Éxodo 19 - Li Santil hu

Eb laj Israel queꞌcuulac saꞌ li naꞌajej Sinaí xcꞌabaꞌ

¹ Saꞌ li xbe̱n cutan re li rox po reliqueb saꞌ li tenamit Egipto nak queꞌcuulac laj Israel saꞌ li chaki chꞌochꞌ Sinaí xcꞌabaꞌ.

² Queꞌel saꞌ li naꞌajej Refidim xcꞌabaꞌ ut coxeꞌxtau li chaki chꞌochꞌ Sinaí. Aran queꞌxyi̱b xmuheba̱leb chiru li tzu̱l.

³ Ut laj Moisés quitakeꞌ chiru li tzu̱l ut aran quia̱tinac li Ka̱cuaꞌ Dios riqꞌuin. Quixye re: —Tat-a̱tinak riqꞌuineb li ralal xcꞌajol laj Jacob.

⁴ La̱ex xeril chanru xinba̱nu reheb laj Egipto. La̱ex xexcuisi saꞌ xya̱nkeb ut xexincꞌam cuiqꞌuin joꞌ naxba̱nu li cꞌuch riqꞌuin li cocꞌ ral.

⁵ Cui la̱ex te̱rabi li cua̱tin ut te̱ba̱nu li contrato li xkacꞌu̱b chi kibil kib, la̱exak lin tenamit raro̱quex inban. Chixjunil li ruchichꞌochꞌ cue la̱in. Abanan la̱ex li tenamit li sicꞌbil ru inban.

⁶ La̱ex taxak jun santil tenamit chicuu. Texcꞌanjelak chicuu joꞌ xbe̱nil aj tij. Aꞌin li cua̱tin ta̱yeheb re laj Israel, chan li Dios re laj Moisés.

⁷ Ut laj Moisés quixbokeb chixjunil li cui̱nk li nequeꞌcꞌamoc be chiruheb laj Israel. Quixye reheb li cꞌaꞌru quixye li Dios.

⁸ Junajeb lix chꞌo̱l eb laj Israel nak queꞌxye: —Takaba̱nu chixjunil li quixye li Dios, chanqueb. Laj Moisés quixye re li Ka̱cuaꞌ Dios li cꞌaꞌru queꞌxye.

⁹ Li Ka̱cuaꞌ Dios quixye re laj Moisés: —Re nak tateꞌxpa̱b chi junelic laj Israel, la̱in tina̱tinak a̱cuiqꞌuin saꞌ jun chok moymo ru ut eb aꞌan teꞌrabi nak yo̱kin chi a̱tinac a̱cuiqꞌuin.— Ut laj Moisés quixye reheb laj Israel li cꞌaꞌru quixye li Dios.

¹⁰ Li Dios quixye re laj Moisés: —Tatxic riqꞌuineb li cristian. Chiru li cutan aꞌin ut cuulaj ta̱kꞌaxtesiheb saꞌ cuukꞌ. Eb aꞌan teꞌxpuchꞌ li rakꞌeb, ut teꞌxti̱cobresi lix yuꞌameb chi tzꞌakal. Teꞌati̱nk ut teꞌxpuchꞌ li rakꞌeb joꞌ retalil nak xeꞌxyi̱b xyuꞌameb.

¹¹ Ut cheꞌxcauresi rib xban nak saꞌ rox li cutan chiruheb chixjunileb li cristian tincuulak saꞌ li tzu̱l Sinaí.

¹² Ta̱qꞌue retalil chire li tzu̱l re nak li tenamit incꞌaꞌ teꞌnumekꞌ ut ta̱ye reheb nak cheꞌxba̱nu cue̱nt nak incꞌaꞌ teꞌtakekꞌ chiru li tzu̱l ut incꞌaꞌ naru teꞌxqꞌue li rok aran chire. Li ani tixqꞌue li rok aran ta̱ca̱mk.

¹³ Usta cristian usta xul li ta̱nachꞌok aran, ta̱ca̱mk. Moco riqꞌuin ukꞌ ta ta̱camsi̱k. Riqꞌuin ban tzimaj malaj riqꞌuin pec ta̱camsi̱k. Toj teꞌrabi xya̱b li trompeta chi cau, tojoꞌnak naru teꞌtakekꞌ chiru li tzu̱l, chan li Dios.

¹⁴ Laj Moisés quicube chak chiru li tzu̱l. Co̱ saꞌ xya̱nkeb li cristian ut quixkꞌaxtesiheb saꞌ rukꞌ li Dios. Ut eb li cristian quilajeꞌxpuchꞌ li rakꞌeb.

¹⁵ Laj Moisés quixye reheb: —Checauresi e̱rib re li rox cutan. Eb li cui̱nk incꞌaꞌ teꞌcua̱nk riqꞌuin rixakileb, chan.

¹⁶ Saꞌ rox li cutan toj ekꞌela, natenloc li ca̱k ut nareploc li rakꞌ ca̱k. Quicuan jun chok kꞌaxal moymo ru saꞌ xbe̱n li tzu̱l. Chixjunileb li tenamit queꞌrabi xya̱b li trompeta chi cau ut nequeꞌsicsot xbaneb xxiu.

¹⁷ Tojoꞌnak laj Moisés quicꞌamoc be chiruheb nak queꞌel cuan cuiꞌ lix muheba̱leb. Queꞌco̱eb chixcꞌulbal li Dios. Queꞌxakli chi xto̱n li tzu̱l.

¹⁸ Ut quikꞌojyi̱noꞌ saꞌ li tzu̱l Sinaí xban li sib xban nak li Ka̱cuaꞌ Dios quicuulac aran riqꞌuin xam. Li sib nakꞌujujnac joꞌ xsibel junak nimla horno. Ut li tzu̱l yo̱ chi ecꞌa̱nc saꞌ xnaꞌaj.

¹⁹ Li trompeta yo̱ chi cacuuc xya̱b, ut laj Moisés quia̱tinac. Li Dios quichakꞌoc chi cau xya̱b cux.

²⁰ Li Ka̱cuaꞌ Dios quicuulac saꞌ xbe̱n li tzu̱l Sinaí ut quixbok laj Moisés aran. Ut laj Moisés quitakeꞌ chiru li tzu̱l.

²¹ Li Ka̱cuaꞌ quixye re laj Moisés: —Cuben. Ayu. Ta̱ye reheb li cristian nak meꞌjiloc chak arin chicuilbal. Cui nequeꞌjiloc chak arin teꞌca̱mk.

²² Ut ta̱ye reheb li xbe̱n aj tij li teꞌnachꞌok chak cuiqꞌuin nak teꞌxkꞌaxtesi rib saꞌ cuukꞌ chi tzꞌakal, re nak incꞌaꞌ tinrakok a̱tin saꞌ xbe̱neb, chan li Dios.

²³ Laj Moisés quixye re li Ka̱cuaꞌ Dios: —La̱at xaye ke nak takaqꞌue retalil chire li tzu̱l Sinaí xban nak sicꞌbil ru a̱ban. Eb li cristian incꞌaꞌ naru teꞌtakekꞌ chiru li tzu̱l aꞌin.—

²⁴ Li Ka̱cuaꞌ Dios quixye re laj Moisés: —Ayu. Ut cꞌam chak arin laj Aarón a̱cuochben. Aban ma̱qꞌueheb chi jiloc eb laj tij chi moco eb li tenamit. Cui teꞌjilok chak arin tinrakok a̱tin saꞌ xbe̱neb, chan.

²⁵ Ut laj Moisés quicube chak ut quixye reheb chixjunil li cꞌaꞌru quiyeheꞌ re xban li Dios.