Éxodo 27 - Li Santil hu

Teꞌxyi̱b riqꞌuin bronce li artal li teꞌmayejak cuiꞌ xul

¹ Ut te̱yi̱b ajcuiꞌ jun li artal riqꞌuin li cheꞌ acacia. Te̱yi̱b chi ca̱ xucu̱t. Cuib metro riqꞌuin o̱b xcaꞌcꞌa̱l centímetro xnimal li ru ut cuib metro riqꞌuin o̱b xcaꞌcꞌa̱l centímetro xnimal li rok. Ut o̱b xcaꞌcꞌa̱l centímetro li xteram.

² Te̱yi̱b ca̱hib li xucub ut te̱qꞌue saꞌ lix ca̱ xucu̱til li artal. Chixjunil li artal rochben li xucub junaj ru nak te̱yi̱b ut te̱letz bronce chiru.

³ Chixjunil li cꞌaꞌak re ru li ta̱cꞌanjelak saꞌ li artal re li mayej, aꞌan yi̱banbilak riqꞌuin bronce. Te̱yi̱b li chꞌi̱chꞌ re xxocbal li cha, ut te̱yi̱b li pala, joꞌ ajcuiꞌ li ni̱nki secꞌ re xxocbal li quicꞌ, ut li ganchos re xchapbal li tib joꞌ ajcuiꞌ lix naꞌaj li ru xam.

⁴ Ut te̱yi̱b ajcuiꞌ riqꞌuin bronce lix naꞌaj li xam ut hopox ru te̱qꞌue. Te̱yi̱b ajcuiꞌ ca̱hib li argollas bronce ut te̱qꞌue saꞌ xca̱ xucu̱til li tusbil chꞌi̱chꞌ.

⁵ Toj chi saꞌ li artal saꞌ xyitok te̱qꞌue li chꞌi̱chꞌ aꞌan.

⁶ Te̱yi̱b ajcuiꞌ cuib li cheꞌ ti̱c rix re xpakonquil li artal. Te̱yi̱b riqꞌuin li cheꞌ acacia ut te̱letz li bronce chirix.

⁷ Ut te̱numsi li cheꞌ aꞌan saꞌ li argolla li cuan saꞌ xcaꞌ pacꞌalil li artal ut riqꞌuin li cuib chi cheꞌ te̱pako li artal.

⁸ Ut hopho xsaꞌ li artal li te̱yi̱b. Te̱yi̱b chi tzꞌakal joꞌ quincꞌut cha̱cuu saꞌ li tzu̱l.

Teꞌxyi̱b li neba̱l re li tabernáculo

⁹ Te̱yi̱b ajcuiꞌ lix neba̱l li tabernáculo. Te̱sut li neba̱l riqꞌuin tꞌicr yi̱banbil riqꞌuin li bakbil nokꞌ lino. Saꞌ li jun pacꞌal li nacana saꞌ li sur o̱b roxcꞌa̱l metro xnimal rok li tꞌicr te̱qꞌue.

¹⁰ Te̱yi̱b junmay li okech riqꞌuin bronce ut te̱yi̱b ajcuiꞌ riqꞌuin bronce junmay xnaꞌajeb li okech re te̱qꞌue cuiꞌ. Li ganchos joꞌ ajcuiꞌ li argollas li te̱chap cuiꞌ li tꞌicr yi̱banbilak riqꞌuin plata.

¹¹ Ut joꞌcan cuiꞌchic te̱ba̱nu saꞌ li jun pacꞌal jun chic li nacana saꞌ li norte. O̱b roxcꞌa̱l metro xnimal rok li tꞌicr li te̱qꞌue aran. Te̱yi̱b junmay li okech ut junmay lix naꞌajeb te̱qꞌue cuiꞌ. Ut riqꞌuin plata te̱yi̱b li ganchos ut li argollas li te̱qꞌue cuiꞌ li tꞌicr.

