Éxodo 28 - Li Santil hu

Teꞌxyi̱b li rakꞌeb laj tij

¹ Saꞌ xya̱nkeb laj Israel ta̱sicꞌ ru la̱ cuas laj Aarón joꞌqueb ajcuiꞌ li ralal. Aꞌaneb laj Nadab, laj Abiú, laj Eleazar ut laj Itamar. Aꞌaneb li ta̱xakabeb chi cꞌanjelac chicuu chokꞌ aj tij.

² Ta̱yi̱b li rakꞌ laj Aarón la̱ cuas chi cha̱bil xyi̱banquil. Riqꞌuin li rakꞌ aꞌan ta̱cꞌutu̱nk nak aꞌan laj tij ut lokꞌ lix cꞌanjel.

³ Tat-a̱tinak riqꞌuineb chixjunileb laj yi̱bom tꞌicr li xinqꞌueheb xnaꞌleb. Ta̱ye reheb nak teꞌxyi̱b li rakꞌ laj Aarón xban nak aꞌan li te̱kꞌaxtesi chi cꞌanjelac chicuu chokꞌ aj tij.

⁴ Joꞌcaꞌin nak te̱yi̱b li rakꞌeb: li rakꞌ li nim rok li nequeꞌxqꞌue toj chi saꞌ (túnica), ut li rakꞌ jun chic li nequeꞌxqꞌue saꞌ xbe̱n (manto), ut li rakꞌ jun chic li kꞌaxal cha̱bil xyi̱banquil li nequeꞌxqꞌue toj saꞌ xbe̱n (efod). Ut teꞌxyi̱b ajcuiꞌ li tꞌicr li nequeꞌxqꞌue chire xchꞌo̱l (pectoral) joꞌ ajcuiꞌ lix cꞌa̱mal xsaꞌ (cinturón) ut li tꞌicr li nequeꞌxbacꞌ saꞌ xjolom (mitra). Joꞌcan nak yi̱bomak chi cha̱bil li rakꞌ la̱ cuas laj Aarón joꞌ eb ajcuiꞌ li ralal re nak eb aꞌan teꞌcꞌanjelak chicuu chokꞌ aj tij.

⁵ Li cꞌaꞌru ta̱cꞌanjelak chiruheb li teꞌyi̱ba̱nk re li rakꞌeb, aꞌan aꞌin: li oro, li nokꞌ azul, li nokꞌ púrpura, li nokꞌ cak ut li bakbil nokꞌ lino.

⁶ Li efod li rakꞌ li teꞌxqꞌue toj saꞌ xbe̱n, aꞌan yi̱banbilak riqꞌuin oro, ut riqꞌuin li nokꞌ azul, li nokꞌ púrpura ut li nokꞌ cak ut li bakbil nokꞌ lino. Teꞌxqꞌue lix sahob ru chi cha̱bil xyi̱banquil.

⁷ Cuib pere̱l ru te̱qꞌue, jun pere̱l chiru ut jun pere̱l chirix. Saꞌ xbe̱n xtel teꞌxcꞌul rib.

⁸ Lix bacꞌbal xsaꞌ te̱yi̱b juntakꞌe̱t xyi̱banquil riqꞌuin li efod. Te̱yi̱b riqꞌuin oro ut riqꞌuin li nokꞌ azul, li nokꞌ púrpura ut li nokꞌ cak ut li bakbil nokꞌ lino.

⁹ Ta̱sicꞌ cuib li pec ónice ut chiru li pec aꞌan ta̱tzꞌi̱ba xcꞌabaꞌeb li cablaju chi ralal laj Israel.

¹⁰ Ta̱tzꞌi̱ba cuakib chi cꞌabaꞌej chiru li junju̱nk chi pec chi tustu, aꞌ yal ani quiyoꞌla xbe̱n cua.

¹¹ Nak ta̱tzꞌi̱ba lix cꞌabaꞌeb chiru li pec aꞌan, juchꞌbil te̱ba̱nu joꞌ nequeꞌxba̱nu nak nequeꞌxyi̱b li chꞌi̱chꞌ re li sello. Ut li pec aꞌin li tzꞌi̱banbil cuiꞌ lix cꞌabaꞌeb, te̱letz chiru li oro.

¹² Te̱letz li pec aꞌan, saꞌ xbe̱n xtel li rakꞌ efod li naxcꞌul cuiꞌ rib li cuib pere̱l retalil li ralal xcꞌajol laj Israel. Chi joꞌcan li pec aꞌan junelic ta̱cua̱nk saꞌ xbe̱n xtel laj Aarón re xjulticanquil chiru li Ka̱cuaꞌ li ralal xcꞌajoleb laj Israel.

