Ezequiel 16 - Li Santil hu

Li Dios quixjuntakꞌe̱taheb laj Jerusalén riqꞌuin jun li ixk quixmux ru xsumlajic

¹ Li Ka̱cuaꞌ quia̱tinac cuiꞌchic cuiqꞌuin ut quixye cue:

² —At ralal cui̱nk, ta̱ye reheb li cuanqueb Jerusalén nak kꞌaxal yibru li nequeꞌxba̱nu.

³ Ta̱ye reheb nak li nimajcual Dios naxye chi joꞌcaꞌin chirixeb laj Jerusalén. La̱at catyoꞌla aran Canaán. La̱ yucuaꞌ, aꞌan aj amorreo ut la̱ naꞌ, aꞌan aj hetea.

⁴ Saꞌ li cutan nak catyoꞌla, incꞌaꞌ queꞌxset la̱ chꞌup, chi moco cateꞌratesi, chi moco cateꞌxchꞌaj riqꞌuin atzꞌam, chi moco cateꞌxlan saꞌ tꞌicr.

⁵ Ma̱ ani qui-iloc xtokꞌoba̱l a̱cuu. Ma̱ jun quiba̱nun usilal a̱cue. Ma̱ ani quitenkꞌan a̱cue. Cateꞌxtzꞌek ban saꞌ li cꞌaleba̱l xban nak chalen nak catyoꞌla, xicꞌ cat-ileꞌ.

⁶ La̱in quinnumeꞌ aran ut quicuil nak yo̱cat chi ecꞌa̱nc saꞌ la̱ quiqꞌuel. Ut la̱in quinye nak incꞌaꞌ tatca̱mk.

⁷ La̱in catinqꞌue chi qꞌui̱c joꞌ nak naqꞌui li acui̱mk. Catqꞌui toj retal cat-ixkiloꞌ. Ut cꞌajoꞌ xchakꞌal a̱cuu. Queꞌni̱nkan la̱ tuꞌ ut quichamoꞌ la̱ cuismal. Abanan tꞌustꞌu̱cat.

⁸ Mokon chic la̱in quinnumeꞌ cuancat cuiꞌ ut quinqꞌue retal nak xat-ixkiloꞌ ut ac xcuulac xkꞌehil nak ta̱cua̱nk a̱be̱lom. Joꞌcan nak catintzꞌap riqꞌuin lin tꞌicr xban nak tꞌustꞌu̱cat. Quinba̱nu li contrato nak quinsumla a̱cuiqꞌuin ut la̱at chic cue.

⁹ La̱in quinchꞌaj la̱ quiqꞌuel ut quinyul li aceite cha̱cuix.

¹⁰ La̱in quinqꞌue la̱ cuakꞌ li qꞌuebil xsahob ru ut quinqꞌue la̱ xa̱b cha̱bil. Ut quinqꞌue jun xcꞌa̱mal a̱saꞌ yi̱banbil riqꞌuin li tꞌicr lino. Catintikib riqꞌuin li cha̱bil akꞌej terto xtzꞌak.

¹¹ Quinqꞌue chokꞌ xsahob a̱cuu li cha̱bil pec terto xtzꞌak. Quinqꞌue li matkꞌab saꞌ xcux la̱ cuukꞌ ut quinqꞌue li cha̱bil kꞌol saꞌ la̱ cux.

¹² Ut quinqꞌue li cha̱bil matkꞌab saꞌ la̱ cuuꞌuj ut quinqꞌue ajcuiꞌ la̱ caꞌxic. Cꞌajoꞌ xchꞌinaꞌusal li corona li quinqꞌue saꞌ a̱jolom.

¹³ Joꞌcaꞌin nak quinqꞌue xsahob a̱cuu riqꞌuin oro ut plata. Ut la̱ cuakꞌ yi̱banbil riqꞌuin li cha̱bil tꞌicr lino xcomon li tꞌicr terto xtzꞌak li cuan xsahob ru. Catzaca li caxlan cua yi̱banbil riqꞌuin cha̱bil cꞌaj, li xyaꞌal cab ut li aceite olivo. Cꞌajoꞌ xchakꞌal a̱cuu. Quiniman a̱cuanquil toj retal cat-oc chokꞌ reina.

