Éxodo 38 - Li Santil hu

¹ Queꞌxyi̱b ajcuiꞌ li artal riqꞌuin li cheꞌ acacia li teꞌxcꞌat cuiꞌ li xul li teꞌxmayeja. Ca̱ xucu̱t nak queꞌxyi̱b. Cuib metro riqꞌuin o̱b xcaꞌcꞌa̱l (25) centímetro xnimal ru ut cuib metro riqꞌuin o̱b xcaꞌcꞌa̱l (25) centímetro li rok. Ut o̱b xcaꞌcꞌa̱l (25) centímetro li xteram.

² Queꞌxyi̱b ca̱hib li xucub ut queꞌxqꞌue saꞌ lix ca̱ xucu̱til li artal. Chixjunil li artal rochben li xucub junaj ru nak queꞌxyi̱b ut queꞌxletz li bronce chiru.

³ Queꞌxyi̱b ajcuiꞌ riqꞌuin bronce chixjunil li cꞌaꞌak re ru li ta̱cꞌanjelak saꞌ li artal re li mayejac. Queꞌxyi̱b li chꞌi̱chꞌ re xxocbal li cha ut li pala. Queꞌxyi̱b ajcuiꞌ li ni̱nki secꞌ re xxocbal li quicꞌ joꞌ ajcuiꞌ li gancho re xchapbal li tib joꞌ ajcuiꞌ lix naꞌaj li ru xam.

⁴ Queꞌxyi̱b ajcuiꞌ riqꞌuin bronce lix naꞌaj li xam. Hopox ru queꞌxqꞌue. Chi saꞌ li artal saꞌ xyitok queꞌxqꞌue li chꞌi̱chꞌ aꞌan.

⁵ Ut queꞌxyi̱b ca̱hib li argollas riqꞌuin bronce ut queꞌxqꞌue saꞌ xca̱ xucu̱til li tusbil chꞌi̱chꞌ re teꞌxnumsi cuiꞌ li cheꞌ re xpakonquil li artal.

⁶ Queꞌxyi̱b cuib li cheꞌ ti̱c rix ut queꞌxletz li bronce chirix.

⁷ Queꞌxnumsi li cheꞌ aꞌan saꞌ eb li argollas li cuan saꞌ xcaꞌ pacꞌalil li artal re nak ta̱ru̱k xpakonquil. Riqꞌuin tzꞌalam cheꞌ queꞌxyi̱b ut hopho xsaꞌ queꞌxqꞌue li artal nak queꞌxyi̱b.

⁸ Riqꞌuin li lem bronce li quicꞌanjelac chiruheb li ixk li queꞌcꞌanjelac chire li oqueba̱l re li tabernáculo, queꞌxyi̱b jun li pila xnaꞌaj li haꞌ joꞌ ajcuiꞌ lix naꞌaj li teꞌxqꞌue cuiꞌ.

⁹ Queꞌxyi̱b ajcuiꞌ li neba̱l re li tabernáculo. Queꞌxsut riqꞌuin tꞌicr yi̱banbil riqꞌuin li bakbil nokꞌ lino. Saꞌ li jun pacꞌal li nacana saꞌ li sur o̱b roxcꞌa̱l (65) metro xnimal rok li tꞌicr queꞌxqꞌue.

¹⁰ Queꞌxyi̱b junmay li okech riqꞌuin bronce ut junmay lix naꞌajeb li teꞌxqꞌue cuiꞌ. Queꞌxyi̱b ajcuiꞌ li ganchos ut li argollas riqꞌuin plata li teꞌxchap cuiꞌ li tꞌicr.

¹¹ Ut joꞌcan cuiꞌchic queꞌxba̱nu saꞌ li jun pacꞌal chic li nacana saꞌ li norte. O̱b roxcꞌa̱l (65) metro xnimal rok li tꞌicr li teꞌxqꞌue aran. Queꞌxyi̱b riqꞌuin bronce junmay li okech ut junmay lix naꞌajeb teꞌxqꞌue cuiꞌ. Ut riqꞌuin plata queꞌxyi̱b li ganchos ut li argollas li teꞌxchap cuiꞌ li tꞌicr.