¹³ Te̱letz li pec chiru li oro,

¹⁴ ut te̱yi̱b cuib lix cꞌa̱mal riqꞌuin tzꞌakal oro. Tzꞌulbil ru te̱qꞌue. Ut riqꞌuin lix cꞌa̱mal aꞌan, te̱chap li pec li tzꞌi̱banbil cuiꞌ lix cꞌabaꞌeb li ralal xcꞌajol laj Israel.

¹⁵ Ut te̱yi̱b ajcuiꞌ li pectoral li nequeꞌxqꞌue chire xchꞌo̱l retalil li ti̱quilal. Te̱yi̱b chi cha̱bil xyi̱banquil joꞌ nak te̱yi̱b li efod. Yi̱banbilak riqꞌuin oro, ut riqꞌuin li nokꞌ azul, li nokꞌ púrpura ut li nokꞌ cak ut li bakbil nokꞌ lino.

¹⁶ Te̱yi̱b chi ca̱ xucu̱t, cuib xcaꞌcꞌa̱l centímetro saꞌ xca̱ pacꞌalil. Basbo li re te̱qꞌue.

¹⁷ Ut ca̱hib tzol li terto̱quil pec te̱letz chiru. Saꞌ li xbe̱n tzol li cha̱bil pec li te̱qꞌue, aꞌan jun li sárdica, jun li topacio ut jun li carbunclo.

¹⁸ Saꞌ li xcab tzol te̱qꞌue li cha̱bil pec esmeralda, zafiro ut diamante.

¹⁹ Ut saꞌ li rox tzol te̱qꞌue li cha̱bil pec jacinto, ágata ut amatista.

²⁰ Ut saꞌ li xca̱ tzol te̱qꞌue li cha̱bil pec berilo, ónice ut jaspe. Chixjunileb li pec aꞌin te̱letz chiru li oro.

²¹ Tento nak te̱qꞌue cablaju li pec xban nak cablaju xte̱paleb li ralal xcꞌajol laj Israel. Chiru li junju̱nk chi pec aꞌan te̱tzꞌi̱ba lix cꞌabaꞌ chixju̱nkaleb li ralal xcꞌajol laj Israel. Juchꞌbil te̱ba̱nu joꞌ nak nequeꞌxyi̱b jun li chꞌi̱chꞌ re xyi̱banquil li sello.

²² Ut te̱yi̱b ajcuiꞌ cuib lix cꞌa̱mal li pectoral riqꞌuin tzꞌakal oro tzꞌulbil ru.

²³ Te̱yi̱b cuib li argollas riqꞌuin oro ut te̱letz saꞌ xuc saꞌ xcaꞌ pacꞌalil li nacana takecꞌ.

²⁴ Ut te̱numsi lix cꞌa̱mal oro saꞌ li argollas li cuan saꞌ xuc saꞌ xcaꞌ pacꞌalil li pectoral.

²⁵ Lix cꞌa̱mal li pectoral teꞌxchap rib riqꞌuin li ónice li cuan saꞌ xbe̱n xtel li efod saꞌ li jun pere̱l li nacana chiru.

²⁶ Te̱yi̱b cuib chic li argollas riqꞌuin oro ut te̱letz saꞌ xxuc li pectoral xcaꞌ pacꞌalil li nacana takꞌa. Te̱letz chirix li pectoral re nak chiru li efod ta̱cana̱k.

²⁷ Te̱yi̱b cuib chic li argollas oro ut te̱letz chiru li efod takecꞌ caꞌchꞌin saꞌ xbe̱n xcꞌa̱mal xsaꞌ.

²⁸ Ut te̱bacꞌ riqꞌuin jun cꞌa̱m azul saꞌ li argollas re xchapbal li pectoral riqꞌuin li efod re nak li pectoral tixchap rib chi us riqꞌuin li efod ut incꞌaꞌ ta̱ecꞌa̱nk saꞌ xnaꞌaj.

²⁹ Chi joꞌcaꞌin tixcꞌam chire xchꞌo̱l laj Aarón li pectoral retalil li ti̱quilal, li tzꞌi̱banbil cuiꞌ lix cꞌabaꞌeb li cablaju xte̱paleb li ralal xcꞌajol laj Israel. Tixcꞌam chire xchꞌo̱l li pectoral rajlal nak ta̱oc saꞌ li Santil Naꞌajej ut laj Aarón junelic tixjultica chiru li Ka̱cuaꞌ eb li ralal xcꞌajol laj Israel.

³⁰ Ut te̱qꞌue li Urim ut li Tumim saꞌ li pectoral re nak cua̱nk chire xchꞌo̱l laj Aarón nak ta̱oc saꞌ li tabernáculo chiru li Ka̱cuaꞌ. Joꞌcan nak laj Aarón junelic tixcꞌam chire xchꞌo̱l li Urim ut li Tumim nak ta̱oc chiru li Ka̱cuaꞌ re nak ta̱ru̱k ta̱tzꞌilok a̱tin chirixeb laj Israel.

