Éxodo 3 - Li Santil hu

Laj Moisés quibokeꞌ xban li Dios

¹ Laj Moisés yo̱ chixcꞌacꞌalenquil lix queto̱mk laj Jetro lix yucuaꞌ li rixakil. (Aj Jetro nayeman ajcuiꞌ re laj Reuel.) Aꞌan xbe̱n aj tij reheb laj Madián. Laj Moisés najt quixcꞌameb li queto̱mk saꞌ li chaki chꞌochꞌ, toj retal queꞌcuulac cuan cuiꞌ li tzu̱l Horeb bar quia̱tinac cuiꞌ li Dios riqꞌuin laj Moisés.

² Aran quixcꞌutbesi rib lix ángel li Ka̱cuaꞌ Dios chiru laj Moisés saꞌ rakꞌ li xam saꞌ li jun to̱n chi qꞌuix. Laj Moisés quiril nak yo̱ xxamlel ut incꞌaꞌ na-osoꞌ li qꞌuix.

³ Quixye: —Tinxic. Tinjilok ut tincuil cꞌaꞌru chi xxamil aꞌan. ¿Cꞌaꞌut nak yo̱ xxamlel ut incꞌaꞌ nacꞌat li qꞌuix?—

⁴ Quiril li Ka̱cuaꞌ Dios nak laj Moisés quijiloc chixcꞌatk. Ut saꞌ li qꞌuix li yo̱ chi cꞌatc, quia̱tinac li Dios ut quixye: —At Moisés, chan. Laj Moisés quixye: —Cueꞌquin, chan.

⁵ Li Ka̱cuaꞌ Dios quixye: —Matjiloc chak arin. Ta̱cuisi la̱ xa̱b cha̱cuok xban nak li naꞌajej cuancat cuiꞌ aꞌan santil naꞌajej.—

⁶ Ut li Dios quixye ajcuiꞌ: —La̱in lix Dios la̱ xeꞌto̱nil yucuaꞌ. La̱in lix Dios laj Abraham, laj Isaac ut laj Jacob, chan. Laj Moisés quixucuac chirilbal li Dios ut quixmuk li ru.

⁷ Li Ka̱cuaꞌ Dios quixye re: —La̱in yo̱quin chirilbal li raylal li yo̱queb chixcꞌulbal lin tenamit li cuanqueb Egipto. Yo̱quin chirabinquil nak yo̱queb chixkꞌokonquil ribeb saꞌ rukꞌeb li nequeꞌtaklan reheb saꞌ joskꞌil. Ninnau nak kꞌaxal nayotꞌeꞌ xchꞌo̱leb xban nak rahobtesinbileb.

⁸ Joꞌcan nak la̱in tincoleb saꞌ rukꞌeb laj Egipto ut tincuisiheb ajcuiꞌ saꞌ li tenamit aꞌan. Tincꞌameb saꞌ jun nimla naꞌajej numtajenak xcha̱bilal bar cuan cuiꞌ li sahil echej. Aꞌan li chꞌochꞌ li bar cuanqueb cuiꞌ laj cananeo, eb laj heteo, eb laj amorreo, eb laj ferezeo, eb laj heveo, ut eb laj jebuseo.

⁹ Nacuabi nak yo̱queb chi ya̱bac ut yo̱queb chixkꞌokonquil ribeb. Ut ninnau ajcuiꞌ chanru nak nequeꞌrahobtesi̱c xbaneb laj Egipto.

¹⁰ Abi li cꞌaꞌru tinye a̱cue anakcuan. La̱in tatintakla riqꞌuin laj faraón re nak ta̱cuisiheb chak lin tenamit Egipto, chan li Dios.

¹¹ Ut laj Moisés quichakꞌoc ut quixye re li Dios: —¿Ma cuan ta biꞌ incuanquil la̱in nak tinxic riqꞌuin laj faraón ut tincuisiheb chak laj Israel? chan.

¹² Li Dios quichakꞌoc ut quixye re laj Moisés: —Ayu ut la̱in cua̱nkin a̱cuiqꞌuin. Ut aꞌin a̱cuetalil nak la̱in xintaklan a̱cue. Nak ac xacuisiheb chak laj Israel saꞌ li tenamit Egipto, saꞌ li tzu̱l aꞌin tina̱lokꞌoni cuiꞌchic, chan li Dios.