¹² Li tꞌicr li te̱qꞌue saꞌ li jun pacꞌal chic li nacana saꞌ xjayal li na-oc cuiꞌ li sakꞌe, cuib xcaꞌcꞌa̱l metro riqꞌuin media lix nimal rok. Te̱yi̱b laje̱b li okech joꞌ ajcuiꞌ li laje̱b li xnaꞌajeb li te̱qꞌue cuiꞌ li okech.

¹³ Ut joꞌcan ajcuiꞌ bar cuan cuiꞌ li oqueba̱l li nacana saꞌ lix jayal li na-el cuiꞌ chak li sakꞌe. Aꞌan cuib xcaꞌcꞌa̱l metro riqꞌuin media lix nimal rok te̱qꞌue.

¹⁴ Chixcꞌatk li oqueba̱l te̱qꞌue oxib li okech ut oxib lix naꞌaj li te̱qꞌue cuiꞌ. Ut cuukub metro xnimal rok li tꞌicr li te̱qꞌue chiru li okech.

¹⁵ Ut saꞌ li jun pacꞌal chic re li oqueba̱l te̱qꞌue li oxib chi okech ut oxib lix naꞌaj li te̱qꞌue cuiꞌ ut te̱letz chiru li okech aꞌan cuukub metro li tꞌicr.

¹⁶ Ut saꞌ li oqueba̱l re li neba̱l te̱qꞌue bele̱b metro li tꞌicr yi̱banbil riqꞌuin li nokꞌ azul, li nokꞌ púrpura ut li nokꞌ cak ut riqꞌuin li bakbil nokꞌ lino. Cha̱bil xyi̱banquil lix sahob ru te̱qꞌue. Ut te̱yi̱b ca̱hib li okech ut ca̱hib lix naꞌaj li te̱qꞌue cuiꞌ.

¹⁷ Chixjunil li okech li te̱sut cuiꞌ li neba̱l cua̱nk lix argolla ut lix gancho yi̱banbil riqꞌuin plata ut yi̱banbilakeb riqꞌuin bronce lix naꞌajeb li teꞌqꞌuehekꞌ cuiꞌ li okech.

¹⁸ O̱b roxcꞌa̱l (45) metro xnimal rok li neba̱l ut cuib xcaꞌcꞌa̱l metro riqꞌuin media (22 1/2) chiru ut chirix, ut cuib metro riqꞌuin o̱b xcaꞌcꞌa̱l (45) centímetro xnajtil xteram. Ut li tꞌicr li ta̱tzꞌapok re li neba̱l yi̱banbilak riqꞌuin bakbil nokꞌ lino. Ut yi̱banbil riqꞌuin bronce li xnaꞌajeb li teꞌqꞌuehekꞌ cuiꞌ li okech.

¹⁹ Chixjunil li cꞌaꞌak re ru ta̱cꞌanjelak re lokꞌoni̱nc saꞌ li tabernáculo, te̱yi̱b riqꞌuin bronce. Ut te̱yi̱b ajcuiꞌ riqꞌuin bronce chixjunil li chꞌi̱chꞌ li ta̱chapok re li cꞌa̱m saꞌ chꞌochꞌ.

Teꞌxyi̱b li aceite li nacꞌanjelac chokꞌ xyaꞌal li candil

²⁰ Te̱ye reheb laj Israel nak junelic teꞌxcꞌam chak li cha̱bil aceite li na-el riqꞌuin li ru li cheꞌ olivo, li ta̱cꞌanjelak chokꞌ xyaꞌal li candil re nak junelic lochlo̱k li candil li cuan saꞌ li tabernáculo.

²¹ Laj Aarón rochbeneb li ralal, aꞌaneb li teꞌilok re li candelero li cuan saꞌ li Santil Naꞌajej, li cuan chiru li tas li naramoc re li Lokꞌlaj Santil Naꞌajej, li cuan cuiꞌ li Lokꞌlaj Ca̱x. Teꞌril nak junelic lochlo̱k chiru li Ka̱cuaꞌ lix xamlel li candelero. Li chakꞌrab aꞌin tenebanbil saꞌ xbe̱neb laj Israel joꞌqueb ajcuiꞌ li ralal xcꞌajoleb re nak joꞌcan teꞌxba̱nu junelic.