Ezequiel 13 - Li Santil hu

Raylal ta̱cha̱lk saꞌ xbe̱neb li profeta aj balakꞌ

¹ Ut li Ka̱cuaꞌ quia̱tinac cuiꞌchic cuiqꞌuin ut quixye cue:

² —At ralal cui̱nk, ta̱kꞌuseb lix profeteb laj Israel li yo̱queb chi balakꞌic riqꞌuin li cꞌaꞌru nequeꞌxye yal xjuneseb rib. Ta̱ye reheb nak cheꞌrabihak li oc cue chixyebal.

³ Joꞌcaꞌin xye li nimajcual Dios: Ra ta̱cha̱lk saꞌ xbe̱neb li profeta li yal xjuneseb rib nequeꞌxcꞌoxla li cꞌaꞌru nequeꞌxye ut ma̱cꞌaꞌ quicꞌutbesi̱c chiruheb.

⁴ Ex aj Israel, eb le̱ profeta chanchaneb li yac li nequeꞌcuan saꞌ li chaki chꞌochꞌ. Ma̱cꞌaꞌ nequeꞌoc cuiꞌ.

⁵ Moco queꞌxyi̱b ta li tzꞌac li queꞌjuqꞌueꞌ chi moco queꞌxyi̱b li tzꞌac sutsu cuiꞌ li tenamit Israel re te̱col cuiꞌ e̱rib saꞌ li ple̱t. Eb aꞌan incꞌaꞌ queꞌxchꞌolob xya̱lal che̱ru re nak ta̱ru̱k te̱col e̱rib saꞌ li cutan nak ta̱cha̱lk li Ka̱cuaꞌ chi rakoc a̱tin saꞌ e̱be̱n.

⁶ Eb li visión li nequeꞌril moco ya̱l ta. Nak nequeꞌkꞌehin ticꞌtiꞌ li nequeꞌxye. Nequeꞌxye nak la̱in xinyehoc re, abanan moco la̱in ta quintaklan reheb. Saꞌ xchꞌo̱leb aꞌan nak la̱in tinba̱nu li cꞌaꞌru nequeꞌxye.

⁷ ¿Ma ma̱cuaꞌ ta biꞌ ticꞌtiꞌ li visión ut li kꞌehicꞌ li incꞌaꞌ cꞌutbil inban la̱in? Usta nequeꞌxye nak la̱in xincꞌutuc chiruheb, abanan moco ya̱l ta li nequeꞌxye.

⁸ Li nimajcual Dios quixye: —Xban li ticꞌtiꞌic li nequeꞌxba̱nu ut xban li visión li moco ya̱l ta, la̱in yo̱ injoskꞌil saꞌ xbe̱neb.

⁹ La̱in tinsach ruheb li nequeꞌril li visión li moco ya̱l ta ut tinsach ruheb li nequeꞌticꞌtiꞌic nak nequeꞌkꞌehin. Incꞌaꞌ chic teꞌoque̱nk saꞌ xya̱nkeb li nequeꞌcꞌu̱ban re li cꞌaꞌru ta̱uxma̱nk saꞌ lin tenamit chi moco tzꞌi̱banbilak lix cꞌabaꞌeb saꞌ li hu li tzꞌi̱banbil cuiꞌ xcꞌabaꞌeb laj Israel. Ut incꞌaꞌ chic teꞌsukꞌi̱k saꞌ lix naꞌajeb laj Israel. Riqꞌuin aꞌin teꞌxqꞌue retal nak la̱in li Ka̱cuaꞌ li nimajcual Dios.

¹⁰ Eb li profeta queꞌxbalakꞌiheb lin tenamit nak queꞌxye nak ta̱cua̱nk tuktu̱quil usilal, abanan moco ya̱l ta. Chanchan nak queꞌxyi̱b jun li tzꞌac moco cau ta ut queꞌxbon li rix.

¹¹ Joꞌcan nak ta̱ye reheb li xeꞌbonoc re li tzꞌac li incꞌaꞌ cau nak cha̱lc re li cacuil hab saꞌ xbe̱n ut cha̱lc re li cacuil ikꞌ. Ut tintakla li sakbach saꞌ xbe̱n. Ut li tzꞌac ta̱tꞌanekꞌ.

¹² Nak ta̱tꞌanekꞌ li tzꞌac eb li tenamit teꞌxpatzꞌ cꞌaꞌru aj e nak xebon li tzꞌac chi cha̱bil, chaꞌkeb.

