Ezequiel 12 - Li Santil hu

Laj Ezequiel quixye resil nak teꞌisi̱k laj Israel saꞌ lix naꞌajeb

¹ Li Ka̱cuaꞌ quia̱tinac cuiqꞌuin ut quixye cue:

² —At ralal cui̱nk, la̱at cuancat saꞌ xya̱nkeb li tenamit kꞌaxal kꞌetkꞌeteb. Cuanqueb xnakꞌ ru, abanan incꞌaꞌ nequeꞌiloc. Cuanqueb xxic, abanan incꞌaꞌ nequeꞌabin xban nak aꞌaneb aj kꞌetol a̱tin.

³ Joꞌcan ut, at ralal cui̱nk, cauresi li cꞌaꞌru a̱cue re tatxic. Chi cutan ut chiruheb chixjunileb tat-e̱lk saꞌ la̱ naꞌaj li cuancat cuiꞌ ut tatxic saꞌ jalan naꞌajej. Ma̱re chi joꞌcan teꞌxtau xya̱lal, usta kꞌaxal kꞌetkꞌeteb.

⁴ Chiru li cutan nak yo̱keb cha̱cuilbal, isi li cꞌaꞌru a̱cue ac cauresinbil re tatxic saꞌ jalan naꞌajej. Ut nak ac x-ecuu, nak yo̱keb cha̱cuilbal, tat-e̱lk joꞌ nak nequeꞌel li nequeꞌcꞌameꞌ chi pre̱xil saꞌ jalan tenamit.

⁵ Nak yo̱keb cha̱cuilbal ta̱hop jun li jul saꞌ li tzꞌac. Ut saꞌ li hopol aꞌan tat-e̱lk saꞌ li tenamit.

⁶ Yo̱keb cha̱cuilbal nak ta̱pako li cꞌaꞌru a̱cue saꞌ xbe̱n a̱tel nak tatxic. Tat-e̱lk nak oc re li kꞌojyi̱n. Ta̱tzꞌap la̱ cuu re nak incꞌaꞌ ta̱cuil li naꞌajej xban nak la̱in xatinxakab chokꞌ retalil chiruheb laj Israel.—

⁷ Ut quinba̱nu joꞌ quixye cue li Ka̱cuaꞌ. Saꞌ li cutan aꞌan quinyi̱b li cꞌaꞌru cue re tincꞌam joꞌ naxba̱nu junak nak yo̱ chi e̱lelic. Ut nak oc re li kꞌojyi̱n, la̱in quinhop riqꞌuin cuukꞌ li tzꞌac ut quin-el saꞌ li tenamit. Ut chiruheb chixjunileb quinqꞌue li cui̱k saꞌ xbe̱n intel ut co̱in.

⁸ Saꞌ li cutan jun chic li Ka̱cuaꞌ quia̱tinac cuiꞌchic cuiqꞌuin.

⁹ Quixye cue: —At ralal cui̱nk, ¿ma incꞌaꞌ queꞌxpatzꞌ a̱cue cꞌaꞌru yo̱cat eb laj Israel li kꞌaxal kꞌetkꞌeteb?

¹⁰ Ta̱ye reheb: Aꞌan aꞌin li quixye li nimajcual Dios. Li a̱tin aꞌin re li nataklan aran Jerusalén ut reheb ajcuiꞌ chixjunileb laj Israel li cuanqueb aran.

¹¹ Ta̱ye reheb nak la̱at jun li retalil chokꞌ reheb. Joꞌ caba̱nu la̱at, joꞌcan teꞌxcꞌul eb aꞌan. Teꞌchapekꞌ ut teꞌcꞌamekꞌ chi pre̱xil saꞌ jalan naꞌajej.

¹² Li nataklan saꞌ xbe̱neb tixpako li cꞌaꞌru re. Nak oc re li kꞌojyi̱n, ta̱e̱lk saꞌ lix hopolal li tzꞌac li teꞌxhop. Tixtzꞌap li ru re nak incꞌaꞌ ta̱ril li naꞌajej nak ta̱e̱lk.

¹³ La̱in li Ka̱cuaꞌ tinqꞌue lin raꞌal re nak ta̱chapekꞌ. La̱in tincꞌam toj Babilonia saꞌ lix naꞌajeb laj Caldea, abanan aꞌan incꞌaꞌ ta̱ril li naꞌajej. Aran ta̱ca̱mk.

¹⁴ La̱in tinjeqꞌuiheb yalak bar chixjunileb li nequeꞌoquen chirix, joꞌ eb ajcuiꞌ li nequeꞌtenkꞌan re ut eb lix soldado. La̱in tincua̱linaheb chi chꞌi̱chꞌ.