¹³ Laj Moisés quixye re li Dios: —Nak tincuulak riqꞌuineb laj Israel, tinye reheb nak lix Dios lix xeꞌto̱nil yucuaꞌeb xtaklan cue. Ut eb aꞌan teꞌxpatzꞌ cue, “¿Ani xcꞌabaꞌ li Dios aꞌan?” Ut, ¿cꞌaꞌru tinye reheb? chan laj Moisés.

¹⁴ Li Dios quixye cuiꞌchic re laj Moisés: —La̱in cuanquin chalen chak kꞌe cutan ut chalen anakcuan. La̱in li Dios. Ta̱ye reheb laj Israel nak La̱in xintaklan a̱cue.

¹⁵ Li Dios quixye cuiꞌchic re laj Moisés: —Joꞌcaꞌin ta̱ye reheb laj Israel, “Li nimajcual Dios xtaklan chak cue. Aꞌan li Dios li queꞌxlokꞌoni eb le̱ xeꞌto̱nil yucuaꞌ laj Abraham, laj Isaac ut laj Jacob.” Nimajcual Dios incꞌabaꞌ ut aꞌan tincꞌabaꞌin chi junelic kꞌe cutan.—

¹⁶ Li Dios quixye cuiꞌchic re laj Moisés: —Ayu ut ta̱chꞌutubeb li cui̱nk li nequeꞌcꞌamoc be saꞌ xya̱nkeb laj Israel. Ut ta̱ye reheb, “Li nimajcual Dios li queꞌxlokꞌoni laj Abraham, laj Isaac ut laj Jacob, aꞌan xcꞌutbesi rib chicuu. Joꞌcaꞌin quixye cue: Xexcuil ut ninnau chixjunil li cꞌaꞌru yo̱quex chixcꞌulbal arin Egipto.

¹⁷ La̱in tinyechiꞌi e̱re nak texcuisi saꞌ li raylal li yo̱quex chixcꞌulbal arin Egipto. Texincꞌam saꞌ li chꞌochꞌ li cuanqueb cuiꞌ laj cananeo, eb laj heteo, eb laj amorreo, eb laj ferezeo, eb laj heveo ut eb laj jebuseo. Aꞌan jun nimla naꞌajej numtajenak xcha̱bilal bar cuan cuiꞌ li sahil echej”, chaꞌkat reheb.

¹⁸ Eb aꞌan teꞌrabi la̱ cua̱tin. La̱at ut eb li cui̱nk li nequeꞌcꞌamoc be saꞌ xya̱nkeb laj Israel texxic riqꞌuin lix reyeb laj Egipto ut te̱ye re, “Li nimajcual Dios li nequeꞌxlokꞌoni laj hebreo, aꞌan quixcꞌutbesi rib chiku. Choa̱canab chi xic saꞌ li chaki chꞌochꞌ oxib cutan chi be. Aran tomayejak chiru li Ka̱cuaꞌ Dios”, chaꞌkex re.

¹⁹ La̱in ac ninnau nak lix reyeb laj Egipto incꞌaꞌ texcanab chi e̱lc cui incꞌaꞌ tincꞌut lin cuanquil chiruheb.

²⁰ La̱in tincꞌut lin cuanquil chiruheb laj Egipto. Tinrahobtesiheb ut riqꞌuin aꞌan texcanab chi e̱lc.

²¹ Ut la̱in tinba̱nu nak eb laj Egipto teꞌxcꞌam rib saꞌ usilal riqꞌuineb laj Israel re nak incꞌaꞌ tex-e̱lk chak aran Egipto chi ma̱cꞌaꞌ te̱cꞌam.

²² Chixjunileb li ixk aj Israel teꞌxtzꞌa̱ma li cꞌaꞌak re ru yi̱banbil riqꞌuin oro ut plata riqꞌuineb li rechcabal joꞌ ajcuiꞌ riqꞌuineb li ani teꞌhila̱nk riqꞌuineb. Teꞌxtzꞌa̱ma ajcuiꞌ li cha̱bil akꞌej ut te̱qꞌueheb chirixeb le̱ ralal e̱cꞌajol. Chi joꞌcaꞌin ta̱makꞌma̱nk lix biomaleb laj Egipto, chan li Dios.