Éxodo 10 - Li Santil hu

Li nimla raylal xban li qꞌuila sa̱cꞌ

¹ Li Ka̱cuaꞌ Dios quixye re laj Moisés: —Tatxic cuiꞌchic riqꞌuin laj faraón. La̱in xincacuubresi xchꞌo̱l laj faraón joꞌ eb ajcuiꞌ laj cꞌanjel chiru re nak tincꞌut lin cuanquilal chiruheb.

² Chi joꞌcan la̱ex te̱ye reheb le̱ ralal e̱cꞌajol chanru xinba̱nu riqꞌuineb laj Egipto nak xincꞌutbesi lin cuanquilal chiruheb. La̱ex te̱nau nak relic chi ya̱l nak la̱in li Ka̱cuaꞌ Dios, chan.

³ Tojoꞌnak laj Moisés ut laj Aarón queꞌco̱eb riqꞌuin laj faraón ut queꞌxye re: —Joꞌcaꞌin xye a̱cue li Ka̱cuaꞌ Dios, lix Dioseb laj hebreo. “¿Jokꞌe ta̱cubsi a̱cuib chicuu? Canabeb chi xic lin tenamit re nak tineꞌxlokꞌoni.”

⁴ Ut xye ajcuiꞌ, “Cui incꞌaꞌ nacacanabeb chi xic lin tenamit, cuulaj tintaklaheb laj sa̱cꞌ saꞌ la̱ tenamit.

⁵ Tintakla li qꞌuila okꞌob chi aj sa̱cꞌ toj retal ta̱tzꞌapo̱nk li chꞌochꞌ xbaneb. Joꞌ qꞌuial chic li acui̱mk incꞌaꞌ xcamsi li sakbach, talajeꞌxlou chixjunil. Talajeꞌxcuaꞌ xxak li cheꞌ.

⁶ Talajeꞌoc saꞌ la̱ cuochoch ut talajeꞌoc saꞌ rochocheb laj cꞌanjel cha̱cuu. Talajeꞌoc saꞌ rochocheb chixjunileb laj Egipto. Ma̱ jun sut rilomeb la̱ yucuaꞌ chi moco la̱ xeꞌto̱nil yucuaꞌ joꞌ tinba̱nu anakcuan,” chan a̱cue li Ka̱cuaꞌ Dios.— Ut laj Moisés qui-el riqꞌuin laj faraón.

⁷ Ut eb laj cꞌanjel chiru laj faraón queꞌxye re laj faraón: —¿Joꞌ najtil chic toxchꞌiꞌchꞌiꞌi li cui̱nk aꞌin? Canabeb chi xic laj Israel re nak eb aꞌan teꞌxlokꞌoni chak li Ka̱cuaꞌ lix Dioseb. ¿Ma incꞌaꞌ nacacuil nak x-osoꞌ li katenamit Egipto? chanqueb.

⁸ Tojoꞌnak laj Moisés rochben laj Aarón queꞌcꞌameꞌ cuiꞌchic riqꞌuin laj faraón. Laj faraón quixye reheb: —Ayukex. Lokꞌonihomak chak ru li Ka̱cuaꞌ le̱ Dios. Ut ¿aniheb li teꞌxic? chan.

⁹ Laj Moisés quichakꞌoc ut quixye: —Chikajunilo toxic xban nak toninkꞌei̱k chiru li kaDios. Teꞌxic li sa̱j cui̱nk ut teꞌxic li che̱quel cui̱nk ut teꞌxic ajcuiꞌ li ixk. Talajeꞌxic li kalal kacꞌajol. Ut takacꞌameb ajcuiꞌ li kaqueto̱mk, chan laj Moisés.

¹⁰ Laj faraón saꞌ joskꞌil quichakꞌoc. Re xhobbaleb nak quixye reheb: —Tento nak le̱ Dios textenkꞌa cui la̱ex cuan saꞌ e̱chꞌo̱l nak texincanab chi xic e̱rochbeneb le̱ cocꞌal. La̱in moco texincanab ta chi xic chi joꞌcan. La̱in ninnau nak inbalakꞌinquil te̱raj. Ma̱ jaruj texincanab chi xic che̱junilex.

¹¹ Incꞌaꞌ texincanab chi xic cui te̱cꞌameb li cocꞌal. Caꞌaj cuiꞌ la̱ex cui̱nk texxic ut te̱lokꞌoni le̱ Dios cui joꞌcan te̱raj, chan. Ut laj Moisés ut laj Aarón queꞌa̱linasi̱c saꞌ junpa̱t xban laj faraón.

¹² Tojoꞌnak li Ka̱cuaꞌ Dios quixye re laj Moisés: —Taksi la̱ cuukꞌ saꞌ xbe̱n li tenamit re nak teꞌcha̱lk laj sa̱cꞌ. Chixjunil li cheꞌcꞌam saꞌ li tenamit Egipto li incꞌaꞌ qui-osoꞌ xban li sakbach, eb laj sa̱cꞌ talajeꞌxcuaꞌ chixjunil, chan li Ka̱cuaꞌ Dios.

¹³ Ut laj Moisés quixtaksi lix xukꞌ saꞌ xbe̱n li tenamit Egipto. Ut li Ka̱cuaꞌ Dios quixtakla chak jun cacuil ikꞌ. Li ikꞌ qui-el chak saꞌ li na-el cuiꞌ chak li sakꞌe. Chi cutan ut chi kꞌojyi̱n yo̱ li ikꞌ. Ut nak quisake̱u, ac cuanqueb chic laj sa̱cꞌ li quixcꞌam chak li ikꞌ.

