Ester 1 - Li Santil hu

Lix Vasti qui-isi̱c chokꞌ reina aran Persia

¹ Aꞌan aꞌin li quicꞌulman saꞌ eb li cutan nak quicuan chokꞌ rey laj Asuero. Aꞌan quitaklan saꞌ xbe̱n li tenamit La India. Ut aꞌan ajcuiꞌ quitaklan saꞌ xbe̱neb chixjunileb li tenamit quicuulac toj saꞌ li tenamit Etiopía. Jun ciento riqꞌuin cuukub xcaꞌcꞌa̱l (127) chi tenamit queꞌcuan rubel xcuanquil laj Asuero.

² Saꞌ li tenamit Susa quicuan lix naꞌaj li quitaklan cuiꞌ.

³ Yo̱ rox chihab roquic chokꞌ rey laj Asuero nak quixba̱nu jun li ninkꞌe chokꞌ reheb li nequeꞌcꞌanjelac chiru. Ut quixbokeb saꞌ li ninkꞌe li nequeꞌtaklan saꞌ li junju̱nk chi tenamit joꞌqueb ajcuiꞌ li nequeꞌcꞌamoc be saꞌ xya̱nkeb lix soldado eb laj Persia ut eb laj Media.

⁴ Quixbokeb chixjunileb re xcꞌutbal chiruheb lix nimal ut lix lokꞌal lix cuanquilal ut lix biomal. Li ninkꞌe aꞌan quicuan cuakib po.

⁵ Nak ac xeꞌnumeꞌ li cutan aꞌan, quixba̱nu jun chic li ninkꞌe chiru li neba̱l re li rochoch li rey Asuero. Cuukub cutan chic quibay li ninkꞌe aꞌan. Chixjunileb li cuanqueb Susa queꞌbokeꞌ saꞌ li ninkꞌe, li cuanqueb xcuanquil joꞌqueb ajcuiꞌ li ma̱cꞌaꞌeb xcuanquil.

⁶ Queꞌxyi̱b chi cha̱bil li neba̱l. Queꞌxqꞌue li cha̱bil tꞌicr sak, rax ut azul ut queꞌxbacꞌ chiru li ni̱nki pilar yi̱banbil riqꞌuin li cha̱bil pec mármol. Li tꞌicr chapcho riqꞌuin cꞌa̱m lino morado. Li cꞌa̱m chapcho saꞌ li junju̱nk chi pilar riqꞌuin argollas yi̱banbil riqꞌuin plata. Li cꞌojariba̱l, li queꞌhilan cuiꞌ li ulaꞌ yi̱banbil riqꞌuin oro ut plata. Li xan yi̱banbil riqꞌuin li cha̱bil pec pórfido ut mármol ut riqꞌuin li pec alabastro ut jacinto. Eb li pec aꞌan kꞌaxal terto̱queb xtzꞌak.

⁷ Li secꞌ li queꞌucꞌac cuiꞌ junes oro ut jalan jala̱nk xyi̱banquil. Kꞌaxal nabal li vino xcomon li cha̱bil li narucꞌ li rey ut quiqꞌueheꞌ chi nabal joꞌ quiraj aꞌan.

⁸ Li rey quixqꞌue jun li chakꞌrab reheb laj jecꞌol vino ut quixye reheb nak ma̱ ani teꞌxmin ruheb chi ucꞌac. Aꞌ yal re li junju̱nk cꞌaꞌru ta̱raj rucꞌbal.

⁹ Ut li reina Vasti, li rixakil li rey, quixba̱nu ajcuiꞌ jun li ninkꞌe reheb li ixk saꞌ li rochoch li rey Asuero.

¹⁰ Saꞌ xcuuk li cutan re li ninkꞌe, cꞌajoꞌ xsahil xchꞌo̱l li rey Asuero xban lix calajic. Quixtaklaheb li cuukub chi eunucos li nequeꞌcꞌanjelac chiru. Aꞌaneb laj Mehumán, laj Bizta, laj Harbona, laj Bigta, laj Abagta, laj Zetar ut laj Carcas.

¹¹ Li rey quixye reheb nak teꞌxbok chak li reina Vasti. Ut quixye reheb nak cua̱nk chak lix corona saꞌ xjolom nak ta̱cha̱lk chiru li rey re xcꞌutbal lix chꞌinaꞌusal chiruheb li tenamit ut chiruheb ajcuiꞌ li nequeꞌtaklan saꞌ li junju̱nk chi tenamit xban nak kꞌaxal chꞌinaꞌus lix Vasti.

¹² Li cuukub chi cui̱nk queꞌcuulac riqꞌuin li reina Vasti ut queꞌxye re li cꞌaꞌru quixye li rey. Abanan lix Vasti incꞌaꞌ quixba̱nu li cꞌaꞌru quiraj li rey. Joꞌcan nak cꞌajoꞌ nak quijoskꞌoꞌ li rey.

