Éxodo 32 - Li Santil hu

Queꞌxyi̱b li cuacax oro

¹ Eb li cristian queꞌxqꞌue retal nak laj Moisés quibay chak chi sukꞌi̱c saꞌ li tzu̱l. Queꞌxchꞌutub rib chiru laj Aarón ut queꞌxye re: —Ta̱yi̱b kadios re teꞌcꞌamok be chiku. Incꞌaꞌ nakanau cꞌaꞌru xcꞌul chak laj Moisés, li qui-isin chak ke saꞌ li tenamit Egipto, chanqueb.

² Ut laj Aarón quixye reheb: —Isihomakeb lix caꞌxic oro le̱ rixakil, le̱ ralal joꞌ eb ajcuiꞌ le̱ rabin ut cꞌamomak chak cue arin, chan.

³ Ut chixjunileb li cristian queꞌrisiheb lix caꞌxic oro ut queꞌxcꞌam riqꞌuin laj Aarón.

⁴ Laj Aarón quilajxcꞌul li oro li joꞌ qꞌuial queꞌxcꞌam riqꞌuin. Quixhaꞌobresi li oro ut quixyi̱b jun chꞌina cuacax chiru. Riqꞌuin chꞌi̱chꞌ quixti̱cobresi ru. Eb li cristian queꞌxye: —Aꞌin li kadios, la̱o aj Israel. Aꞌan li qui-isin chak ke saꞌ li tenamit Egipto, chanqueb.

⁵ Nak quirabi aꞌin, laj Aarón quixyi̱b jun li artal chiru li cuacax oro ut quixye: —Cuulaj toninkꞌei̱k saꞌ xcꞌabaꞌ li Ka̱cuaꞌ Dios, chan.

⁶ Joꞌ cuulajak chic queꞌcuulac ekꞌela ut queꞌmayejac ut queꞌxqꞌue ajcuiꞌ lix cꞌatbil mayej. Ut eb li tenamit queꞌcuaꞌac ut queꞌucꞌac ut quilajeꞌxba̱nu li moco uxc ta naraj.

⁷ Ut li Dios quixye re laj Moisés: —Ayu, cuben. Tatxic riqꞌuineb li cristian. Cꞌajoꞌ xyibal ru yo̱queb la̱ tenamit li xacuisiheb chak saꞌ li tenamit Egipto.

⁸ Saꞌ junpa̱t queꞌxkꞌet li cua̱tin. Ut queꞌxyi̱b jun cuacax oro chokꞌ xdioseb. Yo̱queb chi mayejac chiru ut yo̱queb chixlokꞌoninquil. Yo̱queb chixyebal, “Li cuacax aꞌin, aꞌan li kadios, la̱o aj Israel. Li dios aꞌin, aꞌan li qui-isin chak ke saꞌ li tenamit Egipto”, chanqueb.

⁹ Ut li Ka̱cuaꞌ Dios quixye ajcuiꞌ re laj Moisés: —La̱in xinqꞌue retal nak li cristian aꞌin kꞌaxal cauheb xchꞌo̱l. Incꞌaꞌ nequeꞌabin chicuu.

¹⁰ Canabin chixba̱nunquil li tincuaj. Xchal injoskꞌil xbaneb. Tinsach ruheb chi jun aj cua. Ut la̱at, at Moisés, eb chic la̱ cualal a̱cꞌajol teꞌqꞌuia̱nk ut teꞌta̱mk. Ut eb aꞌan chic li sicꞌbilakeb ru inban, chan li Dios.

¹¹ Laj Moisés quixtzꞌa̱ma chiru li Ka̱cuaꞌ Dios ut quixye re: —At Ka̱cuaꞌ Dios, ¿cꞌaꞌut nak mas xchal la̱ joskꞌil saꞌ xbe̱neb la̱ tenamit? Riqꞌuin lix nimal a̱cuanquilal xacuisiheb chak saꞌ li tenamit Egipto.

