Ester 5 - Li Santil huLix Ester quixbok li rey ut laj Amán saꞌ li ninkꞌe li tixba̱nu 1 Nak ac xnumeꞌ li oxib cutan, lix Ester quixtikib rib chi cha̱bil joꞌ xcꞌulub xban nak aꞌan li reina. Qui-oc saꞌ li rochoch li rey ut quixakli saꞌ li oqueba̱l re li naꞌajej chunchu cuiꞌ li rey saꞌ lix cꞌojariba̱l. Lix cꞌojariba̱l na-iloc bar cuan cuiꞌ li puerta. 2 Li rey quisahoꞌ xchꞌo̱l chirilbal li reina Ester xakxo aran chire li oqueba̱l ut quixtaksi lix xukꞌ oro. Ut lix Ester quinachꞌoc riqꞌuin ut quixchꞌeꞌ li ruꞌuj lix xukꞌ li rey. 3 Li rey Asuero quixpatzꞌ re: —¿Cꞌaꞌru xacꞌul, at reina Ester? Ye cue cꞌaꞌru ta̱cuaj ut la̱in tinqꞌue a̱cue. Usta yijach lin biomal ta̱patzꞌ cue, la̱in tinqꞌue a̱cue, chan. 4 Ut lix Ester quichakꞌoc ut quixye re: —Cui tixcꞌul a̱chꞌo̱l, at rey, nintzꞌa̱ma cha̱cuu nak tatxic ho̱n a̱cuochben laj Amán saꞌ li ninkꞌe li xincꞌu̱b chokꞌ a̱cue.— 5 Li rey quixye reheb laj cꞌanjel chiru: —Bokomak chak saꞌ junpa̱t laj Amán ut takaba̱nu li cꞌaꞌru naraj li reina Ester, chan. Joꞌcan nak li rey rochben laj Amán queꞌco̱eb saꞌ li ninkꞌe li quixba̱nu lix Ester. 6 Nak yo̱queb chi ucꞌac vino, li rey quixye re lix Ester: —Tzꞌa̱ma chicuu li cꞌaꞌru ta̱cuaj. La̱in tinqꞌue a̱cue. Ye cue cꞌaꞌru ta̱cuaj. Usta yijach lin biomal ta̱tzꞌa̱ma, la̱in tinqꞌue a̱cue, chan li rey. 7 Ut lix Ester quichakꞌoc ut quixye re: —Li cꞌaꞌru nacuaj, aꞌan aꞌin: 8 Cui la̱at ta̱cuaj xba̱nunquil li cꞌaꞌru tintzꞌa̱ma cha̱cuu ut cui la̱at ta̱cuaj xba̱nunquil usilal cue, tatcha̱lk raj cuiꞌchic cuulaj a̱cuochben laj Amán saꞌ li ninkꞌe li tinba̱nu chokꞌ e̱re. Ut cuulaj la̱in tinsume li cꞌaꞌru xapatzꞌ cue, at rey, chan lix Ester. 9 Laj Amán qui-el saꞌ li ninkꞌe chi sa saꞌ xchꞌo̱l. Abanan cꞌajoꞌ nak quijoskꞌoꞌ nak quiril laj Mardoqueo saꞌ li oqueba̱l re li rochoch li rey xban nak incꞌaꞌ quixcuikꞌib rib chiru chi moco qui-ecꞌan saꞌ xnaꞌaj nak quinumeꞌ. 10 Laj Amán incꞌaꞌ quixcꞌut lix joskꞌil chiru laj Mardoqueo. Nak quicuulac saꞌ li rochoch quixtakla xbokbaleb li rami̱g joꞌ ajcuiꞌ lix Zeres li rixakil. 11 Laj Amán qui-oc chixserakꞌinquil reheb chixjunil lix biomal. Quixye reheb nak nabaleb li ralal xcꞌajol ut nak sicꞌbil ru xban li rey. Ut quixye chanru nak quiqꞌueheꞌ xlokꞌal chiruheb chixjunileb ut quiqꞌueheꞌ xcuanquil saꞌ xbe̱neb chixjunileb li nequeꞌcꞌanjelac chiru li rey. 12 Ut quixye reheb: —Caꞌaj cuiꞌ la̱in xinixbok saꞌ li ninkꞌe li quixcꞌu̱b li reina chokꞌ re li rey. Ut xinixbok ajcuiꞌ chirochbeninquil li rey saꞌ li ninkꞌe li tixba̱nu cuulaj. 13 Abanan chixjunil aꞌan ma̱cꞌaꞌ na-oc cuiꞌ chicuu nak nacuil nak chunchu laj Mardoqueo laj judío chire li oqueba̱l re li rochoch li rey, chan laj Amán. 14 Ut lix Zeres li rixakil joꞌqueb ajcuiꞌ li rami̱g queꞌxye re: —Takla xyi̱banquil junak li naꞌajej cuib xcaꞌcꞌa̱l (22) metro xteram ut ta̱yi̱b li cꞌa̱m re xyatzꞌbal laj Mardoqueo. Ut ekꞌela cuulaj ta̱tzꞌa̱ma chiru li rey nak tixtakla xyatzꞌbal laj Mardoqueo re nak naru tatxic saꞌ li ninkꞌe a̱cuochben li rey chi ma̱cꞌaꞌ a̱cꞌaꞌux, chanqueb. Ut quisahoꞌ xchꞌo̱l laj Amán riqꞌuin li naꞌleb aꞌan ut quixtakla xyi̱banquil li naꞌajej re xyatzꞌbal laj Mardoqueo. |
© 2019, Wycliffe Bible Translators. All rights reserved.
Wycliffe Bible Translators, Inc.