Esdras 8 - Li Santil hu

Aꞌan aꞌin xqꞌuialeb li queꞌco̱eb Jerusalén rochben laj Esdras

¹ Laj Esdras quixye: —Aꞌan aꞌin lix cꞌabaꞌeb li queꞌjolomin reheb li junju̱nk cabal ut li tzꞌi̱banbileb xcꞌabaꞌ. Aꞌaneb li queꞌel Babilonia cuochben la̱in saꞌ eb li cutan nak laj Artajerjes cuan chokꞌ rey.

² Laj Gersón xcomoneb li ralal xcꞌajol laj Finees; laj Daniel, xcomoneb li ralal xcꞌajol laj Itamar; laj Hatús, xcomoneb li ralal xcꞌajol laj David ut li ralal xcꞌajol laj Secanías;

³ laj Zacarías xcomoneb li ralal xcꞌajol laj Paros, aꞌan cuanqueb jun ciento riqꞌuin laje̱b roxcꞌa̱l (150).

⁴ Laj Elioenai, li ralal laj Zeraías xcomoneb li ralal xcꞌajol laj Pahat-moab, aꞌan cuanqueb cuib ciento (200).

⁵ Li ralal laj Jahaziel, xcomoneb li ralal xcꞌajol laj Secanías, aꞌan cuanqueb oxib ciento (300).

⁶ Laj Ebed ralal laj Jonatán xcomoneb li ralal xcꞌajol laj Adín, aꞌan cuanqueb laje̱b roxcꞌa̱l (50).

⁷ Laj Jesaías li ralal laj Atalías xcomoneb li ralal xcꞌajol laj Elam, aꞌan cuanqueb laje̱b xca̱cꞌa̱l (70).

⁸ Laj Zebadías li ralal laj Micael xcomoneb li ralal xcꞌajol laj Sefatías, aꞌan cuanqueb ca̱cꞌa̱l (80).

⁹ Laj Obadías li ralal laj Jehiel, xcomoneb li ralal xcꞌajol laj Joab, aꞌan cuanqueb cuib ciento riqꞌuin cuakxaklaju (218).

¹⁰ Li ralal laj Josifías, xcomoneb li ralal xcꞌajol laj Selomit, aꞌan cuanqueb jun ciento riqꞌuin oxcꞌa̱l (160).

¹¹ Laj Zacarías li ralal laj Bebai, xcomoneb li ralal xcꞌajol laj Bebai aꞌan cuanqueb cuakxakib xcaꞌcꞌa̱l (28).

¹² Laj Johanán li ralal laj Hacatán, xcomoneb li ralal xcꞌajol laj Azgad, aꞌan cuanqueb jun ciento riqꞌuin laje̱b (110).

¹³ Laj Elifelet, laj Jeiel ut laj Semaías, aꞌaneb li ralal xcꞌajol laj Adonicam, li queꞌcuan mokon. Aꞌan cuanqueb oxcꞌa̱l (60).

¹⁴ Laj Utai ut laj Zabud xcomoneb li ralal xcꞌajol laj Bigvai, aꞌan cuanqueb oxcꞌa̱l (60).

¹⁵ Aran kachꞌutub kib chire li nimaꞌ Ahava. Xocana aran oxib cutan cuochbeneb li xeꞌchal chicuix. Quin-oc xsiqꞌuinquil laj levita saꞌ xya̱nkeb ut ma̱ jun quintau.

¹⁶ Joꞌcan nak quinbokeb laj Eliezer, laj Ariel, laj Semaías, laj Elnatán, laj Jarib, laj Elnatán jun chic, laj Natán, laj Zacarías ut laj Mesulam. Eb li cui̱nk aꞌin, aꞌaneb laj cꞌamol be. Ut quinbokeb ajcuiꞌ laj Joiarib ut laj Elnatán. Aꞌaneb laj tzolonel.

