Éxodo 39 - Li Santil hu

¹ Queꞌxyi̱b li rakꞌeb laj tij li teꞌxqꞌue chirix nak teꞌcꞌanjelak saꞌ li tabernáculo. Queꞌxyi̱b li rakꞌ riqꞌuin li nokꞌ azul, li nokꞌ púrpura ut li nokꞌ cak. Ut queꞌxyi̱b ajcuiꞌ li rakꞌ laj Aarón li xbe̱nil aj tij joꞌ quiyeheꞌ re laj Moisés xban li Ka̱cuaꞌ.

² Queꞌxyi̱b li efod riqꞌuin oro, ut riqꞌuin li nokꞌ azul, li nokꞌ púrpura ut li nokꞌ cak joꞌ ajcuiꞌ li bakbil nokꞌ lino.

³ Queꞌxten li oro. Chanchan li nokꞌ nak queꞌxset chi cocꞌ ru re teꞌxqꞌue xsahob ru li tꞌicr yi̱banbil riqꞌuin lino ut riqꞌuin li nokꞌ azul, li nokꞌ púrpura ut li nokꞌ cak, ut cha̱bil nak queꞌxyi̱b.

⁴ Ut queꞌxyi̱b ajcuiꞌ cuib lix cꞌa̱mal li efod re nak teꞌxcꞌul rib chi us saꞌ xbe̱n xtel.

⁵ Queꞌxyi̱b ajcuiꞌ lix bacꞌbal li efod ut juntakꞌe̱t xyi̱banquil riqꞌuin li efod nak queꞌxqꞌue. Queꞌxyi̱b riqꞌuin oro ut riqꞌuin li nokꞌ azul, li nokꞌ púrpura ut li nokꞌ cak ut riqꞌuin li bakbil nokꞌ lino joꞌ quiyeheꞌ re laj Moisés xban li Ka̱cuaꞌ.

⁶ Queꞌxyi̱b cuib li pec ónice ut queꞌxletz chiru li oro. Queꞌxtzꞌi̱ba lix cꞌabaꞌeb li cablaju chi ralal laj Israel chiru li cuib chi pec aꞌin.

⁷ Queꞌxqꞌue li pec aꞌan saꞌ xbe̱n xtel li efod re xjulticanquil chiru li Ka̱cuaꞌ li ralal xcꞌajol laj Israel, joꞌ quiyeheꞌ re laj Moisés xban li Ka̱cuaꞌ.

⁸ Ut queꞌxyi̱b ajcuiꞌ li pectoral chi cha̱bil. Juntakꞌe̱t xyi̱banquil riqꞌuin li efod queꞌxqꞌue. Queꞌxyi̱b riqꞌuin oro, ut riqꞌuin li nokꞌ azul, li nokꞌ púrpura ut li nokꞌ cak ut li bakbil nokꞌ lino.

⁹ Queꞌxyi̱b ut queꞌxbas saꞌ xyi ut ca̱ xucu̱t quicana. Cuib xcaꞌcꞌa̱l (22) centímetro saꞌ xca̱ pacꞌalil.

¹⁰ Queꞌxletz chiru ca̱hib tzol li terto̱quil pec. Saꞌ li xbe̱n tzol queꞌxqꞌue oxib li cha̱bil pec. Queꞌxqꞌue jun li sardio, jun li topacio, ut jun li carbunclo.

¹¹ Saꞌ li xcab tzol queꞌxqꞌue jun li esmeralda, jun li zafiro, ut jun li diamante.

¹² Saꞌ li rox tzol queꞌxqꞌue jun li jacinto, jun li ágata ut jun li amatista.

¹³ Saꞌ li xca̱ tzol queꞌxqꞌue jun li berilo, jun li ónice ut jun li jaspe. Chixjunileb li cha̱bil pec aꞌin queꞌxletz chiru li oro.

¹⁴ Cablaju li pec li queꞌxqꞌue xban nak cablaju xte̱paleb laj Israel. Chiru li junju̱nk chi pec aꞌan queꞌxtzꞌi̱ba lix cꞌabaꞌ chixju̱nkaleb li ralal xcꞌajol laj Israel. Juchꞌbil queꞌxba̱nu nak queꞌxtzꞌi̱ba lix cꞌabaꞌeb chiru li pec aꞌan joꞌ nak nequeꞌxyi̱b jun li chꞌi̱chꞌ re li sello.

¹⁵ Ut queꞌxyi̱b ajcuiꞌ cuib lix cꞌa̱mal li pectoral riqꞌuin tzꞌakal oro ut tzꞌulbil ru nak queꞌxyi̱b.