¹⁴ Naꞌno a̱cuu xbaneb li xni̱nkal ru tenamit xban la̱ chꞌinaꞌusal. Xban nak la̱in quinqꞌuehoc la̱ chꞌinaꞌusal, tzꞌakal a̱cue a̱cuu, chan li Ka̱cuaꞌ li nimajcual Dios.

¹⁵ Abanan cacꞌojob a̱chꞌo̱l saꞌ xbe̱n la̱ chꞌinaꞌusal ut catsukꞌi joꞌ jun ixk naxcꞌayi rib xban nak naꞌno a̱cuu. Cakꞌaxtesi a̱cuib reheb li joꞌ qꞌuial queꞌnumeꞌ cuancat cuiꞌ.

¹⁶ Caqꞌue la̱ cha̱bil akꞌ saꞌ li naꞌajej li najt xteram ut aran camux ru la̱ sumlajic. Ma̱ jun sut qui-uxman li cꞌaꞌru caba̱nu chi moco ta̱uxma̱nk mokon.

¹⁷ Cachap ajcuiꞌ li cha̱bil oro ut plata li quinqꞌue chokꞌ xsahob a̱cuu. Ut cayi̱beb la̱ dios cui̱nk ut calokꞌoniheb. Riqꞌuineb aꞌan camux ru la̱ sumlajic.

¹⁸ Ut riqꞌuin la̱ cha̱bil akꞌ li quinqꞌue a̱cue catikibeb la̱ yi̱banbil dios. Ut camayeja ajcuiꞌ lin aceite ut lin incienso chiruheb.

¹⁹ Ut li cha̱bil tzacae̱mk li quinqꞌue a̱cue joꞌ li cha̱bil cꞌaj, li aceite olivo ut li xyaꞌal cab camayeja chiruheb joꞌ jun sununquil ban. Chixjunil li ma̱usilal aꞌin caba̱nu, chan li Ka̱cuaꞌ.

²⁰ Ut camayejaheb chiruheb li yi̱banbil dios la̱ cualal a̱cꞌajol li quinqꞌue a̱cue. ¿Ma caꞌchꞌin ta biꞌ li ma̱usilal li caba̱nu nak quina̱tzꞌekta̱na?

²¹ ¿Ma incꞌaꞌ ta biꞌ cacamsiheb li cualal incꞌajol nak caqꞌueheb chokꞌ a̱cꞌatbil mayej chiruheb li yi̱banbil dios?

²² Nak yo̱cat chixlokꞌoninquil li yi̱banbil dios ut chixba̱nunquil li ma̱usilal, incꞌaꞌ quinak saꞌ a̱chꞌo̱l chanru nak catcuan chak saꞌ a̱caꞌchꞌinal. Incꞌaꞌ quinak saꞌ a̱chꞌo̱l nak tꞌustꞌu̱cat ut yo̱cat chi ecꞌa̱nc saꞌ la̱ quiqꞌuel.

²³ Li nimajcual Dios quixye: —Nabal li raylal ta̱cha̱lk saꞌ a̱be̱n xban nak xaba̱nu chixjunil li ma̱usilal aꞌin.

²⁴ Yalak bar saꞌ chixjunil li tenamit cayi̱beb li naꞌajej li najt xteram re lokꞌoni̱nc ut cayi̱beb la̱ artal.

²⁵ Cayi̱beb li naꞌajej li najt xteram saꞌ eb li xa̱la be. Xban xba̱nunquil li kꞌaxal yibru la̱at catzꞌek la̱ chꞌinaꞌusal. Cayechiꞌi a̱cuib reheb li joꞌ qꞌuial li queꞌnumeꞌ cuancat cuiꞌ.

²⁶ Caba̱nu li ma̱usilal riqꞌuineb laj Egipto li junes cua̱nc riqꞌuin ixk nequeꞌxcꞌoxla. Kꞌaxal xnumta li ma̱usilal li xaba̱nu riqꞌuineb ut riqꞌuin aꞌan cachikꞌ injoskꞌil.

²⁷ Anakcuan xintaksi li cuukꞌ re nak tatinqꞌue chixtojbal la̱ ma̱c. Xcuisi cha̱cuu li cꞌaꞌru a̱cue. Xatinkꞌaxtesi saꞌ rukꞌeb laj filisteo li xicꞌ nequeꞌiloc a̱cue. Eb aꞌan nequeꞌsach xchꞌo̱leb xban li ma̱usilal li yo̱cat chixba̱nunquil.

