Éxodo 29 - Li Santil hu

Chanru teꞌxba̱nu nak teꞌkꞌaxtesi̱k laj tij chi cꞌanjelac

¹ Aꞌan aꞌin li ta̱ba̱nu nak ta̱kꞌaxtesiheb ut ta̱xakabeb chi cꞌanjelac chicuu chokꞌ aj tij: Ta̱sicꞌ jun li toro toj sa̱j ut cuib li carner te̱lom li cha̱bileb. Ma̱cꞌaꞌak xyajeleb.

² Ut te̱yi̱b li caxlan cua li ma̱cꞌaꞌ xchꞌamal riqꞌuin li cha̱bil cꞌaj re li trigo, ut te̱yi̱b li caxlan cua jun chic li cuan aceite chi saꞌ, ut te̱yi̱b ajcuiꞌ li caxlan cua chi jay ut te̱yul li aceite chiru.

³ Te̱qꞌue saꞌ jun li chacach ut te̱cꞌam saꞌ li tabernáculo re te̱mayeja chicuu rochben li chꞌina toro ut li cuib chi carner.

⁴ Chirix aꞌan ta̱cꞌameb laj Aarón rochben li ralal saꞌ li oqueba̱l re li tabernáculo ut ta̱qꞌueheb chi ati̱nc.

⁵ Nak acak xeꞌrakeꞌ chi ati̱nc, ta̱qꞌue chirixeb li rakꞌeb li quiyi̱ba̱c chokꞌ reheb. Xbe̱n cua ta̱qꞌue li túnica chirix laj Aarón. Saꞌ xbe̱n li túnica, ta̱qꞌue li rakꞌ rax. Ut saꞌ xbe̱n aꞌan, ta̱qꞌue li efod rochben li pectoral. Ut ta̱qꞌue lix bacꞌbal xsaꞌ.

⁶ Ut ta̱qꞌue li mitra saꞌ xjolom ut chiru li mitra ta̱qꞌue li oro retalil nak aꞌan kꞌaxtesinbil re li Ka̱cuaꞌ.

⁷ Ut ta̱chap li aceite ut ta̱qꞌue saꞌ xjolom laj Aarón retalil nak yo̱cat chixxakabanquil chokꞌ aj tij.

⁸ Ut ta̱bokeb ajcuiꞌ li ralal laj Aarón ut ta̱qꞌue ajcuiꞌ li rakꞌeb chirixeb aꞌan.

⁹ Ut ta̱qꞌue lix bacꞌbal xsaꞌeb laj Aarón joꞌqueb ajcuiꞌ li ralal ut ta̱qꞌue lix mitra saꞌ xjolomeb. Riqꞌuin aꞌan kꞌaxtesinbilakeb chi cꞌanjelac chicuu chokꞌ aj tij chi junelic.

¹⁰ Chirix aꞌan ta̱cꞌam li toro li toj sa̱j chiru li tabernáculo. Ut laj Aarón joꞌqueb ajcuiꞌ li ralal teꞌxqꞌue li rukꞌeb saꞌ xjolom li toro.

¹¹ Ut aran saꞌ li oqueba̱l re li tabernáculo ta̱camsi li toro chicuu la̱in li Ka̱cuaꞌ.

¹² Ta̱xoc lix quiqꞌuel ut riqꞌuin ruꞌuj a̱cuukꞌ ta̱yul li quicꞌ chiru li ca̱hib chi xucub li cuanqueb saꞌ xca̱ xucu̱til li artal. Ut li joꞌ qꞌuial li ta̱elaꞌa̱nk ta̱hoy saꞌ xto̱n li artal.

¹³ Ta̱cuisi chixjunil li xe̱b li nacuan chiru lix cꞌamcꞌot ut li xe̱b li nacuan chiru lix sa̱seb joꞌ ajcuiꞌ lix que̱nkꞌ rochben li xe̱b li cuan chiru, ut ta̱cꞌat saꞌ li artal.

¹⁴ Abanan lix tibel li toro ut lix cꞌot ut lix tzꞌu̱mal te̱cꞌam jun pacꞌal li tꞌicr li sutsu cuiꞌ li tabernáculo, ut aran te̱cꞌat. Aꞌan li mayej re xtzꞌa̱manquil xcuybal xma̱queb laj Israel.

¹⁵ Joꞌcan ajcuiꞌ te̱ba̱nu riqꞌuin li carner jun. Laj Aarón rochbeneb li ralal teꞌxqꞌue li rukꞌeb saꞌ xjolom li carner.

¹⁶ Chirix aꞌan ta̱camsi li carner ut ta̱rachrachi lix quiqꞌuel saꞌ xbe̱n li artal joꞌ ajcuiꞌ chixcꞌatk.

¹⁷ Ut te̱setꞌi lix tibel li carner ut te̱chꞌaj lix cꞌamcꞌot joꞌqueb ajcuiꞌ li rok ut te̱qꞌue saꞌ li artal rochben lix tibel ut lix jolom.

