Ezequiel 20 - Li Santil huLi Dios ti̱c xchꞌo̱l abanan eb laj Israel aj kꞌetoleb a̱tin 1 Cuanqueb li nequeꞌcꞌamoc be saꞌ xya̱nkeb laj Israel queꞌcuulac cuiqꞌuin nak yo̱ li laje̱b xbe li roꞌ po re li xcuuk li chihab kacꞌambal Babilonia. Queꞌcuulac chixpatzꞌbal cꞌaꞌru naraj li Dios nak teꞌxba̱nu ut queꞌcꞌojla chicuu. 2 Ut li Ka̱cuaꞌ quia̱tinac cuiqꞌuin ut quixye cue: 3 —At ralal cui̱nk, tat-a̱tinak riqꞌuineb li cui̱nk aꞌin li nequeꞌcꞌamoc be saꞌ xya̱nkeb laj Israel ut ta̱ye reheb: Aꞌan aꞌin li naxye li nimajcual Dios. ¿Ma xexchal chixpatzꞌbal e̱naꞌleb cuiqꞌuin? La̱in li yoꞌyo̱quil Dios ninye e̱re nak la̱in incꞌaꞌ tinsume li cꞌaꞌru xexchal chixpatzꞌbal cue. 4 At ralal cui̱nk, ¿ma tatrakok a̱tin saꞌ xbe̱neb? Cui tatrakok a̱tin saꞌ xbe̱neb ta̱ye reheb li ma̱usilal li queꞌxba̱nu lix xeꞌto̱nil yucuaꞌeb. 5 Ta̱ye reheb nak la̱in li Ka̱cuaꞌ quintaksi li cuukꞌ ut quinba̱nu li juramento saꞌ li cutan nak quinsicꞌ ruheb chokꞌ intenamit laj Israel li ralal xcꞌajol laj Jacob. Ut quincꞌutbesi cuib chiruheb nak cuanqueb Egipto. Quintaksi li cuukꞌ ut quinye reheb: La̱inak li Ka̱cuaꞌ le̱ Dios. 6 Saꞌ li cutan aꞌan la̱in quinye reheb riqꞌuin juramento nak la̱in teꞌcuisi saꞌ li naꞌajej Egipto ut tincꞌameb saꞌ jun cha̱bil naꞌajej li quinsicꞌ ru chokꞌ reheb li na-el cuiꞌ chi us li sahil echej. Aꞌan li kꞌaxal chꞌinaꞌus chiru chixjunil li naꞌajej. 7 La̱in li Ka̱cuaꞌ quinye reheb: —Che̱ju̱nkalex te̱sach ruheb li yi̱banbil dios li nequelokꞌoni. Kꞌaxal yibeb ru. Me̱mux e̱rib riqꞌuineb lix jalanil dioseb laj Egipto. La̱in li Ka̱cuaꞌ le̱ Dios, chanquin reheb. 8 Abanan queꞌxkꞌetkꞌeti ribeb ut incꞌaꞌ queꞌabin chicuu. Incꞌaꞌ queꞌrisi saꞌ xya̱nkeb li jalanil dios li queꞌcuulac chiruheb xlokꞌoninquil, chi moco queꞌxtzꞌekta̱na lix jalanil dioseb laj Egipto. Joꞌcan nak quinye nak tinqꞌueheb chixtojbal lix ma̱queb aran Egipto toj retal nak tincuisi lin joskꞌil saꞌ xbe̱neb. 9 Abanan incꞌaꞌ quinba̱nu xban nak chiruheb laj Egipto la̱in quinye reheb laj Israel nak tincuisiheb Egipto. Incꞌaꞌ quicuaj nak ta̱isi̱k lin lokꞌal. 10 Joꞌcan nak la̱in quincuisiheb chak Egipto ut quincꞌameb saꞌ li chaki chꞌochꞌ. 11 La̱in quinqꞌue lin chakꞌrab reheb ut quincꞌut chiruheb chanru teꞌxba̱nu xban nak li ani naxba̱nu li cꞌaꞌru ninye, cua̱nk xyuꞌam. 12 La̱in quinye reheb nak teꞌx-oxlokꞌi li hiloba̱l cutan chokꞌ retalil li contrato li xkaba̱nu chi kibil kib nak la̱in li Ka̱cuaꞌ ninsantobresin reheb. 