¹³ Joꞌcaꞌin xye li Ka̱cuaꞌ li nimajcual Dios: —Xban nak cꞌajoꞌ lin joskꞌil saꞌ xbe̱neb, la̱in tintakla li cacuil ikꞌ ut li cacuil hab, joꞌ ajcuiꞌ li sakbach. Ut ta̱sachekꞌ li tzꞌac li xeꞌxyi̱b.

¹⁴ La̱in tinsach li tzꞌac li xeꞌxbon rix. Tincuisi lix xeꞌ li tzꞌac ut tintꞌan chi junaj cua. Ut nak ta̱tꞌanekꞌ telajeꞌcamsi̱k xban. Ut riqꞌuin aꞌan teꞌxqꞌue retal nak la̱in li Ka̱cuaꞌ.

¹⁵ Li tzꞌac ut eb li queꞌbonoc rix teꞌrecꞌa lin joskꞌil. Ut la̱in tinye e̱re: Xsacheꞌ li tzꞌac joꞌ eb ajcuiꞌ li queꞌbonoc rix.

¹⁶ Teꞌsachekꞌ ruheb lix profeteb laj Israel li queꞌyehoc ticꞌtiꞌ reheb laj Jerusalén nak queꞌxye nak ta̱cua̱nk tuktu̱quil usilal, abanan moco ya̱l ta, chan li Dios.

¹⁷ Joꞌcan ut anakcuan, at ralal cui̱nk, ta̱ye resil li raylal li ta̱cha̱lk saꞌ xbe̱neb li ixk li nequeꞌbalakꞌin, li cuanqueb saꞌ la̱ tenamit. Ta̱ye resil li raylal teꞌxcꞌul xban nak nequeꞌxye li cꞌaꞌru nequeꞌxcꞌoxla xjuneseb.

¹⁸ Ye reheb nak joꞌcaꞌin ninye la̱in li nimajcual Dios: Raylal ta̱cha̱lk saꞌ e̱be̱n la̱ex ixk li nequeboj li tꞌicr re kꞌehicꞌ ut re tu̱lac li nequeꞌxqꞌue saꞌ xcux rukꞌeb ut saꞌ xjolomeb. Nequeba̱nu chi joꞌcan xban nak te̱raj nak ta̱cua̱nk e̱cuanquil saꞌ xbe̱neb le̱ rech tenamitil re te̱ye ani ta̱ca̱mk ut ani incꞌaꞌ. ¿Ma ta̱ru̱k te̱ba̱nu aꞌan yal re xcolbal rix le̱ yuꞌam?

¹⁹ Xine̱mux nak xeba̱nu li incꞌaꞌ us ut riqꞌuin aꞌan xecꞌul li cebada ut li caxlan cua. Xecamsiheb li moco xcꞌulubeb ta ca̱mc ut xecol rix li moco xcꞌulubeb ta cua̱nc chi yoꞌyo. Xeba̱nu aꞌan riqꞌuin li ticꞌtiꞌ xeye.

²⁰ Joꞌcan nak la̱in li nimajcual Dios xicꞌ nacuil li tꞌicr li nequeqꞌue saꞌ xcux li rukꞌeb re xbalakꞌinquileb li tenamit. Tinsach le̱ tꞌicr ut tincoleb li tenamit saꞌ e̱rukꞌ. Libre chic teꞌcana̱k joꞌ nak nequeꞌachꞌaba̱c li cocꞌ xul.

²¹ La̱in tinpej li tꞌicr li nequeqꞌue saꞌ lix jolomeb. Tincoleb lin tenamit saꞌ e̱rukꞌ. Incꞌaꞌ chic texincanab chixbalakꞌinquileb. Riqꞌuin aꞌan te̱qꞌue retal nak la̱in li Ka̱cuaꞌ.

²² La̱ex xeqꞌue xrahil xchꞌo̱leb li ti̱queb xchꞌo̱l riqꞌuin li ticꞌtiꞌ xeye. La̱in incꞌaꞌ nacuaj nak teꞌxcꞌul li raylal. La̱ex xeqꞌueheb chi cacuu̱c xchꞌo̱leb li incꞌaꞌ useb xnaꞌleb. Ut incꞌaꞌ xeꞌxcanab xba̱nunquil li ma̱usilal e̱ma̱c la̱ex.

²³ Joꞌcan nak la̱ex incꞌaꞌ chic te̱ril li visión li moco ya̱l ta, chi moco texkꞌehikꞌ chic. La̱in tincoleb lin tenamit saꞌ e̱rukꞌ la̱ex. Ut riqꞌuin aꞌan la̱ex te̱qꞌue retal nak la̱in li Ka̱cuaꞌ, chan li Dios.