Ester 3 - Li Santil hu

Laj Amán quixcꞌu̱b ru chanru nak tixsach ruheb chi junaj cua laj Israel

¹ Mokon chic li rey Asuero quixqꞌue xcuanquil laj Amán chi takla̱nc saꞌ xbe̱neb chixjunileb li nequeꞌtaklan saꞌ eb li tenamit. Laj Amán aꞌan li ralal laj Hamedata, xcomoneb aj agagueo.

² Nak quinumeꞌ laj Amán, chixjunileb li nequeꞌcꞌanjelac chiru li rey saꞌ li rochoch queꞌxcuikꞌib ribeb chiru ut queꞌxxulub xjolomeb re xqꞌuebal xlokꞌal xban nak joꞌcan quixye li rey. Abanan laj Mardoqueo incꞌaꞌ quixcuikꞌib rib chiru chi moco quixqꞌue xlokꞌal.

³ Ut eb li nequeꞌcꞌanjelac chiru li rey queꞌxpatzꞌ re laj Mardoqueo cꞌaꞌut nak incꞌaꞌ naxba̱nu li cꞌaꞌru quixye li rey.

⁴ Junelic yo̱queb xpatzꞌbal re laj Mardoqueo cꞌaꞌut nak incꞌaꞌ quixba̱nu li cꞌaꞌru quixye li rey. Abanan laj Mardoqueo incꞌaꞌ qui-abin chiruheb. Joꞌcan nak queꞌco̱eb riqꞌuin laj Amán ut queꞌxye re nak laj Mardoqueo incꞌaꞌ naxcuikꞌib rib chiru xban nak quixye reheb nak aꞌan aj judío. Queꞌraj rilbal ma tixye na chiru laj Amán nak aꞌan aj judío.

⁵ Nak laj Amán quixqꞌue retal nak laj Mardoqueo incꞌaꞌ naxcuikꞌib rib chiru, chi moco naxxulub xjolom nak nanumeꞌ, cꞌajoꞌ nak quichal xjoskꞌil.

⁶ Ac quirabi resil nak laj Mardoqueo aj judío. Incꞌaꞌ quiraj xcamsinquil xjunes laj Mardoqueo. Quixcꞌoxla nak kꞌaxal us xcamsinquileb chixjunileb laj judío li cuanqueb saꞌ eb li naꞌajej li cuanqueb rubel xtakl li rey Asuero.

⁷ Saꞌ li xbe̱n po Nisán xcꞌabaꞌ nak yo̱ cablaju chihab roquic chokꞌ rey laj Asuero, queꞌbu̱lic chiru laj Amán re xnaubal jokꞌe us xba̱nunquil li quixye laj Amán. Nak queꞌbu̱lic chirix li cutan ut chirix li po qui-el nak teꞌxba̱nu saꞌ li oxlaju xbe lix cablaju po. Li po aꞌan Adar xcꞌabaꞌ. Li bu̱lic nequeꞌxba̱nu, Pur nequeꞌxye re.

⁸ Laj Amán quixye re li rey Asuero: —Saꞌ xya̱nkeb li tenamit li cuanqueb rubel la̱ takl, cuan jun te̱p li tenamit xjuneseb nequeꞌxcꞌam ribeb. Incꞌaꞌ nequeꞌxjunaji rib riqꞌuineb li jun chꞌol chic. Jalan lix chakꞌrabeb ut incꞌaꞌ nequeꞌxba̱nu li cꞌaꞌru nacaye la̱at. Ma̱cꞌaꞌ aj e nak cuanqueb saꞌ eb li naꞌajej li cuanqueb rubel la̱ cuanquil.

⁹ Joꞌcan nak cui naxcꞌul a̱chꞌo̱l, at rey, ta̱qꞌue jun li chakꞌrab re nak teꞌsachekꞌ ru chixjunileb laj judío. Ut la̱in tincꞌam chak chokꞌ a̱cue oxib ciento millón riqꞌuin laje̱b xcaꞌcꞌa̱l mil kilo li tumin li takamakꞌ chiruheb. Tinqꞌue aꞌan saꞌ xnaꞌaj la̱ tumin, chan laj Amán.

¹⁰ Ut quirisi lix matkꞌab li rey Asuero ut quixqꞌue re laj Amán. Aꞌan retalil nak quixcꞌul xchꞌo̱l li quixye laj Amán, li xicꞌ na-iloc reheb laj judío.

¹¹ Ut quixye re: —Xoc chokꞌ a̱cue li tumin aꞌan. Ut ba̱nu li cꞌaꞌru ta̱cuaj riqꞌuineb li tenamit aꞌan, chan li rey.

¹² Joꞌcan nak saꞌ li oxlaju xbe li xbe̱n po re li chihab aꞌan, queꞌbokeꞌ laj tzꞌi̱b li nequeꞌcꞌanjelac chiru li rey. Ut queꞌxtzꞌi̱ba li chakꞌrab joꞌ quixye laj Amán reheb. Li chakꞌrab aꞌan quitakla̱c riqꞌuineb chixjunileb li nequeꞌtaklan saꞌ li junju̱nk chi tenamit li cuanqueb rubel xtakl li rey. Ut quitakla̱c riqꞌuineb laj cꞌamol be. Queꞌtzꞌi̱bac saꞌ ra̱tinoba̱leb ut joꞌ nequeꞌtzꞌi̱bac saꞌ li junju̱nk chi tenamit. Eb li hu aꞌan queꞌtzꞌi̱ba̱c saꞌ xcꞌabaꞌ li rey Asuero ut quiqꞌueheꞌ retalil lix matkꞌab li rey chiruheb.

¹³ Chirix aꞌan eb li hu queꞌcꞌameꞌ saꞌ li junju̱nk chi tenamit xbaneb lix takl li rey. Ut yalak bar queꞌrabi lix chakꞌrab li rey nak teꞌcamsi̱k chixjunileb laj judío saꞌ li oxlaju xbe li cablaju po Adar xcꞌabaꞌ. Jun xxiquic nak teꞌsachekꞌ ruheb laj judío. Teꞌcamsi̱k li ti̱x joꞌqueb ajcuiꞌ li sa̱jeb, ut eb li ixk joꞌqueb ajcuiꞌ li cocꞌal. Ut ta̱xoquekꞌ chixjunil li cꞌaꞌru cuan reheb.

¹⁴ Li chakꞌrab li quixqꞌue li rey quitakla̱c saꞌ li junju̱nk chi tenamit. Ut qui-el resil yalak bar re nak ta̱cuulak xkꞌehil, ac cauresinbilakeb chixba̱nunquil li cꞌaꞌru quixye li rey.

¹⁵ Eb li hu aꞌan queꞌtakla̱c xbaneb lix takl li rey ut qui-el ajcuiꞌ resil saꞌ li tenamit Susa. Ut li rey Asuero rochben laj Amán queꞌcꞌojla ut queꞌoc chi ucꞌac chi saheb saꞌ xchꞌo̱l. Abanan chixjunileb li cuanqueb saꞌ li tenamit Susa, queꞌyotꞌeꞌ xchꞌo̱leb ut sachso̱queb xchꞌo̱l queꞌcana.