Éxodo 35 - Li Santil hu

¹ Laj Moisés quixchꞌutubeb chixjunileb li ralal xcꞌajol laj Israel ut quixye reheb: —Li Ka̱cuaꞌ xqꞌue jun li chakꞌrab tento takaba̱nu. Aꞌan aꞌin:

² Cuakib cutan ajcuiꞌ textrabajik ut saꞌ li xcuuk li cutan texhila̱nk xban nak li cutan aꞌan santobresinbilak re nak te̱qꞌue xlokꞌal li Ka̱cuaꞌ. Ani ta̱trabajik saꞌ li hiloba̱l cutan, aꞌan ta̱camsi̱k.

³ Chi moco le̱ xam te̱tzꞌab saꞌ le̱ rochoch saꞌ li hiloba̱l cutan.

⁴ Laj Moisés quia̱tinac riqꞌuineb li ralal xcꞌajol laj Israel ut quixye reheb: —Aꞌan aꞌin li cꞌaꞌru xye li Ka̱cuaꞌ re takaba̱nu.

⁵ Te̱xoc jun li mayej chokꞌ re li Ka̱cuaꞌ. Te̱qꞌue chi anchal e̱chꞌo̱l li joꞌ qꞌuial na-ala saꞌ e̱chꞌo̱l xqꞌuebal. Te̱qꞌue li oro, li plata, li bronce,

⁶ li tꞌicr azul, li tꞌicr púrpura, ut li tꞌicr cak joꞌ ajcuiꞌ li cha̱bil tꞌicr lino ut li tꞌicr yi̱banbil riqꞌuin li rismal li chiba̱t.

⁷ Joꞌ ajcuiꞌ lix tzꞌu̱mal li carner bonbil riqꞌuin caki bon ut li cha̱bil tzꞌu̱m rixeb li tzꞌiꞌ haꞌ, joꞌ ajcuiꞌ li cha̱bil cheꞌ acacia.

⁸ Te̱qꞌue li aceite re li candil, joꞌ ajcuiꞌ li ban li nacꞌanjelac re xyi̱banquil li aceite li nequeꞌxqꞌue saꞌ xbe̱neb li teꞌkꞌaxtesi̱k chi cꞌanjelac chicuu, joꞌ ajcuiꞌ li ban li nacꞌanjelac re xyi̱banquil li sununquil incienso.

⁹ Ut te̱qꞌue li terto̱quil pec ónice, joꞌqueb ajcuiꞌ li cha̱bil pec re xqꞌuebal xsahob ru li efod ut li pectoral.

¹⁰ Cha̱lkeb chixjunileb li cuanqueb xnaꞌleb saꞌ e̱ya̱nk ut xyi̱bakeb li cꞌaꞌak re ru chi cha̱bil xyi̱banquil joꞌ quixye li Ka̱cuaꞌ.

¹¹ Teꞌxyi̱b chixjunil li ta̱cꞌanjelak re li tabernáculo. Teꞌxyi̱b li lokꞌlaj muheba̱l joꞌ ajcuiꞌ li ta̱oc saꞌ xbe̱n. Teꞌxyi̱b li ganchos ut li tzꞌalam cheꞌ ut li cheꞌ li na-oc chi kꞌekꞌo, joꞌ ajcuiꞌ li okech ut lix naꞌajeb li teꞌqꞌuehekꞌ cuiꞌ.

¹² Teꞌxyi̱b li Lokꞌlaj Ca̱x ut li cheꞌ re xpakonquil ut teꞌxyi̱b ajcuiꞌ lix tzꞌapbal re joꞌ ajcuiꞌ li tꞌicr li ta̱cꞌanjelak chokꞌ tas.

¹³ Teꞌxyi̱b li me̱x ut li cheꞌ re xpakonquil ut teꞌxyi̱b ajcuiꞌ chixjunil li cꞌaꞌak re ru ta̱cꞌanjelak saꞌ li me̱x. Ut teꞌxyi̱b ajcuiꞌ li caxlan cua li ta̱mayeja̱k.

¹⁴ Teꞌxyi̱b li candelero, li teꞌxqꞌue cuiꞌ li cuukub chi candil. Ut teꞌxyi̱b li chꞌi̱chꞌ li teꞌcꞌanjelak re xyi̱banquil lix mechil. Ut teꞌxyi̱b ajcuiꞌ li candil ut li aceite li ta̱cꞌanjelak chokꞌ xyaꞌal.

