Ezequiel 10 - Li Santil hu

Lix lokꞌal li Ka̱cuaꞌ qui-el saꞌ li templo

¹ Ut quicuil nak saꞌ xbe̱n li chanchan choxa li cuan saꞌ xbe̱neb li querubines quicꞌutun jun li cꞌojariba̱l yi̱banbil riqꞌuin li cha̱bil pec zafiro.

² Ut li Ka̱cuaꞌ quixye re li cui̱nk li lino rakꞌ: —Tat-oc saꞌ xya̱nkeb li ruedas li cuanqueb rubeleb li querubines. Riqꞌuin la̱ cuukꞌ ta̱chap li ru xam li yo̱ xxamlel. Ut ta̱paji li ru xam saꞌ xbe̱n li tenamit, chan. Ut la̱in yo̱quin chirilbal nak qui-oc li cui̱nk saꞌ xya̱nkeb li ruedas.

³ Eb li querubines cuanqueb chiru li templo saꞌ li sur nak li cui̱nk co̱ chi saꞌ. Ut li neba̱l li cuan chak toj chi saꞌ quinujac riqꞌuin li chok.

⁴ Lix lokꞌal li Ka̱cuaꞌ qui-el saꞌ xbe̱neb li querubines ut co̱ saꞌ li oqueba̱l re li templo. Ut li templo quinujac riqꞌuin li chok. Ut li neba̱l cꞌajoꞌ nak quilemtzꞌun xban xlokꞌal li Ka̱cuaꞌ.

⁵ Lix ya̱b lix xiqꞌueb li querubines qui-abi̱c toj saꞌ li neba̱l li cuan chak toj chirix li templo. Chanchan nak yo̱ chi a̱tinac li nimajcual Dios.

⁶ Li Ka̱cuaꞌ quixye re li cui̱nk li lino rakꞌ nak tixxoc li ru xam li cuan saꞌ xya̱nkeb li ruedas li cuanqueb cuiꞌ li querubines. Ut li cui̱nk co̱ ut quixakli saꞌ xya̱nkeb li rueda.

⁷ Ut jun li querubín quixchap li ru xam li cuan saꞌ xyiheb ut quixqꞌue saꞌ rukꞌ li cui̱nk li lino rakꞌ. Li cui̱nk quixcꞌul ut qui-el.

⁸ Ut quicuil jun li ukꞌej chanchan rukꞌ cui̱nk rubel lix xiqꞌueb li querubines.

⁹ Ut quicuil ajcuiꞌ ca̱hib li ruedas. Jun cuan chixcꞌatk li junju̱nk chi querubín. Li ruedas cꞌajoꞌ nak nequeꞌlemtzꞌun chanchan li cha̱bil pec crisólito.

¹⁰ Li ca̱hib chi rueda juntakꞌe̱t xyi̱banquileb. Eb li rueda aꞌan li quicuil chanchan nak cuan chic jun li rueda chi saꞌ li jun chic.

¹¹ Saꞌ xca̱ pacꞌalil nequeꞌxic li rueda aꞌan. Nak nequeꞌxic incꞌaꞌ nequeꞌxsukꞌisi ribeb. Eb li querubines nequeꞌxic saꞌ xjayal li yo̱ chi iloc cuiꞌ ut incꞌaꞌ nequeꞌsukꞌi nak nequeꞌxic.

¹² Nabal li xnakꞌ ruheb li querubines. Cuan chiruheb ut cuan chirixeb. Cuan ajcuiꞌ saꞌ li rukꞌeb ut saꞌ lix xiqꞌueb. Ut joꞌcan ajcuiꞌ li ca̱hib chi rueda. Nabal li xnakꞌeb ru cuan saꞌ li junju̱nk.

¹³ La̱in quicuabi nak queꞌxjap re chixyebal reheb li rueda: —¡Qꞌuehomak vue̱lt!—

¹⁴ Chixju̱nkaleb li querubines ca̱ ca̱ li riloba̱leb. Li xbe̱n, aꞌan chanchan na-iloc bo̱yx. Li xcab, aꞌan chanchan na-iloc cui̱nk. Li rox, aꞌan chanchan na-iloc cakcoj, ut li xca̱, aꞌan chanchan na-iloc tꞌiu.

¹⁵ Aꞌaneb li querubines li quicuil chire li nimaꞌ Quebar. Ut eb li querubines queꞌco̱eb takecꞌ.

¹⁶ Nak nequeꞌxic li querubines, nequeꞌxic ajcuiꞌ li ruedas. Nak eb li querubines nequeꞌxhel lix xiqꞌueb re nak teꞌcuacli̱k, eb li ruedas nequeꞌcuacli ajcuiꞌ.

¹⁷ Nak nequeꞌxakli li querubines, nequeꞌxakli ajcuiꞌ li ruedas. Ut nak nequeꞌcuacli li querubines, eb li ruedas nequeꞌcuacli ajcuiꞌ xban nak lix musikꞌeb li querubines na-ecꞌasin reheb li ruedas.

¹⁸ Ut lix lokꞌal li Dios qui-el saꞌ li oqueba̱l re li templo ut co̱ cuiꞌchic saꞌ xbe̱neb li querubines.

¹⁹ Ut quicuil nak eb li querubines queꞌxhel lix xiqꞌueb ut queꞌtakeꞌ ut queꞌco̱eb. Ut eb li ruedas queꞌtakeꞌ rochbeneb. Nak yo̱queb chi xic queꞌxakli saꞌ xbe̱n li oqueba̱l re li templo li cuan saꞌ releb sakꞌe. Ut lix lokꞌal lix Dioseb laj Israel cuan saꞌ xbe̱neb.

²⁰ Ut la̱in quinqꞌue retal nak aꞌaneb li chanchaneb ángel li queꞌcuil rubel lix cꞌojariba̱l lix Dioseb laj Israel chire li nimaꞌ Quebar. Ut quinqꞌue retal nak aꞌaneb li querubines.

²¹ Chixju̱nkaleb cuanqueb ca̱hib li riloba̱leb ut ca̱hib lix xiqꞌueb. Ut rubeleb lix xicꞌ cuan rukꞌeb chanchan rukꞌ cui̱nk.

²² Li riloba̱leb aꞌan, chanchaneb ajcuiꞌ li riloba̱leb li queꞌcuil chire li nimaꞌ Quebar. Ut li junju̱nk yo̱ chi xic chi ti̱c chiruheb.