Éxodo 9 - Li Santil hu

Li nimla raylal nak quilajeꞌyajer li cuacax

¹ Tojoꞌnak li Ka̱cuaꞌ Dios quixye re laj Moisés: —Tatxic cuiꞌchic riqꞌuin laj faraón ut ta̱ye re, “Joꞌcaꞌin quixye li Ka̱cuaꞌ Dios, lix Dioseb aj hebreo: Xcanabakeb chi xic lin tenamit re nak tineꞌxlokꞌoni.

² Ut cui incꞌaꞌ nacacanabeb chi xic ut yo̱cat chixbaybaleb chi xic,

³ la̱in tintakla jun nimla raylal saꞌ xbe̱neb le̱ queto̱mk li cuanqueb saꞌ cꞌaleba̱l. Jun nimla yajel ta̱tꞌanekꞌ saꞌ xbe̱neb li cuacax, li cacua̱y, li bu̱r, li camello joꞌ ajcuiꞌ eb li carner.

⁴ Abanan lix queto̱mkeb laj Israel ma̱cꞌaꞌ teꞌxcꞌul. Caꞌaj cuiꞌ lix queto̱mkeb laj Egipto teꞌca̱mk”, chan li Dios.

⁵ Chꞌolchꞌo chiru li Dios jokꞌe ta̱cꞌulma̱nk aꞌin. Li Dios quixye reheb: —Cuulaj tinba̱nu aꞌin saꞌ li tenamit, chan.

⁶ Joꞌ cuulajak chic li Ka̱cuaꞌ Dios quixba̱nu joꞌ quixye reheb. Quilajeꞌcam lix queto̱mkeb laj Egipto ut reheb laj Israel ma̱ jun queꞌcam.

⁷ Laj faraón quixtakla rilbal lix queto̱mkeb laj Israel ma xeꞌcam na. Ut quirabi resil nak ma̱ jun queꞌcam. Ut toj cau ajcuiꞌ xchꞌo̱l laj faraón ut incꞌaꞌ quixcanabeb chi xic li tenamit.

Li nimla raylal nak quilajeꞌxcꞌul li ni̱nki xox

⁸ Li Ka̱cuaꞌ Dios quixye re laj Moisés ut laj Aarón: —Te̱chap jun mo̱chꞌak li cha li cuan saꞌ xnaꞌaj li xam ut laj Moisés tixcut takecꞌ nak yo̱ chi iloc laj faraón.

⁹ Yalak bar saꞌ li tenamit Egipto pukuknac li cha saꞌ xbe̱neb li cristian ut pukuknac saꞌ xbe̱neb li xul. Riqꞌuin aꞌan ta̱ticla̱k li ni̱nki xox chirixeb, chan.

¹⁰ Tojoꞌnak queꞌxchap jun mo̱chꞌ li cha cuan saꞌ xnaꞌaj li xam. Chiru laj faraón laj Moisés quixcut takecꞌ. Riqꞌuin aꞌan quichal li ni̱nki xox saꞌ xbe̱neb li cristian ut saꞌ xbe̱neb ajcuiꞌ li xul.

¹¹ Eb laj kꞌe incꞌaꞌ chic queꞌru xcꞌutbal xcuanquileb chiru laj Moisés xban nak yajeb xban li xox joꞌ nak queꞌyajer chixjunileb laj Egipto.

¹² Ut li Ka̱cuaꞌ Dios quixcacuubresi xchꞌo̱l laj faraón. Joꞌ quixye li Ka̱cuaꞌ Dios re laj Moisés junxil, laj faraón ti̱c incꞌaꞌ quixba̱nu li cꞌaꞌru queꞌxye.

Li nimla raylal xban li sakbach

¹³ Tojoꞌnak li Ka̱cuaꞌ Dios quixye re laj Moisés: —Cuulaj tatcuacli̱k ekꞌela ut tatxic riqꞌuin laj faraón. Ta̱ye re, “Joꞌcaꞌin xye a̱cue li Ka̱cuaꞌ Dios, lix Dioseb laj hebreo: Canabeb chi xic lin tenamit re nak tineꞌxlokꞌoni.

¹⁴ Ut anakcuan tintakla cuiꞌchic jun raylal saꞌ a̱be̱n joꞌ ajcuiꞌ saꞌ xbe̱neb la̱ mo̱s ut saꞌ xbe̱neb ajcuiꞌ chixjunil li tenamit re nak chi joꞌcan ta̱nau nak ma̱ ani chic junak Dios saꞌ ruchichꞌochꞌ joꞌ la̱in.

¹⁵ Cui ta la̱in xcuaj, xinqꞌue raj jun nimla yajel saꞌ e̱be̱n ut xex-osoꞌ raj. Ut xexcuisi raj chi junaj cua saꞌ ruchichꞌochꞌ.

¹⁶ Abanan la̱in incꞌaꞌ xinqꞌue li yajel aꞌan saꞌ e̱be̱n xban nak xcuaj xcꞌutbal lin cuanquil che̱ru. Ut re ajcuiꞌ nak te̱ye cuesilal saꞌ ruchichꞌochꞌ.

¹⁷ Abanan la̱at riqꞌuin chixjunil aꞌin, toj yo̱cat chixnimobresinquil a̱cuib saꞌ xbe̱neb lin tenamit ut incꞌaꞌ nacacanabeb chi xic.

¹⁸ Cuulaj ta̱qꞌue retal nak saꞌ li o̱r aꞌin tintakla chak li ni̱nki sakbach hamamnak saꞌ xbe̱n li tenamit Egipto. Ma̱ jun sut e̱rilom chak chalen kꞌe cutan.

