Ezequiel 23 - Li Santil hu

Li tenamit Samaria ut Jerusalén queꞌjuntakꞌe̱ta̱c riqꞌuineb li ixk li nequeꞌxcꞌayi ribeb

¹ Li Ka̱cuaꞌ quia̱tinac cuiqꞌuin ut quixye cue:

² —At ralal cui̱nk, cuanqueb cuib li ixk ri̱tzꞌineb rib. Junaj lix naꞌeb.

³ Chalen saꞌ xcaꞌchꞌinaleb aꞌaneb xcomoneb li ixk li nequeꞌxcꞌayi ribeb. Saꞌ xsa̱jilal queꞌxqꞌue rib chi batzꞌune̱c aran Egipto ut riqꞌuin aꞌan queꞌxmux ribeb li cuib chi tukꞌ ixk.

⁴ Li asbej, aꞌan xAhola xcꞌabaꞌ, ut li i̱tzꞌinbej, aꞌan xAholiba xcꞌabaꞌ. La̱in xinsumla riqꞌuineb ut queꞌcuan cualal incꞌajol riqꞌuineb. Lix Ahola, aꞌan retalil li tenamit Samaria, ut lix Aholiba, aꞌan retalil li tenamit Jerusalén.

⁵ Nak sumsu cuiqꞌuin, lix Ahola quixmux ru xsumlajic ut quicuan riqꞌuineb li soldado aj Asiria, li cuanqueb nachꞌ riqꞌuin li tenamit.

⁶ Li rakꞌeb, aꞌan púrpura. Aꞌaneb li nequeꞌtaklan ut nequeꞌcꞌamoc be. Cꞌajoꞌ xchakꞌal ruheb. Ut chixjunileb nequeꞌxic chirix cacua̱y.

⁷ Lix Ahola quixcꞌayi rib reheb chixjunileb laj Asiria li cuanqueb xcuanquil. Ut quixmux rib nak quixlokꞌoniheb lix dioseb li cui̱nk aꞌan.

⁸ Incꞌaꞌ quixcanab xba̱nunquil li ma̱usilal li quixtiquib xba̱nunquil aran Egipto saꞌ xsa̱jilal nak quixqꞌue rib chi batzꞌune̱c xbaneb nabal chi cui̱nk.

⁹ Joꞌcan nak la̱in xinkꞌaxtesi saꞌ rukꞌeb li cui̱nk laj Asiria li cuanqueb riqꞌuin xban nak quiraj cua̱nc riqꞌuineb.

¹⁰ Eb aꞌan queꞌxmux ru lix Ahola ut queꞌxmakꞌ chiru li ralal xcꞌajol, ut lix Ahola queꞌxcamsi riqꞌuin chꞌi̱chꞌ. Ut eb li ixk yalak bar queꞌrabi resil li cꞌaꞌru quixcꞌul. Riqꞌuin aꞌan quicꞌuteꞌ xxuta̱n.

¹¹ Usta lix Aholiba li ri̱tzꞌin quiril chixjunil li quixcꞌul lix Ahola, abanan kꞌaxal cuiꞌchic yibru quixba̱nu chiru li quixba̱nu lix Ahola. Kꞌaxal cuiꞌchic numtajenak li ma̱usilal li quixba̱nu.

¹² Lix Aholiba quixcꞌayi rib reheb laj Asiria. Quixra ruheb li nequeꞌtaklan ut eb li cuanqueb xcuanquil. Aꞌaneb li soldado li sa̱jeb ut cꞌajoꞌ xchakꞌal ruheb. Cha̱bil li rakꞌeb ut cha̱bil lix chꞌi̱chꞌeb. Ut nequeꞌxic chirix cacua̱y.

¹³ La̱in quinqꞌue retal nak lix Aholiba quixmux ru li xsumlajic joꞌ quixba̱nu lix Ahola. Juntakꞌe̱t xnaꞌlebeb.

¹⁴ Abanan kꞌaxal cuiꞌchic numtajenak li ma̱usilal li quixba̱nu lix Aholiba nak quixmux rib. Quiril nak tzꞌi̱banbil chiru tzꞌac retalileb laj Babilonia. Bonbil riqꞌuin caki bon.