¹² Queꞌxyi̱b ajcuiꞌ li tꞌicr li teꞌxqꞌue saꞌ li jun pacꞌal chic li na-oc cuiꞌ li sakꞌe. Cuib xcaꞌcꞌa̱l (42) metro riqꞌuin media lix nimal rok. Queꞌxyi̱b laje̱b li okech ut laje̱b li xnaꞌajeb li teꞌxqꞌue cuiꞌ. Queꞌxyi̱b li ganchos ut li argollas riqꞌuin plata.

¹³ Ut joꞌcan cuiꞌchic queꞌxba̱nu saꞌ li jun pacꞌal chic li na-el cuiꞌ chak li sakꞌe. Cuib xcaꞌcꞌa̱l (42) metro riqꞌuin media xnimal rok li tꞌicr li queꞌxqꞌue aran.

¹⁴ Chixcꞌatk li oqueba̱l queꞌxqꞌue oxib li okech ut oxib lix naꞌajeb li teꞌxqꞌue cuiꞌ. Cuukub metro xnimal rok li tꞌicr li teꞌxqꞌue aran.

¹⁵ Ut saꞌ li jun pacꞌal chic re li oqueba̱l queꞌxyi̱b li oxib chi okech ut oxib lix naꞌajeb li teꞌxqꞌue cuiꞌ. Li tꞌicr li teꞌxqꞌue chiru li oxib chi okech, aꞌan cuukub metro xnimal rok.

¹⁶ Chixjunil li tꞌicr li teꞌxsut cuiꞌ li neba̱l re li tabernáculo, aꞌan yi̱banbil riqꞌuin li bakbil nokꞌ lino.

¹⁷ Queꞌxyi̱b riqꞌuin bronce lix naꞌajeb li teꞌqꞌuehekꞌ cuiꞌ li okech. Ut queꞌxyi̱b riqꞌuin plata li ganchos ut li argollas ut queꞌxletz li plata chirix li okech. Ut queꞌxletz ajcuiꞌ plata saꞌ xjolomeb li okech.

¹⁸ Cha̱bil xyi̱banquil li tꞌicr li teꞌxqꞌue saꞌ li oqueba̱l re li neba̱l. Queꞌxyi̱b riqꞌuin li nokꞌ azul, li nokꞌ púrpura ut li nokꞌ cak, joꞌ ajcuiꞌ li bakbil nokꞌ lino. Bele̱b metro xnimal rok li tꞌicr ut cuib metro riqꞌuin o̱b xcaꞌcꞌa̱l (25) centímetro lix teram. Juntakꞌe̱t xteram riqꞌuin li tꞌicr re li neba̱l.

¹⁹ Queꞌxyi̱b ajcuiꞌ riqꞌuin bronce ca̱hib li okech joꞌ ajcuiꞌ lix naꞌajeb li teꞌqꞌuehekꞌ cuiꞌ. Ut queꞌxyi̱b riqꞌuin plata li ganchos ut li argollas. Ut queꞌxletz ajcuiꞌ plata saꞌ xjolomeb li okech.

²⁰ Queꞌxyi̱b riqꞌuin bronce chixjunil li chꞌi̱chꞌ li ta̱chapok re saꞌ chꞌochꞌ lix cꞌa̱mal li tabernáculo joꞌqueb ajcuiꞌ lix cꞌa̱mal li okech li cuan saꞌ li neba̱l.

²¹ Laj Moisés quixye reheb nak teꞌxtzꞌi̱ba retalil chixjunil li quicꞌanjelac chiruheb re xyi̱banquil lix tabernáculo li Ka̱cuaꞌ. Eb laj levita queꞌxtzꞌi̱ba retalil ut laj Itamar li ralal laj Aarón, aꞌan li quijolomin reheb.

