Ezequiel 24 - Li Santil hu

Li jaljo̱quil ru a̱tin chirix li ucꞌal ta̱cuokxi̱nk

¹ Li Ka̱cuaꞌ quia̱tinac cuiqꞌuin saꞌ li laje̱b xbe li xlaje po re li xbele chihab kacꞌambal Babilonia ut quixye cue:

² —At ralal cui̱nk, tzꞌi̱ba retalil li cutan aꞌin xban nak saꞌ li cutan aꞌin lix reyeb laj Babilonia quixtakla xsutbal li tenamit Jerusalén re teꞌoc chi pletic riqꞌuineb.

³ Tat-a̱tinak riqꞌuineb laj Israel laj kꞌetoleb a̱tin. Ta̱ye reheb li jaljo̱quil ru a̱tin aꞌin. Joꞌcaꞌin xye li nimajcual Dios: Qꞌuehomak li ucꞌal saꞌ xam ut qꞌuehomak haꞌ chi saꞌ.

⁴ Te̱sicꞌ li cha̱bil tib joꞌ xtzꞌejcual li raꞌ ut li tzꞌej ut te̱qꞌue saꞌ li ucꞌal. Ut te̱qꞌue ajcuiꞌ li cha̱bil bak.

⁵ Te̱sicꞌ ru lix tibel li carner, li kꞌaxal cha̱bil. Te̱tus li siꞌ rubel li ucꞌal. Ut te̱canab chi cuokxi̱nc li haꞌ. Te̱chik li tib ut li bak saꞌ li ucꞌal.

⁶ Aꞌan aꞌin li naxye li nimajcual Dios: Raylal cha̱lc re saꞌ xbe̱n lix tenamiteb laj camsinel. Li tenamit chanchaneb jun li ucꞌal moꞌ xsaꞌ. Ta̱isi̱k li tib li cuan chi saꞌ chixjunju̱nkaleb. Ut incꞌaꞌ texbu̱lik chirix nak te̱risi.

⁷ Nabal li camsi̱nc qui-uxman saꞌ li tenamit ut lix quiqꞌueleb li queꞌcamsi̱c quihoyeꞌ saꞌ xbe̱n li pec. Incꞌaꞌ quihoyeꞌ saꞌ chꞌochꞌ re nak incꞌaꞌ ta̱sachk saꞌ li poks.

⁸ La̱in xincanab lix quiqꞌueleb chiru li pec bar ta̱cꞌutu̱nk cuiꞌ. Aran yo̱k chi kꞌoko̱nc ut yo̱k chixtzꞌa̱manquil nak teꞌqꞌuehekꞌ chixtojbal xma̱queb li queꞌcamsin reheb.

⁹ Joꞌcan nak la̱in li nimajcual Dios ninye: Raylal cha̱lc re saꞌ xbe̱n li tenamit aꞌin xban nak aj camsineleb. Joꞌcan nak la̱in tintzꞌab jun li xam.

¹⁰ Tinqꞌue nabal li siꞌ ut tinloch xxamlel. Tinchik chi us li tib ut tinqꞌue xbanol. Tinchik li bak chi us toj retal teꞌcꞌatk.

¹¹ Chirix aꞌan tinchunub li ucꞌal li ma̱cꞌaꞌ chic xsaꞌ saꞌ xbe̱n li ru xam toj retal ta̱cakokꞌ xban xtikcual re nak lix tzꞌajnil ta̱cꞌatekꞌ ut ta̱e̱lk lix moꞌil.

¹² Abanan ma̱cꞌaꞌ aj e nak xintacuasi cuib xban nak incꞌaꞌ ajcuiꞌ qui-el li moꞌ usta xinqꞌue saꞌ xam re ta̱e̱lk lix tzꞌajnil.

¹³ La̱ex aj Jerusalén chanchanex li ucꞌal xban nak xemux e̱rib. La̱in xinyal risinquil le̱ ma̱usilal, abanan incꞌaꞌ x-el xban nak muxbil e̱ru. Le̱ ma̱usilal ta̱e̱lk nak la̱in tincuisi lin joskꞌil saꞌ e̱be̱n nak texinqꞌue chixtojbal e̱ma̱c.

¹⁴ La̱in li Ka̱cuaꞌ xinyehoc re aꞌin. Xcuulac xkꞌehil nak texinqꞌue chixtojbal e̱ma̱c. Incꞌaꞌ tincuy e̱ma̱c ut incꞌaꞌ tincuil xtokꞌoba̱l e̱ru. La̱in incꞌaꞌ tinjal incꞌaꞌux. Ta̱rakekꞌ a̱tin saꞌ e̱be̱n aꞌ yal chanru le̱ yehom e̱ba̱nuhom, chan li nimajcual Dios.