²⁸ Incꞌaꞌ quicꞌojla a̱chꞌo̱l riqꞌuin li ma̱usilal li ac xaba̱nu toj retal co̱at Asiria chixmuxbal la̱ sumlajic riqꞌuineb. Chi moco riqꞌuin aꞌan quicꞌojla a̱chꞌo̱l.

²⁹ Kꞌaxal cuiꞌchic xnumta li ma̱usilal xaba̱nu Canaán ut riqꞌuineb laj Babilonia. Abanan incꞌaꞌ ajcuiꞌ quicꞌojla a̱chꞌo̱l.

³⁰ La̱in li nimajcual Dios ninye: —La̱at moco tuktu ta a̱chꞌo̱l. Xaba̱nu chixjunil li ma̱usilal aꞌin joꞌ jun li ixk naxcꞌayi rib, ut incꞌaꞌ nacanau xuta̱nac.

³¹ Saꞌ chixjunileb li be cayi̱b li naꞌajej li najt xteram re ta̱lokꞌoni cuiꞌ li jalanil dios. Cayi̱beb li artal saꞌ eb li naꞌajej li cuanqueb cuiꞌ nabal li cristian re ta̱ba̱nu li ma̱usilal. Abanan incꞌaꞌ cacꞌul la̱ tojbal joꞌ nequeꞌxba̱nu li ixk li nequeꞌxcꞌayi ribeb.

³² La̱at jun ixk incꞌaꞌ nacara la̱ be̱lom. Nacamux ban ru la̱ sumlajic riqꞌuin jalan cui̱nk.

³³ Junak li ixk li naxcꞌayi rib naxcꞌul xtojbal. Abanan la̱at incꞌaꞌ caba̱nu chi joꞌcan. La̱at ban chic nacatqꞌuehoc xma̱taneb li cui̱nk li nequeꞌchal yalak bar chi ma̱cobc a̱cuiqꞌuin.

³⁴ Lix jalanil li nacaba̱nu la̱at, aꞌan nak ma̱cuaꞌeb li cui̱nk nequeꞌsicꞌoc a̱cue. La̱at ban nacatsicꞌoc reheb ut nacatojeb. Ut la̱at ma̱cꞌaꞌ nacacꞌul.

³⁵ Joꞌcan ut la̱at ixakilbej li nacamux ru la̱ sumlajic, chacuabi li cꞌaꞌru naxye a̱cue li Ka̱cuaꞌ.

³⁶ Aꞌan aꞌin li naxye li Ka̱cuaꞌ: —Kꞌaxal yibru la̱ naꞌleb. Catꞌusub a̱cuib chiruheb li cui̱nk li queꞌcuan a̱cuiqꞌuin. Ut calokꞌoniheb li jalanil dios ut cacamsiheb la̱ cocꞌal ut camayejaheb chiruheb li jalanil dios.

³⁷ Joꞌcan nak la̱in tinchꞌutubeb chixjunileb li cui̱nk li queꞌcuan a̱cuiqꞌuin, li nacacꞌojob cuiꞌ a̱chꞌo̱l, joꞌ eb ajcuiꞌ li xicꞌ nacacuileb. Tinchꞌutubeb cha̱jun sutam ut chiruheb aꞌan tincuisi la̱ cuakꞌ re nak tꞌustꞌu tatcana̱k chiruheb.

³⁸ Tatinqꞌue chixtojbal a̱ma̱c joꞌ nequeꞌxcꞌul li nequeꞌxmux ru lix sumlajiqueb ut joꞌ li nequeꞌcamsin. Ut xban nak xicꞌ nacuil li cꞌaꞌru caba̱nu yo̱ injoskꞌil saꞌ a̱be̱n. Tatincanab chi camsi̱c re xtojbal rix la̱ ma̱c.

³⁹ Tatincanab saꞌ rukꞌeb li cui̱nk li queꞌcuan a̱cuiqꞌuin ut eb aꞌan teꞌxjuqꞌuiheb li naꞌajej li najt xteram li nacalokꞌoni cuiꞌ li jalanil dios. Ut teꞌxjuqꞌuiheb ajcuiꞌ li artal. Eb aꞌan teꞌxmakꞌ cha̱cuu la̱ cha̱bil akꞌ ut eb li pec li terto xtzꞌak. Ut la̱at tatcana̱k chi tꞌustꞌu chi ma̱cꞌaꞌ chic cuan a̱cue.

