Ester 9 - Li Santil hu

¹ Li oxlaju xbe li cablaju po Adar, aꞌan li cutan xakabanbil xban li rey nak teꞌsachekꞌ ruheb laj judío, ut aꞌan ajcuiꞌ li cutan li yo̱queb chiroybeninquil li xicꞌ nequeꞌiloc reheb laj judío re nak teꞌnumta̱k saꞌ xbe̱neb. Abanan incꞌaꞌ queꞌnumta saꞌ xbe̱neb laj judío. Laj judío ban queꞌnumta saꞌ xbe̱neb li xicꞌ nequeꞌiloc reheb.

² Ut saꞌ eb li tenamit li cuanqueb rubel xcuanquil li rey Asuero, eb laj judío queꞌxchꞌutub ribeb chi pletic riqꞌuineb li queꞌajoc xsachbal ruheb. Ut ma̱ jun quiru xcolbal rib chiruheb laj judío xban nak qui-oc xxiuheb chiruheb.

³ Chixjunileb li cuanqueb xcuanquil ut eb li nequeꞌtaklan saꞌ eb li tenamit, joꞌqueb ajcuiꞌ li nequeꞌtaklan saꞌ xbe̱neb li soldado, queꞌxtenkꞌaheb laj judío xban nak queꞌxucuac chiru laj Mardoqueo.

⁴ Queꞌxucuac xban nak laj Mardoqueo nim xcuanquil saꞌ li rochoch li rey ut naꞌno ru yalak bar saꞌ eb li tenamit li cuanqueb rubel xcuanquil li rey. Ut rajlal yo̱ chi nima̱nc lix cuanquil li quiqꞌueheꞌ re.

⁵ Ut eb laj judío queꞌxcamsiheb chi chꞌi̱chꞌ chixjunileb li xicꞌ nequeꞌiloc reheb. Queꞌxba̱nu reheb li cꞌaꞌru queꞌraj.

⁶ Saꞌ li tenamit Susa bar cuan cuiꞌ li rey queꞌxcamsi o̱b ciento chi cui̱nk.

⁷ Ut queꞌcamsi̱c li laje̱b chi cui̱nk ralaleb laj Amán. Aꞌaneb aꞌin lix cꞌabaꞌeb: laj Parsandata, laj Dalfón, ut laj Aspata,

⁸ laj Porata, laj Adalía, ut laj Aridata,

⁹ laj Parmasta, laj Arisai, laj Aridai ut laj Vaizata.

¹⁰ Aꞌaneb li laje̱b chi ralal laj Amán li ralal laj Hamedata, li xicꞌ queꞌiloc reheb laj judío. Eb laj judío queꞌxcamsiheb, abanan incꞌaꞌ queꞌxcꞌam li cꞌaꞌru cuan reheb.

¹¹ Saꞌ ajcuiꞌ li cutan aꞌan quicuulac resil riqꞌuin li rey joꞌ qꞌuial li queꞌcamsi̱c aran Susa, li tenamit cuan cuiꞌ li rey.

¹² Ut li rey quixye re lix Ester: —Arin Susa queꞌcamsi̱c o̱b ciento li cui̱nk xbaneb laj judío. Ut queꞌcamsi̱c li laje̱b chi ralal laj Amán. ¿Ani ta cuiꞌ ta̱naꞌok re chanru xcꞌulman saꞌ eb li junju̱nk chi tenamit li cuanqueb rubel incuanquil? Ye cue cꞌaꞌ chic ru ta̱cuaj anakcuan, ut la̱in tinqꞌue a̱cue. Ye cue cꞌaꞌru ta̱cuaj, ut ta̱uxma̱nk joꞌ ta̱cuaj, chan li rey.

¹³ Lix Ester quichakꞌoc ut quixye: —Eb laj judío xeꞌxba̱nu anakcuan joꞌ tzꞌi̱banbil saꞌ li chakꞌrab li xaqꞌue reheb. Cui la̱at ta̱cuaj, ta̱takla xyebal reheb laj judío li cuanqueb arin Susa nak ta̱ru̱k teꞌxba̱nu ajcuiꞌ cuulaj joꞌ xeꞌxba̱nu anakcuan. Ut nacuaj ajcuiꞌ nak teꞌtꞌuyuba̱k riqꞌuin cꞌa̱m chiruheb li tenamit li laje̱b chi camenak li ralal laj Amán, chan.

