Éxodo 13 - Li Santil hu

Li xbe̱n ralaleb laj Israel queꞌkꞌaxtesi̱c saꞌ rukꞌ li Dios

^1-2 Ut li Ka̱cuaꞌ Dios quixye re laj Moisés: —Te̱kꞌaxtesi saꞌ cuukꞌ chixjunileb li xbe̱n ralaleb laj Israel ut te̱kꞌaxtesi ajcuiꞌ chixjunileb li xbe̱n raleb li xul. Eb aꞌan cue la̱in, chan.

^3-4 Laj Moisés quixye reheb: —Saꞌ li cutan aꞌin re li po Abib xcꞌabaꞌ, li Ka̱cuaꞌ Dios xexrisi chak saꞌ li tenamit Egipto bar quexcꞌanjelac cuiꞌ chak chokꞌ rahobtesinbil mo̱s. Rajlal chihab texninkꞌei̱k re xjulticanquil li cutan aꞌin, ut me̱cuaꞌ li caxlan cua li cuan xchꞌamal. Chijulticokꞌ e̱re nak riqꞌuin xnimal xcuanquil li Dios quexrisi chak saꞌ li tenamit aꞌan.

⁵ Texninkꞌei̱k rajlal chihab saꞌ li po aꞌin nak cua̱nkex saꞌ li naꞌajej li yo̱ cuiꞌ che̱cꞌambal li Ka̱cuaꞌ Dios. Aꞌan li cha̱bil naꞌajej li quiyechiꞌi̱c reheb le̱ xeꞌto̱nil yucuaꞌ junxil ut te̱re̱chani ajcuiꞌ la̱ex. Aꞌan li naꞌajej cuanqueb cuiꞌ laj cananeo, laj heteo, laj amorreo, laj heveo ut laj jebuseo.

⁶ Cuukub cutan te̱cuaꞌ li caxlan cua li ma̱cꞌaꞌ xchꞌamal. Saꞌ xcuuk li cutan ta̱cua̱nk li ninkꞌe saꞌ xcꞌabaꞌ li Ka̱cuaꞌ Dios re xnimanquil ru.

⁷ Cuukub cutan te̱cuaꞌ li caxlan cua li ma̱cꞌaꞌ xchꞌamal. Incꞌaꞌ ta̱cua̱nk saꞌ e̱ya̱nk li caxlan cua li nasipoꞌ. Ut incꞌaꞌ ajcuiꞌ ta̱cua̱nk saꞌ le̱ rochoch li na-oc chokꞌ xchꞌamal li caxlan cua.

⁸ Ut saꞌ li cutan aꞌan te̱ye reheb le̱ ralal e̱cꞌajol nak li ninkꞌe li nequeba̱nu, aꞌan re xjulticanquil nak li Ka̱cuaꞌ Dios qui-isin chak e̱re saꞌ li tenamit Egipto.

⁹ Li ninkꞌe aꞌin ta̱cꞌanjelak chokꞌ e̱re re xjulticanquil nak junelic cua̱nk saꞌ e̱chꞌo̱l li ra̱tin li Dios. Te̱serakꞌi ajcuiꞌ li ra̱tin li Dios xban nak riqꞌuin lix nimal xcuanquilal, li Dios quexrisi chak saꞌ li tenamit Egipto.

¹⁰ Rajlal chihab texninkꞌei̱k. Ac chꞌolchꞌo cꞌaꞌru li cutan texninkꞌei̱k cuiꞌ.

¹¹ Li Ka̱cuaꞌ Dios texcꞌam saꞌ li tenamit bar cuanqueb cuiꞌ laj cananeo. Ut la̱ex te̱re̱chani li naꞌajej li quixyechiꞌi li Dios reheb le̱ xeꞌto̱nil yucuaꞌ junxilaj ut quixyechiꞌi ajcuiꞌ e̱re la̱ex.

¹² Nak cua̱nkex aran la̱ex te̱kꞌaxtesi saꞌ rukꞌ li Dios li xbe̱n e̱ralal. Ut te̱kꞌaxtesi ajcuiꞌ re chixjunil li xbe̱n raleb le̱ queto̱mk li te̱lom.