¹⁵ Nak acak xebinjeqꞌui ruheb saꞌ jalan tenamit, toj aran teꞌxqꞌue retal nak la̱in li Ka̱cuaꞌ.

¹⁶ Abanan, incꞌaꞌ tinqꞌueheb chi camsi̱c chixjunileb. Tebincol ban chiru li camsi̱nc ut chiru li cueꞌej ut chiru li caki yajel re nak naru teꞌxserakꞌi saꞌ eb li tenamit chixjunil li ma̱usilal li queꞌxba̱nu. Ut riqꞌuin aꞌan teꞌxqꞌue retal nak la̱in li Ka̱cuaꞌ, chan li Dios.

¹⁷ Li Ka̱cuaꞌ quia̱tinac cuiqꞌuin ut

¹⁸ quixye cue: —At ralal cui̱nk, yo̱k a̱xiu nak tatcuaꞌak ut yo̱k a̱cꞌaꞌux nak tat-ucꞌak.

¹⁹ Ta̱ye reheb li tenamit li cuanqueb saꞌ li naꞌajej aꞌin: Aꞌan aꞌin li naxye li nimajcual Dios chirixeb li cuanqueb Jerusalén ut chirix li naꞌajej Israel. Teꞌtzaca̱nk chi yo̱keb xxiu. Ut chi yo̱keb xcꞌaꞌux teꞌucꞌak xban nak ta̱isi̱k saꞌ li naꞌajej chixjunil li cuan aran. Ma̱cꞌaꞌ chic ta̱cana̱k xban lix ma̱usilaleb li cuanqueb saꞌ li tenamit aꞌan.

²⁰ Eb li tenamit li cuanqueb cuiꞌ li cristian ta̱cana̱k chi ma̱cꞌaꞌ cristian chi saꞌ. Li cꞌaleba̱l ta̱cana̱k joꞌ chaki chꞌochꞌ. Riqꞌuin aꞌan te̱qꞌue retal nak la̱in li Ka̱cuaꞌ, chan.

²¹ Ut li Ka̱cuaꞌ quixye cuiꞌchic cue:

²² —At ralal cui̱nk, ¿cꞌaꞌut nak eb laj Israel nequeꞌxye nak eb li cutan nequeꞌnumeꞌ ut incꞌaꞌ nacꞌulman li cꞌaꞌru nequeꞌxye li profetas li quicꞌuteꞌ chiruheb saꞌ visión? chanqueb.

²³ Ta̱ye reheb nak la̱in li nimajcual Dios ninye chi joꞌcaꞌin: La̱in tinsach xcuanquil li a̱tin li nequeꞌxye ut incꞌaꞌ chic teꞌxye chi joꞌcan arin Israel. Ta̱ye reheb nak cuulac re xkꞌehil nak ta̱tzꞌaklok ru chixjunil li queꞌxye li profetas.

²⁴ Incꞌaꞌ chic ta̱cꞌutbesi̱k chiruheb li visión li moco ya̱l ta, chi moco teꞌticꞌtiꞌik chic riqꞌuin kꞌehicꞌ saꞌ xya̱nkeb laj Israel.

²⁵ La̱in li Ka̱cuaꞌ tinye li cꞌaꞌru nacuaj xyebal ut ta̱cꞌulma̱nk chi junpa̱t li cꞌaꞌru ninye. Ut la̱ex li nequekꞌetkꞌeti e̱rib te̱ril nak tinba̱nu li cꞌaꞌru ninye. Toj cua̱nkex ajcuiꞌ la̱ex nak tinba̱nu li cꞌaꞌru ninye. La̱in li Ka̱cuaꞌ ninyehoc re aꞌin.

²⁶ Ut li Ka̱cuaꞌ quixye ajcuiꞌ cue:

²⁷ —At ralal cui̱nk, eb laj Israel yo̱queb chixyebal nak toj ma̱jiꞌ ta̱cꞌulma̱nk li cꞌaꞌru xcꞌutbesi̱c cha̱cuu saꞌ visión. Toj mokon ta̱cꞌulma̱nk, chanqueb.

²⁸ Joꞌcan nak ta̱ye reheb nak la̱in li nimajcual Dios ninye chi joꞌcaꞌin: Incꞌaꞌ tinba̱yk chixba̱nunquil li cꞌaꞌru xinye. Li cꞌaꞌru xinye ta̱cꞌulma̱nk chi junpa̱t, chan li Dios.