13 Abanan eb laj Israel queꞌxkꞌetkꞌeti ribeb chicuu saꞌ li chaki chꞌochꞌ. Incꞌaꞌ queꞌxba̱nu li cꞌaꞌru quinye reheb. Queꞌxtzꞌekta̱na lin chakꞌrab usta queꞌxnau nak riqꞌuin xba̱nunquil li cꞌaꞌru ninye cua̱nk xyuꞌameb. Ut queꞌxmux ru li hiloba̱l cutan. Joꞌcan nak la̱in quinye nak tincuisi lin joskꞌil saꞌ xbe̱neb ut tinsach ruheb saꞌ li chaki chꞌochꞌ. 14 Abanan incꞌaꞌ quinsach ruheb xban nak incꞌaꞌ quicuaj nak ta̱isi̱k lin lokꞌal xbaneb li xni̱nkal ru tenamit li queꞌiloc re nak quicuisiheb laj Israel aran Egipto. 15 Joꞌcan nak la̱in quinba̱nu li juramento saꞌ li chaki chꞌochꞌ ut quinye nak incꞌaꞌ tebincanab chi oc saꞌ li naꞌajej li quinyechiꞌi reheb, li naꞌajej li kꞌaxal cha̱bil li na-el cuiꞌ chi us li sahil echej. Aꞌan li kꞌaxal chꞌinaꞌus chiru chixjunil li naꞌajej. 16 Quinba̱nu li juramento aꞌan xban nak queꞌxtzꞌekta̱na lin chakꞌrab. Incꞌaꞌ queꞌxba̱nu li cꞌaꞌru quinye. Queꞌxmux ban ru li hiloba̱l cutan. Ut queꞌxqꞌue xchꞌo̱leb chixlokꞌoninquil li jalanil dios. 17 Usta ac xeꞌxba̱nu chixjunil aꞌan, abanan la̱in quincuyeb xma̱c. Quicuil xtokꞌoba̱l ruheb ut incꞌaꞌ quinsach ruheb saꞌ li chaki chꞌochꞌ. 18 Nak cuanqueb saꞌ li chaki chꞌochꞌ la̱in quinye reheb li ralal xcꞌajoleb: —Me̱ba̱nu li cꞌaꞌru nequeꞌxye le̱ naꞌ e̱yucuaꞌ. Me̱ba̱nu joꞌ nequextakla cuiꞌ. Ut me̱mux e̱rib riqꞌuin xlokꞌoninquileb lix jalanil dios. 19 La̱in li Ka̱cuaꞌ le̱ Dios. Cheqꞌuehak saꞌ e̱chꞌo̱l li naxye saꞌ lin chakꞌrab. Cheba̱nuhak chi tzꞌakal li cꞌaꞌru ninye e̱re. 20 Cheqꞌuehak xlokꞌal lin hiloba̱l cutan li quinsantobresi chokꞌ retalil chokꞌ cue ut chokꞌ e̱re ajcuiꞌ la̱ex nak la̱in le̱ Dios. 21 Abanan eb li ralal xcꞌajoleb queꞌxkꞌetkꞌeti ajcuiꞌ ribeb chicuu. Queꞌxkꞌet lin chakꞌrab ut incꞌaꞌ queꞌxba̱nu li cꞌaꞌru quinye, usta cua̱nk xyuꞌam li ani naxba̱nu lin chakꞌrab. Queꞌxmux ru li hiloba̱l cutan. Joꞌcan nak la̱in quinye nak tincuisi lin joskꞌil saꞌ xbe̱neb nak cuanqueb saꞌ li chaki chꞌochꞌ. 22 Abanan incꞌaꞌ quinsach ruheb nak incꞌaꞌ quicuaj nak ta̱isi̱k xlokꞌal lin cꞌabaꞌ chiruheb li xni̱nkal ru tenamit li queꞌiloc re nak quicuisiheb chak laj Israel Egipto. 23 Joꞌcan nak la̱in quinba̱nu li juramento nak cuanqueb saꞌ li chaki chꞌochꞌ ut quinye nak tinjeqꞌuiheb yalak bar saꞌ eb li xni̱nkal ru tenamit. 24 Quinye chi joꞌcan xban nak incꞌaꞌ queꞌxba̱nu li cꞌaꞌru quinye reheb. Queꞌxkꞌet lin chakꞌrab ut queꞌxmux ru li hiloba̱l cutan. Ut queꞌxlokꞌoniheb li jalanil dios li queꞌxlokꞌoni lix yucuaꞌeb. 