¹⁸ Ut te̱cꞌat chixjunil li carner saꞌ xbe̱n li artal. Li cꞌatbil mayej, aꞌan re inlokꞌoninquil la̱in li Ka̱cuaꞌ. Ut lix bo̱c, aꞌan jun sununquil mayej li ta̱cuulak chicuu.

¹⁹ Joꞌcan cuiꞌchic te̱ba̱nu riqꞌuin li carner jun chic. Laj Aarón rochbeneb li ralal teꞌxqꞌue li rukꞌeb saꞌ xjolom li carner.

²⁰ Ta̱camsi li carner ut ta̱qꞌue caꞌchꞌinak lix quiqꞌuel chiru lix xic laj Aarón li cuan saꞌ xnim. Joꞌcan ajcuiꞌ ta̱ba̱nu riqꞌuineb li ralal. Ut joꞌcan ajcuiꞌ ta̱ba̱nu riqꞌuin li ruꞌuj rukꞌeb li nim li cuan saꞌ lix nim ukꞌeb. Ut joꞌcan ajcuiꞌ ta̱ba̱nu riqꞌuin li ruꞌuj rokeb li cuan saꞌ xnim rokeb. Ut li quicꞌ li ta̱elaꞌa̱nk ta̱rachrachi saꞌ li artal joꞌ ajcuiꞌ chixcꞌatk.

²¹ Ut li quicꞌ li cuan saꞌ li artal ta̱junaji riqꞌuin li aceite li nequeꞌxqꞌue saꞌ xbe̱neb li nequeꞌkꞌaxtesi̱c chi cꞌanjelac chiru li Ka̱cuaꞌ. Ut ta̱rachrachi li quicꞌ rochben li aceite saꞌ xbe̱n laj Aarón ut saꞌ xbe̱neb li ralal, joꞌ ajcuiꞌ chiru li rakꞌeb re nak kꞌaxtesinbilak laj Aarón joꞌqueb ajcuiꞌ li ralal chi cꞌanjelac chicuu, ut re ajcuiꞌ nak kꞌaxtesinbilak li rakꞌeb.

²² Ta̱cuisi chixjunil lix xe̱bul li carner. Ta̱cuisi li xe̱b li cuan saꞌ lix ye ut li cuan chiru lix cꞌamcꞌot joꞌ ajcuiꞌ li cuan chiru lix sa̱seb ut lix que̱nkꞌ cuib, joꞌ ajcuiꞌ li xe̱b li cuan chiru. Joꞌcan ajcuiꞌ lix tel li cuan saꞌ xnim. Ta̱ba̱nu chi joꞌcaꞌin xban nak li carner aꞌin, aꞌan re xkꞌaxtesinquileb laj tij li teꞌcꞌanjelak chicuu.

²³ Saꞌ li chacach li cuan cuiꞌ li caxlan cua li ac xakꞌaxtesi cue la̱in li Ka̱cuaꞌ, ta̱chap jun li caxlan cua li ma̱cꞌaꞌ xchꞌamal ut ta̱chap jun li caxlan cua li cuan aceite riqꞌuin ut jun li caxlan cua li jay.

²⁴ Li caxlan cua aꞌin ta̱qꞌue saꞌ rukꞌ laj Aarón joꞌ ajcuiꞌ saꞌ rukꞌeb li ralal. Teꞌxtaksi li rukꞌeb re xmayejanquil chicuu.

²⁵ Nak ac xeꞌxkꞌaxtesi li mayej, ta̱cꞌul cuiꞌchic chiruheb ut ta̱qꞌue saꞌ xbe̱n li artal re nak teꞌxcꞌat aran. Nak yo̱k chi cꞌatc lix bo̱c, aꞌan jun sununquil mayej ta̱cuulak chicuu.

²⁶ Ta̱chap ajcuiꞌ li re xchꞌo̱l li carner ut te̱taksi re xkꞌaxtesinquil laj Aarón chokꞌ aj tij chicuu. Nak acak xexrakeꞌ xmayejanquil ta̱cana̱k chokꞌ a̱cue li tib aꞌan.

²⁷ Chalen anakcuan nak ta̱xakaba̱k jalan chic aj tij, ta̱qꞌuehekꞌ re laj Aarón ut eb li ralal xcꞌajol li re xchꞌo̱l li carner joꞌ ajcuiꞌ lix tel, li ac taksinbil re xkꞌaxtesinquil chicuu.

²⁸ Aꞌan jun chakꞌrab tenebanbil saꞌ xbe̱neb laj Israel nak lix tibel li carner li teꞌxtaksi chicuu la̱in li Ka̱cuaꞌ, aꞌan li teꞌxqꞌue re laj Aarón ut reheb li ralal. Aꞌin teꞌxba̱nu eb laj Israel re xcꞌambaleb rib saꞌ usilal cuiqꞌuin la̱in li Dios.

