Ezequiel 1 - Li Santil hu

Laj Ezequiel quiril lix lokꞌal li Dios saꞌ visión

¹ La̱in laj Ezequiel laj tij. La̱in jun saꞌ xya̱nkeb laj Israel li queꞌchapeꞌ ut queꞌcꞌameꞌ saꞌ li naꞌajej Babilonia. Cocꞌameꞌ chire li nimaꞌ Quebar. O̱b cutan chic xticlajic xca̱ li po re li laje̱b xcaꞌcꞌa̱l chihab nak li Dios quixcꞌutbesiheb li visión chicuu. Quiteli li choxa chicuu nak quicuil.

² Ac o̱b chihab xcꞌambal li rey Joaquín aran Babilonia.

³ Saꞌ li chihab aꞌan, saꞌ li roꞌ xbe li xca̱ po nak cuanquin saꞌ xchꞌochꞌeb laj Babilonia chire li nimaꞌ Quebar quicuabi nak li Ka̱cuaꞌ quia̱tinac cuiqꞌuin la̱in li ralal laj Buzi. Chanchan nak quixqꞌue li rukꞌ saꞌ inbe̱n nak quicuecꞌa lix cuanquil.

⁴ Quicuil nak yo̱ chak chi cha̱lc saꞌ li norte jun cacuil ikꞌ. Li ikꞌ aꞌan yo̱ chak chixcꞌambal jun li chok sutsu riqꞌuin xam ut nalemtzꞌun. Chanchan yo̱ chi repoc joꞌ nak narepoc li ca̱k. Ut saꞌ li chok nacꞌutun jun li xam ut saꞌ li xam cuan jun li nalemtzꞌun joꞌ li kꞌan chꞌi̱chꞌ bronce.

⁵ Ut saꞌ li xam queꞌcꞌutun ca̱hib li chanchaneb ángel yoꞌyo̱queb. Chanchan nequeꞌiloc cui̱nk.

⁶ Chixju̱nkaleb cuanqueb ca̱hib li riloba̱l ut ca̱hib lix xiqꞌueb.

⁷ Ut lix tzelequeb ti̱queb ut li rokeb chanchan rokeb li cuacax ut nalemtzꞌun joꞌ li kꞌan chꞌi̱chꞌ bronce.

⁸ Rubeleb lix xicꞌ ca̱hib cuan li rukꞌeb chanchan rukꞌeb cui̱nk. Chixju̱nkaleb ca̱ ca̱ li riloba̱leb ut ca̱ ca̱ lix xiqꞌueb saꞌ xca̱ pacꞌalileb.

⁹ Nequeꞌxcꞌul ribeb lix xiqꞌueb chi ribileb rib. Ut nak nequeꞌbe̱c incꞌaꞌ nequeꞌxic chirix. Ti̱c ban chiru nequeꞌxic.

¹⁰ Joꞌcaꞌin nequeꞌiloc li ca̱hib chi riloba̱l li junju̱nk chi ángel: Li cuan chiruheb, aꞌan chanchan na-iloc cui̱nk. Li cuan saꞌ lix nimeb, aꞌan chanchan na-iloc cakcoj. Ut li cuan saꞌ lix tzꞌeheb, aꞌan chanchan na-iloc bo̱yx. Ut li cuan chirixeb, aꞌan chanchan na-iloc tꞌiu.

¹¹ Ut helho ruheb lix xiqꞌueb saꞌ xbe̱neb chi xju̱nkaleb. Cuib lix xiqꞌueb nequeꞌxcꞌul ribeb ut riqꞌuin li cuib chic nequeꞌxtzꞌap rib.

¹² Nak nequeꞌbe̱c chi xju̱nkaleb ti̱c chiruheb nequeꞌxic. Nequeꞌxic bar nequeꞌcꞌameꞌ cuiꞌ xban lix musikꞌ. Incꞌaꞌ tento nak toj teꞌxsukꞌisi ribeb nak nequeꞌbe̱c.

¹³ Eb li ca̱hib li yoꞌyo̱queb, li chanchaneb ángel, aꞌan queꞌcꞌutun saꞌ li visión joꞌ li ru xam li yo̱ xxamlel. Cuan li xam chanchan yo̱ chi be̱c saꞌ xya̱nkeb ut nalemtzꞌun ut saꞌ li xam narepoc li ca̱k.

¹⁴ Ut li ca̱hib li chanchaneb ángel nequeꞌchal nequeꞌxic saꞌ junpa̱t joꞌ nak narepoc li ca̱k.