¹³ Li xbe̱n raleb li bu̱r, carner te̱qꞌue chokꞌ ru̱chil. Cui incꞌaꞌ te̱qꞌue ru̱chil, tento nak te̱tok xcux li chꞌina bu̱r. Ut tento ajcuiꞌ nak te̱mayeja junak xul chokꞌ ru̱chil li xbe̱n e̱ralal.

¹⁴ Mokon chic le̱ ralal e̱cꞌajol teꞌxpatzꞌ e̱re cꞌaꞌru xya̱lal li nequeba̱nu. La̱ex te̱ye reheb, “Nakaba̱nu aꞌin re xjulticanquil nak riqꞌuin xnimal xcuanquilal li Dios corisi chak saꞌ li tenamit Egipto bar cocuan cuiꞌ chak chokꞌ rahobtesinbil mo̱s.

¹⁵ Laj faraón quixcacuubresi xchꞌo̱l ut incꞌaꞌ coxcanab chi e̱lc saꞌ li tenamit Egipto. Ut li Ka̱cuaꞌ Dios quixqꞌueheb chi ca̱mc chixjunileb li xbe̱n ralaleb laj Egipto. Quixqꞌueheb ajcuiꞌ chi ca̱mc li xbe̱n ral li queto̱mk. Re xjulticanquil li xba̱nu li Dios, la̱in ninmayeja chiru li Dios li xbe̱n raleb lin xul. Ut tinqꞌue chokꞌ ru̱chil li xbe̱n cualal”, chaꞌkex reheb le̱ ralal e̱cꞌajol.

¹⁶ Li ninkꞌe aꞌan ta̱cꞌanjelak e̱re re xjulticanquil nak junelic cua̱nk saꞌ e̱chꞌo̱l li ra̱tin li Dios xban nak riqꞌuin lix nimal xcuanquil li Dios quexrisi chak Egipto, chan laj Moisés.

Li Dios quicꞌamoc be chiruheb riqꞌuin jun chok ut jun xam

¹⁷ Nak laj faraón quixcanabeb chi xic laj Israel, nachꞌ raj li be li nanumeꞌ saꞌ xtenamiteb laj filisteo, aban li Dios incꞌaꞌ quixcꞌameb aran. Quixye li Dios: —Ma̱re teꞌpletik eb laj filisteo riqꞌuineb laj Israel ut ma̱re ta̱chꞌina̱k xchꞌo̱leb ut teꞌxic cuiꞌchic xcaꞌ sut Egipto, chan.

¹⁸ Li Dios quixcꞌameb aꞌan saꞌ li chaki chꞌochꞌ saꞌ xjayal li palau Mar Rojo xcꞌabaꞌ. Nequeꞌtzololnac nak queꞌel chi junju̱nk chꞌu̱tal saꞌ li tenamit Egipto.

¹⁹ Laj Moisés quixcꞌam xbakel li camenak José chirixeb nak queꞌco̱eb. Quicꞌameꞌ xbakel xban nak junxilaj laj José quixye reheb li ralal xcꞌajol: —Chi ya̱l li Ka̱cuaꞌ Dios texrisi saꞌ li tenamit aꞌin. Te̱cꞌam lin bakel che̱rix nak tex-e̱lk arin, chan.

²⁰ Ut nak queꞌel saꞌ li naꞌajej Sucot xcꞌabaꞌ, queꞌco̱eb toj saꞌ li naꞌajej Etam li cuan chire li chaki chꞌochꞌ.

²¹ Cuan nak queꞌbe̱c chi kꞌek chi cutan. Chiru li cutan li Ka̱cuaꞌ Dios quicꞌamoc be chiruheb riqꞌuin jun chok ut chiru li kꞌojyi̱n quicꞌamoc be riqꞌuin jun xam saꞌ choxa re xcutanobresinquil ruheb lix beheb.

²² Li chok ut li xam cuan chi junelic. Incꞌaꞌ napaltoꞌ chi cꞌamoc be chiruheb.