¹⁵ Teꞌxyi̱b li artal li teꞌxcꞌat cuiꞌ li incienso joꞌ ajcuiꞌ li cheꞌ re xpakonquil. Teꞌxyi̱b li aceite li teꞌxqꞌue saꞌ xbe̱neb li teꞌkꞌaxtesi̱k chi cꞌanjelac chicuu ut teꞌxyi̱b ajcuiꞌ li sununquil incienso ut li tꞌicr li ta̱qꞌuehekꞌ chiru li oqueba̱l re li tabernáculo.

¹⁶ Ut teꞌxyi̱b li artal li ta̱cꞌatma̱nk cuiꞌ li mayej rochben li chꞌi̱chꞌ bronce li hopox ru. Ut teꞌxyi̱b li cheꞌ re xpakonquil, joꞌ ajcuiꞌ chixjunil li ta̱cꞌanjelak saꞌ li artal. Ut teꞌxyi̱b ajcuiꞌ li pila rochben lix cꞌochleba̱l.

¹⁷ Teꞌxyi̱b li tꞌicr li te̱sut cuiꞌ li neba̱l re li tabernáculo, joꞌqueb ajcuiꞌ li okech rochbeneb lix naꞌajeb li teꞌqꞌuehekꞌ cuiꞌ. Ut teꞌxyi̱b li nimla tꞌicr li ta̱qꞌuehekꞌ chiru li oqueba̱l re li neba̱l.

¹⁸ Teꞌxyi̱b li cꞌa̱m joꞌ ajcuiꞌ li chꞌi̱chꞌ li ta̱chapok re saꞌ chꞌochꞌ li rokechal li tabernáculo joꞌ ajcuiꞌ li rokechal li neba̱l.

¹⁹ Teꞌxyi̱b li rakꞌeb laj tij li teꞌcꞌanjelak saꞌ li tabernáculo. Teꞌxyi̱b li rakꞌ laj Aarón li xbe̱nil aj tij joꞌ ajcuiꞌ li rakꞌeb li ralal re nak teꞌcꞌanjelak chokꞌ aj tij.

²⁰ Nak quirakeꞌ laj Moisés chi a̱tinac riqꞌuineb laj Israel, queꞌsukꞌi saꞌ lix naꞌajeb.

²¹ Ut chixjunileb li qui-ala saꞌ xchꞌo̱leb, queꞌxqꞌue lix mayejeb re li Ka̱cuaꞌ chi anchaleb xchꞌo̱l re nak ta̱ru̱k teꞌxyi̱b li tabernáculo joꞌ ajcuiꞌ chixjunil li ta̱cꞌanjelak aran joꞌ ajcuiꞌ re xyi̱banquil li rakꞌeb laj tij.

²² Queꞌcuulac li cui̱nk joꞌ ajcuiꞌ li ixk ut queꞌxcꞌam lix mayejeb li joꞌ qꞌuial qui-ala saꞌ xchꞌo̱leb xqꞌuebal. Ut chi anchal xchꞌo̱leb queꞌxqꞌue lix kꞌoleb ut lix caꞌxiqueb ut lix matkꞌabeb joꞌ ajcuiꞌ li cadeneb li nequeꞌxqꞌue chi rukꞌeb joꞌ ajcuiꞌ li terto̱quil pec. Ut chixjunileb queꞌxmayeja chiru li Ka̱cuaꞌ li cꞌaꞌak re ru yi̱banbil riqꞌuin oro.

²³ Chixjunileb li cuanqueb tꞌicr riqꞌuineb, queꞌxqꞌue chokꞌ xmayejeb. Queꞌxqꞌue li tꞌicr azul, li tꞌicr púrpura, ut li tꞌicr cak. Ut queꞌxqꞌue ajcuiꞌ li cha̱bil tꞌicr lino joꞌ ajcuiꞌ li tꞌicr yi̱banbil riqꞌuin li rismal li chiba̱t. Ut queꞌxqꞌue ajcuiꞌ li rix li carner bonbil riqꞌuin caki bon joꞌ ajcuiꞌ li cha̱bil tzꞌu̱m, rixeb li tzꞌiꞌ haꞌ.

