Éxodo 22 - Li Santil hu

Li chakꞌrab chirix li cꞌaꞌru ta̱sachk

¹ Cui ani ta̱relkꞌa junak bo̱yx malaj ut junak carner, ut tixcamsi malaj ut tixcꞌayi, aꞌan tento nak tixqꞌue o̱b chi bo̱yx chokꞌ re̱kaj li jun li xrelkꞌa malaj ut tixqꞌue ca̱hib chi carner chokꞌ re̱kaj li jun li xrelkꞌa.

² Cui laj e̱lkꞌ ta̱taꞌekꞌ chiru kꞌojyi̱n nak yo̱k chi elkꞌac, ut cui saꞌ li ho̱nal aꞌan ta̱camsi̱k, li ani ta̱camsi̱nk re, ta̱cana̱k chi ma̱cꞌaꞌ xma̱c.

³ Abanan cui ac xcutanoꞌ nak ta̱taꞌekꞌ laj e̱lkꞌ ut ta̱camsi̱k, li ani ta̱camsi̱nk re tento nak tixtoj xma̱c. Cui laj e̱lkꞌ incꞌaꞌ nacamsi̱c, tento nak tixqꞌue re̱kaj li joꞌ qꞌuial ac xrelkꞌa. Abanan cui laj e̱lkꞌ ma̱cꞌaꞌ xtumin, tento nak ta̱cꞌayi̱k aꞌan re xtojbal li joꞌ qꞌuial ac xrelkꞌa.

⁴ Ut cui teꞌxtau li xul chi yoꞌyo riqꞌuin, li ac xrelkꞌa usta bo̱yx, malaj ut bu̱r, malaj ut carner, tento tixqꞌue re̱kaj cuib sut xqꞌuial chiru li ac xrelkꞌa.

⁵ Cui ani tixcanab lix queto̱mk chi xic chi cuaꞌac yalak bar, ut cui lix queto̱mk tixsach chak li acui̱mk jalan aj e, tento nak laj e̱chal re li queto̱mk tixqꞌue re̱kaj riqꞌuin li racui̱mk aꞌan, li kꞌaxal cha̱bil.

⁶ Cui junak yo̱ chi cꞌatoc ut saꞌ xcꞌatbal li qꞌuix naxhel rib li xam ut naxtau li acui̱mk jalan aj e li ac sicꞌbil malaj chixjunil li aubil aran, li ani ta̱qꞌuehok re li xam tento tixtoj re laj e̱chal re li acui̱mk li joꞌ qꞌuial xcꞌat.

⁷ Cui ani tixqꞌue tumin malaj li cꞌaꞌak chic re ru terto xtzꞌak chi xoquecꞌ riqꞌuin junak li ras ri̱tzꞌin ut li ani ta̱xocok re ta̱elkꞌa̱k chiru saꞌ li rochoch, cui teꞌxtau laj e̱lkꞌ, tento tixtoj cuib sut xqꞌuial chiru li ac xrelkꞌa.

⁸ Abanan cui incꞌaꞌ teꞌxtau laj e̱lkꞌ tento nak ta̱cꞌamekꞌ riqꞌuin laj rakol a̱tin laj e̱chal cab re nak aran ta̱tzꞌilekꞌ a̱tin chirix re rilbal ma aꞌan li qui-elkꞌan re malaj incꞌaꞌ.

⁹ Riqꞌuin chixjunil li chꞌaꞌajquilal joꞌcaꞌin, usta chirix bo̱yx, malaj bu̱r, malaj carner, malaj tꞌicr, malaj chirix cꞌaꞌak chic re ru qui-elkꞌa̱c, cui junak tixye: “aꞌin cue la̱in”, tento nak teꞌxic xcabichaleb riqꞌuin laj rakol a̱tin re nak ta̱tzꞌilekꞌ a̱tin chirixeb. Ut laj rakol a̱tin tixye ani cuan xma̱c. Li ani cuan xma̱c, aꞌan ta̱tojok re li jun chic cuib sut xqꞌuial li quisach.

¹⁰ Cui ani tixqꞌue junak xbu̱r malaj xbo̱yx, malaj xcarner, malaj cꞌaꞌak chic re ru chi xulil, chi xoquecꞌ riqꞌuin junak li ras ri̱tzꞌin, ut cui ta̱ca̱mk malaj ut ta̱yoqꞌuekꞌ malaj ut ta̱elkꞌa̱k chiru chi ma̱ ani ta̱ilok re,

¹¹ tento nak li jun li quicanaba̱c cuiꞌ li xul tixye li juramento saꞌ incꞌabaꞌ la̱in li Ka̱cuaꞌ Dios chiru laj e̱chal re nak aꞌan incꞌaꞌ xcheꞌ. Ut tento nak ta̱cꞌojla̱k xchꞌo̱l laj e̱chal re lix xul riqꞌuin li a̱tin aꞌan. Ut li jun chic incꞌaꞌ ta̱tojok.

¹² Abanan cui ta̱elkꞌa̱k li xul chiru xban nak incꞌaꞌ yo̱k chirilbal chi us, tento nak tixtoj re laj e̱chal re.