²² Laj Bezaleel quixba̱nu chixjunil li quiyeheꞌ re laj Moisés xban li Ka̱cuaꞌ. Laj Bezaleel, aꞌan li ralal laj Uri. Laj Uri, aꞌan li ralal laj Hur xcomoneb li ralal xcꞌajol laj Judá.

²³ Laj Aholiab, aꞌan li quitenkꞌan re laj Bezaleel. Laj Aholiab, aꞌan li ralal laj Ahisamac xcomoneb li ralal xcꞌajol laj Dan. Aꞌan aj tenol chꞌi̱chꞌ ut naxnau ajcuiꞌ quemoc tꞌicr. Ut naxnau xqꞌuebal xsahob ru li tꞌicr riqꞌuin li cha̱bil lino, ut li nokꞌ azul, li nokꞌ púrpura ut li nokꞌ cak.

²⁴ Chixjunil li oro li quicꞌanjelac re li tabernáculo, aꞌan mayejanbil xbaneb laj Israel. Lix qꞌuial li oro li queꞌxqꞌue, aꞌan cuib mil libra riqꞌuin jun ciento riqꞌuin oꞌlaju roꞌcꞌa̱l libra (2,195) joꞌ nequeꞌbisoc cuiꞌ saꞌ li tabernáculo.

²⁵ Li plata li queꞌxqꞌue, aꞌan cuukub mil riqꞌuin o̱b ciento libra riqꞌuin mero ciento (7,550) joꞌ nequeꞌbisoc saꞌ li tabernáculo.

²⁶ Chixjunileb li cuanqueb junmay chihab reheb, aꞌan cuanqueb cuakib ciento riqꞌuin oxib mil riqꞌuin o̱b ciento riqꞌuin laje̱b roxcꞌa̱l (603,550). Li junju̱nk chi cristian queꞌxqꞌue o̱b roxcꞌa̱l (45) libra li plata joꞌ nequeꞌbisoc saꞌ li tabernáculo.

²⁷ Cuukub mil libra riqꞌuin o̱b ciento libra li plata (7,500) quicꞌanjelac re xyi̱banquil li jun ciento chi xnaꞌajeb li teꞌqꞌuehekꞌ cuiꞌ li okech re li tabernáculo. Ut oꞌlaju xca̱cꞌa̱l libra li plata quicꞌanjelac re xyi̱banquil li junju̱nk lix naꞌajeb li okech.

²⁸ Mero ciento libra chic li plata qui-elaꞌan ut riqꞌuin aꞌan queꞌxyi̱b li argollas ut li ganchos li queꞌxqꞌue chiru li okech li teꞌxqꞌue chire li oqueba̱l.

²⁹ Li bronce li queꞌxmayeja, aꞌan o̱b mil libras riqꞌuin oxib ciento riqꞌuin laje̱b libras (5,310).

³⁰ Riqꞌuin li bronce aꞌan, queꞌxyi̱b lix naꞌajeb li teꞌxqꞌue cuiꞌ li okech re li oqueba̱l re li tabernáculo. Ut queꞌxyi̱b ajcuiꞌ li artal ut li xnaꞌaj li ru xam joꞌqueb ajcuiꞌ chixjunil li secꞌ li teꞌcꞌanjelak saꞌ li artal.

³¹ Ut queꞌxyi̱b lix naꞌajeb li okech li teꞌxqꞌue saꞌ li neba̱l ut saꞌ li oqueba̱l. Ut queꞌxyi̱b ajcuiꞌ li chꞌi̱chꞌ li ta̱chapok re saꞌ chꞌochꞌ lix cꞌa̱mal li tabernáculo, joꞌ ajcuiꞌ li chꞌi̱chꞌ li ta̱chapok re lix cꞌa̱mal li okech li sutsu cuiꞌ li neba̱l.