Ezequiel 14 - Li Santil hu

Raylal ta̱cha̱lk saꞌ xbe̱neb li nequeꞌxlokꞌoni li jalanil dios

¹ Queꞌcuulac cuiqꞌuin cuib oxibeb laj cꞌamol be saꞌ xya̱nkeb laj Israel re nak la̱in tinpatzꞌ re li Dios cꞌaꞌru teꞌxba̱nu.

² Ut li Ka̱cuaꞌ quia̱tinac cuiqꞌuin ut quixye:

³ —At ralal cui̱nk, eb li cui̱nk aꞌin nequeꞌxqꞌue xchꞌo̱l chixlokꞌoninquil li yi̱banbil dios li naqꞌuehoc reheb chi ma̱cobc. ¿Ma ta̱ru̱k ta biꞌ teꞌcha̱lk chixpatzꞌbal cue cꞌaꞌru teꞌxba̱nu?

⁴ Tat-a̱tinak riqꞌuineb ut ta̱ye reheb joꞌcaꞌin naxye li nimajcual Dios: Cui junak aj Israel naxqꞌue xchꞌo̱l chixlokꞌoninquil li yi̱banbil dios ut naxba̱nu li ma̱usilal, ut chirix aꞌan naxic chixsicꞌbal xnaꞌleb riqꞌuin junak profeta, la̱in tinsume li jun aꞌan joꞌ xcꞌulub xcꞌulbal xban nak naxlokꞌoniheb li jalanil dios.

⁵ Tinba̱nu chi joꞌcan re nak teꞌsukꞌi̱k cuiqꞌuin eb laj Israel xban nak eb aꞌan xineꞌxtzꞌekta̱na nak yo̱queb chixlokꞌoninquil li jalanil dios.

⁶ Ta̱ye reheb laj Israel li Ka̱cuaꞌ xye chi joꞌcaꞌin: Chiyotꞌekꞌ e̱chꞌo̱l ut jalomak e̱cꞌaꞌux. Canabomak xlokꞌoninquil li yi̱banbil dios ut canabomak xba̱nunquil li ma̱usilal.

⁷ Cui junak aj Israel malaj ut junak li jalan xtenamit li cuan saꞌ xya̱nkeb laj Israel tinixtzꞌekta̱na ut tixlokꞌoniheb li jalanil dios, ut incꞌaꞌ naxcanab xba̱nunquil li ma̱c aꞌan, ut chirix aꞌan ta̱xic riqꞌuin junak li profeta chixpatzꞌbal cꞌaꞌru tixba̱nu, la̱in li Ka̱cuaꞌ tinsume̱nk re.

⁸ La̱in tinrakok a̱tin saꞌ xbe̱n ut tincꞌut xxuta̱n chiruheb chixjunileb re nak teꞌxqꞌue retal nak incꞌaꞌ us xba̱nu li jun aꞌan. Ut la̱in tincuisi saꞌ xya̱nkeb lin tenamit. Ut riqꞌuin aꞌan te̱qꞌue retal nak la̱in li Ka̱cuaꞌ.

⁹ Junak profeta li ta̱balakꞌi̱k tixye li moco ya̱l ta. Aꞌan xban nak la̱in xincanab chi balakꞌi̱c. Ut la̱in tincuisi saꞌ xya̱nkeb laj Israel.

¹⁰ Li ani tixpatzꞌ xnaꞌleb riqꞌuin li profeta aj balakꞌ, juntakꞌe̱t lix tojbaleb xma̱c li teꞌxcꞌul, joꞌ li tixpatzꞌ xnaꞌleb joꞌ ajcuiꞌ li profeta aj balakꞌ.

¹¹ Tinba̱nu chi joꞌcan re nak eb laj Israel incꞌaꞌ chic tineꞌxtzꞌekta̱na, chi moco teꞌxmux chic ribeb riqꞌuin xba̱nunquil li ma̱c. Aꞌanakeb lin tenamit ut la̱inak lix Dioseb, chan li Ka̱cuaꞌ li nimajcual Dios.