²⁹ Li rakꞌ li ta̱qꞌuehekꞌ chirix laj Aarón nak ta̱xakaba̱k chokꞌ aj tij, aꞌan ajcuiꞌ ta̱kꞌaxtesi̱k cuiꞌchic reheb li ralal xcꞌajol re teꞌxqꞌue chirixeb nak teꞌxakaba̱k mokon chokꞌ aj tij chicuu la̱in li Dios.

³⁰ Ut li ralal laj Aarón, li ta̱oc saꞌ xnaꞌaj aꞌan, tixqꞌue li rakꞌ laj Aarón chirix chiru cuukub cutan nak ta̱oc saꞌ li tabernáculo chi cꞌanjelac saꞌ li Santil Naꞌajej.

³¹ Ta̱cꞌam lix tibel li carner li xcꞌanjelac re xkꞌaxtesinquil laj Aarón chokꞌ aj tij ut ta̱chik saꞌ junak ucꞌal ac kꞌaxtesinbil chokꞌ re li mayej.

³² Aran chire li oqueba̱l re li tabernáculo laj Aarón rochbeneb li ralal teꞌxtzaca li tib aꞌan rochben li caxlan cua li cuan saꞌ li chacach.

³³ Teꞌxtzaca li tib ut li caxlan cua aꞌan li ta̱mayeja̱k re xtzꞌa̱manquil xcuybal xma̱queb nak teꞌxakaba̱k chokꞌ aj tij. Ma̱ ani chic junak jalan ta̱ru̱k tixtzaca li tzacae̱mk aꞌan xban nak ac kꞌaxtesinbilak chicuu la̱in li Ka̱cuaꞌ.

³⁴ Cui ta̱elaꞌa̱nk li tib ut li caxlan cua aꞌan re cuulaj, cꞌatbil te̱ba̱nu re nak ma̱ ani chic ta̱tzaca̱nk re xban nak kꞌaxtesinbilak chicuu la̱in li Ka̱cuaꞌ.

³⁵ Ba̱nu chi tzꞌakal re ru joꞌ xinye a̱cue nak ta̱xakabeb laj Aarón ut eb li ralal chokꞌ aj tij. Chiru cuukub cutan ta̱ba̱nu li cꞌanjel aꞌin re xxakabanquileb chokꞌ aj tij.

³⁶ Chiru li cuukub cutan aꞌan, rajlal cutan te̱cꞌat junju̱nk li toro re xtzꞌa̱manquil xcuybal xma̱queb laj Israel. Cheqꞌue retal nak sak ru li artal ut te̱qꞌue li aceite saꞌ xbe̱n re xsantobresinquil.

³⁷ Cuukub cutan texmayejak saꞌ xbe̱n li artal. Joꞌcaꞌin nak te̱santobresi li artal chicuu. Ut aꞌanak jun santil artal ut chixjunil li te̱qꞌue saꞌ xbe̱n li artal, aꞌan santobresinbilak chic.

Li mayej li teꞌxqꞌue rajlal cutan

³⁸ Rajlal cutan te̱mayeja saꞌ li artal cuib li carner jun chihab cua̱nk reheb.

³⁹ Jun te̱mayeja ekꞌela ut li jun chic te̱mayeja ecuu.

⁴⁰ Te̱mayeja rochben li xbe̱n carner numenak ca̱hib libra li cha̱bil cꞌaj junajinbil riqꞌuin jun litro li aceite oliva. Ut te̱mayeja ajcuiꞌ jun litro li vino.

⁴¹ Te̱mayeja li xcab carner nak acak oc re li kꞌojyi̱n rochben li cꞌaj ut li vino joꞌ te̱ba̱nu re li mayej ekꞌela. Ut nak yo̱k chi cꞌatc, lix bo̱c aꞌanak jun sununquil mayej ta̱cuulak chicuu.

⁴² Ut chalen anakcuan junelic tatmayejak chicuu la̱at joꞌqueb ajcuiꞌ la̱ cualal a̱cꞌajol. Texmayejak chire li oqueba̱l re li tabernáculo. Ut la̱in tina̱tinak a̱cuiqꞌuin ut tincua̱nk a̱cuiqꞌuin.

⁴³ Ut aran ajcuiꞌ tincua̱nk riqꞌuineb li ralal xcꞌajol laj Israel. Ut tinsantobresi li naꞌajej aꞌan riqꞌuin lin lokꞌal.

⁴⁴ La̱in tinsantobresi li tabernáculo ut tinsantobresi li artal. Tinsantobresi laj Aarón joꞌqueb ajcuiꞌ li ralal re nak teꞌcꞌanjelak chicuu chokꞌ aj tij.

⁴⁵ La̱in tincua̱nk riqꞌuineb li ralal xcꞌajol laj Israel ut La̱inak lix Dioseb.

⁴⁶ Ut eb aꞌan teꞌxnau nak la̱in li Ka̱cuaꞌ lix Dioseb aꞌan. La̱in quin-isin chak reheb saꞌ li naꞌajej Egipto re tincua̱nk riqꞌuineb. La̱in li Ka̱cuaꞌ lix Dioseb.