¹⁵ Nak yo̱quin chirilbaleb li ca̱hib li chanchaneb ángel quicuil ajcuiꞌ ca̱hib li rueda saꞌ ruchichꞌochꞌ. Junju̱nk li rueda cuan chixcꞌatkeb li junju̱nk li chanchaneb ángel.

¹⁶ Li ca̱hib chi rueda juntakꞌe̱teb xyi̱banquileb. Eb li rueda aꞌan nequeꞌlemtzꞌun chanchan li cha̱bil pec crisólito. Ut eb li ruedas aꞌan quicuil chanchan nak cuan chic jun li rueda chi saꞌ li jun chic.

¹⁷ Saꞌ xca̱ pacꞌalil nequeꞌxic li ruedas aꞌan. Nak nequeꞌxic incꞌaꞌ nequeꞌxsukꞌisi ribeb.

¹⁸ Ut li chꞌi̱chꞌ li sursu li cuan chiru li rueda cuan nabal xnakꞌeb ru saꞌ li ca̱hib chi rueda. Xiu xiu rilbal.

¹⁹ Nak nequeꞌbe̱c li ca̱hibeb li chanchaneb ángel, nequeꞌbe̱c ajcuiꞌ li ruedas rochbeneb. Ut nak eb li chanchaneb ángel nequeꞌcuacli, eb li ruedas nequeꞌcuacli ajcuiꞌ.

²⁰ Eb li chanchaneb ángel beresinbileb xban lix musikꞌ ut nequeꞌxic bar nequeꞌcꞌameꞌ cuiꞌ. Ut eb li ruedas nequeꞌxic bar nequeꞌxic cuiꞌ li chanchaneb ángel.

²¹ Nak nequeꞌbe̱c li chanchaneb ángel, nequeꞌbe̱c ajcuiꞌ li ruedas. Ut nak nequeꞌxakli, nequeꞌxakli ajcuiꞌ li ruedas. Nak nequeꞌcuacli, nequeꞌcuacli li ruedas xban nak lix musikꞌeb li chanchaneb ángel na-ecꞌasin reheb li ruedas.

²² Ut saꞌ xbe̱neb li ca̱hib li chanchaneb ángel cuan li chanchan choxa nalemtzꞌun joꞌ li lem.

²³ Ut rubel li chanchan choxa helho̱queb lix xicꞌ chi ti̱c ut nequeꞌxcꞌul ribeb. Ut riqꞌuin li cuib chic li xiqꞌueb nequeꞌxtzꞌap ribeb.

²⁴ Ut quicuabi lix ya̱b lix xiqꞌueb nak yo̱queb chi be̱c chanchan nak na-ecꞌan xya̱b rok li haꞌ, malaj ut chanchan xya̱b xcux li nimajcual Dios, malaj ut chanchan xya̱beb li qꞌuila tenamit, malaj ut chanchan xya̱b li jun tu̱b chi soldados. Ut nak nequeꞌxakli, nequeꞌxcubsi lix xiqꞌueb.

²⁵ Nak nequeꞌxakli nequeꞌxcubsi lix xiqꞌueb, na-abiman jun xya̱b cux na-el chak saꞌ xbe̱n li chanchan choxa, li cuan saꞌ xbe̱n lix jolomeb li chanchaneb ángel.

²⁶ Ut saꞌ xbe̱n li chanchan choxa li cuan saꞌ xbe̱neb li chanchaneb ángel, quicꞌutun jun li cꞌojariba̱l yi̱banbil riqꞌuin li cha̱bil raxi pec zafiro. Ut saꞌ li cꞌojariba̱l aꞌan chunchu jun li chanchan cui̱nk.

²⁷ Ut quicuil ajcuiꞌ li cui̱nk li chunchu saꞌ li cꞌojariba̱l chanchan li kꞌan chꞌi̱chꞌ bronce li jun tokol naticla saꞌ lix cꞌa̱mal xsaꞌ toj takecꞌ. Chanchan yo̱ xxamlel. Ut li jun tokol chic li naticla saꞌ lix cꞌa̱mal xsaꞌ toj takꞌa chanchan xam. Cꞌajoꞌ nak nalemtzꞌun chi xjun sutam.

²⁸ Nalemtzꞌun lix lokꞌal li Dios nak quicuil. Chanchan li xo̱quikꞌab li naxqꞌue rib saꞌ li chok nak yo̱ li hab. Nak quicuil lix lokꞌal li Dios, quincut cuib saꞌ chꞌochꞌ ut quicuabi xya̱b xcux nak qui-oc chi a̱tinac.