³¹ Li rakꞌ li naxqꞌue saꞌ xbe̱n li saki túnica, te̱yi̱b riqꞌuin tꞌicr azul.

³² Te̱canab xnaꞌaj lix cux chi teto, ut te̱quem jun li tꞌicr chokꞌ xta lix cux re nak incꞌaꞌ ta̱pejekꞌ nak ta̱rocsi saꞌ xjolom.

³³ Te̱qꞌue li granada chire chokꞌ xsahob ru yi̱banbil riqꞌuin nokꞌ azul, nokꞌ púrpura ut nokꞌ cak. Ut te̱qꞌue li cocꞌ campana yi̱banbil riqꞌuin oro.

³⁴ Te̱qꞌue jun li granada, jun li campana, ut jun chic li granada ut jun chic li campana. Joꞌcaꞌin te̱ba̱nu chire li rakꞌ.

³⁵ Laj Aarón tento nak tixqꞌue li rakꞌ aꞌin chirix nak ta̱oc chi cꞌanjelac saꞌ li tabernáculo re nak incꞌaꞌ ta̱ca̱mk. Rajlal nak ta̱oc ut nak ta̱e̱lk saꞌ li tabernáculo ta̱abi̱k nak ta̱ecꞌa̱nk li cocꞌ campana.

³⁶ Ut te̱yi̱b ajcuiꞌ jun chꞌina pere̱l tzꞌakal oro ut juchꞌbil te̱ba̱nu joꞌ nak nequeꞌxyi̱b li sello nak te̱tzꞌi̱ba chiru li a̱tin li naxye “Santilal Chiru li Ka̱cuaꞌ.”

³⁷ Ut riqꞌuin jun li cꞌa̱m azul te̱bacꞌ li oro chiru li mitra li tixbacꞌ saꞌ xjolom.

³⁸ Li mitra junelic cua̱nk saꞌ xjolom laj Aarón nak tixkꞌaxtesi chiru li Dios lix mayejeb li tenamit. Ut cui teꞌpaltok laj Israel riqꞌuin li mayej teꞌxqꞌue, lix ma̱queb ta̱cana̱k saꞌ xbe̱n laj Aarón. Abanan li Dios tixcꞌul lix mayejeb xban nak li jun chꞌina pere̱l chi oro tzꞌi̱banbil cuiꞌ li a̱tin junelic cua̱nk saꞌ xjolom laj Aarón.

³⁹ Li túnica te̱yi̱b riqꞌuin li cha̱bil nokꞌ lino. Joꞌcan ajcuiꞌ li mitra te̱yi̱b riqꞌuin lino. Ut te̱yi̱b ajcuiꞌ lix bacꞌbal xsaꞌ ut te̱qꞌue xsahob ru cha̱bil xyi̱banquil.

⁴⁰ Ut te̱yi̱b ajcuiꞌ li túnica ut lix bacꞌbal saꞌ joꞌ ajcuiꞌ li mitra reheb li ralal laj Aarón re xcꞌutbal xlokꞌal li cꞌanjel teꞌxba̱nu.

⁴¹ Ta̱qꞌue li rakꞌ chirix laj Aarón la̱ cuas joꞌqueb ajcuiꞌ li ralal. Ut ta̱qꞌue li aceite saꞌ xjolomeb re xxakabanquileb chokꞌ aj tij. Ta̱kꞌaxtesiheb chicuu re nak santobresinbilakeb re teꞌcꞌanjelak chicuu.

⁴² Te̱yi̱b ajcuiꞌ riqꞌuin li nokꞌ lino lix cue̱xeb li teꞌrocsi chokꞌ xta rakꞌeb. Ta̱cuulak saꞌ xcꞌa̱mal xsaꞌeb ut ta̱cuulak toj saꞌ xbe̱n rakeb.

⁴³ Rajlal teꞌxqꞌue li rakꞌeb aꞌan chirixeb nak teꞌoc saꞌ li tabernáculo ut nak teꞌoc chi cꞌanjelac saꞌ li artal li cuan saꞌ li Santil Naꞌajej re nak incꞌaꞌ teꞌpaltok chicuu la̱in li Ka̱cuaꞌ. Tento teꞌxba̱nu aꞌan re nak incꞌaꞌ teꞌca̱mk laj Aarón rochbeneb li ralal. Li chakꞌrab aꞌan tenebanbil chi junelic saꞌ xbe̱neb laj Aarón ut eb li ralal xcꞌajol li teꞌcua̱nk mokon.