Esdras 7 - Li Santil hu

Li rey Artajerjes quixcanab chi xic Jerusalén laj Esdras

¹ Nak quicuan laj Artajerjes chokꞌ xreyeb laj Persia, quicuan jun li cui̱nk aj Esdras xcꞌabaꞌ. Aꞌan ralal laj Seraías. Ut laj Seraías, aꞌan ralal laj Azarías. Ut laj Azarías, aꞌan ralal laj Hilcías.

² Laj Hilcías, aꞌan ralal laj Salum. Laj Salum, aꞌan ralal laj Sadoc. Ut laj Sadoc, aꞌan ralal laj Ahitob.

³ Laj Ahitob, aꞌan ralal laj Amarías. Laj Amarías, aꞌan ralal laj Azarías. Ut laj Azarías, aꞌan ralal laj Meraiot.

⁴ Laj Meraiot, aꞌan ralal laj Zeraías. Laj Zeraías, aꞌan ralal laj Uzi. Ut laj Uzi, aꞌan ralal laj Buqui.

⁵ Laj Buqui, aꞌan ralal laj Abisúa. Laj Abisúa, aꞌan ralal laj Finees. Ut laj Finees, aꞌan ralal laj Eleazar. Laj Eleazar, aꞌan ralal laj Aarón, li xbe̱n aj tij.

⁶ Laj Esdras aꞌan tzolbil chi us riqꞌuin li chakꞌrab li quiqꞌueheꞌ re laj Moisés xban li Ka̱cuaꞌ lix Dioseb laj Israel. Ut xban nak li Ka̱cuaꞌ quitenkꞌan re laj Esdras, chixjunil li cꞌaꞌru quixtzꞌa̱ma chiru li rey, quiqꞌueheꞌ re. Laj Esdras qui-el Babilonia ut co̱ Jerusalén.

⁷ Ut nabaleb laj Israel queꞌco̱eb Jerusalén rochben nak ac yo̱ chic xcuuk chihab roquic chokꞌ rey laj Artajerjes. Saꞌ xya̱nkeb li queꞌsukꞌi cuanqueb laj tij, cuanqueb laj levita, cuanqueb laj bichanel, cuanqueb li nequeꞌcꞌacꞌalen saꞌ li oqueba̱l re li templo, ut cuanqueb ajcuiꞌ li nequeꞌcꞌanjelac saꞌ li templo.

⁸ O̱b po xcuuk chihab roquic chokꞌ rey laj Artajerjes nak laj Esdras quicuulac Jerusalén.

⁹ Laj Esdras qui-el Babilonia saꞌ li xbe̱n cutan re li xbe̱n po. Ut quicuulac Jerusalén saꞌ li xbe̱n cutan re li roꞌ po. Li Ka̱cuaꞌ cuan riqꞌuin ut aꞌan yo̱ chi tenkꞌa̱nc re.

¹⁰ Laj Esdras quixqꞌue xchꞌo̱l chixtzolbal ut chixba̱nunquil li naxye saꞌ li chakꞌrab li qꞌuebil xban li Ka̱cuaꞌ. Ut quixqꞌue ajcuiꞌ xchꞌo̱l chixchꞌolobanquil lix ya̱lal li tzꞌi̱banbil saꞌ li chakꞌrab reheb laj Israel.

¹¹ Aꞌan aj tij ut aj tzolonel ajcuiꞌ. Quixtzol rib chi us riqꞌuin li chakꞌrab, li quiqꞌueheꞌ reheb laj Israel xban li Ka̱cuaꞌ lix Dioseb. Joꞌcaꞌin tzꞌi̱banbil saꞌ li hu li quixtzꞌi̱ba li rey Artajerjes re laj Esdras nak toj ma̱jiꞌ naxic Jerusalén.

¹² —La̱in li rey Artajerjes, li kꞌaxal nim incuanquil chiruheb li jun chꞌol chic rey. Li hu aꞌin re laj Esdras laj tij, laj cꞌutul re li chakꞌrab li quiqꞌueheꞌ xban li Ka̱cuaꞌ Dios li cuan saꞌ choxa. Chicua̱nk taxak li tuktu̱quil usilal a̱cuiqꞌuin.

¹³ La̱in xinqꞌue jun li chakꞌrab nak chixjunileb laj Israel li cuanqueb rubel incuanquil, joꞌ eb laj tij ut eb laj levita, cui teꞌraj xic Jerusalén, naru nequeꞌxic cha̱cuix.