²⁴ Ut chixjunileb li cuanqueb plata malaj bronce riqꞌuineb, queꞌxcꞌam ut queꞌxmayeja re li Ka̱cuaꞌ. Ut chixjunileb li cuanqueb li cheꞌ acacia riqꞌuineb, queꞌxqꞌue chokꞌ xmayejeb re xyi̱banquil li cꞌaꞌak re ru re li tabernáculo.

²⁵ Ut chixjunileb li ixk li queꞌxnau quemoc, queꞌxquem li tꞌicr riqꞌuin li nokꞌ azul, li nokꞌ púrpura ut li nokꞌ cak ut li cha̱bil nokꞌ lino ut queꞌxqꞌue chokꞌ xmayejeb.

²⁶ Ut eb li ixk li queꞌxnau bakoc nokꞌ, queꞌxbak li nokꞌ riqꞌuin rismal li chiba̱t joꞌ qui-ala saꞌ xchꞌo̱leb.

²⁷ Eb li nequeꞌtaklan saꞌ xya̱nkeb laj Israel queꞌxqꞌue li cha̱bil pec ónice li ta̱cꞌanjelak re xyi̱banquil li efod ut queꞌxqꞌue ajcuiꞌ li terto̱quil pec li ta̱qꞌuehekꞌ chiru li pectoral.

²⁸ Ut queꞌxqꞌue ajcuiꞌ li aceite re li xam ut queꞌxqꞌue ajcuiꞌ li ban re xyi̱banquil li aceite li nequeꞌxqꞌue saꞌ xbe̱neb li teꞌkꞌaxtesi̱k chi cꞌanjelac chiru li Ka̱cuaꞌ, ut joꞌ ajcuiꞌ re xyi̱banquil li sununquil incienso.

²⁹ Chixjunileb laj Israel joꞌ cui̱nk joꞌ ixk, joꞌ qui-ala saꞌ xchꞌo̱leb tenkꞌa̱nc, queꞌxqꞌue lix mayejeb chi anchal xchꞌo̱leb re nak ta̱uxma̱nk li quixye li Ka̱cuaꞌ re laj Moisés. Joꞌcan nak queꞌxqꞌue lix mayejeb re lix cꞌanjel li Ka̱cuaꞌ.

³⁰ Ut laj Moisés quixye reheb laj Israel: —Qꞌuehomak retal. Li Ka̱cuaꞌ xsicꞌ ru laj Bezaleel saꞌ xya̱nkeb li ralal xcꞌajol laj Judá. Laj Bezaleel, aꞌan li ralal laj Uri. Ut laj Uri, aꞌan li ralal laj Hur.

³¹ Ut li Dios quixqꞌue lix musikꞌ re ut quixqꞌue xnaꞌleb laj Bezaleel re xjolominquil li cꞌanjel aꞌin. Cuan xnaꞌleb ut naxnau xcꞌoxlanquil chanru tixyi̱b chixjunil chi cha̱bil.

³² Naxnau xcꞌanjelanquil chi cha̱bil li oro, plata, ut bronce ut naxnau xcꞌoxlanquil chanru tixqꞌue xsahob ru li cꞌaꞌru tixyi̱b.

³³ Naxnau xyi̱banquil chi cha̱bil li terto̱quil pec ut naxnau ajcuiꞌ xyi̱banquil chi cha̱bil li cheꞌ. Naxnau xcꞌoxlanquil chanru tixba̱nu yalak cꞌaꞌru chi cꞌanjelil.

³⁴ Ut li Dios quixqꞌue xnaꞌleb laj Bezaleel re xcꞌutbal chiruheb li jun chꞌol chic chanru teꞌcꞌanjelak. Ut quixqꞌue ajcuiꞌ xnaꞌleb laj Aholiab li ralal laj Ahisamac xcomoneb li ralal xcꞌajol laj Dan.

³⁵ Quixqꞌue xnaꞌlebeb chixba̱nunquil chixjunil li cꞌanjel chi cha̱bil ut chi chꞌinaꞌus ut quixqꞌue ajcuiꞌ xnaꞌlebeb re xcꞌoxlanquil chanru teꞌxba̱nu. Nequeꞌxnau xyi̱banquil lix sahob ru li tꞌicr riqꞌuin li nokꞌ azul, li nokꞌ púrpura ut li nokꞌ cak joꞌ ajcuiꞌ li cha̱bil nokꞌ lino. Nequeꞌxnau ajcuiꞌ quemoc ut xcꞌoxlanquil chanru xqꞌuebal lix sahob ru.