¹⁴ Quilajeꞌchal laj sa̱cꞌ saꞌ chixjunil li tenamit Egipto. Nequeꞌhirirnac saꞌ xbe̱n li tenamit. Ma̱ jun cua rilomeb aꞌan chalen kꞌe cutan, ut ma̱ jun cua chic teꞌril mokon.

¹⁵ Quikꞌojyi̱noꞌ li tenamit Egipto xban xqꞌuialeb laj sa̱cꞌ ut quitzꞌapon li chꞌochꞌ xbaneb. Quilajeꞌxcuaꞌ chixjunil li cheꞌcꞌam ut li ru li cheꞌ li incꞌaꞌ qui-osoꞌ xban li sakbach, quilajeꞌxcꞌux. Ma̱cꞌaꞌ chic cꞌaꞌru rax ru quicana saꞌ li tenamit Egipto. Ma̱cꞌaꞌ chic li cheꞌcꞌam, ut ma̱cꞌaꞌeb chic lix xak li cheꞌ.

¹⁶ Tojoꞌnak laj faraón saꞌ junpa̱t quixbokeb chak laj Moisés ut laj Aarón. Quixye reheb: —Xinma̱cob chiru li Ka̱cuaꞌ la̱ Dios ut che̱ru ajcuiꞌ la̱ex.

¹⁷ Tintzꞌa̱ma che̱ru, caꞌaj chic anakcuan te̱cuy inma̱c ut chetzꞌa̱ma chiru le̱ Dios nak ta̱risi li raylal aꞌin saꞌ kabe̱n nak toj ma̱jiꞌ nococam, chan.

¹⁸ Laj Moisés qui-el riqꞌuin laj faraón ut quitijoc chiru li Ka̱cuaꞌ Dios.

¹⁹ Li Ka̱cuaꞌ Dios quixtakla cuiꞌchic jun li cacuil ikꞌ. Qui-el chak saꞌ li na-oc cuiꞌ li sakꞌe. Eb laj sa̱cꞌ quilajeꞌcꞌameꞌ xban li ikꞌ. Quilajeꞌcuteꞌ saꞌ jun li nimla palau Mar Rojo xcꞌabaꞌ. Ti̱c ma̱ jun chic laj sa̱cꞌ queꞌcana saꞌ li tenamit Egipto.

²⁰ Li Ka̱cuaꞌ Dios quixcacuubresi cuiꞌchic xchꞌo̱l laj faraón ut incꞌaꞌ quixcanabeb chi xic laj Israel.

Li nimal raylal xban nak quikꞌojyi̱noꞌ ru li cutan

²¹ Ut li Ka̱cuaꞌ Dios quixye re laj Moisés: —Taksi la̱ cuukꞌ re nak ta̱kꞌojyi̱nokꞌ ru li cutan saꞌ li tenamit Egipto. Nak teꞌbe̱k li cristian yal teꞌxchꞌeꞌ aj chic lix beheb, chan li Dios.

²² Laj Moisés quixtaksi li rukꞌ. Ut chirix aꞌan quicana li tenamit saꞌ kꞌojyi̱n. Oxib cutan tzꞌakal quicuan li kꞌojyi̱n saꞌ li tenamit Egipto.

²³ Eb laj Egipto incꞌaꞌ quiru queꞌril rib xban nak kꞌaxal cuiꞌchic kꞌojyi̱n. Yal chunchu̱queb aj chic saꞌ lix naꞌajeb saꞌ kꞌojyi̱n chiru li oxib cutan aꞌan. Ma̱ bar naru nequeꞌxic. Abanan eb laj Israel cutan saꞌ li naꞌajej li cuanqueb cuiꞌ.

²⁴ Ut laj faraón quixbok laj Moisés ut quixye re: —Ayukex. Lokꞌonihomak chak le̱ Dios. Cꞌamomak le̱ cocꞌal. Aban le̱ queto̱mk te̱canab arin, chan.

²⁵ Laj Moisés quixye re: —Tento nak takacꞌam li kaqueto̱mk re nak tomayejak chiru li kaDios. Takacꞌat li kamayej.

²⁶ Tento nak ta̱xic chixjunil li kaqueto̱mk. Ma̱ jun takacanab. Saꞌ xya̱nkeb aꞌan takasicꞌ ru li takamayeja chiru li kaDios. Nak tocuulak, aran takil bar cuan li ta̱cꞌanjelak chokꞌ kamayej, chan laj Moisés.

²⁷ Ut li Dios quixcacuubresi cuiꞌchic xchꞌo̱l laj faraón ut incꞌaꞌ quixcanabeb chi xic.

²⁸ Laj faraón quixye re laj Moisés: —Elen saꞌ xnakꞌ cuu chi junaj cua. Incꞌaꞌ chic nacuaj rilbal a̱cuu. Relic chi ya̱l tinye a̱cue nak saꞌ li cutan nak tincuil cuiꞌchic a̱cuu, aran tatca̱mk, chan.

²⁹ Laj Moisés quixye re: —Chi-uxma̱nk joꞌ xaye. Nak tine̱lk a̱cuiqꞌuin, incꞌaꞌ chic ta̱cuil cuu, chan re.