⁴⁰ Eb aꞌan teꞌxcꞌameb chak nabal li tenamit ut tateꞌxcuti chi pec ut tateꞌxcuj chi chꞌi̱chꞌ.

⁴¹ Teꞌxcꞌateb la̱ cuochoch ut nabaleb li ixk yo̱keb chi iloc a̱cue nak ta̱cꞌul xtojbal a̱ma̱c. Riqꞌuin aꞌin ta̱canab ma̱cobc riqꞌuineb li cui̱nk ut incꞌaꞌ chic ta̱qꞌue xma̱taneb.

⁴² Ut chirix aꞌan ma̱cꞌaꞌak chic injoskꞌil saꞌ a̱be̱n. Ut moco xicꞌ ta chic tatcuil.

⁴³ La̱at xsach saꞌ a̱chꞌo̱l cꞌaꞌru quinba̱nu a̱cue saꞌ a̱caꞌchꞌinal. Ut cachikꞌ injoskꞌil riqꞌuin chixjunil li caba̱nu. Xban aꞌan nak tatinqꞌue chixtojbal rix la̱ ma̱usilal. Ut incꞌaꞌ xcꞌojla a̱chꞌo̱l riqꞌuin li caba̱nu toj retal camux ru la̱ sumlajic ut caba̱nu li moco uxc ta naraj.

⁴⁴ Cuan jun li a̱tin li nequeꞌxye li tenamit ut aꞌan li teꞌxye cha̱cuix la̱at. Aꞌan aꞌin: chanru xnaꞌleb li naꞌbej, joꞌcan ajcuiꞌ xnaꞌleb li coꞌbej.

⁴⁵ La̱at juntakꞌe̱t la̱ naꞌleb riqꞌuin la̱ naꞌ. La̱ naꞌ quixtzꞌekta̱na lix be̱lom ut quixtzꞌekta̱naheb ajcuiꞌ lix cocꞌal. Ut juntakꞌe̱t ajcuiꞌ la̱ naꞌleb riqꞌuin xnaꞌlebeb la̱ cuas. Eb aꞌan queꞌxtzꞌekta̱na lix be̱lomeb ut queꞌxtzꞌekta̱na ajcuiꞌ li ralal xcꞌajoleb. La̱ naꞌ, aꞌan aj hetea ut la̱ yucuaꞌ, aꞌan aj amorreo.

⁴⁶ La̱ cuas ut eb lix coꞌ, aꞌaneb li tenamit Samaria li cuan saꞌ li norte. Ut la̱ cui̱tzꞌin ut eb lix coꞌ, aꞌaneb li tenamit Sodoma li cuan sa li sur.

⁴⁷ La̱at catzol a̱cuib riqꞌuineb ut caba̱nu li incꞌaꞌ us li queꞌxba̱nu eb aꞌan. Abanan la̱ ma̱usilal la̱at quinumta chiru li ma̱usilal li queꞌxba̱nu eb aꞌan.

⁴⁸ La̱in li yoꞌyo̱quil Dios ninye a̱cue nak relic chi ya̱l la̱ ma̱usilal la̱at ut eb la̱ coꞌ kꞌaxal cuiꞌchic numtajenak chiru lix ma̱usilaleb laj Sodoma rochbeneb lix coꞌ.

⁴⁹ Aꞌan aꞌin lix ma̱queb laj Sodoma ut eb lix coꞌ. Kꞌetkꞌeteb ut cuan nabal cꞌaꞌruheb re ut incꞌaꞌ nequeꞌraj cꞌanjelac. Ut incꞌaꞌ nequeꞌraj xtenkꞌanquileb li nebaꞌ ut eb li rahobtesinbileb.

⁵⁰ Nequeꞌxnimobresi ribeb ut la̱in xinqꞌue retal li ma̱usilal li nequeꞌxba̱nu chicuu. Joꞌcan nak quebinsach ruheb.

⁵¹ Moco qꞌui ta li ma̱c queꞌxba̱nu eb laj Samaria chiru li ma̱c li caba̱nu la̱at. Kꞌaxal nabal la̱ ma̱usilal chiru lix ma̱usilaleb aꞌan. Riqꞌuin aꞌan chanchan nak ti̱queb xchꞌo̱leb cha̱cuu la̱at xban nak kꞌaxal yibru li caba̱nu la̱at.

