Éxodo 40 - Li Santil hu

Laj Moisés quixxakab li tabernáculo

¹ Li Ka̱cuaꞌ Dios quixye re laj Moisés:

² —Saꞌ xticlajic li xbe̱n po re li chihab te̱yi̱b li tabernáculo. Ut aran te̱chꞌutub e̱rib re tine̱lokꞌoni.

³ Chi saꞌ li tabernáculo te̱qꞌue li Lokꞌlaj Ca̱x li cꞌu̱lanbil cuiꞌ li laje̱b chi chakꞌrab. Ut te̱tas xsaꞌ riqꞌuin jun li tꞌicr re xrambal li Lokꞌlaj Ca̱x.

⁴ Te̱rocsi li xnaꞌaj li candil ut te̱cꞌochoxiheb li candil saꞌ xbe̱n.

⁵ Li artal oro, li re cꞌatoc pom, te̱qꞌue chiru li tꞌicr li naramoc re li Lokꞌlaj Ca̱x. Ut te̱tzꞌap li oqueba̱l re li tabernáculo riqꞌuin junak nimla tꞌicr.

⁶ Li artal re xcꞌatbal li mayej te̱qꞌue chiru li oqueba̱l re li tabernáculo.

⁷ Te̱qꞌue ajcuiꞌ li pila saꞌ xyi li artal riqꞌuin li oqueba̱l re li tabernáculo. Ut te̱qꞌue haꞌ chi saꞌ.

⁸ Te̱qꞌue li cheꞌ chiru li ruꞌuj neba̱l ut te̱sut saꞌ tꞌicr ut te̱tzꞌap li oqueba̱l riqꞌuin junak nimla tꞌicr.

⁹ Ta̱cꞌam li aceite ut ta̱yul chiru li tabernáculo. Ut telaja̱yul chiru chixjunil li cuan chi saꞌ. Ut ta̱kꞌaxtesi saꞌ cuukꞌ chixjunil aꞌan re nak santobresinbilak chic.

¹⁰ Ta̱yul li aceite chiru li artal re li cꞌatbil mayej. Ut ta̱yul ajcuiꞌ chiru chixjunil li nacꞌanjelac re li artal. Ta̱kꞌaxtesiheb saꞌ cuukꞌ re nak santobresinbilak chic.

¹¹ Ta̱yul li aceite chiru li pila joꞌ ajcuiꞌ chiru lix cꞌochleba̱l ut ta̱kꞌaxtesi saꞌ cuukꞌ.

¹² Tojoꞌnak ta̱cꞌameb laj Aarón rochbeneb li ralal chiru li oqueba̱l re li tabernáculo. Ut aran ta̱chꞌajeb riqꞌuin haꞌ.

¹³ Ta̱qꞌue li rakꞌ laj Aarón chirix, li sicꞌbil ru inban. Ta̱yul li aceite saꞌ xjolom ut ta̱kꞌaxtesi saꞌ cuukꞌ re nak naru ta̱cꞌanjelak chicuu chokꞌ aj tij.

¹⁴ Ta̱qꞌueheb ajcuiꞌ li rakꞌeb li ralal.

¹⁵ Ta̱yul ajcuiꞌ li aceite saꞌ xjolomeb joꞌ xaba̱nu re laj Aarón lix yucuaꞌeb. Aꞌan retalil nak eb aꞌan teꞌcꞌanjelak ajcuiꞌ chicuu chokꞌ aj tij. Ut aꞌan ajcuiꞌ li retalil nak mokon chic eb li ralal xcꞌajol joꞌ eb ajcuiꞌ li ri xmam teꞌcꞌanjelak chicuu chokꞌ aj tij chalen kꞌe cutan, chan li Dios re laj Moisés.

¹⁶ Joꞌ quixye li Dios, joꞌcan quixba̱nu laj Moisés.

¹⁷ Saꞌ xticlajic li xbe̱n po re li xcab chihab, queꞌxyi̱b li tabernáculo.

¹⁸ Laj Moisés quiyi̱ban re li tabernáculo. Quixyi̱b li xnaꞌaj li rokechal li tabernáculo ut quixxakabeb li okech saꞌ xbe̱n. Quixqꞌueheb li cheꞌ chi kꞌekꞌo chiru ut quixxakabeb ajcuiꞌ li cheꞌ li najt xteram li queꞌxtꞌuyub cuiꞌ li tꞌicr.

¹⁹ Quixhel li xtꞌicrul li tabernáculo saꞌ xbe̱n li cheꞌ ut quixtzꞌap chi us riqꞌuin rix li xul. Quixba̱nu joꞌ quiyeheꞌ re xban li Dios.