¹⁵ Cuanqueb xcꞌa̱mal xsaꞌeb ut lix jolomeb batbil riqꞌuin tꞌicr qꞌuila pa̱y ru xbonol. Eb aꞌan li nequeꞌtaklan. Chixjunileb chanchaneb laj Babilonia, li naꞌajej li queꞌyoꞌla cuiꞌ.

¹⁶ Nak quiril li retalileb, lix Aholiba quixra ruheb ut quixtaklaheb lix takl toj Babilonia chixbokbaleb.

¹⁷ Ut eb laj Babilonia queꞌchal riqꞌuin. Ut lix Aholiba quicuan riqꞌuineb. Nak ac xmuxeꞌ ru lix Aholiba incꞌaꞌ chic quiraj ruheb.

¹⁸ Chiruheb chixjunileb lix Aholiba quixmux rib ut quixtꞌusub rib. Joꞌcan nak la̱in quinjoskꞌoꞌ riqꞌuin joꞌ nak quinjoskꞌoꞌ riqꞌuin lix Ahola li ras ut quintzꞌekta̱na.

¹⁹ Abanan kꞌaxal cuiꞌchic yibru quixba̱nu lix Aholiba nak quinak saꞌ xchꞌo̱l nak quixcꞌayi chak rib saꞌ xsa̱jilal aran Egipto.

²⁰ Quixrahi ru cua̱nc riqꞌuineb li cui̱nk li kꞌaxal yibru xnaꞌlebeb. Chanchaneb li cacua̱y ut chanchaneb li bu̱r xban nak junes cua̱nc riqꞌuin ixk queꞌxcꞌoxla.

²¹ Ut lix Aholiba quiraj cua̱nc joꞌ nak quicuan aran Egipto saꞌ xsa̱jilal nak quixqꞌue rib chi batzꞌune̱c xbaneb li cui̱nk.

²² Joꞌcan ut at Aholiba, joꞌcaꞌin xye li nimajcual Dios a̱cue: —Usta xacanabeb li cui̱nk aꞌan, ut usta incꞌaꞌ chic nacacuaj ruheb, abanan la̱in tintaklaheb a̱cuiqꞌuin. Tateꞌxsut ut xicꞌ chic tateꞌril.

²³ Tintaklaheb laj Babilonia, eb laj Caldea, eb laj Pecod, ut eb laj Soa ut eb laj Coa. Teꞌcha̱lk ajcuiꞌ rochbeneb chixjunileb laj Asiria. Chixjunileb li teꞌcha̱lk aꞌaneb li cuanqueb xcuanquil ut eb li nequeꞌtaklan. Aꞌaneb li sa̱jeb ut naꞌno̱queb ruheb. Chixjunileb nequeꞌxic chirix cacua̱y.

²⁴ Teꞌcha̱lk chi pletic e̱riqꞌuin ut teꞌcha̱lk nabaleb li soldado rochbeneb. Cua̱nk xcarruajeb ut cua̱nkeb xcꞌanjeleba̱l re pletic. Cua̱nkeb xchꞌi̱chꞌ re xcolbal re xchꞌo̱leb ut cua̱nkeb xpunit chꞌi̱chꞌ. Teꞌxsut le̱ tenamit. Xban nak yo̱ injoskꞌil saꞌ e̱be̱n, la̱in texinkꞌaxtesi saꞌ rukꞌeb ut eb aꞌan teꞌrakok a̱tin saꞌ e̱be̱n joꞌ naxye saꞌ lix chakꞌrabeb.

²⁵ Xban nak yo̱ injoskꞌil saꞌ e̱be̱n, la̱in tincanabeb chixba̱nunquil li cꞌaꞌru teꞌraj eb aꞌan. Xban xjoskꞌileb, teꞌrisi le̱ ruꞌuj ut eb le̱ xic. Ut cuan e̱re teꞌcamsi̱k riqꞌuin chꞌi̱chꞌ. Teꞌcꞌamekꞌ chi najt eb le̱ ralal e̱cꞌajol. Ut li joꞌ qꞌuial chic teꞌcolekꞌ teꞌsachekꞌ riqꞌuin xam.

