Éxodo 34 - Li Santil hu

Quixqꞌue cuiꞌchic li laje̱b chi chakꞌrab li Dios

¹ Li Dios quixye re laj Moisés: —Ta̱ti̱cobresi ru cuibak li pec joꞌ li cuib li xajor junxil. Ut chiruheb aꞌan la̱in tintzꞌi̱ba lin chakꞌrab li xcuan chiruheb li xajor.

² Ta̱cauresi a̱cuib ut cuulaj ekꞌela, tattakekꞌ chiru li tzu̱l Sinaí. Aran tatcuulak cuiqꞌuin saꞌ xbe̱n li tzu̱l.

³ A̱junes tatxic. Ma̱ ani ta̱cꞌam cha̱cuix. Ma̱ jun reheb li tenamit naru ta̱takekꞌ yalak bar chiru li tzu̱l chi moco li queto̱mk ta̱ichajibk saꞌ li tzu̱l, chan li Dios.

⁴ Tojoꞌnak laj Moisés quixti̱cobresi li cuib chi pec chanchan ajcuiꞌ li quixjor junxil. Quicuacli ekꞌela ut quitakeꞌ chiru li tzu̱l. Quixcꞌam saꞌ rukꞌ li cuib chi pec. Joꞌ quiyeheꞌ re xban li Dios, joꞌcan quixba̱nu.

⁵ Ut li Ka̱cuaꞌ Dios quicube saꞌ li chok. Quicuulac cuan cuiꞌ laj Moisés. Li Dios quixchꞌolob xya̱lal chirix lix nimal cuanquilal joꞌ ajcuiꞌ lix lokꞌal.

⁶ Li Dios quinumeꞌ chiru laj Moisés ut quixye re: —La̱in li Ka̱cuaꞌ Dios. La̱in li nimajcual Dios. La̱in li nintokꞌoban u ut la̱in ajcuiꞌ nin-uxta̱nan u. La̱in incꞌaꞌ ninjoskꞌoꞌ chi junpa̱t. Numtajenak lin rahom. Ma̱ jaruj ninpaltoꞌ. Cuanquin chi junelic.

⁷ La̱in chi qꞌuila okꞌob li cristian nacuuxta̱naheb ru. Nincuy li qꞌuila ma̱c li nequeꞌxba̱nu. Eb li nequeꞌma̱cob teꞌxtoj rix lix ma̱c. Ninrahobtesiheb li alal cꞌajolbej riqꞌuin lix ma̱queb lix naꞌ xyucuaꞌeb toj saꞌ rox saꞌ xca̱ xtasalil li ralal xcꞌajoleb, chan li Dios.

⁸ Saꞌ junpa̱t quixxulub lix jolom laj Moisés ut quixlokꞌoni li Dios.

⁹ Ut quixye: —At Ka̱cuaꞌ, cui tincꞌam cuib saꞌ usilal a̱cuiqꞌuin, ba̱nu usilal tatcua̱nk saꞌ kaya̱nk. Usta cau kachꞌo̱l, chacuy kama̱c. Ut choa̱cꞌul cuiꞌchic chokꞌ a̱cualal a̱cꞌajol, chan laj Moisés.

¹⁰ Ut li Dios quixye: —La̱in tinba̱nu lin contrato e̱riqꞌuin. Chiruheb chixjunileb li cristian tincꞌut lin cuanquilal. Ma̱ jun cua e̱rilom saꞌ ruchichꞌochꞌ li tinba̱nu la̱in. Ut chixjunileb laj Israel teꞌril li tinba̱nu ut teꞌxnau nak aꞌan xba̱nuhom li Dios xban nak nimla sachba chꞌo̱lej li tinba̱nu e̱riqꞌuin.