¹² ¿Cꞌaꞌut nak ta̱qꞌue a̱cuib chi hobecꞌ xbaneb laj Egipto? Eb aꞌan teꞌxye, “¿Cꞌaꞌut nak li Dios xrisiheb arin ut xcꞌameb saꞌ li chaki chꞌochꞌ yal re tixcamsiheb saꞌ li tzu̱l? Quixsacheb chi junaj cua”, chaꞌkeb. Ma̱qꞌue a̱joskꞌil. Jal la̱ cꞌaꞌux. Ma̱sach ruheb la̱ tenamit.

¹³ Julticak a̱cue laj Abraham ut laj Isaac ut laj Jacob. Eb aꞌan aj cꞌanjeleb cha̱cuu ut la̱at xayechiꞌi chi anchal a̱chꞌo̱l reheb. Xaye reheb nak ta̱qꞌue chi qꞌuia̱nc ut chi nabalocꞌ li ralal xcꞌajoleb joꞌ xqꞌuialeb li chahim saꞌ choxa. Ut xayechiꞌi jun cha̱bil naꞌajej reheb aꞌan chi junelic ut reheb ajcuiꞌ li ralal xcꞌajol, chan laj Moisés.

¹⁴ Ut li Ka̱cuaꞌ Dios quixjal xcꞌaꞌux ut incꞌaꞌ quixsacheb lix tenamit.

¹⁵ Laj Moisés quicube chak saꞌ li tzu̱l. Quixcꞌam saꞌ rukꞌ li cuib chi perpo̱quil pec li tzꞌi̱banbil cuiꞌ li laje̱b chi chakꞌrab. Tzꞌi̱banbil li chakꞌrab chiru li perpo̱quil pec saꞌ xcaꞌ pacꞌalil.

¹⁶ Eb li perpo̱quil pec aꞌin xba̱nuhom li Dios. Li a̱tin tzꞌi̱banbil chiru li perpo̱quil pec, aꞌ li Dios quitzꞌi̱ban re.

¹⁷ Laj Josué quirabi li choki̱nc nak eb li tenamit yo̱queb chixjapbaleb re. Quixye re laj Moisés: —¿Cꞌaꞌru yo̱queb li tenamit? Cꞌajoꞌ nak yo̱queb chi choki̱nc. Chanchan pletic yo̱queb, chan.

¹⁸ Laj Moisés quixye re: —Incꞌaꞌ. Li choki̱nc nacuabi la̱in ma̱cuaꞌ xya̱b pletic. La̱in nacuabi nak bicha̱nc yo̱queb, chan.

¹⁹ Laj Moisés quijiloc chixcꞌatk lix muheba̱leb. Quiril li cuacax oro ut quiril nak yo̱queb chi xajoc chiru. Cꞌajoꞌ nak quichal xjoskꞌil. Ut xban xjoskꞌil quixcut chi chꞌochꞌ li cuib chi perpo̱quil pec li cuan saꞌ rukꞌ ut aran queꞌjoreꞌ saꞌ xto̱n li tzu̱l.

²⁰ Laj Moisés quixchap li cuacax oro li queꞌxyi̱b ut quixcꞌat saꞌ xam. Chirix aꞌan quixqueꞌ ut quixqꞌue lix poksil saꞌ li haꞌ ut saꞌ pue̱rs quixqꞌue chi ruqꞌueb.

²¹ Ut laj Moisés quixye re laj Aarón: —¿Cꞌaꞌru xeꞌxba̱nu a̱cue nak xaqꞌueheb chi ma̱cobc li tenamit aꞌin?—

²² Laj Aarón quixye: —Ka̱cuaꞌ Moisés, matjoskꞌoꞌ cuiqꞌuin. La̱at ac nacanau chanruheb li tenamit aꞌin. Nacanau nak teꞌraj xba̱nunquil li incꞌaꞌ us.

²³ Eb aꞌan queꞌxye cue, “Yi̱b kadios re ta̱cꞌamok be chiku. Incꞌaꞌ nakanau cꞌaꞌru xcꞌul chak laj Moisés, li qui-isin chak ke saꞌ li tenamit Egipto”, chanqueb.

²⁴ La̱in xinye reheb nak ani cuan oro riqꞌuin xcꞌamak chak, chanquin reheb. Ut eb aꞌan xeꞌxcꞌam chak ut la̱in caꞌaj cuiꞌ xincut li oro saꞌ xam ut aran xya̱loꞌ li cuacax oro aꞌin, chan.