25 Joꞌcan nak la̱in quincanabeb chixba̱nunquil li chakꞌrab li moco us ta, li incꞌaꞌ naqꞌuehoc yuꞌam. 26 Quincanabeb chixmuxbal ribeb riqꞌuin li mayej queꞌxqꞌue reheb li jalanil dios. Queꞌxqꞌue li xbe̱n ralaleb chokꞌ xcꞌatbil mayej. Quincanabeb chixba̱nunquil chi joꞌcan re nak teꞌxucuak ut teꞌxqꞌue retal nak la̱in li Ka̱cuaꞌ. 27 At ralal cui̱nk, ta̱ye reheb laj Israel nak la̱in li Ka̱cuaꞌ Dios ninye chi joꞌcaꞌin: Joꞌcan ajcuiꞌ le̱ xeꞌto̱nil yucuaꞌ quineꞌxtzꞌekta̱na nak queꞌxkꞌetkꞌeti ribeb chicuu. 28 La̱in quincꞌameb saꞌ li cha̱bil naꞌajej li quinyechiꞌi reheb. Nak queꞌril li tzu̱l li najt xteram ut eb li cheꞌ li ni̱nk xmu, queꞌxqꞌue xmayejeb aran. Queꞌxchikꞌ injoskꞌil nak queꞌxqꞌue lix cꞌatbil mayej ut queꞌxqꞌue li vino chokꞌ xmayej ut queꞌxqꞌue ajcuiꞌ li sununquil pom. 29 Ut la̱in quinye reheb: —¿Cꞌaꞌ na-oc cuiꞌ li naꞌajej li najt xteram li nequexxic cuiꞌ?— Ut chalen anakcuan Bama nequeꞌxye re li naꞌajej aꞌan. 30 Joꞌcan nak ta̱ye reheb laj Israel nak la̱in li Ka̱cuaꞌ Dios ninye: ¿Ma toj te̱mux e̱rib joꞌ queꞌxba̱nu le̱ naꞌ e̱yucuaꞌ? ¿Ma te̱lokꞌoniheb li jalanil dios joꞌ queꞌxba̱nu eb aꞌan? 31 Chalen anakcuan nequemux e̱rib riqꞌuin xlokꞌoninquileb li jalanil dios ut nequeqꞌue le̱ cocꞌal chokꞌ cꞌatbil mayej. Ut chirix aꞌan nequexchal chixsicꞌbal e̱naꞌleb cuiqꞌuin. La̱in li yoꞌyo̱quil Dios ninye e̱re nak la̱in incꞌaꞌ tinsume li cꞌaꞌru nequepatzꞌ. 32 La̱ex nequeye nak te̱raj cua̱nc joꞌ eb li xni̱nkal ru tenamit li nequeꞌxlokꞌoni li cheꞌ ut li pec. Abanan incꞌaꞌ ta̱cꞌulma̱nk joꞌ nequecꞌoxla la̱ex. 33 La̱in li yoꞌyo̱quil Dios ninye e̱re nak relic chi ya̱l la̱in tintakla̱nk chi cau saꞌ e̱be̱n la̱ex ut saꞌ joskꞌil. 34 Riqꞌuin xnimal incuanquil ut riqꞌuin lin joskꞌil la̱in texcuisi saꞌ eb li tenamit li quexinjeqꞌui cuiꞌ ut tinchꞌutub cuiꞌchic e̱ru. 35 La̱in texincꞌam saꞌ li chaki chꞌochꞌ li cuan nachꞌ riqꞌuineb li jalan tenamit. Ut aran tinrakok a̱tin saꞌ e̱be̱n. 36 La̱in tinrakok a̱tin saꞌ e̱be̱n joꞌ nak quinrakoc a̱tin saꞌ xbe̱neb le̱ xeꞌto̱nil yucuaꞌ saꞌ li chaki chꞌochꞌ li cuan saꞌ xcue̱nt Egipto. La̱in li nimajcual Dios ninyehoc re aꞌin. 37 La̱in texinqꞌue chi cua̱nc rubel incuanquil ut texinpuersi chixba̱nunquil li cꞌaꞌru xkaye nak xkaba̱nu li contrato. 