Éxodo 18 - Li Santil hu

Laj Jetro quirulaꞌani laj Moisés

¹ Laj Jetro, lix yucuaꞌ li rixakil laj Moisés, aꞌan laj tij aran saꞌ li tenamit Madián. Laj Jetro quirabi chanru nak li Dios quixtenkꞌa laj Moisés nak quirisiheb chak laj Israel saꞌ li tenamit Egipto.

² Laj Moisés quixtakla xbe̱n cua lix Séfora li rixakil saꞌ rochoch lix yucuaꞌ.

³ Quixtakla ajcuiꞌ chi xcabichaleb li ralal. Laj Moisés quixqꞌue aj Gersón chokꞌ xcꞌabaꞌ jun li ralal xban nak jalan xtenamit laj Moisés. (Li cꞌabaꞌej Gersón naraj naxye “aj numel.”)

⁴ Ut li ralal jun chic aj Eliezer xcꞌabaꞌ xban nak laj Moisés quixye: —Li Dios li quixlokꞌoni lin yucuaꞌ xinixtenkꞌa ut xinixcol nak xinixcamsi raj laj faraón.— (Li cꞌabaꞌej Eliezer naraj naxye “li Dios niquinixtenkꞌa.”)

⁵ Nak laj Moisés yo̱ chi hila̱nc saꞌ li naꞌajej chiru li tzu̱l li quia̱tina̱c cuiꞌ laj Moisés xban li Dios, lix Séfora quicꞌameꞌ chak riqꞌuin laj Moisés xban lix yucuaꞌ. Quixcꞌam ajcuiꞌ chak chixcabichaleb li ralal laj Moisés.

⁶ Laj Jetro quixtakla resil riqꞌuin laj Moisés ut quixye re: —Caꞌchꞌin chic ma̱ nococuulac a̱cuiqꞌuin cuochben la̱ cuixakil ut eb la̱ cualal cuib, chan.

⁷ Laj Moisés co̱ chixcꞌulbaleb. Quixcuikꞌib rib chiru lix yucuaꞌ li rixakil. Quixkꞌalu. Quirutzꞌ ru. Queꞌxpatzꞌ chi ribileb rib chanru cuanqueb ut queꞌoc saꞌ lix muheba̱l.

⁸ Laj Moisés quixserakꞌi re li quilajxba̱nu li Ka̱cuaꞌ Dios riqꞌuin laj faraón joꞌ eb ajcuiꞌ laj Egipto saꞌ xcꞌabaꞌeb laj Israel. Quixserakꞌi reheb chirix chixjunil li raylal li quilajeꞌxcꞌul nak yo̱queb chi xic saꞌ li chaki chꞌochꞌ ut quixye reheb chanru nak li Ka̱cuaꞌ Dios quixcoleb laj Israel.

⁹ Laj Jetro quisahoꞌ xchꞌo̱l chirabinquil li usilal li quixba̱nu li Ka̱cuaꞌ Dios reheb laj Israel nak quirisiheb chak saꞌ rukꞌeb laj Egipto.

¹⁰ Laj Jetro quixye: —Lokꞌoninbil taxak li Ka̱cuaꞌ Dios li qui-isin chak e̱re saꞌ li raylal li quexcuan cuiꞌ aran Egipto. Ut quexrisi ajcuiꞌ chak saꞌ rukꞌ laj faraón.

¹¹ Anakcuan ninnau nak mas nim xcuanquil li Ka̱cuaꞌ Dios chiruheb chixjunileb li jalanil dios. Aꞌan quixcoleb laj Israel saꞌ rukꞌeb laj Egipto li queꞌxnimobresi xcuanquil xjuneseb saꞌ xbe̱neb laj Israel, chan.

¹² Ut laj Jetro quixqꞌue lix cꞌatbil mayej chiru li Ka̱cuaꞌ Dios. Laj Aarón rochbeneb li cui̱nk li nequeꞌcꞌamoc be saꞌ xya̱nkeb laj Israel, queꞌchal ut queꞌcuaꞌac rochben re xlokꞌoninquil li Ka̱cuaꞌ Dios.

Eb li cui̱nk xakabanbileb chi rakoc a̱tin

¹³ Joꞌ cuulajak chic laj Moisés quitzꞌiloc a̱tin chirixeb li cristian. Xakxo̱queb li cristian chiru laj Moisés chixjunil li cutan ekꞌela toj ecuu chiroybeninquil jokꞌe teꞌa̱tinak.

