Éxodo 12 - Li Santil hu

Li Ka̱cuaꞌ Dios quinumeꞌ chi rakoc a̱tin

¹ Nak toj cuanqueb saꞌ li tenamit Egipto laj Moisés ut laj Aarón, li Ka̱cuaꞌ Dios quixye reheb:

² —Chalen anakcuan li po aꞌin, aꞌan chic xticlajic li chihab chokꞌ e̱re la̱ex.

³ Ta̱ye reheb chixjunileb laj Israel nak saꞌ li laje̱b xbe li po aꞌin li cui̱nk teꞌxsicꞌ junju̱nk li carner re li ju̱nk cabal.

⁴ Li incꞌaꞌ qꞌuiheb saꞌ rochocheb naru nequeꞌxic chi cuaꞌac rochbeneb li rech cabal re nak teꞌxchoy xtiubal chixjunil lix tibel li carner. Teꞌxbir rix joꞌ qꞌuial li teꞌxtzaca li junju̱nk.

⁵ Usta chiba̱t, usta carner li te̱sicꞌ, jun chihab cua̱nk re. Ut tento nak te̱lom li xul ut cha̱bilak. Ma̱cꞌaꞌak xyajel.

⁶ Nak ac xesicꞌ aꞌan, te̱xoc. Saꞌ li ca̱laju xbe li po nak ac namoynac, che̱junilex la̱ex aj Israel te̱camsi li chꞌina carner li sicꞌbil ru e̱ban.

⁷ Te̱rach xquiqꞌuel li carner saꞌ xbe̱n li puerta joꞌ ajcuiꞌ saꞌ xcaꞌ pacꞌalil xcheꞌel li puerta saꞌ le̱ rochoch li bar yo̱kex cuiꞌ chi cuaꞌac.

⁸ Saꞌ li kꞌojyi̱n aꞌan te̱tiu li tib chi pombil. Te̱cuaꞌ li caxlan cua xcomon li ma̱cꞌaꞌ xchꞌamal ut te̱tiu ajcuiꞌ li ichaj li cꞌa.

⁹ Me̱tiu li tib chi rax chi moco chi caltinbil. Chi pombil ban te̱tiu. Te̱pom chi tzꞌakal jun, rochben lix jolom joꞌ ajcuiꞌ li rok, li rukꞌ ut li cuan chi saꞌ. Caꞌaj cuiꞌ lix tzꞌaj te̱risi.

¹⁰ Li joꞌ qꞌuial li ta̱elaꞌa̱nk me̱xoc chokꞌ re cuulaj. Cꞌatbil te̱ba̱nu.

¹¹ Joꞌcaꞌin nak texcuaꞌak. Nak ac oc e̱re chi cuaꞌac, te̱qꞌue lix cꞌa̱mal e̱saꞌ, te̱qꞌue le̱ xa̱b ut cua̱nk le̱ xukꞌ saꞌ le̱ rukꞌ. Te̱se̱ba e̱rib chi cuaꞌac. Aꞌan li kꞌojyi̱n nak la̱in li Ka̱cuaꞌ Dios tinnumekꞌ saꞌ li tenamit chi rakoc a̱tin.

¹² Saꞌ li kꞌojyi̱n aꞌan la̱in tincuulak saꞌ li tenamit Egipto ut tincamsiheb chixjunileb li xbe̱n alalbej saꞌ xya̱nkeb laj Egipto, joꞌcan ajcuiꞌ li xbe̱n ral li queto̱mk. Ut la̱in tinrakok a̱tin saꞌ xbe̱neb lix dioseb li nequeꞌxlokꞌoni laj Egipto. La̱in li Ka̱cuaꞌ Dios.

¹³ Abanan li quicꞌ li te̱qꞌue chire xpuertil le̱ rochoch, aꞌan e̱retalil chicuu. Nak tincuil li quicꞌ, ti̱c tinnumekꞌ saꞌ le̱ rochoch. Ma̱ jun ta̱ca̱mk saꞌ le̱ rochoch la̱ex nak yo̱kin chixcamsinquil li xbe̱n ralaleb aj Egipto.

¹⁴ Chalen anakcuan rajlal chihab texninkꞌei̱k saꞌ incꞌabaꞌ saꞌ li ca̱laju xbe li xbe̱n po. Li ninkꞌe aꞌin, aꞌan re xjulticanquil chanru nak xexincol.