²⁶ Teꞌxmakꞌ che̱ru le̱ cha̱bil akꞌ ut teꞌxmakꞌ ajcuiꞌ che̱ru li pec li terto xtzꞌak li nequeqꞌue chok xsahob e̱ru.

²⁷ La̱in tinba̱nu̱nk re nak incꞌaꞌ chic te̱ba̱nu li ma̱usilal ut incꞌaꞌ chic te̱raj te̱cꞌayi e̱rib chi moco ta̱nak chic saꞌ e̱chꞌo̱l li cꞌaꞌru queba̱nu chak Egipto.

²⁸ Aꞌan aꞌin li naxye li Ka̱cuaꞌ li nimajcual Dios: La̱in oc cue che̱kꞌaxtesinquil saꞌ rukꞌeb li xicꞌ nequerileb. Texincanab saꞌ rukꞌeb li incꞌaꞌ chic nequerajeb.

²⁹ Xban nak xicꞌ nequex-ileꞌ xbaneb teꞌxba̱nu raylal e̱re. Teꞌxmakꞌ che̱ru chixjunil li cꞌaꞌru e̱re, usta cau xecꞌanjela rix. Ma̱cꞌaꞌ chic cua̱nk e̱re. Chanchan nak tꞌustꞌu texcana̱k. Chanchanakex chic li ixk li nequeꞌxcꞌayi ribeb xban nak xine̱tzꞌekta̱na ut xelokꞌoniheb li jalanil dios. Xuta̱nal te̱cꞌul.

³⁰ Anakcuan te̱cꞌul chi joꞌcan xban nak xejunaji e̱rib riqꞌuineb li jalan xtenamit ut xemux e̱rib nak xelokꞌoniheb lix jalanil dios.

³¹ La̱ex xeba̱nu joꞌ xeꞌxba̱nu eb laj Samaria. Joꞌcan nak la̱in texinqꞌue chixtojbal e̱ma̱c joꞌ xinba̱nu reheb aꞌan.

³² Li nimajcual Dios quixye reheb laj Judá: —La̱ex te̱cꞌul ajcuiꞌ li raylal li xinqꞌue saꞌ xbe̱neb aꞌan. Kꞌaxal nim li raylal ta̱cha̱lk saꞌ e̱be̱n. Chixjunileb li tenamit texhob ut texseꞌe xban li raylal li te̱cꞌul.

³³ Chanchan texcala̱k xban li raylal li te̱cꞌul. Cꞌajoꞌ nak ta̱rahokꞌ le̱ chꞌo̱l xban nak ma̱cꞌaꞌ chic cua̱nk saꞌ le̱ tenamit. Ta̱sachekꞌ e̱ru la̱ex ut tex-osokꞌ joꞌ nak queꞌosoꞌ eb laj Samaria.

³⁴ La̱ex te̱cꞌul chixjunil li raylal li qꞌuebil saꞌ e̱be̱n. Kꞌaxal ra te̱cꞌul. Te̱tenle re le̱ chꞌo̱l che̱rukꞌ. La̱in li nimajcual Dios xinyehoc re aꞌin.

³⁵ Joꞌcaꞌin naxye li nimajcual Dios: —Xban nak quine̱tzꞌekta̱na ut incꞌaꞌ chic niquine̱cꞌoxla, joꞌcan nak texinqꞌue chixtojbal le̱ ma̱c ut li ma̱usilal li xeba̱nu.—

³⁶ Ut li Ka̱cuaꞌ quixye cue: —At ralal cui̱nk, tatrakok a̱tin saꞌ xbe̱n lix Ahola ut lix Aholiba. Ta̱ye reheb chixjunil li ma̱usilal li queꞌxba̱nu.

³⁷ Queꞌxmux lix sumlajiqueb xban nak xineꞌxtzꞌekta̱na ut xeꞌxlokꞌoniheb li jalanil dios. Osoꞌjenakeb li rukꞌeb saꞌ quicꞌ. Queꞌxmayejaheb lix cocꞌaleb nak queꞌxcꞌateb chiruheb li yi̱banbil dios, usta aꞌaneb li cualal incꞌajol la̱in.

