Ester 2 - Li Santil hu

Li rey quixxakab lix Ester chokꞌ reina

¹ Mokon chic nak ac xnumeꞌ xjoskꞌil li rey Asuero, quijulticoꞌ re lix Vasti li quicuan chokꞌ rixakil. Quijulticoꞌ re li quixba̱nu ut quijulticoꞌ ajcuiꞌ re chanru nak quirisi chokꞌ reina.

² Ut eb li nequeꞌcꞌanjelac chiru li rey queꞌxye: —Tento takasiqꞌueb li tukꞌ ixk chꞌinaꞌuseb li ma̱jiꞌ cuanjenakeb riqꞌuin cui̱nk chokꞌ re li rey.

³ Li rey tixxakabeb li teꞌxic saꞌ chixjunileb li tenamit li cuanqueb rubel xcuanquil chixsicꞌbaleb li tukꞌ ixk li cꞌajoꞌ xchꞌinaꞌusaleb. Teꞌcꞌamekꞌ chak Susa li tukꞌ ixk saꞌ li rochoch li rey ut teꞌqꞌuehekꞌ chi cua̱nc saꞌ li naꞌajej li nequeꞌcuan cuiꞌ li ixk. Teꞌcanaba̱k saꞌ xcue̱nt laj Hegai li na-iloc reheb li ixk. Aꞌan li eunuco li nacꞌanjelac chiru li rey. Ut aꞌan ta̱qꞌuehok reheb chixjunil li cꞌaꞌak re ru re teꞌxtikib ribeb chi cha̱bil.

⁴ Ut li tukꞌ ixk li kꞌaxal ta̱cuulak chiru li rey, aꞌan li ta̱qꞌuehekꞌ chokꞌ reina chokꞌ re̱kaj lix Vasti, chanqueb. Ut quixcꞌul xchꞌo̱l li rey li naꞌleb aꞌin. Ut quixba̱nu joꞌ quiyeheꞌ re.

⁵ Aran Susa cuan jun li cui̱nk aj judío aj Mardoqueo xcꞌabaꞌ. Aꞌan ralal laj Jair. Laj Jair, aꞌan li ralal laj Simei. Laj Simei, aꞌan li ralal laj Cis. Eb aꞌan xcomoneb li ralal xcꞌajol laj Benjamín.

⁶ Eb aꞌan xcomoneb li qꞌuila tenamit li queꞌisi̱c Jerusalén xban laj Nabucodonosor, lix reyeb laj Babilonia. Rochbeneb laj Jeconías lix reyeb laj Judá nak queꞌcꞌameꞌ aran Babilonia.

⁷ Quicuan jun lix rabin li rican laj Mardoqueo. Nak quicam lix naꞌ xyucuaꞌ li xkaꞌal, laj Mardoqueo quixxoc ut quixqꞌuiresi joꞌ jun tzꞌakal xrabin, xHadasa xcꞌabaꞌ. Ester nayeman ajcuiꞌ re. Cꞌajoꞌ xchꞌinaꞌusal li xkaꞌal aꞌan.

⁸ Nak qui-el resil li chakꞌrab li quixqꞌue li rey, nabaleb li tukꞌ ixk queꞌchꞌutuba̱c saꞌ li tenamit Susa saꞌ li rochoch li rey. Ut laj Hegai aꞌan li na-iloc reheb. Saꞌ xya̱nkeb li tukꞌ ixk cuan lix Ester.

⁹ Laj Hegai quixqꞌue retal nak cha̱bil lix Ester ut quisahoꞌ xchꞌo̱l riqꞌuin. Joꞌcan nak junpa̱t quixqꞌue chixjunil li cꞌaꞌru re, re nak tixtikib rib chi cha̱bil ut quixqꞌue li cha̱bil tzacae̱mk re. Quixqꞌue cuukub li tukꞌ ixk li kꞌaxal cha̱bileb li cuanqueb saꞌ li rochoch li rey re nak teꞌcꞌanjelak chiru lix Ester. Ut quixqꞌue jun xnaꞌaj lix Ester kꞌaxal cha̱bil re nak ta̱cua̱nk aran rochbeneb li cuukub chi tukꞌ ixk.

¹⁰ Lix Ester incꞌaꞌ quixye bar xtenamit chi moco quixye nak aꞌan xcomoneb laj Israel xban nak ac yebil re xban laj Mardoqueo nak incꞌaꞌ tixye.

¹¹ Rajlal cutan nanumeꞌ laj Mardoqueo chiru lix neba̱l li rochoch li rey bar cuanqueb cuiꞌ li tukꞌ ixk re xnaubal chanru lix Ester, ma sa saꞌ xchꞌo̱l ut ma cha̱bileb riqꞌuin.

