Éxodo 14 - Li Santil hu

Eb laj Israel queꞌnumeꞌ cuan cuiꞌ li palau Mar Rojo xcꞌabaꞌ

¹ Tojoꞌnak li Ka̱cuaꞌ Dios quixye re laj Moisés:

² —Ye reheb laj Israel nak jalan li be teꞌxcꞌam toj jun pacꞌal li naꞌajej Pi-hahirot. Saꞌ xyi li naꞌajej Migdol ut li palau saꞌ xjayal li naꞌajej Baal-zefón te̱yi̱b le̱ muheba̱l chire li palau.

³ Laj faraón tixye nak xsach li be chiruheb saꞌ li chaki chꞌochꞌ. Aran incꞌaꞌ naru teꞌnumekꞌ, chaꞌak.

⁴ Ut la̱in tincacuubresi xchꞌo̱l laj faraón ut laj faraón texta̱ke la̱ex aj Israel re nak texsukꞌisi chak. Ut kꞌaxal cuiꞌchic ta̱nimobresi̱k lin cꞌabaꞌ xban laj faraón ut eb lix soldado. Ut eb laj Egipto teꞌxnau nak la̱in li Ka̱cuaꞌ Dios, chan li Dios re laj Moisés. Ut eb laj Israel queꞌxba̱nu joꞌ quixye li Ka̱cuaꞌ Dios.

⁵ Nak quirabi nak ac xeꞌel laj Israel, laj faraón joꞌ eb ajcuiꞌ laj cꞌanjel chiru queꞌyotꞌeꞌ xchꞌo̱l nak queꞌxcanabeb chi xic. Eb aꞌan queꞌxye: —¿Ma us ta biꞌ nak xkacanabeb chi xic ut xocana chi ma̱cꞌaꞌ chic kamo̱s? chanqueb.

⁶ Tojoꞌnak laj faraón quixtakla xbokbaleb lix soldado. Ut quixtakla ajcuiꞌ xcꞌambaleb lix carruaje.

⁷ Xbe̱n cua quixtakla li cuakib ciento (600) lix carruaje li mas cha̱bil. Chirix aꞌan quixtakla chixjunileb li incꞌaꞌ mas cha̱bil. Queꞌco̱eb ajcuiꞌ li nequeꞌtaklan reheb.

⁸ Li Ka̱cuaꞌ Dios quixcacuubresi xchꞌo̱l laj faraón lix reyeb laj Egipto re nak tixta̱keheb laj Israel. Ut eb laj Israel nequeꞌtzololnac chi xic. Ut li Ka̱cuaꞌ Dios yo̱ chi cꞌamoc be chiruheb riqꞌuin lix nimal xcuanquilal.

⁹ Eb laj Egipto queꞌxta̱keheb laj Israel. Queꞌco̱eb lix cacua̱y laj faraón joꞌ ajcuiꞌ eb lix carruaje. Queꞌco̱eb chixjunileb lix soldado. Ut coxeꞌxtauheb xmuheba̱l laj Israel jun pacꞌal li naꞌajej Pi-hahirot chire li palau saꞌ xjayal li naꞌajej Baal-zefón.

¹⁰ Nak queꞌril laj Israel nak yo̱queb chi nachꞌoc laj faraón rochbeneb chak lix soldado quilajeꞌsach xchꞌo̱l ut cꞌajoꞌ nak queꞌxucuac. Japjo̱queb re chiru li Ka̱cuaꞌ Dios.

¹¹ Ut queꞌxye re laj Moisés: —¿Ma ma̱cꞌaꞌ mukleba̱l aran Egipto? ¿Cꞌaꞌut nak xoa̱cꞌam chak arin chi ca̱mc saꞌ li chaki chꞌochꞌ? ¿Cꞌaꞌut nak xaba̱nu ke chi joꞌcaꞌin? ¿Cꞌaꞌru rajbal nak xoa̱cuisi saꞌ li tenamit Egipto?

¹² Nak toj cuanco aran xkaye a̱cue nak toa̱canab chi trabajic riqꞌuineb laj Egipto. Us raj chokꞌ ke li trabajic riqꞌuineb chiru nak toeꞌxcamsi arin saꞌ li chaki chꞌochꞌ, chanqueb.

¹³ Laj Moisés quixye reheb: —Mexxucuac. Cacuubresihomak ban e̱chꞌo̱l. Ho̱n nequeril chanru nak tocolekꞌ xban li Ka̱cuaꞌ Dios. Eb laj Egipto li yo̱quex chi rilbal anakcuan ma̱ jun cua chic te̱ril ruheb.

¹⁴ La̱ex mexcꞌoxlac. Ma̱cuaꞌ la̱ex texpletik. Li Ka̱cuaꞌ Dios ban ta̱pletik riqꞌuineb chokꞌ e̱ru̱chil, chan laj Moisés.

¹⁵ Ut li Ka̱cuaꞌ Dios quixye re laj Moisés: —¿Cꞌaꞌru nequeroybeni? Ye reheb li cristian nak xicakeb.

¹⁶ La̱at ta̱taksi la̱ xukꞌ ut ta̱teleb la̱ cuukꞌ saꞌ xbe̱n li palau re nak tixjach rib li haꞌ. Tincanab chi chaki le̱ be re nak texnumekꞌ saꞌ li palau.

