Éxodo 20 - Li Santil hu

Li laje̱b chi chakꞌrab

¹ Ut li Dios quia̱tinac ut quixye chixjunil li a̱tin aꞌin:

² La̱in li Ka̱cuaꞌ le̱ Dios. La̱in xin-isin chak e̱re saꞌ li tenamit Egipto, saꞌ li naꞌajej li xexrahobtesi̱c cuiꞌ chak.

³ Incꞌaꞌ naru nacuan jalanil dios e̱riqꞌuin chicuu la̱in.

⁴ Me̱yi̱b e̱pechꞌbil dios chi moco xjalam u̱ch ta li cuan saꞌ choxa, chi moco li cuan saꞌ ruchichꞌochꞌ, chi moco li cuan saꞌ haꞌ.

⁵ Me̱cuikꞌib e̱rib chiruheb li yi̱banbil dios, chi moco chelokꞌoniheb. La̱in li Ka̱cuaꞌ le̱ Dios. Cau cuib. La̱in incꞌaꞌ nacuulac chicuu nak jalan te̱qꞌue xlokꞌal. Ut ninrahobtesiheb li alal cꞌajolbej riqꞌuin lix ma̱queb lix naꞌ xyucuaꞌeb toj saꞌ rox saꞌ xca̱ xtasalil li ralal xcꞌajoleb li xicꞌ nequeꞌiloc cue.

⁶ Ut nacuuxta̱naheb ru li nequeꞌrahoc cue ut nequeꞌxpa̱b lin chakꞌrab.

⁷ Me̱patzꞌ xcꞌabaꞌ li Ka̱cuaꞌ le̱ Dios saꞌ yoꞌobanbil a̱tin. Li Ka̱cuaꞌ Dios moco tixcanab ta chi incꞌaꞌ tixtoj xma̱c li ani tixpatzꞌ xcꞌabaꞌ chi ma̱cꞌaꞌ rajbal.

⁸ Julticak e̱re li hiloba̱l cutan re nak oxlokꞌinbilak che̱ru.

⁹ Cuakib cutan texcꞌanjelak ut te̱ba̱nu chixjunil le̱ trabaj.

¹⁰ Saꞌ xcuuk li cutan aꞌan jun hiloba̱l cutan chiru li Ka̱cuaꞌ le̱ Dios. Ma̱ jun li cꞌanjel te̱ba̱nu. Ma̱ ani ta̱trabajik chi moco la̱ex, chi moco le̱ ralal e̱cꞌajol, chi moco le̱ mo̱s cui̱nk, chi moco le̱ mo̱s ixk, chi moco le̱ xul, chi moco junak li jalan xtenamit li cuan saꞌ e̱ya̱nk.

¹¹ Chiru cuakib cutan li Ka̱cuaꞌ Dios quixyi̱b li choxa, li ruchichꞌochꞌ ut li palau. Quilajxyi̱b chixjunil li cꞌaꞌak re ru cuan saꞌ ruchichꞌochꞌ joꞌ ajcuiꞌ saꞌ choxa. Ut saꞌ xcuuk li cutan quihilan. Joꞌcan nak li Ka̱cuaꞌ Dios quirosobtesi li hiloba̱l cutan ut quixsantobresi.

¹² Che-oxlokꞌi le̱ naꞌ e̱yucuaꞌ re nak ta̱najtokꞌ ru le̱ yuꞌam saꞌ li chꞌochꞌ li yo̱ chixqꞌuebal e̱re li Ka̱cuaꞌ le̱ Dios.

¹³ Me̱camsi e̱ras e̱ri̱tzꞌin.

¹⁴ Mexmuxuc caxa̱r.

¹⁵ Mex-elkꞌac.

¹⁶ Mexyoꞌoban a̱tin chirix le̱ ras e̱ri̱tzꞌin.

¹⁷ Me̱ra ru rochoch le̱ ras e̱ri̱tzꞌin. Me̱ra ru rixakil le̱ ras e̱ri̱tzꞌin chi moco lix mo̱s cui̱nk, chi moco lix mo̱s ixk. Me̱ra ru lix bo̱yx chi moco lix xul nai̱kan. Ma̱cꞌaꞌ cꞌaꞌ chic re ru re le̱ ras e̱ri̱tzꞌin te̱ra ru.

Nequeꞌsicsot xbaneb xxiu laj Israel

¹⁸ Eb laj Israel queꞌrabi nak natenloc li ca̱k ut queꞌril nak nareploc. Queꞌrabi xya̱b li trompeta ut queꞌril nak nabukuknac li sib. Chixjunileb nequeꞌsicsot xbaneb xxiu ut queꞌjiloc chirixeb saꞌ junpa̱t.

¹⁹ Ut queꞌxye re laj Moisés: —La̱at tat-a̱tinak kiqꞌuin ut to-abi̱nk cha̱cuu. Mia̱tinac li Dios kiqꞌuin xban nak ma̱re toca̱mk, chanqueb.

²⁰ Laj Moisés quixye reheb: —Mexxucuac. Li Dios xchal chi xyalbal le̱ pa̱ba̱l. Usan cui te̱xucua ru li Dios ut incꞌaꞌ chic texma̱cobk, chan.

²¹ Li tenamit xakxo̱queb chi najt ut laj Moisés yo̱ chi nachꞌoc riqꞌuin li chok li moymo ru bar cuan cuiꞌ li Dios.

²² Ut li Dios quixye re laj Moisés: —Ta̱ye reheb laj Israel, “Joꞌcaꞌin naxye e̱re li Ka̱cuaꞌ Dios: La̱ex xerabi ajcuiꞌ nak la̱in xina̱tinac e̱riqꞌuin saꞌ choxa.

²³ Me̱yi̱b e̱dios riqꞌuin plata chi moco riqꞌuin oro. Caꞌaj cuiꞌ la̱in li tine̱lokꞌoni.

²⁴ Te̱yi̱b jun li artal chokꞌ cue yi̱banbil riqꞌuin chꞌochꞌ. Ut saꞌ xbe̱n li artal aꞌan te̱qꞌue le̱ cꞌatbil mayej. Aran ajcuiꞌ te̱mayeja chicuu le̱ carner ut le̱ bo̱yx re xtzꞌa̱manquil xcuybal e̱ma̱c. Li bar tinye e̱re, aran te̱yi̱b le̱ artal ut la̱in cua̱nkin e̱riqꞌuin ut aran texcuosobtesi.

²⁵ Cui riqꞌuin pec yi̱banbil li artal li te̱yi̱b chokꞌ cue, me̱tukub ru li pec. Cui te̱pechꞌ riqꞌuin chꞌi̱chꞌ, te̱mux ru li pec ut incꞌaꞌ chic us chokꞌ re lin artal.

²⁶ Te̱yi̱b lin artal chi ma̱cꞌaꞌ xtakleba̱l, xban nak cui te̱yi̱b riqꞌuin xtakleba̱l naru te̱cꞌut e̱rib nak yo̱kex chi takecꞌ”, chan li Dios.