¹² Nak toj ma̱jiꞌ nequeꞌxcꞌut rib chiru li rey, tento nak teꞌxyi̱b rib chiru jun chihab joꞌ cꞌaynakeb xba̱nunquil eb li ixk aꞌan. Li xbe̱n cuakib po teꞌxyul li aceite mirra chirixeb ut li cuakib po chic teꞌxqꞌue li sununquil ban chirixeb. Nak acak xeꞌrakeꞌ xyi̱banquil ribeb, chi xjunju̱nkaleb teꞌcꞌamekꞌ riqꞌuin li rey.

¹³ Ut li tukꞌ ixk, li ta̱xic riqꞌuin li rey, tento nak ta̱qꞌuehekꞌ re chixjunil li cꞌaꞌru ta̱raj re xyi̱banquil rib chi kꞌaxal cha̱bil re nak ta̱xic saꞌ li rochoch li rey.

¹⁴ Chiru kꞌojyi̱n ta̱xic riqꞌuin li rey ut cuulajak chic ta̱xic saꞌ lix naꞌajeb li ixk li ac xeꞌcuan riqꞌuin li rey. Li eunuco aj Saasgaz aꞌan li na-iloc reheb. Ut li ixk incꞌaꞌ chic ta̱xic riqꞌuin li rey cui incꞌaꞌ ta̱cuulak chiru li rey ut cui incꞌaꞌ ta̱bokekꞌ xban.

¹⁵ Nak quicuulac xkꞌehil, quicꞌameꞌ lix Ester riqꞌuin li rey. Ma̱cꞌaꞌ quixtzꞌa̱ma. Caꞌaj cuiꞌ quirocsi li cꞌaꞌru quiqꞌueheꞌ re xban laj Hegai li eunuco li na-iloc reheb li tukꞌ ixk. Ut chixjunileb li queꞌiloc re lix Ester, cꞌajoꞌ nak queꞌsahoꞌ xchꞌo̱l riqꞌuin. Lix Ester li quiqꞌuiresi̱c xban laj Mardoqueo, aꞌan xrabin laj Abihail.

¹⁶ Saꞌ li xlaje po Tebet xcꞌabaꞌ re li xcuuk chihab roquic chokꞌ rey laj Asuero, nak quicꞌameꞌ lix Ester riqꞌuin li rey.

¹⁷ Ut li rey Asuero nak quiril ru lix Ester, cꞌajoꞌ nak quicuulac chiru ut aꞌan li kꞌaxal quixra chiruheb chixjunileb li ixk li ac queꞌcuulac riqꞌuin. Quixqꞌue lix corona saꞌ xjolom ut quixqꞌue chokꞌ reina chokꞌ re̱kaj lix Vasti.

¹⁸ Li rey quixba̱nu jun li ninkꞌe re xqꞌuebal xlokꞌal lix Ester ut quixbokeb saꞌ li ninkꞌe chixjunileb li nequeꞌcꞌanjelac chiru. Incꞌaꞌ qꞌui li tumin quixpatzꞌ reheb li junju̱nk chi tenamit. Quixqꞌue ban xma̱taneb joꞌ quiraj li rey.

¹⁹ Nak queꞌchꞌutuba̱c cuiꞌchic xcaꞌ sut li tukꞌ ixk, laj Mardoqueo chunchu aran chire li oqueba̱l re li rochoch li rey.

²⁰ Lix Ester incꞌaꞌ quixye reheb bar xtenamit chi moco quixye reheb nak aꞌan xcomoneb laj judío xban nak joꞌcan quiyeheꞌ re xban laj Mardoqueo. Aꞌan naxba̱nu li cꞌaꞌru naxye laj Mardoqueo joꞌ quixba̱nu nak toj cuan chiru.

²¹ Nak chunchu chire li oqueba̱l re li rochoch li rey, laj Mardoqueo quirabi li cꞌaꞌru yo̱queb chixyebal chi ribileb rib laj Bigtán ut laj Teres. Li cuib chi cui̱nk aꞌan, aꞌaneb li nequeꞌcuan saꞌ li oqueba̱l chi cꞌacꞌale̱nc. Cꞌajoꞌ xjoskꞌileb ut yo̱queb xcꞌu̱banquil chanru nak teꞌxcamsi li rey.

²² Nak quirabi nak teꞌraj teꞌxcamsi li rey, laj Mardoqueo quixye re lix Ester. Ut lix Ester quixye re li rey li cꞌaꞌru quirabi ut quixye ajcuiꞌ nak laj Mardoqueo, aꞌan li quiyehoc re.

²³ Queꞌxtzꞌil a̱tin chirix li cꞌaꞌru quixye laj Mardoqueo. Nak queꞌxqꞌue retal nak ya̱l li quixye, queꞌxtakla xyatzꞌbaleb li cuib chi cui̱nk li queꞌajoc xcamsinquil li rey. Ut chixjunil aꞌin quitzꞌi̱ba̱c retalil saꞌ li hu li tzꞌi̱banbil cuiꞌ retalil chixjunil li nacꞌulman saꞌ li tenamit aꞌan.