¹⁵ Chiru cuukub cutan yo̱kex chi ninkꞌei̱k. Saꞌ li xbe̱n cutan te̱risi saꞌ le̱ rochoch chixjunil li naxqꞌue chi si̱pocꞌ li caxlan cua. Re li cuukub cutan li caxlan cua li te̱cuaꞌ, aꞌan xcomon li ma̱cꞌaꞌ xchꞌamal. Ut cui junak cristian tixcuaꞌ li caxlan cua xcomon li cuan xchꞌamal, li cristian aꞌan ta̱isi̱k saꞌ e̱ya̱nk.

¹⁶ Saꞌ li xbe̱n cutan te̱chꞌutub e̱rib re xlokꞌoninquil li Dios ut saꞌ xcuuk li cutan te̱chꞌutub cuiꞌchic e̱rib. Saꞌ li cuib chi cutan aꞌan incꞌaꞌ textrabajik. Caꞌaj cuiꞌ le̱ tzacae̱mk te̱yi̱b.

¹⁷ Saꞌ li ninkꞌe aꞌin te̱cuaꞌ li caxlan cua li ma̱cꞌaꞌ xchꞌamal xban nak saꞌ li cutan aꞌin xexcuisi saꞌ li tenamit Egipto. Re xjulticanquil li xinba̱nu e̱re, chalen anakcuan, texninkꞌei̱k chi joꞌcaꞌin joꞌ eb ajcuiꞌ le̱ ralal e̱cꞌajol. Li cutan aꞌan te̱oxlokꞌi xban nak saꞌ li cutan aꞌan quexcuisi saꞌ li tenamit Egipto.

¹⁸ Saꞌ li ca̱laju xbe li xbe̱n po nak ac namoynac, te̱cuaꞌ li caxlan cua li ma̱cꞌaꞌ xchꞌamal. Joꞌcaꞌin te̱ba̱nu toj saꞌ li jun xcaꞌcꞌa̱l (21) xbe li po.

¹⁹ Cuukub cutan tzꞌakal ma̱cꞌaꞌak li caxlan cua li cuan xchꞌamal saꞌ le̱ rochoch. Li ani ta̱cuaꞌok li caxlan cua li cuan xchꞌamal usta yal numecꞌ yo̱ saꞌ e̱ya̱nk, aꞌan ta̱isi̱k saꞌ e̱ya̱nk la̱ex aj Israel.

²⁰ Me̱cuaꞌ li caxlan cua xcomon li cuan xchꞌamal. Saꞌ li junju̱nk chi cab, te̱cuaꞌ li caxlan cua li ma̱cꞌaꞌ xchꞌamal, chan li Dios.

²¹ Tojoꞌnak laj Moisés quixbok chixjunileb li cui̱nk li nequeꞌcꞌamoc be saꞌ xya̱nkeb laj Israel. Quixye reheb: —Te̱sicꞌ le̱ carner ut te̱camsi chokꞌ reheb li cuanqueb saꞌ le̱ rochoch.

²² Lix quiqꞌuel te̱cꞌul saꞌ junak ucꞌal. Te̱tzꞌa saꞌ li quicꞌ jun chꞌina jo̱b li pim hisopo xcꞌabaꞌ. Te̱qꞌue li quicꞌ saꞌ xbe̱n li puerta joꞌ ajcuiꞌ chiru li cheꞌ li cuan xcaꞌ pacꞌalil li puerta. Ut chetzꞌapak e̱rib saꞌ le̱ rochoch ut ma̱ jun e̱re ta̱e̱lk toj saꞌ li cutan jun chic.

²³ Li Dios ta̱numekꞌ saꞌ li junju̱nk chi cab chi rakoc a̱tin saꞌ xbe̱neb laj Egipto. Nak ta̱ril li quicꞌ saꞌ xbe̱n li puerta ut chiru li cuib chi cheꞌ li cuan saꞌ xcaꞌ pacꞌalil li puerta, li Ka̱cuaꞌ Dios ta̱numekꞌ saꞌ li puerta aꞌan ut tixram lix be laj camsinel re nak incꞌaꞌ ta̱oc saꞌ le̱ rochoch chi camsi̱nc.

²⁴ Ut chalen anakcuan la̱ex, joꞌ eb ajcuiꞌ le̱ ralal e̱cꞌajol, texninkꞌei̱k rajlal chihab re xjulticanquil chanru nak quex-el chak saꞌ li tenamit Egipto.