⁵² Anakcuan tento nak xuta̱nal ta̱cꞌul. Kꞌaxal yibru li ma̱usilal xaba̱nu la̱at chiru li ma̱usilal li queꞌxba̱nu eb aꞌan. Eb aꞌan chanchan ma̱cꞌaꞌ xma̱queb cha̱cuu la̱at xban nak numtajenak la̱ ma̱usilal. Joꞌcan nak xuta̱nal tat-e̱lk.

⁵³ Li Ka̱cuaꞌ quixye ajcuiꞌ reheb laj Jerusalén: La̱in tinqꞌue cuiꞌchic lix biomaleb laj Sodoma ut eb laj Samaria joꞌ eb ajcuiꞌ lix coꞌ. Ut chirix aꞌan tinqꞌue cuiꞌchic la̱ biomal la̱at.

⁵⁴ Tento nak xuta̱nal ta̱cꞌul. Ut eb aꞌan teꞌcꞌojla̱k xchꞌo̱leb nak teꞌxqꞌue retal nak la̱at yo̱cat chixtojbal la̱ ma̱c.

⁵⁵ Eb laj Sodoma ut eb laj Samaria rochbeneb lix coꞌ teꞌcua̱nk cuiꞌchic joꞌ nak queꞌcuan junxil. Joꞌcan ajcuiꞌ la̱at ut eb la̱ coꞌ texcua̱nk joꞌ nak quexcuan junxil.

⁵⁶ ¿Ma ma̱cuaꞌ ta biꞌ a̱cui̱tzꞌin li tenamit Sodoma nak cakꞌetkꞌeti a̱cuib chiru junxil nak sa cuancat?

⁵⁷ Nak toj ma̱ji quicꞌutun li ma̱usilal xaba̱nu la̱at, cahobeb. Anakcuan juntakꞌe̱tex. Ut eb laj filisteo, eb laj Siria ut chixjunileb li xicꞌ nequeꞌiloc a̱cue li cuanqueb cha̱jun sutam yo̱queb cha̱hobbal.

⁵⁸ Anakcuan tento nak ta̱cꞌul lix tojbal a̱ma̱c xban li ma̱usilal li kꞌaxal yibru li xaba̱nu, ut xban nak xakꞌetkꞌeti a̱cuib xban li cꞌaꞌru cuan a̱cue. La̱in li Ka̱cuaꞌ ninyehoc re aꞌin.

⁵⁹ Li nimajcual Dios quixye: La̱in tatinqꞌue chixtojbal a̱ma̱c joꞌ a̱cꞌulub xcꞌulbal xban nak cacuisi xcuanquil li contrato ut incꞌaꞌ caba̱nu li cꞌaꞌru caye.

⁶⁰ Abanan toj cuan saꞌ inchꞌo̱l cꞌaꞌru quinye saꞌ li contrato li quinba̱nu a̱cuiqꞌuin saꞌ a̱sa̱jilal. La̱in tinxakab xcuanquil li contrato chi junelic.

⁶¹ Ta̱julticokꞌ a̱cue li ma̱usilal xaba̱nu ut tatxuta̱na̱k nak la̱in tinkꞌaxtesi chokꞌ a̱coꞌ li tenamit Samaria la̱ cuas ut nak tinkꞌaxtesi chokꞌ a̱coꞌ li tenamit Sodoma la̱ cui̱tzꞌin. Tinba̱nu chi joꞌcan usta incꞌaꞌ tento tinba̱nu xban nak incꞌaꞌ quinye a̱cue saꞌ li contrato nak tinkꞌaxtesiheb a̱cue.

⁶² La̱in tinxakab xcuanquil lin contrato ut la̱at ta̱nau nak la̱in li Ka̱cuaꞌ.

⁶³ La̱in tincuy a̱ma̱c. Abanan cua̱nk saꞌ a̱chꞌo̱l li ma̱usilal xaba̱nu ut tatxuta̱na̱k xban. Incꞌaꞌ chic te̱nimobresi e̱rib xban nak texxuta̱na̱k. La̱in li nimajcual Dios quinyehoc re aꞌin.—