¹⁷ Quintaklaheb riqꞌuin laj Iddo, li nataklan saꞌ li naꞌajej Casifia. Quinye reheb cꞌaꞌru teꞌxye re laj Iddo ut reheb ajcuiꞌ li rochben li nequeꞌcꞌanjelac saꞌ li templo li cuan saꞌ li naꞌajej Casifia. Quintaklaheb aran re nak teꞌxsicꞌ ani teꞌxic chi cꞌanjelac saꞌ lix templo li Ka̱cuaꞌ.

¹⁸ Ut xban nak li Dios yo̱ chi tenkꞌa̱nc ke, queꞌxtau chak laj Serebías re ta̱xic chi cꞌanjelac. Aꞌan jun cui̱nk cha̱bil xnaꞌleb xcomoneb li ralal xcꞌajol laj Mahli laj levita. Queꞌchal rochben li ralal ut li ras. Cuakxaklajuheb (18) chixjunileb.

¹⁹ Ut queꞌchal ajcuiꞌ laj Hasabías rochben laj Jesaías xcomoneb li ralal xcꞌajol laj Merari. Queꞌchal rochben li ralal ut li ras. Junmayeb (20) chixjunileb.

²⁰ Queꞌchal ajcuiꞌ cuib ciento riqꞌuin junmay (220) chi cꞌanjelac saꞌ li templo. Aꞌaneb li ralal xcꞌajol li queꞌxakaba̱c junxil xban laj David ut xbaneb li nequeꞌtaklan re nak eb aꞌan teꞌcꞌanjelak saꞌ li templo chixtenkꞌanquileb laj levita. Ut quitzꞌi̱ba̱c xcꞌabaꞌeb li junju̱nk.

²¹ Aran chire li nimaꞌ Ahava, la̱in quinye reheb nak to-ayuni̱k ut takacubsi kib chiru li Ka̱cuaꞌ. Takatzꞌa̱ma chiru nak aꞌan ta̱tenkꞌa̱nk ke ut ta̱ilok ke re nak ma̱cꞌaꞌ takacꞌul la̱o, chi moco li kacocꞌal chi moco li cꞌaꞌru cuan ke nak yo̱ko chi xic.

²² Quinxuta̱nac xtzꞌa̱manquil chiru li rey nak tixtaklaheb lix soldado ut lix carruaje chikacolbal chiruheb li xicꞌ nequeꞌiloc ke nak yo̱ko chi xic. Ac xinye re li rey chi joꞌcaꞌin: —Li Ka̱cuaꞌ li kaDios cuan riqꞌuineb li ani nequeꞌqꞌuehoc xlokꞌal ut aꞌan ta̱tenkꞌa̱nk reheb. Abanan najoskꞌoꞌ saꞌ xbe̱neb li ani natzꞌekta̱nan re, chanquin.

²³ Joꞌcan nak co-ayunic ut katzꞌa̱ma katenkꞌanquil chiru li Dios. Ut li Dios quirabi li katij.

²⁴ Ut quinsicꞌ ruheb cablaju laj tij. Aꞌaneb laj Serebías, ut laj Hasabías rochbeneb laje̱b chic laj tij.

²⁵ Ut quinbis chiruheb li plata, li oro ut li secꞌ li queꞌxqꞌue chokꞌ xmayej re li Ka̱cuaꞌ li kaDios li rey, ut eb laj qꞌuehol naꞌleb li rey, ut eb li nequeꞌcꞌanjelac chiru li rey, joꞌqueb ajcuiꞌ laj Israel li cuanqueb aran.

²⁶ Aꞌan aꞌin xqꞌuial li quinbis ut quinkꞌaxtesi reheb: jun xcaꞌcꞌa̱l mil riqꞌuin ca̱hib ciento riqꞌuin laje̱b roxcꞌa̱l (21,450) bis li plata, jun ciento li secꞌ plata, ut oxib mil riqꞌuin oxib ciento (3,300) bis li oro.