²⁵ Ut chi joꞌcaꞌin chexninkꞌei̱k ut chexlokꞌoni̱nk ajcuiꞌ nak texcuulak saꞌ li naꞌajej yechiꞌinbil e̱re xban li Ka̱cuaꞌ Dios.

²⁶ Nak eb le̱ ralal e̱cꞌajol teꞌxpatzꞌ e̱re cꞌaꞌru xya̱lal li ninkꞌe li nequeba̱nu,

²⁷ la̱ex te̱chꞌolob xya̱lal chiruheb ut te̱ye reheb: —Aꞌin li kamayej re li ninkꞌe pascua re xjulticanquil chanru nak coxcol li Ka̱cuaꞌ Dios nak quinumeꞌ saꞌ li tenamit Egipto chixcamsinquil li xbe̱n ralaleb, chan laj Moisés. Ut eb laj Israel quilajeꞌxxulub xjolomeb ut queꞌxlokꞌoni li Ka̱cuaꞌ Dios.

²⁸ Chixjunil li queꞌyeheꞌ re laj Moisés ut laj Aarón xban li Ka̱cuaꞌ Dios, queꞌxba̱nu chixjunileb laj Israel.

Lix camiqueb li xbe̱n alalbej

²⁹ Tuktu kꞌojyi̱n nak quinumeꞌ li Dios ut quilajxcamsi li xbe̱n ralaleb chixjunileb laj Egipto. Quixcamsi li xbe̱n ralal laj faraón li kꞌaxal nim xcuanquil. Joꞌcan ajcuiꞌ li cuanqueb saꞌ tzꞌalam queꞌcamsi̱c ajcuiꞌ li xbe̱n ralaleb. Quilajeꞌcamsi̱c ajcuiꞌ li xbe̱n raleb lix queto̱mk chixjunileb, li cuanqueb xcuanquil ut li ma̱cꞌaꞌeb xcuanquil, chixjunileb li xbe̱n alalbej aran Egipto quilajeꞌcamsi̱c.

³⁰ Chiru li kꞌojyi̱n aꞌan laj faraón quicuacli. Queꞌcuacli ajcuiꞌ laj cꞌanjel chiru joꞌ eb ajcuiꞌ chixjunileb laj Egipto. Japjo̱queb re chi ya̱bac chixjunileb laj Egipto xban nak camenakeb chic li xbe̱n alalbej saꞌ li junju̱nk chi cab.

³¹ Ut laj faraón chiru li kꞌojyi̱n aꞌan quixtakla resil riqꞌuin laj Moisés ut laj Aarón. Quixye reheb: —Cuaclinkex. Elenkex saꞌ junpa̱t. Cꞌamomak che̱rix chixjunileb laj Israel. Ayukex ut lokꞌonihomak ru le̱ Dios joꞌ xeye cue.

³² Cꞌamomak ajcuiꞌ che̱rix le̱ queto̱mk joꞌ xeye. Se̱bahomak e̱rib ut elenkex. Ut textijok chicuix, chan laj faraón.

³³ Ut eb laj Egipto queꞌxtzꞌa̱ma ajcuiꞌ chiruheb laj Israel nak teꞌxse̱ba rib chi xic. Queꞌxye reheb: —Ayukex. Se̱bahomak e̱rib chi xic. Ma̱re toca̱mk ajcuiꞌ la̱o cui la̱ex incꞌaꞌ texxic, chanqueb.

³⁴ Tojoꞌnak eb laj Israel queꞌxcꞌam xkꞌemal lix caxlan cua li ma̱cꞌaꞌ xchꞌamal. Queꞌxlan lix yokꞌlebeb saꞌ lix tꞌicr ut queꞌri̱ka.

³⁵ Ac quilajeꞌxba̱nu laj Israel joꞌ queꞌyeheꞌ reheb xban laj Moisés. Quilajeꞌxtzꞌa̱ma riqꞌuineb laj Egipto li cꞌaꞌak re ru yi̱banbil riqꞌuin oro ut plata joꞌ ajcuiꞌ li rakꞌeb.

³⁶ Ut xban nak li Dios quixba̱nu nak eb laj Egipto queꞌxcꞌam rib saꞌ usilal riqꞌuineb laj Israel, aꞌ yal cꞌaꞌru li queꞌxtzꞌa̱ma, queꞌqꞌueheꞌ reheb. Chi joꞌcaꞌin eb laj Israel quiru queꞌrisi chiruheb laj Egipto nabal lix biomaleb.

