Éxodo 17 - Li Santil hu

Li haꞌ qui-el saꞌ li pec

¹ Eb laj Israel queꞌel saꞌ li chaki chꞌochꞌ Sin xcꞌabaꞌ. Moco yal jun ta nak queꞌco̱eb nak yo̱queb chi xic. Cocꞌ aj saꞌ nequeꞌhilan, joꞌ quiyeheꞌ reheb xban li Ka̱cuaꞌ Dios. Coxeꞌxtau li naꞌajej Refidim xcꞌabaꞌ ut aran queꞌxyi̱b xmuheba̱leb. Aran ma̱cꞌaꞌ haꞌ re teꞌrucꞌ.

² Ut eb laj Israel queꞌoc cuiꞌchic chixcuechꞌinquil laj Moisés. —Qꞌue kucꞌa, chanqueb re. Laj Moisés quixye reheb: —¿Cꞌaꞌut nak yo̱quex chincuechꞌinquil? ¿Cꞌaꞌut nak nequecuechꞌi rix li Dios? chan.

³ Cꞌajoꞌ nak teꞌchakik reheb li cristian. Queꞌxcuechꞌi laj Moisés ut queꞌxye re: —¿Cꞌaꞌut nak xoa̱cuisi chak Egipto? ¿Cꞌaꞌut nak xoa̱cꞌam chak arin? Yo̱ chikacamsinquil li chaki el. Eb li kacocꞌal ut eb li kaqueto̱mk teꞌca̱mk xban chaki el, chanqueb.

⁴ Laj Moisés quitijoc chiru li Ka̱cuaꞌ Dios ut quixye: —¿Cꞌaꞌru tinba̱nu riqꞌuineb li tenamit? Oqueb re chincamsinquil chi pec, chan.

⁵ Ut li Ka̱cuaꞌ Dios quixye re laj Moisés: —Ayu. Numen chiruheb li tenamit. Cꞌameb cha̱cuix li cui̱nk li nequeꞌcꞌamoc be saꞌ xya̱nkeb. Ut ta̱cꞌam la̱ xukꞌ saꞌ a̱cuukꞌ li xataksi saꞌ xbe̱n li nimaꞌ Nilo xcꞌabaꞌ.

⁶ Aran toxina̱tau saꞌ li nimla pec li cuan saꞌ li naꞌajej Horeb. Ta̱sacꞌ li pec ut ta̱e̱lk chak li haꞌ saꞌ li pec re nak naru teꞌucꞌak, chan li Dios. Ut eb li cui̱nk yo̱queb chi rilbal nak laj Moisés quixba̱nu joꞌ quitakla̱c cuiꞌ xban li Dios.

⁷ Laj Moisés quixqꞌue chokꞌ xcꞌabaꞌ li naꞌajej aꞌan Masah ut Meriba, xban nak eb laj Israel queꞌxcuechꞌi rix li Ka̱cuaꞌ Dios ut queꞌxye: —¿Ma cuan li Dios kiqꞌuin malaj incꞌaꞌ? chanqueb.

Eb laj Israel queꞌpletic riqꞌuineb laj Amalec

⁸ Nak cuanqueb laj Israel saꞌ li naꞌajej Refidim queꞌchal eb laj Amalec chi pletic riqꞌuineb.

⁹ Laj Moisés quixye re laj Josué: —Ta̱siqꞌueb ru li cui̱nk li teꞌxic chi pletic riqꞌuineb laj Amalec. Ut cuulaj tinxakli̱k saꞌ xbe̱n li tzu̱l ut cua̱nk lin xukꞌ saꞌ cuukꞌ li nacꞌutuc xcuanquil li Dios.

¹⁰ Ut queꞌco̱eb laj Josué chi pletic riqꞌuineb laj Amalec joꞌ quiyeheꞌ re laj Josué xban laj Moisés. Queꞌco̱eb laj Moisés saꞌ xbe̱n tzu̱l rochbeneb laj Aarón ut laj Hur.

¹¹ Nak quixtaksi li rukꞌ laj Moisés, kꞌaxal cauheb rib laj Israel. Ut nak quixcubsi li rukꞌ laj Moisés, eb laj Amalec chic cauheb rib.

¹² Quilub chixtaksinquil li rukꞌ laj Moisés. Tojoꞌnak laj Aarón rochben laj Hur queꞌxcꞌam chak jun li pec ut queꞌxqꞌue chokꞌ xcꞌojariba̱l. Laj Aarón ut laj Hur queꞌoc chixtenkꞌanquil lix tel re nak incꞌaꞌ ta̱lubk chixtaksinquil. Jun quixqꞌue rib saꞌ xnim ukꞌ ut li jun chic quixqꞌue rib saꞌ xtzꞌe. Chi joꞌcan queꞌxtaksi li rukꞌ laj Moisés toj nak qui-oc li sakꞌe.

¹³ Ut riqꞌuin aꞌan queꞌnumta laj Josué saꞌ xbe̱neb laj Amalec.

¹⁴ Ut li Dios quixye re laj Moisés: —Ta̱tzꞌi̱ba retalil aꞌin saꞌ junak hu re nak junelic cua̱nk saꞌ xchꞌo̱leb. Ta̱ye re laj Josué nak la̱in tinrakok a̱tin saꞌ xbe̱neb laj Amalec ut teꞌosokꞌ chixjunileb, chan.

¹⁵ Laj Moisés quixyi̱b jun li artal ut quixqꞌue chokꞌ xcꞌabaꞌ Jehová-nisi. Li cꞌabaꞌej aꞌan naraj naxye: “li Ka̱cuaꞌ Dios naxqꞌue kacuanquil”.

¹⁶ Ut laj Moisés quixye: —Xban nak eb laj Amalec queꞌxtiquib li ple̱t riqꞌuineb laj Israel, li Dios ta̱pletik riqꞌuin laj Amalec ut joꞌ ajcuiꞌ riqꞌuineb li ralal xcꞌajol ut riqꞌuineb li ri xmam, chan.