¹³ Xban nak yo̱ xjoskꞌil li rey quipatzꞌoc reheb li cuanqueb xnaꞌleb cꞌaꞌru us xba̱nunquil. Saꞌ eb li cutan aꞌan cꞌaynakeb li rey chixpatzꞌbal xnaꞌlebeb riqꞌuineb li nequeꞌxnau li chakꞌrab.

¹⁴ Cuanqueb riqꞌuin li rey laj Carsena, laj Setar, laj Admata ut laj Tarsis. Ut cuanqueb ajcuiꞌ laj Meres, laj Marsena ut laj Memucán. Aꞌaneb li cuukub chi xni̱nkal ru cui̱nk saꞌ xya̱nkeb laj Persia ut laj Media. Junelic cuanqueb aran chixqꞌuebal xnaꞌleb li rey ut kꞌaxal ni̱nkeb xcuanquil.

¹⁵ Li rey Asuero quixpatzꞌ reheb: —¿Cꞌaꞌru naxye li chakꞌrab? ¿Cꞌaꞌru us takaba̱nu riqꞌuin li reina Vasti? Xintaklaheb laj cꞌanjel chicuu chixbokbal. Abanan aꞌan incꞌaꞌ xba̱nu li cꞌaꞌru xinye, chan.

¹⁶ Ut laj Memucán quichakꞌoc ut quixye re li rey ut reheb ajcuiꞌ chixjunileb li cuanqueb xcuanquil saꞌ eb li tenamit: —Moco caꞌaj cuiꞌ ta chiru li rey xma̱cob nak quixkꞌet li ra̱tin. Xma̱cob ajcuiꞌ chiruheb li cuanqueb xcuanquil joꞌ ajcuiꞌ chiruheb chixjunileb li tenamit li cuanqueb rubel xcuanquil li rey.

¹⁷ Li cꞌaꞌru xba̱nu li reina ta̱cuulak saꞌ xxiqueb chixjunileb li ixk. Cui teꞌrabi aꞌan, eb li ixk incꞌaꞌ chic teꞌxqꞌue saꞌ ruheb lix be̱lomeb. Eb aꞌan teꞌxye, “Li rey Asuero xtakla xbokbal li reina Vasti ut aꞌan incꞌaꞌ qui-abin chiru,” chaꞌkeb.

¹⁸ Ut anakcuan eb li rixakil li cuanqueb xcuanquil saꞌ xya̱nkeb laj Media ut eb laj Persia cau chic teꞌra̱tina lix be̱lomeb xban nak teꞌrabi li cꞌaꞌru xba̱nu li reina Vasti. Teꞌjoskꞌokꞌ chiruheb lix be̱lom ut ta̱cua̱nk chꞌaꞌajquilal chi joꞌcan.

¹⁹ Cui la̱at tixcꞌul a̱chꞌo̱l, at rey, ta̱qꞌue junak chakꞌrab ut tzꞌi̱banbilak retalil saꞌ li chakꞌrab re Persia ut re Media re nak ma̱ ani ta̱kꞌetok re. Li chakꞌrab aꞌan tixye nak li reina Vasti incꞌaꞌ chic tixcꞌut rib chi junaj cua chiru li rey ut ta̱isi̱k chokꞌ reina. Ut junak chic kꞌaxal cha̱bil chiru aꞌan ta̱qꞌuehekꞌ chokꞌ reina.

²⁰ Nak ta̱e̱lk resil li chakꞌrab li ta̱qꞌue, at rey, teꞌrabi chixjunileb li cuanqueb rubel a̱cuanquil. Ut chixjunileb li ixk teꞌxqꞌue xlokꞌal lix be̱lom, usta cuan xcuanquil usta ma̱cꞌaꞌ xcuanquil, chan.

²¹ Li cꞌaꞌru quixye laj Memucán quixcꞌul xchꞌo̱l li rey joꞌqueb ajcuiꞌ li ni̱nkeb xcuanquil li cuanqueb aran. Ut li rey Asuero quixba̱nu joꞌ quiyeheꞌ re xban laj Memucán.

²² Ut li rey quixtaklaheb li hu saꞌ li junju̱nk chi tenamit. Quixtzꞌi̱ba saꞌ li ra̱tinoba̱leb ut quixtzꞌi̱ba ajcuiꞌ joꞌ nequeꞌtzꞌi̱bac saꞌ eb li junju̱nk chi tenamit. Quixye reheb nak eb li cui̱nk, aꞌaneb li teꞌtakla̱nk saꞌ li rochocheb. Ut quixye ajcuiꞌ nak ta̱yehekꞌ resil li chakꞌrab aꞌan reheb chixjunileb li tenamit saꞌ li ra̱tinoba̱leb li junju̱nk chi tenamit.