¹² Ut li Dios quia̱tinac cuiꞌchic cuiqꞌuin ut quixye:

¹³ —At ralal cui̱nk, cui li tenamit nequeꞌxkꞌetkꞌeti ribeb chicuu ut incꞌaꞌ niquineꞌxlokꞌoni, la̱in tinqꞌueheb chixtojbal lix ma̱queb. Tincuisi chiruheb lix tzacae̱mkeb ut tintakla li cueꞌej saꞌ xbe̱neb. Teꞌca̱mk li cristian ut teꞌca̱mk ajcuiꞌ li xul.

¹⁴ Cui ta cuanqueb saꞌ li tenamit aꞌan laj Noé, laj Daniel, ut laj Job, caꞌaj cuiꞌ raj li oxib chi cui̱nk aꞌan teꞌcolekꞌ xban nak ti̱queb xchꞌo̱l. La̱in li Ka̱cuaꞌ xinyehoc re aꞌin.

¹⁵ Malaj ut tintakla li joskꞌ aj xul saꞌ li tenamit chixcamsinquileb li cristian, ma̱cꞌaꞌak chic cristian teꞌcana̱k aran. Ut ma̱ ani chic ta̱ru̱k ta̱numekꞌ aran xbaneb li joskꞌ aj xul.

¹⁶ Relic chi ya̱l la̱in li yoꞌyo̱quil Dios ninye nak usta cuanqueb raj li oxib chi cui̱nk aꞌan saꞌ li tenamit, eb aꞌan incꞌaꞌ raj teꞌru̱k chixcolbal li ralal xcꞌajoleb. Caꞌaj cuiꞌ raj li oxib chi cui̱nk teꞌcolekꞌ ut li naꞌajej ta̱cana̱k chi ma̱cꞌaꞌ cuan chi saꞌ.

¹⁷ Malaj ut tintakla li ple̱t saꞌ li tenamit aꞌan ut tinye nak teꞌcamsi̱k li cristian ut eb li xul.

¹⁸ Relic chi ya̱l la̱in li yoꞌyo̱quil Dios ninye nak usta cuanqueb raj li oxibeb chi cui̱nk saꞌ li tenamit aꞌan, eb aꞌan incꞌaꞌ raj teꞌru̱k chixcolbal li ralal xcꞌajoleb. Caꞌaj cuiꞌ raj li oxib chi cui̱nk teꞌcolekꞌ.

¹⁹ Malaj ut tintakla li caki yajel saꞌ li tenamit aꞌan ut xban nak yo̱ injoskꞌil saꞌ xbe̱neb la̱in tincamsiheb li cristian ut eb li xul.

²⁰ Relic chi ya̱l la̱in li yoꞌyo̱quil Dios ninye nak usta cuanqueb raj li oxib chi cui̱nk, laj Noé, laj Daniel ut laj Job, eb aꞌan incꞌaꞌ raj teꞌru̱k chixcolbaleb li ralal xcꞌajoleb. Caꞌaj cuiꞌ raj li oxib chi cui̱nk teꞌcolekꞌ xban nak ti̱queb xchꞌo̱l.

²¹ Aꞌan aꞌin li naxye li nimajcual Dios: Kꞌaxal ra cuiꞌchic chokꞌ reheb laj Jerusalén nak la̱in tinrakok a̱tin saꞌ xbe̱neb riqꞌuin li ca̱hib chi raylal. La̱in tintakla li ple̱t, li cueꞌej, li joskꞌ aj xul, ut li caki yajel re nak teꞌcamsi̱k li cristian ut eb li xul.

²² Abanan cuanqueb le̱ ralal e̱cꞌajol li incꞌaꞌ teꞌcamsi̱k. Teꞌcuulak e̱riqꞌuin ut la̱ex te̱qꞌue retal lix ma̱usilaleb nak te̱ril li cꞌaꞌru teꞌxba̱nu. Ut riqꞌuin aꞌan te̱qꞌue retal nak moco yal xcuaj ta nak xinqꞌue li raylal saꞌ xbe̱neb laj Jerusalén.

²³ Nak te̱ril lix yibal ru lix yehom xba̱nuhomeb ta̱cꞌojla̱k e̱chꞌo̱l xban nak te̱qꞌue retal nak xcꞌulubeb xcꞌulbal li tojba ma̱c li xinqꞌue saꞌ xbe̱neb, chan li Ka̱cuaꞌ li nimajcual Dios.