Éxodo 37 - Li Santil hu

¹ Ut laj Bezaleel quijolomin reheb nak queꞌxyi̱b li Lokꞌlaj Ca̱x riqꞌuin li cha̱bil cheꞌ acacia. Jun metro riqꞌuin laje̱b centímetro li rok queꞌxqꞌue. Ut o̱b xca̱cꞌa̱l (65) centímetro xnimal li ru ut o̱b xca̱cꞌa̱l centímetro xteram queꞌxqꞌue.

² Ut queꞌxletz li tzꞌakal oro chirix ut chi saꞌ ut queꞌxqꞌue ajcuiꞌ lix sahob ru yi̱banbil riqꞌuin oro chire li ca̱x bar ta̱hila̱nk cuiꞌ lix tzꞌapbal re.

³ Queꞌxyi̱b ca̱hib li argollas oro ut queꞌxletz saꞌ xxuc li ca̱x, cuib saꞌ jun pacꞌal ut li cuib chic saꞌ li jun pacꞌal chic.

⁴ Queꞌxyi̱b cuib li cheꞌ ti̱c rix yi̱banbil riqꞌuin li cha̱bil cheꞌ acacia ut queꞌxletz oro chirix.

⁵ Queꞌxnumsi li cheꞌ aꞌan saꞌ li argollas li letzlo saꞌ xca̱ xucu̱til li ca̱x re nak riqꞌuin li cheꞌ aꞌan teꞌxpako li ca̱x.

⁶ Ut queꞌxyi̱b ajcuiꞌ jun xtzꞌapbal re li ca̱x riqꞌuin tzꞌakal oro jun metro riqꞌuin laje̱b centímetro xnimal rok ut o̱b xca̱cꞌa̱l (65) centímetro xnimal ru.

⁷ Ut queꞌxyi̱b cuib li querubines chanchaneb li ángel riqꞌuin oro tenbil riqꞌuin martillo. Ut queꞌxqꞌue saꞌ xbe̱n lix tzꞌapbal re li ca̱x.

⁸ Queꞌxqꞌue junju̱nk saꞌ li ju̱nk pacꞌal. Li cuib chi querubines rochben lix tzꞌapbal re li ca̱x jun ajcuiꞌ ru nak queꞌxyi̱b.

⁹ Eb li querubines queꞌxcaꞌya ribeb ut yo̱queb chi iloc saꞌ xbe̱n lix tzꞌapbal re li ca̱x. Lix xiqꞌueb queꞌxhel rib ut queꞌxtzꞌap xbe̱n li ca̱x.

¹⁰ Queꞌxyi̱b ajcuiꞌ li me̱x riqꞌuin li cheꞌ acacia. Laje̱b roꞌcꞌa̱l centímetro li rok (90) ut o̱b roxcꞌa̱l (65) centímetro li ru ut oꞌlaju xca̱cꞌa̱l (75) centímetro li xteram.

¹¹ Ut queꞌxletz li tzꞌakal oro chiru ut queꞌxyi̱b ajcuiꞌ lix sahob ru chire yi̱banbil riqꞌuin oro.

¹² Ut saꞌ xca̱ xucu̱til li me̱x queꞌxletz li cheꞌ cuukub centímetro xnimal ru. Ut chire li cheꞌ aꞌan, queꞌxqꞌue li tzꞌakal oro chokꞌ xsahob ru ut queꞌxletz saꞌ xxuc li me̱x.

¹³ Ut queꞌxyi̱b ca̱hib li argollas oro ut queꞌxletz saꞌ xca̱ xucu̱til li me̱x bar cuanqueb cuiꞌ li rok.

¹⁴ Li argollas queꞌqꞌueheꞌ rubel li cheꞌ li cuukub centímetro xnimal ru re teꞌxnumsi cuiꞌ li cheꞌ li ti̱c rix re xpakonquil li me̱x.

¹⁵ Ut queꞌxyi̱b cuib li cheꞌ ti̱c rix re teꞌxpako cuiꞌ li me̱x ut queꞌxletz li oro chirix.

¹⁶ Ut queꞌxyi̱b ajcuiꞌ li secꞌ li ta̱cꞌanjelak saꞌ li me̱x aꞌan. Queꞌxyi̱b riqꞌuin tzꞌakal oro li xar, li plato, ut li cuchara joꞌ ajcuiꞌ li ni̱nki secꞌ li ta̱cꞌanjelak re mayejac.

