Éxodo 7 - Li Santil hu

¹ Ut li Ka̱cuaꞌ Dios quixye re laj Moisés: —La̱at tatinqꞌue chi cꞌanjelac chokꞌ cuu̱chil chiru laj faraón. Ut laj Aarón ta̱a̱tinak chokꞌ a̱cuu̱chil la̱at.

² La̱at tatyehok re laj Aarón chixjunil li cꞌaꞌru tinye a̱cue la̱in. Ut aꞌan ta̱jalok re la̱ cua̱tin chiru laj faraón re nak aꞌan tixcanabeb chi xic laj Israel.

³ La̱in tincacuubresi xchꞌo̱l laj faraón. Nabal incuanquilal tincꞌutbesi saꞌ li tenamit Egipto.

⁴ Ut laj faraón ti̱c incꞌaꞌ ta̱abi̱nk che̱ru. La̱in tinrakok a̱tin saꞌ xbe̱neb laj Egipto. Tintakla nabal raylal saꞌ xbe̱neb re nak ta̱ru̱k tincuisiheb lin tenamit Israel saꞌ xya̱nkeb laj Egipto.

⁵ Nak tinrakok a̱tin saꞌ xbe̱neb teꞌxnau nak la̱in li Ka̱cuaꞌ Dios ut tincuisiheb lin tenamit saꞌ xya̱nkeb, chan li Dios.

⁶ Laj Moisés ut laj Aarón queꞌxba̱nu chi tzꞌakal re ru li quiyeheꞌ reheb xban li Ka̱cuaꞌ Dios.

⁷ Ca̱cꞌa̱l (80) chihab cuan re laj Moisés ut oxib rocꞌa̱l (83) chihab cuan re laj Aarón nak queꞌa̱tinac riqꞌuin laj faraón.

Lix xukꞌ laj Aarón

⁸ Ut li Ka̱cuaꞌ Dios quixye reheb laj Moisés ut laj Aarón:

⁹ —Cui laj faraón tixye e̱re “Cꞌutumak chicuu le̱ cuanquil”, tojoꞌnak la̱at, at Moisés, ta̱ye re laj Aarón “Cut la̱ xukꞌ chi rok laj faraón” ut la̱ xukꞌ ta̱sukꞌi̱k chokꞌ cꞌantiꞌ, chan li Dios.

¹⁰ Laj Moisés rochben laj Aarón nak queꞌcuulac riqꞌuin laj faraón. Ut queꞌxba̱nu joꞌ queꞌyeheꞌ re xban li Ka̱cuaꞌ Dios. Laj Aarón quixcut lix xukꞌ chiru laj faraón rochbeneb laj cꞌanjel chiru. Ut lix xukꞌ quisukꞌi chokꞌ cꞌantiꞌ.

¹¹ Ut laj faraón quixbokeb li cui̱nk li cuanqueb xnaꞌleb joꞌ eb ajcuiꞌ laj kꞌe li cuanqueb saꞌ li tenamit Egipto. Joꞌ quixba̱nu laj Aarón, joꞌcan ajcuiꞌ queꞌxba̱nu eb aꞌan.

¹² Quilajeꞌxcut lix xukꞌ chi chꞌochꞌ ut eb lix xukꞌ queꞌsukꞌi chokꞌ cꞌantiꞌ. Ut lix xukꞌ laj Aarón quixnukꞌeb lix xukꞌ eb laj kꞌe.

¹³ Aban laj faraón toj naxcacuubresi lix chꞌo̱l ut ti̱c incꞌaꞌ na-abin chiruheb, joꞌ quixye li Ka̱cuaꞌ Dios.

Li nimla raylal nak li haꞌ quisukꞌi chokꞌ quicꞌ

¹⁴ Tojoꞌnak li Ka̱cuaꞌ Dios quixye re laj Moisés: —Cau xchꞌo̱l laj faraón ut incꞌaꞌ naxcanabeb chi xic li tenamit.

