Éxodo 11 - Li Santil hu

Resilal xcamiqueb li xbe̱n alalbej

¹ Li Ka̱cuaꞌ Dios quixye re laj Moisés: —Jun chic li raylal tintakla saꞌ xbe̱n laj faraón joꞌ cuiꞌ anchal saꞌ xbe̱n li tenamit Egipto. Ut riqꞌuin aꞌan texcanab chi xic laj faraón. Aban moco caꞌaj cuiꞌ ta texcanab chi xic, texra̱lina chi junaj cua.

² Anakcuan ta̱yeheb re laj Israel nak xicakeb chixtzꞌa̱manquil li cꞌaꞌak re ru yi̱banbil riqꞌuin oro ut plata. Eb li cui̱nk teꞌxtzꞌa̱ma riqꞌuineb li rech cui̱nkilal ut joꞌcan ajcuiꞌ li ixk teꞌxtzꞌa̱ma riqꞌuin li rech ixkilal, chan li Dios.

³ Li Ka̱cuaꞌ Dios quixkꞌunobresi xchꞌo̱leb li tenamit Egipto ut queꞌxcꞌam rib saꞌ usilal riqꞌuineb laj Israel. Ut eb laj cꞌanjel chiru laj faraón joꞌ eb ajcuiꞌ chixjunileb laj Egipto queꞌx-oxlokꞌi chic laj Moisés.

⁴ Ut laj Moisés quixye re laj faraón: —Joꞌcaꞌin xye li Ka̱cuaꞌ Dios a̱cue. “Saꞌ tuktu kꞌojyi̱n tincꞌut lin cuanquil saꞌ li tenamit Egipto.

⁵ Ut telajeꞌca̱mk li xbe̱neb e̱ralal. Ma̱ jun teꞌcolekꞌ. Usta la̱at aj faraón, kꞌaxal nim a̱cuanquil, ta̱ca̱mk li xbe̱n a̱cualal. Ut teꞌca̱mk ajcuiꞌ xbe̱n ralal la̱ mo̱s ixk li ti̱c ma̱cꞌaꞌeb xcuanquil. (Chixjunileb li xbe̱n ralaleb laj Egipto talajeꞌca̱mk, li cuanqueb xcuanquil ut li ma̱cꞌaꞌeb xcuanquil.) Ut talajeꞌca̱mk ajcuiꞌ chixjunil li xbe̱n ral li queto̱mk.

⁶ Saꞌ li tenamit Egipto chixjunileb li cristian japjo̱keb re chi ya̱bac xban xrahileb saꞌ xchꞌo̱l. Ma̱ jun sut rabiom li ya̱bac chi joꞌcan chi moco ta̱abima̱nk mokon.

⁷ Riqꞌuin aꞌan ta̱qꞌue retal nak eb laj Israel sicꞌbileb ru inban. Eb aꞌan ma̱cꞌaꞌ teꞌxcꞌul, chi moco eb li xul. Chi ti̱c ma̱cꞌaꞌ teꞌxcꞌul laj Israel. Chi moco li tzꞌiꞌ teꞌcuo̱bak,” chan li Dios.—

⁸ Laj Moisés quixye ajcuiꞌ re laj faraón: —Chixjunileb laj cꞌanjel cha̱cuu teꞌcuulak cuiqꞌuin ut teꞌxcuikꞌib rib chicuu chixtzꞌa̱manquil. Teꞌxye cue, “Ba̱nu usilal, ayu la̱at a̱cuochbeneb chixjunileb laj Israel.” Ut chirix aꞌan tine̱lk saꞌ e̱ya̱nk, chan laj Moisés. Ut ma̱ caꞌchꞌin xjoskꞌil laj Moisés nak qui-el riqꞌuin laj faraón.

⁹ Junxil yebil chak re laj Moisés nak li Ka̱cuaꞌ Dios quixye re: —Laj faraón incꞌaꞌ ta̱abi̱nk cha̱cuu xban nak toj tincuaj tincꞌutbesi lin cuanquil chiruheb chixjunileb li tenamit Egipto.—

¹⁰ Laj Moisés rochben laj Aarón sachba chꞌo̱lej li quilajeꞌxba̱nu chiru laj faraón. Aban li Ka̱cuaꞌ Dios quixcacuubresi xchꞌo̱l laj faraón ut incꞌaꞌ quixcanabeb chi e̱lc laj Israel saꞌ li tenamit Egipto.