Queꞌqꞌueheꞌ xnaꞌlebeb laj Israel re nak incꞌaꞌ teꞌxlokꞌoni li jalanil dios

¹¹ Qꞌue retal li cꞌaꞌru tinye a̱cue anakcuan. Oc cue chirisinquileb che̱ru eb laj amorreo, eb laj cananeo, eb laj heteo, eb laj ferezeo, eb laj heveo, joꞌ eb ajcuiꞌ laj jebuseo.

¹² Cheba̱nu cue̱nt ut me̱ba̱nu junak contrato riqꞌuineb li tenamit li cuanqueb saꞌ li naꞌajej li xic cuiꞌ e̱re. Naru nequeqꞌue e̱rib chi a̱le̱c xbaneb.

¹³ Te̱jucꞌ chi junaj cua lix artaleb ut te̱poꞌ ajcuiꞌ lix dioseb Asera xcꞌabaꞌ. Te̱yoqꞌui li cheꞌ li nequeꞌxxakaxi aran li nequeꞌxlokꞌoni ru.

¹⁴ Me̱lokꞌoni jalanil dios xban nak la̱in li Ka̱cuaꞌ Dios ut incꞌaꞌ nacuulac chicuu nak jalan te̱qꞌue xlokꞌal.

¹⁵ Me̱ba̱nu junak contrato riqꞌuineb xban nak cui te̱ba̱nu aꞌan naru nequejunaji e̱rib riqꞌuineb. Me̱lokꞌoni lix dioseb ut nak ta̱cua̱nk lix ninkꞌe lix dioseb, mexxic chi cuaꞌac riqꞌuineb nak texbokekꞌ xbaneb.

¹⁶ Cui la̱ex te̱sumub le̱ ralal riqꞌuin lix rabineb, aꞌan ajcuiꞌ ta̱cꞌamok xbeheb le̱ ralal chixlokꞌoninquil lix dioseb xban nak eb aꞌan nequeꞌxlokꞌoni li jalanil dios.

¹⁷ Me̱yi̱b e̱jalanil dios.

Eb lix ninkꞌe laj Israel

¹⁸ Joꞌ xinye e̱re, saꞌ li po Abib xcꞌabaꞌ texninkꞌei̱k. Cuukub cutan te̱cuaꞌ li caxlan cua li ma̱cꞌaꞌ xchꞌamal. Ac chꞌolchꞌo nak te̱ba̱nu aꞌin saꞌ li po Abib xban nak saꞌ li po aꞌin xex-el chak saꞌ li tenamit Egipto.

¹⁹ Chixjunileb li xbe̱n le̱ ralal cue la̱in joꞌ eb ajcuiꞌ li xbe̱n raleb le̱ queto̱mk, li cocꞌ te̱lom.

²⁰ Li xbe̱n raleb li bu̱r, carner te̱qꞌue chokꞌ ru̱chil. Cui incꞌaꞌ te̱qꞌue ru̱chil tento nak te̱tok xcux li chꞌina bu̱r. Ut tento nak te̱qꞌue ru̱chil li xbe̱n e̱ralal. Chixjunilex texmayejak joꞌ xinye e̱re.

²¹ Cuakib cutan textrabajik. Saꞌ xcuuk li cutan texhila̱nk. Usta xkꞌehil li a̱uc, usta xkꞌehil li kꞌoloc joꞌcaꞌin te̱ba̱nu.

²² Texninkꞌei̱k nak te̱sicꞌ li xbe̱n ru li trigo ut texninkꞌei̱k cuiꞌchic saꞌ xkꞌehil li kꞌoloc.

²³ Oxib sut chiru li jun chihab che̱junilex la̱ex cui̱nk texxic saꞌ li tabernáculo chinlokꞌoninquil. La̱in li Ka̱cuaꞌ Dios. La̱in le̱ Dios la̱ex aj Israel.

²⁴ La̱in tincuisiheb li cuanqueb saꞌ li naꞌajej li xinyechiꞌi e̱re ut tinqꞌue xtzꞌakob le̱ naꞌaj. Ma̱cꞌaꞌak chic e̱cꞌaꞌux chirix le̱ chꞌochꞌ nak texxic chinlokꞌoninquil oxib sut chiru li jun chihab. Ma̱ ani chic ta̱makꞌok che̱ru.

