Éxodo 36 - Li Santil hu

¹ Laj Bezaleel ut laj Aholiab ut chixjunileb li cui̱nk li cuanqueb xnaꞌleb sicꞌbileb ru re teꞌxba̱nu li cꞌanjel aꞌin. Ut li Dios quixqꞌue xnaꞌlebeb chixba̱nunquil chi tzꞌakal re ru joꞌ quixye, chan laj Moisés.

² Joꞌcan nak laj Moisés quixbokeb laj Bezaleel ut laj Aholiab ut chixjunileb li cuanqueb xnaꞌleb chixba̱nunquil chi us li cꞌanjel. Queꞌala saꞌ xchꞌo̱leb oque̱nc saꞌ li cꞌanjel aꞌin, ut li Dios quiqꞌuehoc xnaꞌlebeb re xba̱nunquil.

³ Ut laj Moisés quixkꞌaxtesi reheb li mayej li queꞌxqꞌue laj Israel re teꞌxtiquib xyi̱banquil li cꞌaꞌak re ru ta̱cꞌanjelak re li tabernáculo. Ut rajlal cutan eb laj Israel queꞌxcꞌam lix mayejeb joꞌ qui-ala saꞌ xchꞌo̱leb xqꞌuebal.

⁴ Ut eb li yo̱queb chi cꞌamoc be saꞌ li cꞌanjel queꞌxcanab lix cꞌanjel ut queꞌco̱eb riqꞌuin laj Moisés.

⁵ Ut queꞌxye re: —Kꞌaxal nabal cuiꞌchic li mayej yo̱queb chixqꞌuebal li tenamit. Ac xtzꞌakloc li joꞌ qꞌuial ta̱cꞌanjelak ke re xyi̱banquil chixjunil li quixye li Ka̱cuaꞌ, chanqueb.

⁶ Ut laj Moisés quixtakla xyebal reheb chixjunileb nak teꞌxcanab xqꞌuebal lix mayejeb re li tabernáculo. Joꞌcan nak eb laj Israel queꞌxcanab xqꞌuebal lix mayejeb,

⁷ xban nak ac xtzꞌakloc chixjunil li cꞌaꞌru quicꞌanjelac reheb re li cꞌanjel ut toj cuan li qui-elaꞌan.

⁸ Ut eb li nequeꞌxnau yi̱ba̱nc tꞌicr chi us saꞌ xya̱nkeb li yo̱queb chi cꞌanjelac queꞌxyi̱b li tabernáculo riqꞌuin laje̱b chi tꞌicr. Queꞌxyi̱b riqꞌuin li cha̱bil bakbil nokꞌ lino ut riqꞌuin li nokꞌ azul, li nokꞌ púrpura ut li nokꞌ cak. Ut queꞌxqꞌue li querubines chiru li tꞌicr aꞌan chokꞌ xsahob ru chi cha̱bil xyi̱banquil.

⁹ Li laje̱b chi tꞌicr, juntakꞌe̱t xni̱nkal queꞌxqꞌue. Cablaju metro riqꞌuin media xni̱nkal rok ut cuib metro li xni̱nkal ru.

¹⁰ Queꞌxletz chi ribil li o̱b chi tꞌicr. Ut joꞌcan cuiꞌchic queꞌxba̱nu riqꞌuin li o̱b chic. Queꞌxletz cuiꞌchic chi ribil rib.

¹¹ Queꞌxyi̱b ajcuiꞌ xnaꞌaj li gancho chire li nimla tꞌicr li o̱b ru li ac queꞌxyi̱b. Queꞌxyi̱b aꞌan riqꞌuin nokꞌ azul. Joꞌcan cuiꞌchic queꞌxba̱nu riqꞌuin li nimla tꞌicr jun chic li queꞌxyi̱b.

¹² Mero ciento xchapbal li gancho queꞌxqꞌue chire li junju̱nk. Mero ciento re li jun ut mero ciento cuiꞌchic re li jun chic re nak teꞌxchap rib chi us li cuib chi ni̱nki tꞌicr.