¹⁷ Ut queꞌxyi̱b ajcuiꞌ li candelero riqꞌuin tzꞌakal oro tenbil riqꞌuin martillo. Queꞌxyi̱b li rok ut li xakxo saꞌ xyi joꞌ ajcuiꞌ lix naꞌajeb lix xamlel. Ut queꞌxqꞌue li utzꞌuꞌuj chokꞌ xsahob ru li candelero. Junaj ru li candelero nak queꞌxyi̱b.

¹⁸ Queꞌxyi̱b cuukub xnaꞌaj li candil. Jun xnaꞌaj li xam cuan saꞌ xyi ut ox ox saꞌ xcaꞌ pacꞌalil.

¹⁹ Li junju̱nk chi xnaꞌaj li candil chanchan rukꞌ li cheꞌ almendro nak queꞌxyi̱b. Queꞌxqꞌue oxib lix sahob ru joꞌ rutzꞌuꞌujil li almendro saꞌ li cuakib chi xnaꞌajeb li candil.

²⁰ Ut lix naꞌaj li candil li cuan saꞌ xyi queꞌxqꞌue ca̱hib lix sahob ru joꞌ rutzꞌuꞌujil li almendro.

²¹ Rubel li xbe̱n cuib chi rukꞌeb li candelero, saꞌ li rok queꞌxyi̱b jun li utzꞌuꞌuj li toj ma̱jiꞌ napuqꞌueꞌ. Rubel li cuib chic queꞌxyi̱b jun chic li utzꞌuꞌuj li toj ma̱jiꞌ napuqꞌueꞌ. Ut rubel li cuib chic joꞌcan cuiꞌchic queꞌxba̱nu. Joꞌcan queꞌxba̱nu nak queꞌxyi̱b li cuakib chi xnaꞌajeb li candil.

²² Chixjunil li candelero rochben lix sahob ru, junaj ru nak queꞌxyi̱b riqꞌuin tzꞌakal oro tenbil riqꞌuin martillo.

²³ Ut queꞌxyi̱b ajcuiꞌ li cuukub chi candil joꞌ ajcuiꞌ li chꞌi̱chꞌ li ta̱cꞌanjelak re xsetbal lix mechil ut li plato li naxocman cuiꞌ li teꞌxset. Chixjunil queꞌxyi̱b riqꞌuin tzꞌakal oro.

²⁴ Numenak ca̱laju xca̱cꞌa̱l (74) libra li tzꞌakal oro li quicꞌanjelac re xyi̱banquil li candelero joꞌqueb ajcuiꞌ li chꞌi̱chꞌ li ta̱cꞌanjelak re xyi̱banquil lix mechil li candil.

²⁵ Ut queꞌxyi̱b ajcuiꞌ li artal bar teꞌxcꞌat cuiꞌ li incienso. Queꞌxyi̱b riqꞌuin li cheꞌ acacia. Ca̱ xucu̱t nak queꞌxyi̱b. O̱b roxcꞌa̱l (45) centímetro li ru ut o̱b roxcꞌa̱l (45) centímetro li rok ut laje̱b roꞌcꞌa̱l (90) centímetro li xteram. Junaj ru li artal rochben li xucub nak queꞌxyi̱b.

²⁶ Ut queꞌxletz li tzꞌakal oro saꞌ xbe̱n ut saꞌ xca̱ pacꞌalil ut chiru ajcuiꞌ li xucub. Ut chire queꞌxqꞌue lix sahob ru yi̱banbil riqꞌuin oro.

²⁷ Ut queꞌxyi̱b ca̱hib li argollas ut queꞌxletz rubel lix sahob ru li cuan chire. Queꞌxletz saꞌ xuc xcaꞌ pacꞌalil re teꞌxnumsi cuiꞌ li cheꞌ li ti̱c rix li teꞌxpako cuiꞌ li artal.

²⁸ Ut queꞌxyi̱b ajcuiꞌ li cuib chi cheꞌ acacia ti̱c rix ut queꞌxletz oro chirix.

²⁹ Ut queꞌxyi̱b ajcuiꞌ chi cha̱bil li sununquil aceite li nequeꞌxqꞌue saꞌ xbe̱neb li teꞌkꞌaxtesi̱k chi cꞌanjelac chiru li Ka̱cuaꞌ. Ut queꞌxyi̱b ajcuiꞌ li sununquil incienso. Queꞌxyi̱b chi cha̱bil joꞌ nequeꞌxnau xyi̱banquil li nequeꞌyi̱ban re li sununquil ban aꞌan.