Eb laj Israel queꞌe̱lelic chak Egipto

³⁷ Ut chixjunileb laj Israel queꞌel saꞌ li tenamit Ramesés ut queꞌco̱eb saꞌ li tenamit Sucot. Cuakib ciento mil (600,000) chi cui̱nk queꞌco̱eb chi rok. Eb li ixk joꞌ ajcuiꞌ eb li cocꞌal ma̱cꞌaꞌeb saꞌ ajl.

³⁸ Ut cuanqueb ajcuiꞌ laj Egipto li queꞌco̱eb saꞌ xya̱nkeb laj Israel. Ut ma̱ caꞌchꞌin xqꞌuial li queto̱mk queꞌxcꞌam nak queꞌco̱eb.

³⁹ Xban nak queꞌisi̱c saꞌ junpa̱t saꞌ li tenamit Egipto, ma̱cꞌaꞌ xcuaheb yi̱banbil nak queꞌco̱eb. Riqꞌuin lix kꞌemal li caxlan cua queꞌxyi̱b lix cuaheb xcomon li ma̱cꞌaꞌ xchꞌamal.

⁴⁰ Eb laj Israel ca̱hib ciento riqꞌuin laje̱b xcaꞌcꞌa̱l (430) chihab queꞌcuan saꞌ li tenamit Egipto.

⁴¹ Tzꞌakal ca̱hib ciento riqꞌuin laje̱b xcaꞌcꞌa̱l (430) chihab nak queꞌel chixjunileb li ralal xcꞌajol li Dios saꞌ li tenamit Egipto.

⁴² Saꞌ li kꞌojyi̱n aꞌan li Ka̱cuaꞌ Dios quixcꞌacꞌaleheb chi us re nak ta̱risiheb saꞌ li tenamit Egipto. Ut riqꞌuin aꞌan chalen anakcuan eb laj Israel nequeꞌxyoꞌle li kꞌojyi̱n aꞌan re xjulticanquil chanru nak li Dios quirisiheb chak saꞌ li tenamit Egipto.

⁴³ Li Ka̱cuaꞌ Dios quixye re laj Moisés ut laj Aarón: —Joꞌcaꞌin nak texninkꞌei̱k re xjulticanquil chanru nak quexcoleꞌ nak quilajeꞌcamsi̱c li xbe̱n ralaleb laj Egipto. Ma̱ jun jalan xtenamit ta̱tzaca̱nk re li tzacae̱mk aꞌin.

⁴⁴ Eb li lokꞌbil mo̱s cui xeꞌxcꞌul li circuncisión ta̱ru̱k teꞌxtzaca li tzacae̱mk aꞌan.

⁴⁵ Abanan eb li tojbil mo̱s ut eb li jalan xtenamiteb incꞌaꞌ naru teꞌxtzaca.

⁴⁶ Te̱ba̱nu saꞌ junak cab. Incꞌaꞌ te̱jor li bak ut incꞌaꞌ te̱risi li tib chirix cab.

⁴⁷ Chixjunileb laj Israel teꞌxba̱nu aꞌin.

⁴⁸ Cui cuanqueb jalan xtenamit saꞌ e̱ya̱nk teꞌraj teꞌoque̱nk saꞌ li ninkꞌe aꞌin, tento nak chixjunileb li cui̱nk teꞌxcꞌul li circuncisión. Nak ac xeꞌxcꞌul li circuncisión, e̱comonakeb chic ut naru chic teꞌxtzaca li tzacae̱mk aꞌin. Aban ma̱ jun naru ta̱tzaca̱nk re cui ma̱jiꞌ xcꞌul li circuncisión.

⁴⁹ Juntakꞌe̱takeb chic li chakꞌrab chokꞌ e̱re joꞌ ajcuiꞌ reheb li jalan xtenamiteb.

⁵⁰ Ut joꞌ quixye li Ka̱cuaꞌ Dios reheb laj Moisés ut laj Aarón, joꞌcan quilajeꞌxba̱nu chixjunileb laj Israel.

⁵¹ Ut saꞌ li cutan aꞌan li Ka̱cuaꞌ Dios quilajrisiheb chak laj Israel saꞌ li tenamit Egipto. Nequeꞌtzololnac nak queꞌel laj Israel chi junju̱nk chꞌu̱tal aran Egipto.