²⁵ Laj Moisés quiril nak eb li cristian incꞌaꞌ chic nequeꞌxcꞌoxla li Dios. Quiril nak cꞌajoꞌ xyibal ru yo̱queb chixba̱nunquil xban nak laj Aarón incꞌaꞌ xqꞌue xnaꞌlebeb ut queꞌxcꞌut xxuta̱neb chiruheb li xicꞌ queꞌiloc reheb.

²⁶ Tojoꞌnak laj Moisés quixakli saꞌ li oqueba̱l bar cuan cuiꞌ lix muheba̱leb. Quixye reheb: —Li ani naxpa̱b li Ka̱cuaꞌ Dios, cha̱lkeb cuiqꞌuin, chan. Ut chixjunileb li ralal xcꞌajol laj Leví queꞌxchꞌutub rib chiru laj Moisés.

²⁷ Ut laj Moisés quixye reheb: —Joꞌcaꞌin xye li Ka̱cuaꞌ Dios reheb laj Israel. “Chapomak le̱ chꞌi̱chꞌ ut te̱suti lix muheba̱leb. Chixjunileb li incꞌaꞌ niquineꞌxpa̱b te̱camsi. Usta e̱ras, usta e̱ri̱tzꞌin, usta e̱rechꞌalal, usta e̱rech cabal, ta̱camsi̱k,” chan.

²⁸ Eb laj Leví queꞌxba̱nu li cꞌaꞌru quixye laj Moisés. Ut oxib mil chi cristian queꞌxcamsi saꞌ li cutan aꞌan.

²⁹ Laj Moisés quixye reheb laj Leví: —Saꞌ li cutan aꞌin xakabanbilex chi cꞌanjelac chiru li Ka̱cuaꞌ Dios chokꞌ aj tij. Li Dios texrosobtesi saꞌ li cutan aꞌin xban nak xeba̱nu li cꞌaꞌru quixye. Xecamsi li queꞌkꞌetoc re li ra̱tin li Dios usta e̱ras, usta e̱ri̱tzꞌin, usta le̱ ralal e̱cꞌajol, chan.

³⁰ Joꞌ cuulajak chic laj Moisés quixye reheb li tenamit: —La̱ex xexma̱cob. Anakcuan tintakekꞌ saꞌ li tzu̱l bar cuan cuiꞌ li Ka̱cuaꞌ Dios. Tintzꞌa̱ma chak e̱cuybal chiru li Dios ut ma̱re ta̱cuyekꞌ e̱ma̱c, chan.

³¹ Tojoꞌnak laj Moisés quisukꞌi cuiꞌchic riqꞌuin li Dios ut quixye re: —Eb li tenamit aꞌin nimla ma̱c queꞌxba̱nu. Queꞌxyi̱b lix dioseb oro.

³² Ut anakcuan tintzꞌa̱ma cha̱cuu, ba̱nu usilal, chacuy lix ma̱queb. Cui incꞌaꞌ naru ta̱cuy lix ma̱queb, ba̱nu usilal ta̱cuisi lin cꞌabaꞌ saꞌ la̱ hu li tzꞌi̱banbil cuiꞌ xcꞌabaꞌeb li ti̱queb xchꞌo̱l, chan.

³³ Ut li Dios quixye re laj Moisés: —Incꞌaꞌ. Li ani xeꞌma̱cob chicuu, aꞌan li tincuisi xcꞌabaꞌ saꞌ lin hu.

³⁴ Ayu. Cuben ut tatcꞌamok be chiruheb li tenamit. Texxic saꞌ li naꞌajej xinye a̱cue. Ut lin ángel ta̱cꞌamok be cha̱cuu. Aban nak ta̱cuulak xkꞌehil tinrakok a̱tin saꞌ xbe̱neb, aran teꞌxtoj lix ma̱queb, chan li Dios.

³⁵ Ut li Ka̱cuaꞌ Dios quixtakla jun raylal saꞌ xbe̱neb li tenamit xban nak queꞌxqꞌue chi yi̱ba̱c li cuacax oro xban laj Aarón.