¹⁴ Li rey quixtakla xyebal nak ta̱uxma̱nk joꞌ quixye lix Ester. Ut qui-el resil saꞌ li tenamit Susa. Ut eb li laje̱b chi ralal laj Amán, li queꞌcamsi̱c queꞌtꞌuyuba̱c aran Susa chiruheb li tenamit.

¹⁵ Eb laj judío li cuanqueb Susa queꞌxchꞌutub cuiꞌchic rib saꞌ li ca̱laju xbe li po Adar. Ut queꞌxcamsi oxib ciento chic li cui̱nk, abanan incꞌaꞌ queꞌxchꞌeꞌ li cꞌaꞌru cuan reheb.

¹⁶ Ut eb laj judío li cuanqueb saꞌ eb li tenamit li cuanqueb rubel xcuanquil li rey queꞌxchꞌutub ribeb re xcolbaleb rib chiruheb li xicꞌ nequeꞌiloc reheb. Queꞌxcamsi oꞌlaju xca̱cꞌa̱l mil (75,000) chi cui̱nk abanan incꞌaꞌ queꞌxchꞌeꞌ li cꞌaꞌru cuan reheb.

¹⁷ Aꞌin quicꞌulman saꞌ li oxlaju xbe li po Adar. Ut saꞌ li ca̱laju xbe li po Adar queꞌhilan ut queꞌninkꞌei̱c xban xsahil xchꞌo̱leb.

¹⁸ Aꞌut eb laj judío li cuanqueb Susa queꞌxchꞌutub ribeb re xcolbaleb rib saꞌ li oxlaju ut saꞌ li ca̱laju xbe li po. Ut saꞌ li oꞌlaju xbe li po queꞌhilan ut queꞌninkꞌei̱c xban xsahil xchꞌo̱leb.

¹⁹ Joꞌcan nak eb laj judío li cuanqueb saꞌ eb li cꞌaleba̱l li incꞌaꞌ sutsu xnaꞌajeb saꞌ tzꞌac, nequeꞌxninkꞌei li ca̱laju xbe li po Adar re xjulticanquil chanru nak queꞌcoleꞌ. Nequeꞌsahoꞌ saꞌ xchꞌo̱leb ut nequeꞌxqꞌue xma̱taneb chi ribileb rib.

Eb laj Israel queꞌxba̱nu li ninkꞌe “Purim” xcꞌabaꞌ

²⁰ Ut laj Mardoqueo quixtzꞌi̱ba retalil li cꞌaꞌru quicꞌulman ut quixtakla li hu reheb laj judío li cuanqueb saꞌ eb li tenamit li cuanqueb rubel xcuanquil li rey Asuero, li cuanqueb chi nachꞌ joꞌ ajcuiꞌ li cuanqueb chi najt.

²¹ Quixye reheb nak teꞌxninkꞌei ru li cutan li ca̱laju ut li oꞌlaju xbe li po Adar. Teꞌxninkꞌei rajlal chihab, chan.

²² Teꞌxninkꞌei ru li cutan aꞌan xban nak aꞌan li cutan queꞌcoleꞌ cuiꞌ chiruheb li xicꞌ queꞌiloc reheb. Ut saꞌ li po aꞌan quisukꞌi chokꞌ sahil chꞌo̱lej li rahil chꞌo̱lej li cuanqueb cuiꞌ. Teꞌxninkꞌei ruheb li cutan aꞌan ut teꞌxqꞌue xma̱taneb chi ribileb rib ut teꞌxqꞌue xma̱taneb li nebaꞌ.

²³ Ut eb laj judío queꞌcꞌay chixba̱nunquil joꞌ queꞌyeheꞌ reheb xban laj Mardoqueo saꞌ li hu li quixtakla reheb.

