Ester 7 - Li Santil hu

Nak quicamsi̱c laj Amán

¹ Li rey Asuero rochben laj Amán co̱eb saꞌ li ninkꞌe li quixba̱nu lix Ester.

² Ut nak ac cuanqueb saꞌ li ninkꞌe yo̱queb chi ucꞌac vino ut li rey quixye cuiꞌchic re lix Ester: —Ye cue cꞌaꞌru ta̱cuaj ut la̱in tinqꞌue a̱cue usta yijach lin biomal ta̱patzꞌ cue, chan.

³ Ut li reina Ester quixye re: —At rey, cui la̱at ta̱cuaj xba̱nunquil usilal cue, caꞌaj cuiꞌ tintzꞌa̱ma cha̱cuu nak incꞌaꞌ taxak tincamsi̱k la̱in ut incꞌaꞌ taxak teꞌcamsi̱k li cuech tenamitil, chan.

⁴ —La̱in ut eb li cuech tenamitil, xokꞌaxtesi̱c re camsi̱c. Ta̱sachekꞌ ku chi junaj cua. Cui ta xoxkꞌaxtesi̱c chokꞌ cꞌayinbil mo̱s, ma̱cꞌaꞌ raj tinye. Incꞌaꞌ raj xatinchꞌiꞌchꞌiꞌi. Aban cui la̱o tocamsi̱k, ta̱cha̱lk jun nimla chꞌaꞌajquilal saꞌ a̱be̱n la̱at, at rey, chan lix Ester.

⁵ Ut li rey Asuero quixpatzꞌ re: —¿Ani xcꞌoxlan re xba̱nunquil li ma̱usilal aꞌan? ¿Bar cuan li cui̱nk aꞌan? chan.

⁶ Ut lix Ester quixye re: —Li xicꞌ na-iloc ke li naraj xba̱nunquil raylal ke, aꞌan ajcuiꞌ laj Amán li cuan arin, li incꞌaꞌ us xnaꞌleb, chan. Nak quirabi li cꞌaꞌru quixye, cꞌajoꞌ nak quixucuac laj Amán chiru li rey ut chiru li reina.

⁷ Cꞌajoꞌ nak quijoskꞌoꞌ li rey. Quicuacli saꞌ junpa̱t ut co̱ chirix cab bar aubil cuiꞌ li utzꞌuꞌuj. Laj Amán quicana aran chixtzꞌa̱manquil chiru lix Ester nak incꞌaꞌ ta̱camsi̱k xban nak ac naxnau nak ta̱takla̱k xcamsinquil xban li rey.

⁸ Xban nak cꞌajoꞌ lix xiu laj Amán, quitꞌaneꞌ chi rok lix Ester. Nak quisukꞌi saꞌ cab li rey, quiril nak laj Amán quitꞌaneꞌ saꞌ li cꞌojariba̱l bar yo̱ cuiꞌ chi hila̱nc lix Ester. Li rey quixjap re ut quixye: —¿Ma yo̱cat ajcuiꞌ xcꞌoxlanquil xba̱nunquil li incꞌaꞌ us re li reina chicuu arin saꞌ li cuochoch? chan. Toj yo̱ ajcuiꞌ xyebal aꞌan li rey nak queꞌxchap laj Amán ut queꞌxtzꞌap li ru.

⁹ Ut laj Harbona, jun reheb li eunucos li nequeꞌcꞌanjelac chiru li rey quixye: —Saꞌ rochoch laj Amán cuan li cheꞌ cuib xcaꞌcꞌa̱l metro xteram li quixqꞌue chi yi̱ba̱c laj Amán. Ac cuan aran li cꞌa̱m li quixqꞌue re xyatzꞌbal laj Mardoqueo, li cui̱nk li quiyehoc re nak queꞌraj a̱camsinquil, at rey, chan. Ut li rey quixye reheb: —Cꞌamomak laj Amán ut aran te̱yatzꞌ, chan.

¹⁰ Joꞌcan nak laj Amán quiyatzꞌeꞌ saꞌ li cꞌa̱m li quixqꞌue chi yi̱ba̱c re xyatzꞌbal laj Mardoqueo. Ut nak ac xcam laj Amán, quicube xjoskꞌil li rey.