¹⁴ Laj Jetro quiril li cꞌaꞌru yo̱ chixba̱nunquil laj Moisés. Quixye re: —¿Cꞌaꞌut nak a̱junes yo̱cat chixba̱nunquil li cꞌanjel aꞌin? Xakxo̱queb li cristian chixjunil li cutan cha̱cuoybeninquil, ekꞌela ut ecuu.—

¹⁵ Laj Moisés quichakꞌoc ut quixye re: —Eb li cristian nequeꞌchal chi patzꞌoc cuiqꞌuin chirix li cꞌaꞌru naxye li Dios.

¹⁶ Nak nacuan chꞌaꞌajquilal, nequeꞌchal cuiqꞌuin. La̱in nintzꞌiloc a̱tin chirixeb ut ninchꞌolob xya̱lal lix chakꞌrab li Dios chiruheb, chan.

¹⁷ Laj Jetro quixye re: —Incꞌaꞌ us li yo̱cat chixba̱nunquil.

¹⁸ La̱at yo̱cat chixtacuasinquil a̱cuib ut joꞌcan ajcuiꞌ yo̱cat chixba̱nunquil reheb li cristian. Yo̱cat ajcuiꞌ chixtacuasinquileb. Nabal li cꞌanjel chokꞌ a̱cue. Incꞌaꞌ naru ta̱ba̱nu a̱junes.

¹⁹ Abi li cꞌaꞌru tinye a̱cue. Ut li Dios taxak chitenkꞌa̱nk a̱cue chixba̱nunquil. La̱at aj jalol a̱tin chiru li Dios chirixeb li cristian. Ta̱ye re li Dios cꞌaꞌru li chꞌaꞌajquilal cuanqueb cuiꞌ li cristian.

²⁰ Ta̱chꞌolob xya̱lal lix chakꞌrab li Dios chiruheb. La̱at tatyehok reheb cꞌaꞌru teꞌxba̱nu.

²¹ Ta̱sicꞌ ruheb li cui̱nk li teꞌtenkꞌa̱nk a̱cue. Ta̱siqꞌueb li cui̱nk li nequeꞌxlokꞌoni li Dios, li ti̱queb xchꞌo̱l ut li incꞌaꞌ teꞌxqꞌue rib re ta̱tumina̱k ruheb. Ta̱xakabeb li cui̱nk aꞌan chi rakoc a̱tin saꞌ xbe̱neb li cristian chi ju̱nk chꞌu̱tal. Cuan teꞌrakok a̱tin saꞌ xbe̱n jun mil chi cristian. Cuan teꞌrakok a̱tin saꞌ xbe̱n jun ciento chi cristian ut cuan teꞌrakok a̱tin saꞌ xbe̱n mero ciento chi cristian ut cuan teꞌrakok a̱tin saꞌ xbe̱n laje̱b chi cristian.

²² Eb li cui̱nk aꞌin teꞌrakok a̱tin rajlal cutan. Cui cuan junak nimla chꞌaꞌajquilal, teꞌxcꞌam a̱cuiqꞌuin. Cui incꞌaꞌ nim li chꞌaꞌajquilal, eb li cui̱nk aꞌan teꞌrakok a̱tin saꞌ xbe̱neb. Chi joꞌcan eb aꞌan tateꞌxtenkꞌa ut incꞌaꞌ ta̱tacuasi a̱cuib.

²³ Cui joꞌcaꞌin ta̱ba̱nu, li Dios ta̱cꞌamok be che̱ru chixba̱nunquil li cꞌanjel aꞌin. Joꞌcan naru ta̱cuy xba̱nunquil li cꞌanjel ut eb li cristian teꞌxcꞌam rib saꞌ usilal, chan laj Jetro.

²⁴ Laj Moisés quixpa̱b li ra̱tin laj Jetro ut quixba̱nu joꞌ quiyeheꞌ re.

²⁵ Laj Moisés quixsiqꞌueb ru li cui̱nk li tzꞌakal re ru xnaꞌlebeb joꞌ quiyeheꞌ re. Quixxakabeb chi rakoc a̱tin saꞌ xbe̱neb li cristian. Cuan li queꞌrakoc a̱tin saꞌ xbe̱n jun mil chi cristian, cuan queꞌrakoc a̱tin saꞌ xbe̱neb jun ciento chi cristian, cuan queꞌrakoc a̱tin saꞌ xbe̱n mero ciento chi cristian, ut cuan ajcuiꞌ queꞌrakoc a̱tin saꞌ xbe̱n laje̱b chi cristian.

²⁶ Ut queꞌrakoc a̱tin rajlal cutan. Cui incꞌaꞌ nim li chꞌaꞌajquilal, eb li cui̱nk aꞌan queꞌrakoc a̱tin. Ut li nimla chꞌaꞌajquilal queꞌxcꞌam riqꞌuin laj Moisés.

²⁷ Ut laj Moisés quixcanab chi sukꞌi̱c laj Jetro saꞌ lix tenamit.