¹⁵ Ut li Ka̱cuaꞌ quia̱tinac cuiqꞌuin ut quixye cue:

¹⁶ —At ralal cui̱nk, chi ma̱cꞌaꞌ saꞌ a̱chꞌo̱l tincuisi cha̱cuu li kꞌaxal raro a̱ban. Abanan mirahoꞌ a̱chꞌo̱l. Incꞌaꞌ ta̱yotꞌekꞌ a̱chꞌo̱l chi moco tatya̱bak xban, chan.

¹⁷ Incꞌaꞌ ta̱cꞌut nak ra saꞌ a̱chꞌo̱l. Incꞌaꞌ ta̱cuisi li tꞌicr li nacabacꞌ saꞌ a̱jolom, chi moco ta̱cuisi la̱ xa̱b retalil xrahil a̱chꞌo̱l. Incꞌaꞌ ta̱tzꞌap a̱jolom chi moco ta̱tzaca li tzacae̱mk li nequeꞌxtzaca li raheb saꞌ xchꞌo̱l, chan.

¹⁸ Chiru li ekꞌela quina̱tinac riqꞌuineb li tenamit. Ut saꞌ ajcuiꞌ li ecuu aꞌan quicam li cuixakil. Ut joꞌ cuulajak chic quinba̱nu joꞌ quixye cue li Ka̱cuaꞌ.

¹⁹ Ut eb li tenamit queꞌxpatzꞌ cue: —¿Cꞌaꞌru xya̱lal li yo̱cat chixba̱nunquil? Chꞌolob xya̱lal chiku, chanqueb.

²⁰ Ut la̱in xinye reheb: —Li Ka̱cuaꞌ quia̱tinac cuiqꞌuin ut quixye cue chi joꞌcaꞌin:

²¹ Joꞌcaꞌin naxye li Ka̱cuaꞌ li nimajcual Dios e̱re la̱ex aj Israel: La̱in li Ka̱cuaꞌ tincanab chi muxecꞌ ru lin templo li kꞌaxal nequera, li cꞌojcꞌo cuiꞌ e̱chꞌo̱l ut nacuulac che̱ru rilbal. Ut eb le̱ ralal e̱cꞌajol li toj cuanqueb Jerusalén teꞌcamsi̱k saꞌ li ple̱t, chan li Ka̱cuaꞌ e̱re.

²² Nak te̱cꞌul aꞌan, la̱ex te̱ba̱nu joꞌ xinba̱nu la̱in. Incꞌaꞌ te̱tzꞌap e̱rib joꞌ nequeꞌxba̱nu li raheb saꞌ xchꞌo̱l, chi moco te̱tzaca li tzacae̱mk li nequeꞌxtzaca li raheb saꞌ xchꞌo̱leb.

²³ Incꞌaꞌ te̱risi li tꞌicr li nequebacꞌ cuiꞌ le̱ jolom, chi moco te̱risi le̱ xa̱b, chi moco texya̱bak xban xrahil e̱chꞌo̱l. Te̱recꞌa ban xrahil li ma̱usilal li xeba̱nu ut te̱jikꞌ e̱chꞌo̱l chi ribil e̱rib.—

²⁴ Li Ka̱cuaꞌ Dios quixye: —Li cꞌaꞌru quixcꞌul laj Ezequiel, aꞌan retalil li cꞌaꞌru te̱cꞌul la̱ex. Nak acak xecꞌul li cꞌaꞌak re ru aꞌin, la̱ex te̱qꞌue retal nak la̱in li Ka̱cuaꞌ li nimajcual Dios.—

²⁵ Ut li Ka̱cuaꞌ quixye cue: —At ralal cui̱nk, la̱in tinmakꞌ chiruheb lin templo li cꞌojcꞌo̱queb cuiꞌ xchꞌo̱leb ut nacuulac chiruheb rilbal. Tinmakꞌ chiruheb li templo li nequeꞌxcacuubresi cuiꞌ xchꞌo̱leb ut nasahoꞌ cuiꞌ xchꞌo̱leb. Kꞌaxal raro xbaneb. Ut tinmakꞌ chiruheb li ralal xcꞌajoleb.

²⁶ Saꞌ li cutan nak tinba̱nu aꞌan ta̱cua̱nk junak li ta̱e̱lelik. Li jun aꞌan ta̱cuulak a̱cuiqꞌuin ut tixserakꞌi a̱cue li cꞌaꞌru quicꞌulman.

²⁷ Saꞌ li cutan aꞌan tat-oc chi a̱tinac. Moco la̱atak ta chic mem. Tat-a̱tinak riqꞌuin li cui̱nk. Chi joꞌcan la̱atak jun retalil chiruheb li tenamit. Ut teꞌxqꞌue retal nak la̱in li nimajcual Dios.—