³⁸ Ut ma̱cuaꞌ caꞌaj cuiꞌ aꞌan queꞌxba̱nu. Queꞌxmux ru lin templo ut queꞌxmux ajcuiꞌ ru li hiloba̱l cutan.

³⁹ Saꞌ eb li cutan nak queꞌxmayejaheb lix cocꞌaleb chiruheb lix yi̱banbil dios queꞌoc saꞌ lin templo ut queꞌxmux ru.

⁴⁰ Queꞌxtakla xtakleb saꞌ najtil tenamit chixbokbaleb li cui̱nk. Ut eb li cuib chi ixk, li ri̱tzꞌineb rib, queꞌatin ut queꞌxbon li xnakꞌeb ru. Queꞌxtikib rib chi cha̱bil ut queꞌxqꞌue lix sahob ru.

⁴¹ Queꞌcꞌojla chire li me̱x saꞌ li naꞌajej li yi̱banbil chi cha̱bil. Cꞌajoꞌ li sahil echej saꞌ li me̱x. Ut aran xeꞌxqꞌue li incienso ut li aceite li xeꞌxqꞌue raj chokꞌ cue.

⁴² Qui-abi̱c xya̱beb li qꞌuila tenamit li yo̱queb chi ninkꞌei̱nc. Cuanqueb li cui̱nk li queꞌcꞌameꞌ saꞌ li chaki chꞌochꞌ, li ma̱cꞌaꞌeb xcuanquil. Queꞌxqꞌue lix sahob ru lix teleb li ixk ut queꞌxqꞌue li corona saꞌ xjolomeb.

⁴³ Ut la̱in quinye nak eb li ixk aꞌin li tacuajenakeb chi cua̱nc riqꞌuineb cui̱nk tebincanab saꞌ rukꞌeb li cui̱nk xban nak eb aꞌan xcomoneb li ixk li nequeꞌxcꞌayi rib.

⁴⁴ Eb li cui̱nk aꞌin queꞌchal riqꞌuineb lix Ahola ut lix Aholiba. Joꞌ nak nequeꞌxic riqꞌuineb li ixk li nequeꞌxcꞌayi ribeb, joꞌcan queꞌxba̱nu riqꞌuineb li cuib chi ixk aꞌin li incꞌaꞌ useb xnaꞌleb.

⁴⁵ Abanan, eb li cui̱nk li ti̱queb xchꞌo̱l teꞌrakok a̱tin saꞌ xbe̱neb joꞌ nequeꞌxba̱nu riqꞌuineb li ixk li nequeꞌxmux ru xsumlajic ut eb li nequeꞌcamsin. Teꞌxba̱nu chi joꞌcan xban nak lix Ahola ut lix Aholiba queꞌxmux ru xsumlajiqueb ut queꞌcamsin.

⁴⁶ Aꞌan aꞌin li naxye li nimajcual Dios: —La̱in tinchꞌutubeb li tenamit ut tintaklaheb chixqꞌuebal xxiuheb ut chirelkꞌanquil li cꞌaꞌru cuan reheb.

⁴⁷ Teꞌcuti̱k chi pec xbaneb li tenamit ut teꞌnumsi̱k chi chꞌi̱chꞌ saꞌ xsaꞌeb. Teꞌcamsi̱k li ralal xcꞌajoleb ut teꞌcꞌatekꞌ li rochocheb.

⁴⁸ La̱in tinba̱nu̱nk re nak incꞌaꞌ chic ta̱uxma̱nk li ma̱usilal aꞌin. Ut eb li ixk incꞌaꞌ teꞌxtzol ribeb riqꞌuineb lix Ahola ut lix Aholiba xban nak teꞌxqꞌue retal cꞌaꞌru xeꞌxcꞌul.

⁴⁹ Eb li cuib chi ixk aꞌan teꞌxcꞌul chi joꞌcan xban li ma̱usilal xeꞌxba̱nu. Teꞌxtoj rix li ma̱c xeꞌxba̱nu nak xeꞌxlokꞌoniheb li jalanil dios. Ut riqꞌuin aꞌin che̱junilex te̱qꞌue retal nak la̱in li nimajcual Dios.—