Éxodo 31 - Li Santil hu

¹ Li Ka̱cuaꞌ quia̱tinac riqꞌuin laj Moisés ut quixye re:

² —Abi. La̱in xinsicꞌ ru laj Bezaleel saꞌ xya̱nkeb li ralal xcꞌajol laj Judá. Laj Bezaleel, aꞌan li ralal laj Uri ut laj Uri, aꞌan li ralal laj Hur.

³ La̱in xinqꞌue lin musikꞌ re ut xinqꞌue xnaꞌleb re xjolominquil li cꞌanjel aꞌin. Cuan xnaꞌleb ut naxnau xcꞌoxlanquil chanru tixyi̱b chixjunil chi cha̱bil.

⁴ Naxnau xcꞌanjelanquil chi cha̱bil li oro, plata ut bronce. Ut naxnau xcꞌoxlanquil chanru tixqꞌue xsahob ru li cꞌaꞌru tixyi̱b.

⁵ Naxnau xyi̱banquil chi cha̱bil li terto̱quil pec ut naxnau ajcuiꞌ xyi̱banquil chi cha̱bil li cheꞌ. Naxnau xcꞌoxlanquil chanru tixba̱nu yalak cꞌaꞌru chi cꞌanjelil.

⁶ Ut xinsicꞌ ajcuiꞌ ru laj Aholiab chixtenkꞌanquil laj Bezaleel. Laj Aholiab, aꞌan li ralal laj Ahisamac xcomoneb li ralal xcꞌajol laj Dan. Ut xinqꞌue ajcuiꞌ xnaꞌlebeb ut xcacuilal xchꞌo̱leb chixjunileb li teꞌcꞌanjelak re nak teꞌxba̱nu chixjunil li cꞌaꞌru xinye a̱cue.

⁷ Teꞌxyi̱b li tabernáculo, joꞌ ajcuiꞌ li Lokꞌlaj Ca̱x, ut lix tzꞌapbal, joꞌ ajcuiꞌ chixjunil li ta̱cꞌanjelak saꞌ li tabernáculo.

⁸ Teꞌxyi̱b li me̱x joꞌ ajcuiꞌ li secꞌ li ta̱cꞌanjelak saꞌ li me̱x. Teꞌxyi̱b li candelero riqꞌuin tzꞌakal oro joꞌ ajcuiꞌ li ta̱cꞌanjelak re xyi̱banquil lix mechil. Ut teꞌxyi̱b li artal li teꞌxcꞌat cuiꞌ li incienso.

⁹ Ut teꞌxyi̱b li artal li teꞌxcꞌat cuiꞌ li xul li teꞌxmayeja. Teꞌxyi̱b ajcuiꞌ chixjunil li ta̱cꞌanjelak saꞌ li artal. Ut teꞌxyi̱b ajcuiꞌ li pila joꞌ ajcuiꞌ li xnaꞌaj li teꞌxqꞌue cuiꞌ.

¹⁰ Teꞌxyi̱b li rakꞌ laj Aarón li xbe̱nil aj tij. Ut teꞌxyi̱b ajcuiꞌ li rakꞌeb li ralal li teꞌrocsi nak teꞌoc chi cꞌanjelac chokꞌ aj tij.

¹¹ Teꞌxyi̱b li aceite li ta̱qꞌuehekꞌ saꞌ xbe̱n li teꞌkꞌaxtesi̱k chi cꞌanjelac chicuu. Ut teꞌxyi̱b li sununquil incienso li teꞌxmayeja saꞌ li tabernáculo. Tento teꞌxba̱nu chixjunil chi tzꞌakal joꞌ xinye a̱cue, chan li Ka̱cuaꞌ.

¹² Ut li Dios quixye re laj Moisés:

¹³ —Ta̱ye aꞌin reheb laj Israel, “Che-oxlokꞌi li hiloba̱l cutan ut cheba̱nu li cꞌaꞌru xinye e̱re. Cui la̱ex te̱ba̱nu li cꞌaꞌru xinye e̱re, aꞌan ta̱cꞌanjelak chokꞌ retalil chicuu joꞌ ajcuiꞌ che̱ru la̱ex nak la̱in li Ka̱cuaꞌ Dios ut la̱ex sicꞌbil e̱ru inban. Ta̱cꞌanjelak ajcuiꞌ chokꞌ retalil chiruheb le̱ ralal e̱cꞌajol.

¹⁴ Che-oxlokꞌi li hiloba̱l cutan xban nak aꞌan li lokꞌlaj santil cutan chokꞌ e̱re. Li ani tixmux ru li hiloba̱l cutan, aꞌan ta̱camsi̱k. Li ani natrabajic chiru li hiloba̱l cutan ta̱isi̱k saꞌ e̱ya̱nk chi jun aj cua.

¹⁵ Cuakib cutan textrabajik. Ut li xcuuk li cutan, aꞌan jun lokꞌlaj hiloba̱l cutan. Ut aꞌan jun santil cutan chiru li Ka̱cuaꞌ Dios. Li ani natrabajic chiru li hiloba̱l cutan, ta̱camsi̱k”, chaꞌakat reheb.

¹⁶ La̱ex aj Israel te̱oxlokꞌi li hiloba̱l cutan. Joꞌcan ajcuiꞌ le̱ ralal e̱cꞌajol teꞌx-oxlokꞌi ajcuiꞌ. Ut te̱ba̱nu li xinye e̱re chi junelic kꞌe cutan joꞌ retalil li contrato li xakxo xcuanquil kaban.

¹⁷ Aꞌan retalil chicuu la̱in joꞌ ajcuiꞌ che̱ru la̱ex aj Israel xban nak chiru cuakib cutan xinyi̱b li choxa joꞌ ajcuiꞌ li ruchichꞌochꞌ. Saꞌ xcuak li cutan la̱in xinrak lin cꞌanjel ut saꞌ xcuuk li cutan xinhilan, chan li Dios re laj Moisés.

¹⁸ Nak quirakeꞌ chi a̱tinac li Dios riqꞌuin laj Moisés saꞌ li tzu̱l Sinaí, quixkꞌaxtesi li cuib chi perpo̱quil pec re, li quixtzꞌi̱ba cuiꞌ li chakꞌrab.