¹⁵ Cuulaj tatxic chire li nimaꞌ ut aran ta̱cuoybeni laj faraón nak ta̱cuulak. Ut ta̱cꞌam saꞌ a̱cuukꞌ la̱ xukꞌ li quisukꞌi chokꞌ cꞌantiꞌ.

¹⁶ Ut ta̱ye re, “Li Ka̱cuaꞌ Dios lix Dioseb laj hebreo, xtaklan chak cue a̱cuiqꞌuin. Joꞌ aꞌin xye a̱cue: Xcanabakeb chi xic lin tenamit re nak eb aꞌan tineꞌxlokꞌoni saꞌ li chaki chꞌochꞌ. Chalen anakcuan incꞌaꞌ nacacuaj xba̱nunquil li cꞌaꞌru nacuaj chan li Dios a̱cue.

¹⁷ Anakcuan, at faraón, la̱at ta̱qꞌue retal nak aꞌan li Ka̱cuaꞌ Dios, ut kꞌaxal nim xcuanquil. La̱in tinsacꞌ li nimaꞌ Nilo riqꞌuin lin xukꞌ. Ut riqꞌuin aꞌan ta̱quicꞌokꞌ li haꞌ.

¹⁸ Ut li car li cuanqueb saꞌ li nimaꞌ teꞌca̱mk. Ta̱chuhokꞌ li nimaꞌ. Ut eb laj Egipto incꞌaꞌ chic teꞌrucꞌ li haꞌ xban nak chuhak chic.”

¹⁹ Li Dios quixye ajcuiꞌ re laj Moisés: —Ta̱ye re laj Aarón, “Yeꞌ la̱ xukꞌ saꞌ xbe̱neb li haꞌ li cuan Egipto, saꞌ xbe̱neb li nimaꞌ, li cocꞌ rok haꞌ, joꞌ eb ajcuiꞌ li palau re nak ta̱quicꞌokꞌ. Yalak bar naxocman cuiꞌ li haꞌ saꞌ li tenamit Egipto, junes quicꞌ chic ta̱tauma̱nk,” chan.

²⁰ Laj Moisés ut laj Aarón queꞌxba̱nu joꞌ quiyeheꞌ reheb xban li Ka̱cuaꞌ Dios. Chiru laj faraón rochbeneb laj cꞌanjel chiru, laj Aarón quixsacꞌ li nimaꞌ riqꞌuin lix xukꞌ. Chixjunil li haꞌ quiquicꞌoꞌ.

²¹ Quilajeꞌcam chixjunil li car saꞌ li nimaꞌ ut quichuhoꞌ li haꞌ. Incꞌaꞌ chic naru teꞌrucꞌ li haꞌ. Yalak bar saꞌ li tenamit Egipto, junes quicꞌ chic li haꞌ.

²² Joꞌ nak queꞌxcꞌutbesi lix naꞌlebeb laj Moisés ut laj Aarón, joꞌcan ajcuiꞌ queꞌxba̱nu laj kꞌe. Ut kꞌaxal cuiꞌchic quicacuuc xchꞌo̱l laj faraón. Joꞌ quixye li Ka̱cuaꞌ Dios, laj faraón chi ti̱c incꞌaꞌ qui-abin chiru.

²³ Ut laj faraón ma̱cꞌaꞌ naraj re li cꞌaꞌru yo̱ chixcꞌulbal. Quixsukꞌisi rib ut co̱ saꞌ rochoch.

²⁴ Xban nak incꞌaꞌ chic naru teꞌrucꞌ li haꞌ saꞌ li nimaꞌ, chixjunileb laj Egipto quilajeꞌxbec xhaꞌeb chire li nimaꞌ.

²⁵ Cuukub cutan tzꞌakal quicuan chokꞌ quicꞌ li haꞌ xban li Ka̱cuaꞌ Dios.