌe̱t riqꞌuineb li jun chꞌol chic tenamit.

⁹ Joꞌcan nak la̱in tincanabeb li tenamit li cuanqueb saꞌ li nuba̱l re li tenamit Moab saꞌ rukꞌeb li xicꞌ nequeꞌiloc reheb. Teꞌpletik riqꞌuineb li tenamit li nequeꞌxqꞌue xlokꞌal eb laj Moab. Aꞌaneb li tenamit Bet-jesimot, Baal-meón ut Quiriataim.

¹⁰ La̱in tincanabeb li tenamit li cuanqueb saꞌ li este chi numta̱c saꞌ xbe̱neb laj Moab joꞌ eb ajcuiꞌ laj Amón ut incꞌaꞌ chic teꞌcua̱nk xcuanquil joꞌ tenamit.

¹¹ La̱in tinqꞌueheb laj Moab chixtojbal rix lix ma̱queb ut riqꞌuin aꞌan teꞌxqꞌue retal nak la̱in li Ka̱cuaꞌ Dios.

¹² Li nimajcual Dios naxye: —Eb laj Edom queꞌxqꞌue re̱kaj reheb laj Judá nak queꞌnumta saꞌ xbe̱neb junxil. Xban li raylal queꞌxba̱nu reheb laj Judá numtajenak lix ma̱queb.

¹³ Anakcuan la̱in ninye nak tinqꞌueheb laj Edom chixtojbaleb lix ma̱queb. La̱in tincamsiheb chixjunileb li cristian joꞌ eb ajcuiꞌ li xul. Ma̱cꞌaꞌ chic ta̱cua̱nk aran naticla cuan cuiꞌ li tenamit Temán ut ta̱cuulak toj saꞌ li tenamit Dedán. Li naꞌajej ta̱cana̱k chi ma̱cꞌaꞌ chic cuan chi saꞌ.

¹⁴ Saꞌ incꞌabaꞌ la̱in eb lin tenamit Israel teꞌxqꞌue re̱kaj li ma̱usilal li queꞌxba̱nu laj Edom. Eb laj Edom teꞌrecꞌa xrahil lin joskꞌil ut teꞌxnau nak la̱in xinqꞌuehoc re̱kaj li ma̱usilal queꞌxba̱nu, chan li Ka̱cuaꞌ Dios.

¹⁵ Li Ka̱cuaꞌ li nimajcual Dios naxye: —Eb laj filisteo queꞌxba̱nu raylal reheb laj Judá, li xicꞌ queꞌril chalen najter. Xban nak xicꞌ queꞌril, queꞌxsach ruheb.

¹⁶ Joꞌcan nak la̱in ninye nak tinpletik riqꞌuineb laj filisteo ut tinsach ruheb. Tinsach ruheb laj cereteo joꞌ eb ajcuiꞌ li joꞌ qꞌuial queꞌcana chire li palau.

¹⁷ La̱in tinqꞌueheb chixtojbal lix ma̱queb ut tinqꞌue re̱kaj reheb aꞌan li ma̱usilal queꞌxba̱nu. Eb aꞌan teꞌrecꞌa xrahil lin joskꞌil. Ut riqꞌuin aꞌan teꞌxqꞌue retal nak la̱in li Ka̱cuaꞌ.—