¹⁶ Queꞌxyi̱b cuib li argollas riqꞌuin oro ut queꞌxletz saꞌ xuc saꞌ xcaꞌ pacꞌalil li nacana takecꞌ.

¹⁷ Queꞌxnumsi li cꞌa̱m oro saꞌ li argollas li cuan saꞌ xuc saꞌ xcaꞌ pacꞌalil li pectoral.

¹⁸ Lix cꞌa̱mal li pectoral queꞌxchap rib riqꞌuin li ónice li cuan saꞌ xbe̱n xtel li efod saꞌ li jun pere̱l li nacana chiru.

¹⁹ Queꞌxyi̱b cuib chic li argollas riqꞌuin oro ut queꞌxletz saꞌ xxuc li pectoral xcaꞌ pacꞌalil li nacana takꞌa. Queꞌxletz chirix li pectoral re nak chiru li efod ta̱cana̱k.

²⁰ Queꞌxyi̱b cuib chic li argollas oro ut queꞌxletz chiru li efod takecꞌ caꞌchꞌin saꞌ xbe̱n xcꞌa̱mal xsaꞌ.

²¹ Ut queꞌxbacꞌ riqꞌuin jun cꞌa̱m azul saꞌ li argollas re xchapbal li pectoral riqꞌuin li efod re nak li pectoral tixchap rib chi us riqꞌuin li efod ut incꞌaꞌ ta̱ecꞌa̱nk saꞌ xnaꞌaj. Queꞌxba̱nu joꞌ quiyeheꞌ re laj Moisés xban li Ka̱cuaꞌ.

²² Queꞌxyi̱b riqꞌuin tꞌicr azul li rakꞌ li naqꞌueman saꞌ xbe̱n li saki túnica.

²³ Queꞌxcanab lix cux chi teto ut queꞌxqꞌue jun li tꞌicr chok xta lix cux re nak incꞌaꞌ ta̱pejekꞌ nak teꞌrocsi.

²⁴ Queꞌxqꞌue li granada chire li rakꞌ chokꞌ xsahob ru yi̱banbil riqꞌuin nokꞌ azul, nokꞌ púrpura ut nokꞌ cak ut li bakbil nokꞌ lino.

²⁵ Queꞌxyi̱b ajcuiꞌ li cocꞌ campana riqꞌuin tzꞌakal oro. Ut chire li tꞌicr queꞌxqꞌue jun li granada, jun li campana, jun chic li granada, ut jun chic li campana.

²⁶ Joꞌcan nak queꞌxyi̱b li rakꞌeb laj tij. Queꞌxqꞌue chire jun li campana ut jun li granada, jun chic li campana ut jun chic li granada. Joꞌcan nak queꞌxyi̱b li rakꞌeb laj tij li teꞌxqꞌue chirix nak ocak reheb chi cꞌanjelac saꞌ li tabernáculo.

²⁷ Joꞌcaꞌin nak queꞌxquem li rakꞌ laj Aarón joꞌqueb ajcuiꞌ li ralal riqꞌuin li cha̱bil nokꞌ lino.

²⁸ Joꞌcan ajcuiꞌ li mitra li teꞌxqꞌue saꞌ xjolom ut lix sahob ru joꞌ ajcuiꞌ li cue̱x li nequeꞌxqꞌue chi saꞌ li rakꞌeb. Chixjunil aꞌan queꞌxyi̱b riqꞌuin li bakbil nokꞌ lino.

²⁹ Queꞌxyi̱b lix bacꞌbal xsaꞌ riqꞌuin li bakbil nokꞌ lino, li nokꞌ azul, li nokꞌ púrpura, li nokꞌ cak ut queꞌxqꞌue lix sahob ru joꞌ quiyeheꞌ re laj Moisés xban li Ka̱cuaꞌ.

³⁰ Queꞌxyi̱b ajcuiꞌ jun chꞌina pere̱l tzꞌakal oro ut juchꞌbil queꞌxba̱nu nak queꞌxtzꞌi̱ba chiru li a̱tin li naxye “Santilal Chiru li Ka̱cuaꞌ”.

³¹ Ut riqꞌuin jun cꞌa̱m azul queꞌxbacꞌ li oro chiru li mitra li teꞌxqꞌue saꞌ xjolomeb joꞌ quiyeheꞌ re laj Moisés xban li Ka̱cuaꞌ.

