Esdras 9 - Li Santil hu

Laj Esdras quitijoc chirixeb li queꞌsumla riqꞌuineb li jalaneb xtenamit

¹ Ut chirix chic aꞌan, eb laj cꞌamol be saꞌ xya̱nkeb laj Israel queꞌcuulac cuiqꞌuin ut queꞌxye cue: —Cuanqueb aj Israel yo̱queb chixjunajinquil ribeb riqꞌuineb li jalaneb xtenamit. Saꞌ xya̱nkeb aꞌan cuanqueb laj tij ut laj levita. Yo̱queb chixjunajinquil ribeb riqꞌuineb laj cananeo, eb laj heteo, eb laj ferezeo, eb laj jebuseo, eb laj amonita, eb laj moabita, eb laj Egipto ut eb laj amorreo ut yo̱queb chixba̱nunquil li ma̱usilal nequeꞌxba̱nu eb aꞌan.

² Yo̱queb chi sumla̱c riqꞌuineb ut yo̱queb ajcuiꞌ chixsumubanquil eb li ralal riqꞌuineb lix rabin li cuanqueb saꞌ li tenamit aꞌan. Lix tenamit li Dios, li ti̱queb raj xchꞌo̱l, queꞌxjunaji ribeb riqꞌuineb li jalaneb xtenamit. Ut eb li queꞌcꞌamoc xbe chixba̱nunquil li ma̱c aꞌan, aꞌaneb ajcuiꞌ li cuanqueb saꞌ xcuanquil ut eb li nequeꞌtaklan saꞌ xbe̱neb li tenamit, chanqueb.

³ Nak quicuabi li a̱tin aꞌan, quinpej li cuakꞌ ut quinmichꞌ li cuismal ut lin mach. Ut quincꞌojla chi kꞌaxal ra saꞌ inchꞌo̱l.

⁴ Ut queꞌxchꞌutub ribeb cuiqꞌuin chixjunileb li queꞌoc xxiu nak lix Dioseb laj Israel tixqꞌue raylal saꞌ xbe̱neb xban lix ma̱queb li rech tenamitil. Ut la̱in cꞌajoꞌ xrahil inchꞌo̱l ut quincana aran toj quicuulac x-o̱ril li mayejac re li ecuu.

⁵ Saꞌ x-o̱ril li mayejac re li ecuu, quincuacli saꞌ li naꞌajej bar quincꞌojla cuiꞌ chi ra saꞌ inchꞌo̱l. Ac xinpej li cuakꞌ nak quincuikꞌib cuib. Quintaksi li cuukꞌ ut quin-oc chi tijoc chiru li Ka̱cuaꞌ lin Dios.

⁶ Ut quinye: —At Ka̱cuaꞌ, at inDios, sachso innaꞌleb ut ninxuta̱nac chixtaksinquil li cuiloba̱l cha̱cuu xban nak kꞌaxal numtajenak li kama̱usilal. At Ka̱cuaꞌ, xban nak kꞌaxal nabal li kama̱c chanchan nak ac xcuulac toj saꞌ choxa.

⁷ Chalen nak toj cuanqueb li kaxeꞌto̱nil yucuaꞌ toj anakcuan yo̱co chi ma̱cobc cha̱cuu. Xban li kama̱usilal, ut xban ajcuiꞌ lix ma̱usilaleb li karey ut eb laj tij, la̱o cokꞌaxtesi̱c saꞌ rukꞌeb li rey li jalan xtenamiteb. Cochapeꞌ ut cocꞌameꞌ chi najt saꞌ jalan tenamit. Cuan queꞌcamsi̱c riqꞌuin chꞌi̱chꞌ. Queꞌrelkꞌa li cꞌaꞌru cuan ke ut quicꞌuteꞌ kaxuta̱n toj chalen anakcuan.