¹³ Ut queꞌxyi̱b ajcuiꞌ mero ciento li gancho riqꞌuin oro re li junju̱nk chi tꞌicr re teꞌxchap rib chi us riqꞌuin li jun chic re nak li rix li tabernáculo ta̱cana̱k chi tzꞌaptzꞌo ru.

¹⁴ Queꞌxyi̱b ajcuiꞌ junlaju li tꞌicr yi̱banbil riqꞌuin rismal li chiba̱t re xtzꞌapbal xbe̱n li tabernáculo.

¹⁵ Li junlaju chi tꞌicr aꞌin li queꞌxyi̱b, juntakꞌe̱t xni̱nkal queꞌxqꞌue. Oxlaju metro riqꞌuin media xni̱nkal rok li junju̱nk ut cuib metro lix ni̱nkal ru li junju̱nk.

¹⁶ Queꞌxletz chi ribil rib li o̱b chi tꞌicr. Ut joꞌcan cuiꞌchic queꞌxba̱nu riqꞌuin li cuakib chic. Queꞌxletz cuiꞌchic chi ribil.

¹⁷ Ut queꞌxyi̱b mero ciento li xchapbal li gancho chire li junju̱nk. Mero ciento re li jun ut mero ciento cuiꞌchic chire li jun chic.

¹⁸ Ut queꞌxyi̱b ajcuiꞌ mero ciento li gancho riqꞌuin li chꞌi̱chꞌ bronce re nak teꞌxchap rib li tꞌicr chi us riqꞌuin li jun chic re nak junaj ru ta̱cana̱k.

¹⁹ Ut queꞌxyi̱b li rix li carner bonbil riqꞌuin caki bon re teꞌxqꞌue saꞌ xbe̱n li tabernáculo. Ut queꞌxyi̱b ajcuiꞌ li cha̱bil tzꞌu̱m rixeb li tzꞌiꞌ haꞌ re teꞌxqꞌue saꞌ xbe̱n.

²⁰ Ut riqꞌuin li cheꞌ acacia queꞌxyi̱b li tzꞌalam cheꞌ li ta̱oc chi xakxo.

²¹ Ca̱hib metro riqꞌuin media li xni̱nkal rok li junju̱nk chi tzꞌalam cheꞌ ut o̱b xca̱cꞌa̱l (65) centímetro li xni̱nkal ru.

²² Caꞌcab rok li junju̱nk chi tzꞌalam cheꞌ queꞌxqꞌue re nak us ta̱cana̱k saꞌ lix naꞌaj. Joꞌcan queꞌxba̱nu re chixjunil li tzꞌalam cheꞌ li ta̱cꞌanjelak re xyi̱banquil li tabernáculo.

²³ Queꞌxyi̱b junmay li tzꞌalam cheꞌ re li tabernáculo re teꞌxqꞌue saꞌ li jun pacꞌal li nacana saꞌ li sur.

²⁴ Ut queꞌxyi̱b ajcuiꞌ riqꞌuin plata caꞌcꞌa̱l xnaꞌajeb li rok li tzꞌalam cheꞌ li teꞌqꞌuehekꞌ cuiꞌ. Caꞌcab xnaꞌaj li rok li junju̱nk chi tzꞌalam cheꞌ queꞌxyi̱b.

²⁵ Ut queꞌxyi̱b ajcuiꞌ junmay chic li tzꞌalam cheꞌ re teꞌxqꞌue jun pacꞌal li tabernáculo li nacana saꞌ li norte.

²⁶ Ut queꞌxyi̱b ajcuiꞌ riqꞌuin plata caꞌcꞌa̱l chic xnaꞌajeb li rok li tzꞌalam cheꞌ li teꞌqꞌuehekꞌ cuiꞌ. Caꞌcab xnaꞌajeb li rok li junju̱nk chi tzꞌalam cheꞌ.

²⁷ Ut queꞌxyi̱b cuakib chic li tzꞌalam cheꞌ re teꞌxqꞌue chirix li tabernáculo saꞌ xjayal li na-oc cuiꞌ li sakꞌe.

