Ester 8 - Li Santil hu

Eb laj Israel queꞌnumta saꞌ xbe̱neb li queꞌajoc xcamsinquileb

¹ Saꞌ ajcuiꞌ li cutan aꞌan li rey quixkꞌaxtesi re lix Ester li rochoch laj Amán, li xicꞌ qui-iloc reheb laj judío. Laj Mardoqueo quicuulac riqꞌuin li rey xban nak lix Ester quixye re li rey nak aꞌan rechꞌalal.

² Ut li rey quirisi chi ruꞌuj rukꞌ lix matkꞌab li quixmakꞌ chiru laj Amán ut quixqꞌue re laj Mardoqueo. Ut lix Ester quixxakab laj Mardoqueo re nak aꞌan chic ta̱ilok re chixjunil li cꞌaꞌru quicuan chokꞌ re laj Amán.

³ Lix Ester quia̱tinac cuiꞌchic riqꞌuin li rey. Ta̱ya̱bak nak quixcut rib chi rok li rey ut quixye: —Ta̱sach taxak xcuanquil li chakꞌrab li quixqꞌue laj Amán xban xma̱usilal. Incꞌaꞌ taxak ta̱uxma̱nk li raylal li quixcꞌoxla xba̱nunquil reheb laj judío, chan lix Ester.

⁴ Li rey quixtaksi lix xukꞌ oro ut lix Ester quicuacli ut quixxakab rib chiru li rey.

⁵ Ut quixye re: —At rey, cui la̱at ta̱cuaj xba̱nunquil usilal cue, ut cui nacacꞌoxla nak us xba̱nunquil ut cui niquina̱ra, ta̱qꞌue taxak junak li chakꞌrab li tixsach xcuanquil li hu li quixtakla laj Amán li ralal laj Hamedata aj agagueo re xcamsinquil chixjunileb laj judío yalak bar cuanqueb saꞌ eb li tenamit li cuanqueb rubel la̱ cuanquil.

⁶ ¿Chanru nak tincuy rilbal li raylal li teꞌraj xba̱nunquil reheb li cuech tenamitil? La̱in incꞌaꞌ tincuy cui teꞌcamsi̱k li cuechꞌalal, chan lix Ester.

⁷ Li rey Asuero quichakꞌoc ut quixye re li reina Ester ut re ajcuiꞌ laj Mardoqueo laj judío: —Xban nak laj Amán quiraj xsachbaleb ru laj judío, la̱in xintakla xyatzꞌbal ut xinqꞌue re lix Ester chixjunil li cꞌaꞌru re laj Amán.

⁸ Anakcuan te̱tzꞌi̱ba jun chic li hu saꞌ incꞌabaꞌ la̱in ut te̱tzꞌi̱ba li cꞌaꞌru te̱raj re xtenkꞌanquileb laj judío. Ut te̱qꞌue retalil lin matkꞌab chiru xban nak cui tzꞌi̱banbil saꞌ incꞌabaꞌ, ut cui cuan retalil li matkꞌab chiru, incꞌaꞌ naru xjalbal ru li cꞌaꞌru tzꞌi̱banbil, chan li rey.

⁹ Saꞌ junpa̱t queꞌbokeꞌ laj tzꞌi̱b li nequeꞌcꞌanjelac chiru li rey saꞌ li oxib xcaꞌcꞌa̱l xbe li rox po Siván xcꞌabaꞌ. Ut queꞌxtzꞌi̱ba chixjunil li quixye laj Mardoqueo. Li hu quicuulac saꞌ li jun ciento riqꞌuin cuukub xcaꞌcꞌa̱l chi tenamit li cuanqueb rubel xcuanquil li rey saꞌ li tenamit La India, toj saꞌ li tenamit Etiopía. Li hu quicuulac riqꞌuineb laj judío ut riqꞌuineb li cuanqueb xcuanquil ut riqꞌuineb ajcuiꞌ li nequeꞌtaklan saꞌ xbe̱neb li soldado. Li hu quitzꞌi̱ba̱c saꞌ li ra̱tinoba̱leb ut joꞌ nequeꞌtzꞌi̱bac saꞌ li junju̱nk chi tenamit. Ut quitzꞌi̱ba̱c ajcuiꞌ li hu saꞌ li ra̱tinoba̱leb laj judío ut joꞌ nequeꞌtzꞌi̱bac eb aꞌan.

¹⁰ Laj Mardoqueo quixtzꞌi̱ba li hu saꞌ xcꞌabaꞌ li rey ut quixqꞌue retalil lix matkꞌab li rey chiruheb li hu. Quixtaklaheb li cui̱nk chixcanabanquileb li hu. Queꞌco̱eb chirixeb lix cacua̱y li rey, li kꞌaxal cau nequeꞌa̱linac.

¹¹ Saꞌ li hu li quixtakla li rey quiyeheꞌ reheb laj judío nak teꞌxchꞌutub ribeb saꞌ li junju̱nk chi tenamit cuanqueb cuiꞌ, ut teꞌpletik re xcolbaleb rib chiruheb li xicꞌ nequeꞌiloc reheb. Ta̱ru̱k teꞌxcamsiheb ut teꞌxsach ruheb yalak ani li teꞌcha̱lk chi camsi̱nc reheb aꞌ yal bar xtenamiteb, usta cui̱nk, usta ixk, usta cocꞌal. Ut teꞌxxoc li cꞌaꞌru cuan reheb, chan li rey saꞌ li hu.

¹² Chixjunil aꞌin teꞌxba̱nu chiru jun cutan, saꞌ li oxlaju xbe li po Adar. Aꞌan lix cablaju po re li chihab.

¹³ Ut li hu aꞌin li quixtakla li rey quicana joꞌ chakꞌrab ut qui-el resilal saꞌ chixjunileb li tenamit re nak ac cauresinbilakeb laj judío chi numta̱c saꞌ xbe̱neb li xicꞌ nequeꞌiloc reheb nak ta̱cuulak xkꞌehil li ac yebil resil.

¹⁴ Eb lix takl li rey queꞌco̱eb saꞌ junpa̱t chirixeb lix cacua̱y li rey, li kꞌaxal cau nequeꞌa̱linac, joꞌ quiyeheꞌ reheb xban li rey. Ut qui-el ajcuiꞌ resilal li hu saꞌ li tenamit Susa bar cuan cuiꞌ li rey.

¹⁵ Nak laj Mardoqueo qui-el riqꞌuin li rey cuan chirix li cha̱bil akꞌ joꞌ narocsi li rey, rax ut sak. Cuan saꞌ xjolom jun nimla corona oro. Ut cuan li tꞌicr saꞌ xbe̱n li rakꞌ. Li tꞌicr aꞌan yi̱banbil riqꞌuin cha̱bil tꞌicr lino morado. Nak queꞌril laj Mardoqueo, cꞌajoꞌ nak queꞌsahoꞌ xchꞌo̱l li cuanqueb saꞌ li tenamit Susa.

¹⁶ Ut eb laj judío queꞌsahoꞌ xchꞌo̱l ut queꞌqꞌueheꞌ xlokꞌal.

¹⁷ Saꞌ li junju̱nk chi tenamit li quitakla̱c cuiꞌ li chakꞌrab li quixqꞌue li rey, cꞌajoꞌ nak quisahoꞌ saꞌ xchꞌo̱leb laj judío ut queꞌninkꞌei̱c xban nak aꞌan jun nimla cutan chokꞌ reheb. Ut nabaleb li ma̱cuaꞌeb aj judío queꞌoc saꞌ xya̱nkeb xban nak qui-oc xxiuheb xbaneb laj judío.