⁸ Abanan anakcuan, at Ka̱cuaꞌ, at kaDios, la̱at xacuil xtokꞌoba̱l ku ut xoa̱col la̱o la̱ cualal a̱cꞌajol li joꞌ qꞌuial chic xocana. Xaqꞌue kanaꞌaj saꞌ li santil naꞌajej bar ma̱cꞌaꞌ na-oc ke. La̱at nacacutanobresi li kabe ut xoa̱qꞌue chi hila̱nc junpa̱t.

⁹ La̱o cuanco rubel xtakl lix reyeb laj Persia, abanan incꞌaꞌ xoa̱canab kajunes. Chiruheb li rey xacꞌut chiku lix nimal la̱ cuusilal ut xaqꞌue li kayuꞌam re nak ta̱ru̱k takayi̱b cuiꞌchic la̱ templo li quijuqꞌueꞌ. Ut la̱at xat-iloc ke arin Judá ut Jerusalén.

¹⁰ Abanan anakcuan, at Ka̱cuaꞌ, at kaDios, ¿Cꞌaꞌru ta̱ru̱k takaye chirix chixjunil aꞌin? La̱o xkakꞌet la̱ chakꞌrab,

¹¹ li caqꞌue reheb li profeta, li queꞌcꞌanjelac cha̱cuu. Eb aꞌan queꞌxye ke cꞌaꞌru caye saꞌ la̱ chakꞌrab. La̱at caye reheb li kaxeꞌto̱nil yucuaꞌ nak li naꞌajej li xiqueb cuiꞌ re chi cua̱nc, numtajenak chi ma̱usilal xban li incꞌaꞌ us li nequeꞌxba̱nu li tenamit li cuanqueb aran.

¹² La̱at caye nak incꞌaꞌ takasumubeb li karabin riqꞌuineb li ralal eb aꞌan chi moco li kalal teꞌsumla̱k riqꞌuineb lix rabin eb aꞌan. Ut caye ajcuiꞌ ke nak incꞌaꞌ tocua̱nk chi sum a̱tin riqꞌuineb chi moco takatenkꞌaheb re nak us teꞌe̱lk. Incꞌaꞌ takatenkꞌaheb re nak cauhako ut takatzaca li cha̱bil tzacae̱mk li ta̱e̱lk saꞌ li chꞌochꞌ ut re ajcuiꞌ nak li kalal kacꞌajol teꞌe̱chani̱nk re li naꞌajej aꞌin chi junaj cua.

¹³ Li raylal li xkacꞌul, aꞌan xban li kama̱usilal ut xban li kama̱c. Abanan la̱at incꞌaꞌ xoa̱qꞌue chixtojbal rix li kama̱c joꞌ kacꞌulub raj xcꞌulbal. Xacuy ban li kama̱c ut incꞌaꞌ xasach ku chi junaj cua.

¹⁴ ¿Ma toj yo̱ko ajcuiꞌ chixkꞌetbal la̱ chakꞌrab? Ut, ¿ma toj yo̱ko ajcuiꞌ chixjunajinquil kib riqꞌuineb li tenamit aꞌin li nequeꞌxba̱nu ma̱usilal? ¿Ma incꞌaꞌ ta biꞌ tatjoskꞌokꞌ saꞌ kabe̱n cui toj yo̱ko chixba̱nunquil li ma̱c? Ut, ¿ma incꞌaꞌ ta biꞌ ta̱ru̱k raj ta̱sach ku chi junaj cua chikajunilo?

¹⁵ At Ka̱cuaꞌ, at kaDios, la̱at li kaDios la̱o aj Israel. La̱at ti̱c la̱ chꞌo̱l. Joꞌcan nak toj yoꞌyo̱co la̱o anakcuan, li joꞌ qꞌuial chic xocoleꞌ. Ya̱l nak cuan li kama̱c cha̱cuu. Joꞌcan nak incꞌaꞌ naru nococuan chi sum a̱tin a̱cuiqꞌuin, chan laj Esdras nak quitijoc.