²⁸ Ut queꞌxyi̱b ajcuiꞌ cuib chic li tzꞌalam cheꞌ re teꞌxqꞌue saꞌ xuc chirix saꞌ xcaꞌ pacꞌalil.

²⁹ Li cuib chi tzꞌalam cheꞌ aꞌin queꞌxchap rib takꞌa ut takecꞌ riqꞌuin gancho. Joꞌcan queꞌxba̱nu riqꞌuin li cuib chi tzꞌalam cheꞌ li teꞌcana̱k saꞌ xxuc.

³⁰ Joꞌcan nak cuakxakib li tzꞌalam cheꞌ li quicꞌanjelac ut cuaklaju li xnaꞌaj li rokeb yi̱banbil riqꞌuin plata. Caꞌcab xnaꞌajeb li rok li junju̱nk chi tzꞌalam cheꞌ.

³¹ Queꞌxyi̱b o̱b li cheꞌ riqꞌuin li cheꞌ acacia re teꞌxqꞌue chi kꞌekꞌo chiru li tzꞌalam cheꞌ li nacana jun pacꞌal.

³² Ut queꞌxyi̱b o̱b chic li cheꞌ re teꞌxqꞌue chi kꞌekꞌo chiru li tzꞌalam cheꞌ li cuan jun pacꞌal chic. Ut queꞌxyi̱b o̱b chic li cheꞌ re teꞌxqꞌue chi kꞌekꞌo chiru li tzꞌalam cheꞌ li cuan chirix saꞌ xjayal li na-oc cuiꞌ li sakꞌe.

³³ Li cheꞌ li queꞌxqꞌue chi kꞌekꞌo saꞌ xyi quicuulac saꞌ li xuc jun pacꞌal ut toj saꞌ li xuc jun chic.

³⁴ Ut queꞌxletz li oro chiru li tzꞌalam cheꞌ. Ut queꞌxyi̱b ajcuiꞌ riqꞌuin oro li argollas li teꞌxletz chiru li tzꞌalam cheꞌ li teꞌnumekꞌ cuiꞌ li cheꞌ chi kꞌekꞌo. Ut queꞌxletz ajcuiꞌ li oro chiru li cheꞌ aꞌin li ti̱c rix li teꞌxqꞌue chi kꞌekꞌo.

³⁵ Ut queꞌxyi̱b li tꞌicr li ta̱oc chokꞌ tas. Queꞌxyi̱b riqꞌuin li nokꞌ azul, li nokꞌ púrpura ut li nokꞌ cak, ut riqꞌuin li bakbil nokꞌ lino. Ut chokꞌ xsahob ru li tꞌicr aꞌan, queꞌxqꞌue li querubines chiru chi cha̱bil xyi̱banquil.

³⁶ Ut queꞌxyi̱b ca̱hib li okech riqꞌuin li cheꞌ acacia ut queꞌxqꞌue oro chirix. Queꞌxletz ca̱hib li gancho oro chiru li okech ca̱hib. Chiru li gancho aꞌan teꞌxqꞌue li nimla tꞌicr. Ut queꞌxyi̱b ajcuiꞌ riqꞌuin plata ca̱hib xnaꞌaj li okech.

³⁷ Ut queꞌxyi̱b ajcuiꞌ jun li nimla tꞌicr li teꞌxqꞌue saꞌ li oqueba̱l re li tabernáculo. Queꞌxyi̱b li tꞌicr aꞌan riqꞌuin li nokꞌ azul, li nokꞌ púrpura, ut li nokꞌ cak ut riqꞌuin li bakbil nokꞌ lino. Queꞌxqꞌue xsahob ru chi cha̱bil xyi̱banquil.

³⁸ Ut queꞌxyi̱b ajcuiꞌ o̱b li rokechal ut queꞌxyi̱b o̱b li gancho re xchapbal li tꞌicr chiru li okech. Queꞌxletz li oro chirix li o̱b chi cheꞌ. Ut queꞌxyi̱b ajcuiꞌ riqꞌuin bronce o̱b xnaꞌajeb li okech.