¹⁹ Joꞌcan nak takla xtzꞌapbal saꞌ rochocheb la̱ queto̱mk joꞌ ajcuiꞌ li cꞌaꞌru cuan a̱cue saꞌ cꞌaleba̱l re nak incꞌaꞌ teꞌca̱mk xban li sakbach li ta̱tꞌanekꞌ saꞌ xbe̱neb. Teꞌca̱mk xban li sakbach chixjunileb li cristian joꞌ eb ajcuiꞌ li xul cui incꞌaꞌ tzꞌaptzꞌo̱queb,” chan li Ka̱cuaꞌ Dios.

²⁰ Cuanqueb saꞌ xya̱nkeb lix tenamit laj faraón li queꞌxpa̱b li cꞌaꞌru quixye li Dios. Quilajeꞌrocsiheb lix mo̱s joꞌ ajcuiꞌ eb lix queto̱mk li cuanqueb saꞌ cꞌaleba̱l.

²¹ Aban li incꞌaꞌ queꞌxpa̱b li ra̱tin li Ka̱cuaꞌ Dios queꞌxcanabeb lix mo̱s saꞌ cꞌaleba̱l rochbeneb lix queto̱mk.

²² Ut li Ka̱cuaꞌ Dios quixye re laj Moisés: —Taksi la̱ cuukꞌ ut riqꞌuin aꞌan ta̱tꞌanekꞌ chak li sakbach saꞌ chixjunil li tenamit Egipto. Telajeꞌtꞌanekꞌ chak saꞌ xbe̱neb li cristian ut saꞌ xbe̱neb li xul joꞌ ajcuiꞌ li acui̱mk yalak bar saꞌ li tenamit Egipto, chan li Dios.

²³ Tojoꞌnak laj Moisés quixtaksi lix xukꞌ saꞌ choxa ut li Ka̱cuaꞌ Dios quixtakla li ca̱k ut li sakbach. Ni̱nki sakbach quixtakla chak li Ka̱cuaꞌ Dios saꞌ xbe̱n li tenamit.

²⁴ Nareploc li rakꞌ ca̱k ut yo̱ li sakbach. Ma̱ jun sut queꞌxcꞌul chi joꞌcan saꞌ li tenamit Egipto chalen kꞌe cutan.

²⁵ Xban li sakbach quilajeꞌosoꞌ chixjunil li cꞌaꞌak re ru li cuan chirix cab. Li sakbach quilajxtꞌani li cristian joꞌ ajcuiꞌ eb li xul. Quilajxtꞌani li acui̱mk ut quilajxpuqꞌui chixjunil li cheꞌ.

²⁶ Caꞌaj chic saꞌ li tenamit Gosén incꞌaꞌ quicuan li sakbach xban nak aran cuanqueb laj Israel.

²⁷ Tojoꞌnak laj faraón quixtakla xbokbaleb laj Moisés ut laj Aarón. Quixye reheb: —Anakcuan xinnau nak xinma̱cob. Moco li Ka̱cuaꞌ Dios ta cuan re. La̱in cuan cue ut joꞌ ajcuiꞌ lin tenamit cuanqueb re.

²⁸ Ta̱ya̱ba xcꞌabaꞌ li Ka̱cuaꞌ Dios. Tzꞌakal li xkacꞌul riqꞌuin li sakbach ut li ca̱k. Texincanab chi xic. Incꞌaꞌ chic nacuaj nak texba̱yk arin, chan.

²⁹ Laj Moisés quixye re: —Nak tincuulak chire li tenamit, aran tintaksi li cuukꞌ ut tintijok chiru li Ka̱cuaꞌ Dios. Incꞌaꞌ chic ta̱cua̱nk sakbach chi moco li ca̱k. Chi joꞌcan ta̱nau nak li Ka̱cuaꞌ Dios aꞌan laj e̱chal re li ruchichꞌochꞌ.

³⁰ La̱in ninnau nak la̱at chanchanateb ajcuiꞌ laj cꞌanjel cha̱cuu. Incꞌaꞌ nequexucua ru li Ka̱cuaꞌ Dios, chan laj Moisés.

³¹ Xban nak ac cuan ru li acui̱mk cebada xcꞌabaꞌ ut yo̱ chi atzꞌumac li lino, nak quichal li sakbach saꞌ xbe̱n quilajxtoki chixjunil ut qui-osoꞌ.

³² Aban li trigo ut li centeno ma̱cꞌaꞌ queꞌxcꞌul xban nak toj yo̱queb chi mokc.

³³ Tojoꞌnak laj Moisés qui-el riqꞌuin laj faraón. Nak cuan chire li tenamit, quixtaksi li rukꞌ ut quitijoc chiru li Ka̱cuaꞌ Dios. Ut li Dios quixchꞌanab li sakbach joꞌ ajcuiꞌ li ca̱k. Incꞌaꞌ chic xqꞌue li hab.

³⁴ Ut laj faraón quiril nak chꞌanamil. Ma̱cꞌaꞌ chic li hab ut li ca̱k ut ma̱cꞌaꞌ chic li sakbach. Quima̱cob cuiꞌchic laj faraón. Quixcacuubresi xchꞌo̱l joꞌ eb ajcuiꞌ laj cꞌanjel chiru.

³⁵ Quixcacuubresi cuiꞌchic xchꞌo̱l laj faraón ut incꞌaꞌ quixcanabeb chi xic laj Israel. Joꞌ quixye li Ka̱cuaꞌ Dios junxilaj re laj Moisés, joꞌcan quixba̱nu laj faraón.