²⁰ Ut quixqꞌue li laje̱b chi chakꞌrab chi saꞌ li Lokꞌlaj Ca̱x ut quixyi̱b ajcuiꞌ li cheꞌ re xpakonquil. Quixqꞌue xtzꞌapbal re li Lokꞌlaj Ca̱x, li “Naꞌajej li Nacuyeꞌ cuiꞌ li Ma̱c” xcꞌabaꞌ.

²¹ Laj Moisés quirocsi li Lokꞌlaj Ca̱x chi saꞌ li tabernáculo ut quixqꞌue jun li nimal tꞌicr re xrambal li Lokꞌlaj Ca̱x. Quixba̱nu joꞌ quixye li Dios.

²² Quirocsi li me̱x chi saꞌ li tabernáculo ut quixqꞌue saꞌ lix nim ukꞌ chiru li tꞌicr li naramoc re li Lokꞌlaj Ca̱x.

²³ Quixtus li caxlan cua saꞌ xbe̱n li me̱x chiru li Dios. Laj Moisés quixba̱nu joꞌ quixye li Dios.

²⁴ Quirocsi ajcuiꞌ li xnaꞌaj li candil, ut quixqꞌue saꞌ lix tzꞌe saꞌ xcaꞌyaba̱l li me̱x.

²⁵ Quixloch li candil ut quixcꞌochoxiheb saꞌ xnaꞌaj chiru li Dios. Laj Moisés quixba̱nu joꞌ quixye li Dios.

²⁶ Quixqꞌue li artal oro chiru li tꞌicr li naramoc re li Lokꞌlaj Ca̱x.

²⁷ Ut quixcꞌat li sununquil pom saꞌ xbe̱n joꞌ quixye li Dios.

²⁸ Quixqꞌue jun li nimla tꞌicr saꞌ li oqueba̱l re li tabernáculo.

²⁹ Ut quixqꞌue li artal re li cꞌatbil mayej chiru li oqueba̱l re li tabernáculo. Ut aran quixcꞌat li mayej ut quixmayeja ajcuiꞌ li ru li acui̱mk joꞌ quiyeheꞌ re xban li Dios.

³⁰ Quixqꞌue li pila saꞌ xyi li artal riqꞌuin li oqueba̱l re li tabernáculo ut quixqꞌue li haꞌ chi saꞌ re chꞌajoc.

³¹ Ut aran naxchꞌaj li rok ut li rukꞌ laj Moisés. Ut nachꞌajoc ajcuiꞌ laj Aarón joꞌ eb ajcuiꞌ li ralal.

³² Xbe̱n cua nequeꞌxchꞌaj li rok rukꞌ, tojoꞌnak nequeꞌoc saꞌ li tabernáculo. Joꞌcan ajcuiꞌ nequeꞌxba̱nu nak nequeꞌxic cuan cuiꞌ li artal. Xbe̱n cua nequeꞌchꞌajoc joꞌ quixye li Dios re laj Moisés.

³³ Quixqꞌue li cheꞌ chiru li ruꞌuj neba̱l li tabernáculo joꞌ ajcuiꞌ li artal ut quixsut saꞌ tꞌicr. Quixtzꞌap li oqueba̱l riqꞌuin jun nimla tꞌicr. Joꞌcaꞌin nak quixchoy lix cꞌanjel laj Moisés.

Li tabernáculo sutsu saꞌ li chok

³⁴ Quicube chak li chok ut quixtzꞌap li tabernáculo. Ut quinujac li tabernáculo riqꞌuin xlokꞌal li Dios.

³⁵ Laj Moisés incꞌaꞌ naru na-oc xban nak sutsu saꞌ chok li tabernáculo, ut nujenak riqꞌuin xlokꞌal li Dios.

³⁶ Nak natakeꞌ li chok eb laj Israel nequeꞌoc cuiꞌchic chi xic.

³⁷ Nak incꞌaꞌ natakeꞌ li chok incꞌaꞌ nequeꞌxic. Toj nak natakeꞌ li chok, tojoꞌnak nequeꞌxic.

³⁸ Chi joꞌcan li chok li quitakla̱c xban li Dios cuan saꞌ xbe̱n li tabernáculo chi cutan. Ut chi kꞌek nacꞌutun joꞌ xam. Li chok yo̱ chi cꞌamoc be chiruheb laj Israel nak yo̱queb chi xic toj retal queꞌcuulac.