²⁴ Teꞌxninkꞌei rajlal re xjulticanquil chanru nak laj Amán li ralal laj Hamedata laj agagueo, li xicꞌ qui-iloc reheb laj judío quixcꞌu̱b ru chanru nak xsacheb raj ru laj judío ut queꞌbu̱lic re xxakabanquil lix cutanquil. Li bu̱lic “Pur” xcꞌabaꞌ saꞌ ra̱tinoba̱leb.

²⁵ Abanan lix Ester quia̱tinac riqꞌuin li rey. Ut li rey quixqꞌue li chakꞌrab nak chixjunil li raylal li quixcꞌoxla xba̱nunquil reheb laj judío ta̱tꞌanekꞌ saꞌ xbe̱n laj Amán. Ut quixtakla xyatzꞌbal laj Amán joꞌ ajcuiꞌ li laje̱b chi ralal.

²⁶ Joꞌcan nak Purim nayeman reheb li cutan li nequeꞌxninkꞌei ru. Li cꞌabaꞌej aꞌan isinbil riqꞌuin li a̱tin “pur”. Li a̱tin “pur” naraj naxye “suerte”. Xban li cꞌaꞌru tzꞌi̱banbil saꞌ li hu ut xban li cꞌaꞌru quicꞌulman, li cꞌaꞌru queꞌril ut li cꞌaꞌru queꞌrabi resil,

²⁷ chixjunileb laj judío queꞌxye nak teꞌxba̱nu li ninkꞌe aꞌin rajlal chihab. Ut queꞌxcꞌaytesi ajcuiꞌ li ralal xcꞌajoleb xninkꞌeinquil li cutan aꞌan. Ut queꞌxye nak li joꞌ qꞌuialeb li queꞌoc saꞌ xya̱nkeb laj judío teꞌxninkꞌei ajcuiꞌ li cutan aꞌan. Junelic teꞌxninkꞌei ru li cuib chi cutan aꞌan rajlal chihab.

²⁸ Saꞌ eb li tenamit li cua̱nkeb cuiꞌ laj judío rajlal chihab teꞌxba̱nu li ninkꞌe Purim joꞌqueb ajcuiꞌ li ralal xcꞌajol li teꞌcua̱nk mokon. Incꞌaꞌ teꞌxcanab xba̱nunquil li ninkꞌe Purim re nak incꞌaꞌ ta̱sachk saꞌ xchꞌo̱leb laj judío li cꞌaꞌru quicꞌulman.

²⁹ Ut li reina Ester, lix rabin laj Abihail, rochben laj Mardoqueo laj judío, queꞌxtzꞌi̱ba jun chic li hu. Ut queꞌxye nak tento xba̱nunquil li ninkꞌe Purim. Ut xban nak cuanqueb xcuanquil chi takla̱nc, tento nak ta̱uxma̱nk li cꞌaꞌru queꞌxtzꞌi̱ba saꞌ li hu.

³⁰ Ut queꞌxtakla li hu reheb chixjunileb laj judío li cuanqueb saꞌ li jun ciento riqꞌuin cuukub xcaꞌcꞌa̱l chi tenamit li cuanqueb rubel xcuanquil li rey Asuero. Ut queꞌxtakla xsahil xchꞌo̱leb ut queꞌxqꞌue xcacuil xchꞌo̱leb.

³¹ Ut queꞌxqꞌue li chakꞌrab nak rajlal teꞌxba̱nu li ninkꞌe Purim. Teꞌxba̱nu joꞌ quixye laj Mardoqueo laj judío, ut joꞌ quixye li reina Ester. Eb laj judío ac queꞌxcꞌu̱b ru nak teꞌxba̱nu aꞌin ut nak teꞌxcꞌut chiruheb li ralal xcꞌajol li teꞌcua̱nk mokon re xjulticanquil chanru nak queꞌayunic nak queꞌxcꞌul li raylal.

³² Li chakꞌrab li quixqꞌue lix Ester quixqꞌue xcuanquil li ninkꞌe Purim ut quitzꞌi̱ba̱c retalil saꞌ li hu.