¹⁷ La̱in tincacuubresi xchꞌo̱leb laj Egipto re nak teꞌxic che̱rix. Ut riqꞌuin li tinba̱nu riqꞌuineb laj faraón joꞌ eb ajcuiꞌ chixjunileb lix soldado, joꞌ ajcuiꞌ eb lix carruaje, kꞌaxal cuiꞌchic teꞌxqꞌue inlokꞌal eb laj Israel.

¹⁸ Ut chixjunileb laj Egipto teꞌxqꞌue retal nak la̱in li tzꞌakal Dios. Teꞌxqꞌue incuanquil nak teꞌril nak kꞌaxal nim incuanquilal saꞌ xbe̱n laj faraón ut chixjunileb lix soldado joꞌ ajcuiꞌ eb lix carruaje, chan li Dios.

¹⁹ Ut lix ángel li Dios li yo̱ chi cꞌamoc be chiruheb laj Israel quixjal xnaꞌaj. Quicana chi ixbej. Joꞌcan ajcuiꞌ li chok co̱ chi ixbej.

²⁰ Li chok quicana saꞌ xyiheb laj Israel ut laj Egipto. Chi joꞌcan quikꞌojyi̱noꞌ lix beheb laj Egipto ut eb laj Israel cutan yo̱queb cuiꞌ chi xic. Quinumeꞌ li kꞌojyi̱n ut incꞌaꞌ queꞌcuulac cuanqueb cuiꞌ laj Israel.

²¹ Tojoꞌnak laj Moisés quixqꞌue li rukꞌ saꞌ xbe̱n li palau. Li Ka̱cuaꞌ Dios quixtakla jun cacuil ikꞌ li nachal chak saꞌ releb li sakꞌe. Yo̱ li ikꞌ chixjunil li kꞌojyi̱n ut xban li ikꞌ li palau quixjach rib ut quixchakihobresi lix beheb laj Israel li teꞌnumekꞌ cuiꞌ saꞌ li palau.

²² Ut eb laj Israel saꞌ chaki chꞌochꞌ queꞌnumeꞌ nak quixjach rib li haꞌ. Chanchan li tzꞌac quicana li haꞌ saꞌ xcaꞌ pacꞌalil li be.

²³ Ut chixjunileb lix soldado laj faraón joꞌ eb ajcuiꞌ lix carruaje yo̱queb chixta̱kenquileb laj Israel. Queꞌoc ajcuiꞌ saꞌ xyi li palau saꞌ li chaki be.

²⁴ Nak yo̱ chi sake̱uc cuan li Ka̱cuaꞌ Dios saꞌ li chok ut saꞌ li xam. Quirileb laj Egipto ut quixtakla li raylal saꞌ xbe̱neb.

²⁵ Ut eb li carruaje queꞌxtiquib tꞌilc. Chꞌaꞌaj chic nak yo̱queb chi xic. Eb laj Egipto queꞌxucuac ut queꞌxye chi ribileb rib: —Us tosukꞌi̱k. Us toe̱lelik chiruheb laj Israel. Li Ka̱cuaꞌ Dios yo̱ xtenkꞌanquileb aꞌan ut la̱o aj Egipto xicꞌ yo̱ chikilbal, chanqueb.

²⁶ Tojoꞌnak li Ka̱cuaꞌ Dios quixye re laj Moisés: —Teleb la̱ cuukꞌ saꞌ xbe̱n li palau re nak tixjunaji rib li haꞌ ut ta̱xic saꞌ xbe̱neb laj Egipto rochbeneb lix carruaje, chan.

²⁷ Ut saꞌ li cutan aꞌan toj ekꞌela laj Moisés quixqꞌue li rukꞌ saꞌ xbe̱n li palau. Ut li haꞌ quixjunaji rib. Riqꞌuin li quixba̱nu li Dios, eb laj Egipto queꞌxsach xnaꞌleb saꞌ xyi li palau ut queꞌe̱lelic raj saꞌ li haꞌ.

²⁸ Aban quixcꞌul cuiꞌchic rib li haꞌ ut queꞌmukun rubel chixjunileb laj Egipto joꞌ eb ajcuiꞌ li carruaje li yo̱queb cuiꞌ chi ta̱ke̱nc reheb laj Israel. Queꞌosoꞌ chixjunileb. Ma̱ jun chic queꞌcoleꞌ.

²⁹ Ut eb laj Israel ac xeꞌnumeꞌ jun pacꞌal li palau saꞌ li chaki chꞌochꞌ. Chanchan li tzꞌac quicana li haꞌ saꞌ xcaꞌ pacꞌalil li be nak queꞌnumeꞌ.

³⁰ Joꞌcaꞌin nak li Ka̱cuaꞌ Dios quixcoleb laj Israel saꞌ rukꞌeb laj Egipto saꞌ li cutan aꞌan. Ut xban xcuanquil li Ka̱cuaꞌ Dios, eb laj Egipto queꞌcam saꞌ li palau. Eb laj Israel queꞌril nak camenakeb chic laj Egipto chire li palau.

³¹ Ut eb laj Israel queꞌxxucua ru ut queꞌxlokꞌoni li Ka̱cuaꞌ Dios nak queꞌril li quixba̱nu reheb laj Egipto. Queꞌxpa̱b li Dios ut queꞌabin chiru laj Moisés xban nak aꞌan aj cꞌanjel chiru li Dios.