¹³ Ut cui li xul ta̱tiꞌekꞌ xban junak joskꞌ aj xul, tento nak tixcꞌam lix bakel re nak laj e̱chal re tixpa̱b nak xul quitiꞌoc re. Ut incꞌaꞌ tento nak tixtoj re laj e̱chal re.

¹⁴ Cui ani tixtoꞌoni junak li xul ut ma̱re ta̱ca̱mk malaj ut ta̱tochꞌekꞌ chiru chi ma̱ anihak laj e̱chal re, tento nak tixtoj chiru laj e̱chal re li xul li xtoꞌoni.

¹⁵ Abanan cui cua̱nk laj e̱chal re nak ta̱ca̱mk li xul, li xtoꞌonin re incꞌaꞌ tento tixtoj. Ut cui ac tojbil li xtoꞌoninquil, caꞌaj cuiꞌ aꞌan tixcꞌul laj e̱chal re.

Li chakꞌrab li quiqꞌueheꞌ reheb laj Israel

¹⁶ Cui junak cui̱nk tixbatzꞌune junak xkaꞌal ma̱jiꞌ cuanjenak riqꞌuin cui̱nk, li cui̱nk aꞌan tento tixqꞌue re lix naꞌ xyucuaꞌ li xkaꞌal li joꞌ qꞌuial tento tixqꞌue ut ta̱sumla̱k riqꞌuin li xkaꞌal aꞌan.

¹⁷ Ut cui li yucuaꞌbej incꞌaꞌ ta̱raj xqꞌuebal li xkaꞌal re, tento ajcuiꞌ nak li cui̱nk tixtoj li joꞌ qꞌuial natojman chirixeb li xkaꞌal li toj ma̱jiꞌ cuanjenakeb riqꞌuin cui̱nk.

¹⁸ Incꞌaꞌ ta̱canaba̱k chi yoꞌyo li ani natu̱lac.

¹⁹ Li ani tixchꞌic rib riqꞌuin xul, tento ta̱camsi̱k.

²⁰ Li ani ta̱mayejak chiruheb li jalanil dios, ut cui incꞌaꞌ tixqꞌue lix mayej re li tzꞌakal Dios, aꞌan tento ta̱camsi̱k.

²¹ Me̱balakꞌiheb li jalaneb xtenamit chi moco te̱ba̱nu raylal reheb, xban nak jalan ajcuiꞌ e̱tenamit la̱ex nak quexcuan chak saꞌ li tenamit Egipto.

²² Me̱rahobtesiheb li xma̱lcaꞌan chi moco li ma̱cꞌaꞌ xnaꞌ xyucuaꞌeb.

²³ Cui la̱ex te̱rahobtesiheb, la̱in tincuabi nak teꞌxtzꞌa̱ma xtenkꞌanquileb cue.

²⁴ Ut la̱in tinjoskꞌokꞌ saꞌ e̱be̱n ut texinqꞌue chi camsi̱c riqꞌuin chꞌi̱chꞌ. Le̱ cocꞌal teꞌcana̱k chi ma̱cꞌaꞌ chic xyucuaꞌeb ut le̱ rixakil xma̱lcaꞌan chic teꞌcana̱k.

²⁵ Cui te̱qꞌue tumin chi toꞌ re junak li nebaꞌ li cuanqueb saꞌ e̱ya̱nk, incꞌaꞌ te̱ba̱nu joꞌ nequeꞌxba̱nu li nequeꞌtoꞌonin tumin. Incꞌaꞌ te̱patzꞌ ral li tumin li te̱toꞌoni.

²⁶ Cui te̱cꞌul chi prenda li tꞌicr li naxtzꞌap cuiꞌ rib le̱ ras e̱ri̱tzꞌin, tento te̱kꞌaxtesi cuiꞌchic re lix tꞌicr nak ta̱ecuu̱k,

²⁷ xban nak caꞌaj cuiꞌ aꞌan li tꞌicr li naxtzꞌap cuiꞌ rib. ¿Chanru nak tixtzꞌap rib nak ta̱oc chi cua̱rc chi ma̱cꞌaꞌ lix tꞌicr? Nak tixtzꞌa̱ma xtenkꞌanquil cue, la̱in tincuabi xban nak la̱in nin-uxta̱nan u.

²⁸ Me̱hob li nequeꞌrakoc a̱tin saꞌ e̱be̱n chi moco chetzꞌekta̱na li nataklan saꞌ le̱ tenamit.

²⁹ Rajlal te̱mayeja cue li xbe̱n u le̱ racui̱mk joꞌ ajcuiꞌ li xyaꞌal li ru le̱ uvas. Ut te̱kꞌaxtesi ajcuiꞌ cue li xbe̱n le̱ ralal.

³⁰ Joꞌcan ajcuiꞌ te̱ba̱nu riqꞌuin li xbe̱n ral le̱ cuacax ut riqꞌuin li xbe̱n ral le̱ carner. Cuukub cutan teꞌcua̱nk riqꞌuin lix naꞌ ut saꞌ lix cuakxak cutan te̱kꞌaxtesi cue la̱in.

³¹ La̱ex lin tenamit. Joꞌcan nak chexcua̱nk saꞌ santilal ut me̱tiu xtibel li xul li nacamsi̱c xbaneb li joskꞌ aj xul li cuanqueb saꞌ qꞌuicheꞌ. Qꞌuehomak ban chixtiuheb li tzꞌiꞌ.