³² Joꞌcaꞌin nak queꞌrakeꞌ xyi̱banquil chixjunil li cꞌaꞌru ta̱cꞌanjelak re xyi̱banquil li tabernáculo. Eb laj Israel queꞌxba̱nu chixjunil chi tzꞌakal re ru joꞌ quiyeheꞌ re laj Moisés xban li Ka̱cuaꞌ.

³³ Ut queꞌxkꞌaxtesi re laj Moisés chixjunil li cꞌaꞌru ta̱cꞌanjelak re xyi̱banquil li tabernáculo. Queꞌxkꞌaxtesi re chixjunil li ta̱cꞌanjelak saꞌ li tabernáculo joꞌ li gancho, joꞌqueb ajcuiꞌ li tzꞌalam cheꞌ ut li cheꞌ li teꞌxqꞌue chi kꞌekꞌo, joꞌ ajcuiꞌ li okech ut lix naꞌajeb li teꞌxqꞌue cuiꞌ.

³⁴ Queꞌxkꞌaxtesi ajcuiꞌ li rix li carner li bonbil chi caki bon, joꞌ ajcuiꞌ li rixeb li xul li nacuan saꞌ haꞌ, joꞌ ajcuiꞌ li tꞌicr li ta̱cꞌanjelak chokꞌ tas.

³⁵ Queꞌxkꞌaxtesi ajcuiꞌ li Lokꞌlaj Ca̱x ut li cheꞌ re xpakonquil joꞌ ajcuiꞌ lix tzꞌapbal re,

³⁶ joꞌ ajcuiꞌ li me̱x rochben li secꞌ ut li mayejanbil caxlan cua li nequeꞌxqꞌue saꞌ li me̱x.

³⁷ Queꞌxkꞌaxtesi li candelero rochben lix naꞌajeb li candil joꞌqueb ajcuiꞌ li chꞌi̱chꞌ li ta̱cꞌanjelak re xyi̱banquil lix mechil, joꞌ ajcuiꞌ li aceite li ta̱cꞌanjelak chokꞌ xyaꞌal li candil.

³⁸ Queꞌxkꞌaxtesi li artal li yi̱banbil riqꞌuin oro, joꞌ ajcuiꞌ li aceite li naqꞌueman saꞌ xbe̱n li teꞌkꞌaxtesi̱k chi cꞌanjelac chiru li Ka̱cuaꞌ, joꞌ ajcuiꞌ li sununquil incienso, joꞌ ajcuiꞌ li tꞌicr li teꞌxqꞌue saꞌ li oqueba̱l.

³⁹ Queꞌxkꞌaxtesi ajcuiꞌ li artal yi̱banbil riqꞌuin bronce, rochben li chꞌi̱chꞌ li hopox ru li yi̱banbil riqꞌuin bronce joꞌ ajcuiꞌ li cheꞌ re xpakonquil, joꞌ ajcuiꞌ chixjunil li ta̱cꞌanjelak saꞌ li artal, joꞌ ajcuiꞌ li pila ut lix naꞌaj li teꞌxqꞌue cuiꞌ.

⁴⁰ Ut queꞌxkꞌaxtesi ajcuiꞌ li tꞌicr li ta̱cꞌanjelak re xtzꞌapbal li neba̱l joꞌ ajcuiꞌ li okech ut lix naꞌajeb li teꞌxqꞌue cuiꞌ, joꞌ ajcuiꞌ li tꞌicr li teꞌxqꞌue saꞌ li oqueba̱l re li neba̱l, joꞌqueb ajcuiꞌ li cꞌa̱m ut li chꞌi̱chꞌ li ta̱chapok re li cꞌa̱m saꞌ chꞌochꞌ. Queꞌxkꞌaxtesi chixjunil li cꞌaꞌru ta̱cꞌanjelak saꞌ li tabernáculo.

⁴¹ Queꞌxkꞌaxtesi ajcuiꞌ li rakꞌeb laj tij li teꞌrocsi nak teꞌoc chi cꞌanjelac saꞌ li tabernáculo. Queꞌxkꞌaxtesi li rakꞌ laj Aarón lix be̱nil aj tij joꞌqueb ajcuiꞌ li rakꞌeb li ralal li teꞌrocsi nak teꞌoc chi cꞌanjelac chokꞌ aj tij.

⁴² Eb laj Israel queꞌxba̱nu chixjunil chi tzꞌakal re ru joꞌ quiyeheꞌ re laj Moisés xban li Ka̱cuaꞌ.

⁴³ Nak quiril nak queꞌxba̱nu chixjunil chi tzꞌakal joꞌ quixye reheb, laj Moisés quixtzꞌa̱ma chiru li Dios nak ta̱rosobtesiheb.