38 La̱in tincuisiheb saꞌ e̱ya̱nk li incꞌaꞌ nequeꞌraj abi̱nc chicuu, li nequeꞌxkꞌetkꞌeti ribeb ut nequeꞌxba̱nu li ma̱usilal. Tincuisiheb saꞌ eb li naꞌajej li cuanqueb cuiꞌ anakcuan. Abanan incꞌaꞌ tincanabeb chi oc saꞌ le̱ naꞌaj la̱ex aj Israel. Riqꞌuin aꞌan te̱qꞌue retal nak la̱in li Ka̱cuaꞌ. 39 Li Ka̱cuaꞌ li nimajcual Dios naxye chi joꞌcaꞌin e̱re la̱ex aj Israel: Ayukex che̱junilex ut cꞌanjelankex chiruheb le̱ jalanil dios. Abanan ta̱cuulak xkꞌehil nak la̱ex te̱ba̱nu li cꞌaꞌru tinye e̱re ut incꞌaꞌ chic te̱mux ru lin santil cꞌabaꞌ riqꞌuin le̱ mayej li nequeqꞌue chiruheb li jalanil dios. 40 Abanan mokon che̱junilex la̱ex aj Israel tine̱lokꞌoni saꞌ lin santil naꞌajej saꞌ li tzu̱l Sión li cuan aran Israel. Ta̱sahokꞌ inchꞌo̱l e̱riqꞌuin xban nak che̱junilex texcꞌanjelak chicuu. La̱in tinye e̱re nak te̱cꞌam le̱ mayej chicuu ut la̱in tincꞌul. Te̱cꞌam chak cue li xbe̱n ru le̱ racui̱mk ut li cꞌaꞌru lokꞌ che̱ru. 41 Texincꞌul joꞌ li sununquil ban nak texcuisi saꞌ eb li jalan tenamit li quexinjeqꞌui cuiꞌ. Ut la̱in tincꞌutbesi lin santilal saꞌ e̱ya̱nk chiruheb li xni̱nkal ru tenamit. 42 La̱ex te̱qꞌue retal nak la̱in li Ka̱cuaꞌ nak texincꞌam saꞌ le̱ naꞌaj la̱ex aj Israel. Aꞌan li naꞌajej li quinyechiꞌi reheb le̱ xeꞌto̱nil yucuaꞌ nak quintaksi li cuukꞌ ut quinba̱nu li juramento. 43 Ut ta̱nak saꞌ e̱chꞌo̱l li ma̱usilal li quilaje̱ba̱nu nak quemux e̱rib. La̱ex ajcuiꞌ xicꞌ te̱ril e̱rib riqꞌuin li ma̱usilal li nequeba̱nu. 44 La̱ex aj Israel te̱qꞌue retal nak la̱in li Ka̱cuaꞌ ninba̱nu usilal e̱re. Ma̱cuaꞌ xban nak cha̱bilex nak ninba̱nu usilal e̱re. Xeba̱nu ban li ma̱usilal. Ninba̱nu usilal e̱re re nak ta̱qꞌuehekꞌ xlokꞌal lin cꞌabaꞌ, chan li nimajcual Dios. 45 Li Ka̱cuaꞌ quia̱tinac cuiqꞌuin ut quixye cue: 46 —At ralal cui̱nk, ilon saꞌ li sur. Ut saꞌ incꞌabaꞌ la̱in ta̱ye resil li raylal li ta̱cha̱lk saꞌ xbe̱neb li qꞌuicheꞌ li cuan aran. 47 Ta̱ye chi joꞌcaꞌin re li qꞌuicheꞌ li cuan saꞌ li sur: Abihomak li ra̱tin li Dios. Li nimajcual Dios xye: La̱in oc cue chixlochbal li xam li ta̱cꞌatok re chixjunileb li cheꞌ, li rax rax ru joꞌ ajcuiꞌ li chaki. Incꞌaꞌ ta̱ru̱k xchupbal li xam. Ta̱ticla̱k saꞌ li sur ut ta̱cuulak toj saꞌ li norte. Ut chixjunileb teꞌrecꞌa lix tikcual. 48 Ut chixjunileb li cristian teꞌxqꞌue retal nak la̱in li Ka̱cuaꞌ quinlochoc re ut ma̱ ani ta̱ru̱k ta̱chupuk re, chan. 49 Ut la̱in ra quicuecꞌa ut quinye re: —At nimajcual Dios, chixjunileb nequeꞌxye nak li cꞌaꞌru ninye, aꞌan jaljo̱quil ru a̱tin ut incꞌaꞌ nequeꞌxtau ru, chanquin. |
© 2019, Wycliffe Bible Translators. All rights reserved.
Wycliffe Bible Translators, Inc.