²⁵ Nak texninkꞌei̱k re xjulticanquil nak xexcuisi chak saꞌ li tenamit Egipto, te̱mayeja junak li xul chicuu ut me̱mayeja lix quiqꞌuel rochben li caxlan cua li cuan xchꞌamal. Ut me̱xoc li na-elaꞌan re cuulaj.

²⁶ Li xbe̱n ru le̱ racui̱mk te̱cꞌam saꞌ li naꞌajej li niquineꞌxlokꞌoni cuiꞌ. Me̱chik xtibel li chꞌina chiba̱t saꞌ xyaꞌal xtuꞌ lix naꞌ, chan li Dios.

Laj Moisés quixcꞌul cuiꞌchic xcaꞌ cua li laje̱b chi chakꞌrab

²⁷ Ut li Ka̱cuaꞌ Dios quixye re laj Moisés: —Ta̱tzꞌi̱baheb li a̱tin aꞌin. Riqꞌuin li a̱tin aꞌin xinba̱nu lin contrato a̱cuiqꞌuin ut joꞌ ajcuiꞌ riqꞌuineb laj Israel.—

²⁸ Caꞌcꞌa̱l cutan (40) ut caꞌcꞌa̱l kꞌojyi̱n quicana aran laj Moisés riqꞌuin li Dios. Incꞌaꞌ quicuaꞌac ut incꞌaꞌ qui-ucꞌac. Ut quixtzꞌi̱ba li contrato chiru li cuib chi pec. Aꞌaneb li laje̱b chi chakꞌrab.

²⁹ Nak laj Moisés quicube cuiꞌchic chak chiru li tzu̱l Sinaí quixcꞌam chak saꞌ rukꞌ li cuib chi perpo̱quil pec li tzꞌi̱banbil cuiꞌ li chakꞌrab. Ut quilemtzꞌun li riloba̱l laj Moisés xban nak quia̱tinac li Dios riqꞌuin. Ut laj Moisés incꞌaꞌ naxnau nak nalemtzꞌun li riloba̱l.

³⁰ Laj Aarón ut chixjunileb laj Israel queꞌril nak nalemtzꞌun li riloba̱l laj Moisés. Queꞌxucuac xban ut incꞌaꞌ queꞌnachꞌoc riqꞌuin.

³¹ Tojoꞌnak laj Moisés quixbok laj Aarón joꞌ eb ajcuiꞌ li cui̱nk li nequeꞌcꞌamoc be chiruheb laj Israel. Queꞌnachꞌoc riqꞌuin ut laj Moisés quia̱tinac riqꞌuineb.

³² Chirix aꞌan chixjunileb laj Israel queꞌjiloc ut laj Moisés quixserakꞌi reheb chixjunil li quiyeheꞌ re xban li Ka̱cuaꞌ Dios nak cuan saꞌ li tzu̱l Sinaí.

³³ Nak quirakeꞌ chi a̱tinac riqꞌuineb, laj Moisés quixtzꞌap li ru riqꞌuin jun li tꞌicr.

³⁴ Rajlal nak naxic chi a̱tinac riqꞌuin li Dios, laj Moisés narisi li tꞌicr saꞌ ru. Nak nasukꞌi cuiꞌchic riqꞌuineb laj Israel naxqꞌue cuiꞌchic li tꞌicr saꞌ ru ut naxye reheb li cꞌaꞌru nayeheꞌ chak re xban li Dios.

³⁵ Ut eb laj Israel nequeꞌril nak nalemtzꞌun li ru laj Moisés. Xban aꞌan laj Moisés naxtzꞌap cuiꞌchic li ru riqꞌuin li tꞌicr. Caꞌaj cuiꞌ nak yo̱ chi a̱tinac riqꞌuin li Dios narisi li tꞌicr saꞌ ru.