²⁷ Ut quinkꞌaxtesi ajcuiꞌ reheb junmay li secꞌ oro, cuaklaju libra ra̱lal, ut cuib li cha̱bil secꞌ bronce jiꞌbil chi us ut nalemtzꞌun, kꞌaxal terto xtzꞌak joꞌ li oro.

²⁸ Ut quinye reheb: —La̱ex kꞌaxtesinbilex saꞌ rukꞌ li Ka̱cuaꞌ. Joꞌcan ajcuiꞌ li secꞌ aꞌin ut li plata ut li oro. Qui-ala saꞌ xchꞌo̱leb li kaxeꞌto̱nil yucuaꞌ xqꞌuebal chokꞌ xmayejeb re li Ka̱cuaꞌ Dios.

²⁹ Te̱ril ut te̱xoc chi us re nak ma̱cꞌaꞌ teꞌxcꞌul chalen toj te̱bis chiruheb li nequeꞌtaklan saꞌ xbe̱neb laj judío ut chiruheb laj tij. Ut te̱bis chiruheb laj levita ut chiruheb li nequeꞌjolomin re li junju̱nk cabal li cuanqueb Jerusalén. Te̱bis aran saꞌ lix templo li Ka̱cuaꞌ, chanquin reheb.

³⁰ Eb laj tij ut eb laj levita queꞌxcꞌul li plata ut li oro ut li secꞌ li quibiseꞌ chiruheb re teꞌxcꞌam Jerusalén saꞌ lix templo li Ka̱cuaꞌ li kaDios.

³¹ Cablaju xbe li xbe̱n po co-el aran cuan cuiꞌ li nimaꞌ Ahava ut co̱o Jerusalén. Li Ka̱cuaꞌ cuan kiqꞌuin ut aꞌan quicoloc ke chiruheb li xicꞌ nequeꞌiloc ke joꞌqueb ajcuiꞌ chiruheb laj e̱lkꞌ li cuanqueb saꞌ li be li co̱o cuiꞌ.

³² Cocuulac Jerusalén ut aran cohilan oxib cutan.

³³ Ut saꞌ xca̱ li cutan kabis li oro, li plata ut li secꞌ li kacꞌam saꞌ rochoch li Dios ut kakꞌaxtesi re laj Meremot laj tij li ralal laj Urías. Rochben aꞌan cuan laj Eleazar ralal laj Finees, ut cuanqueb ajcuiꞌ rochbeneb laj levita, laj Jozabad ralal laj Jesúa ut laj Noadías ralal laj Binúi.

³⁴ Chiru ajcuiꞌ li cutan aꞌan quibiseꞌ ut qui-ajla̱c ut quikꞌaxtesi̱c ajcuiꞌ li queꞌxcꞌam. Ut quitzꞌi̱ba̱c retalil joꞌ qꞌuial qui-el chixjunil.

³⁵ Chirix aꞌan, chixjunileb li queꞌsukꞌi Jerusalén queꞌxmayeja li cꞌatbil xul chiru li Ka̱cuaꞌ, lix Dioseb laj Israel. Queꞌxmayeja cablaju li toro reheb li cablaju xte̱paleb laj Israel. Queꞌxmayeja ajcuiꞌ cuaklaju roꞌcꞌa̱l (96) li te̱lom carner ut cuuklaju xca̱cꞌa̱l (77) li cocꞌ carner ut queꞌxmayeja ajcuiꞌ cablaju li te̱lom chiba̱t re xpatzꞌbal xcuybal xma̱queb. Chixjunil aꞌin queꞌxcꞌat chiru li Ka̱cuaꞌ chokꞌ xmayejeb.

³⁶ Ut queꞌxkꞌaxtesi li chakꞌrab li quixqꞌue li rey reheb li cuanqueb saꞌ xcuanquil ut reheb ajcuiꞌ li nequeꞌtaklan saꞌ eb li tenamit li cuanqueb jun pacꞌal li nimaꞌ Éufrates. Ut eb aꞌan queꞌxtenkꞌaheb li tenamit ut queꞌoquen ajcuiꞌ chixyi̱banquil lix templo li Dios.