¹⁴ La̱in li rey, yo̱quin chi takla̱nc a̱cue joꞌqueb ajcuiꞌ li cuukub chi cui̱nk li nequeꞌqꞌuehoc naꞌleb. Tatxic chirilbal chanru cuanqueb aran Judá ut Jerusalén, ma yo̱queb chixba̱nunquil li cꞌaꞌru naxye saꞌ li chakꞌrab li qꞌuebil reheb xban li Ka̱cuaꞌ la̱ Dios. La̱at nacanau chi tzꞌakal cꞌaꞌru naxye saꞌ li chakꞌrab.

¹⁵ Ta̱cꞌam li oro ut li plata ut ta̱qꞌue re lix templo lix Dioseb laj Israel li cuan Jerusalén, li x-ala saꞌ kachꞌo̱l xqꞌuebal, la̱in ut eb laj qꞌuehol naꞌleb.

¹⁶ Ta̱cꞌam ajcuiꞌ chixjunil li plata ut li oro li joꞌ qꞌuial teꞌxchꞌutub li cuanqueb Babilonia. Ut ta̱cꞌam ajcuiꞌ li mayej li x-ala saꞌ xchꞌo̱leb xqꞌuebal eb laj tij ut eb laj Israel li cuanqueb saꞌ li tenamit aꞌan re xyi̱banquil lix templo li Dios aran Jerusalén.

¹⁷ Chiru li tumin aꞌan ta̱lokꞌ li toro, li carner ut li carner li toj sa̱jeb, joꞌ ajcuiꞌ li ru li acui̱mk ut li vino re teꞌxmayeja chiru li artal li cuan saꞌ lix templo li Ka̱cuaꞌ le̱ Dios aran Jerusalén.

¹⁸ La̱at ut eb laj tij jun chꞌol chic te̱ba̱nu li cꞌaꞌru te̱raj riqꞌuin li plata ut li oro li ta̱elaꞌa̱nk. Te̱ba̱nu joꞌ naraj li Ka̱cuaꞌ le̱ Dios.

¹⁹ Chixjunil li secꞌ li quikꞌaxtesi̱c a̱cue re xcꞌanjel li Dios saꞌ li templo aran Jerusalén, kꞌaxtesi re li Dios la̱at.

²⁰ Ut li cꞌaꞌak chic re ru li ta̱cꞌanjelak che̱ru aran saꞌ lix templo le̱ Dios, naru ta̱lokꞌ riqꞌuin lin tumin la̱in, chan li rey.

²¹ Anakcuan la̱in, li rey Artajerjes, yo̱quin xqꞌuebal li chakꞌrab reheb chixjunileb laj xocol tumin li cuanqueb jun pacꞌal li nimaꞌ Éufrates nak teꞌxqꞌue chi junpa̱t chixjunil li cꞌaꞌru ta̱patzꞌ la̱at, Esdras. La̱at aj tij ut nacanau chi us li chakꞌrab li qꞌuebil e̱re xban li Dios cuan saꞌ choxa.

²² Naru teꞌxqꞌue oxib mil riqꞌuin oxib ciento (3,300) kilos li plata. Naru teꞌxqꞌue cuib xcaꞌcꞌa̱l mil (22,000) bisoc li trigo, ut cuib mil riqꞌuin cuib ciento (2,200) botella li vino. Naru teꞌxqꞌue cuib mil riqꞌuin cuib ciento (2,200) botella li aceite ut li atzꞌam ta̱qꞌuehekꞌ chi incꞌaꞌ bisbil.

²³ Chixjunil li ta̱raj li Dios, li cuan saꞌ choxa re lix templo, tento xqꞌuebal re nak incꞌaꞌ ta̱cha̱lk raylal saꞌ xbe̱neb li cuanqueb rubel incuanquil chi moco saꞌ xbe̱neb li cualal incꞌajol.

²⁴ Ut ninye ajcuiꞌ a̱cue nak incꞌaꞌ ta̱patzꞌ xtojeb laj tij chi moco eb laj levita, chi moco eb laj bichanel, chi moco eb li nequeꞌcꞌacꞌalen saꞌ li oqueba̱l re li templo, chi moco riqꞌuineb li nequeꞌcꞌanjelac saꞌ li templo. Incꞌaꞌ ta̱patzꞌ xtojeb.

²⁵ La̱at, Esdras, joꞌ naxcꞌut cha̱cuu li Ka̱cuaꞌ la̱ Dios, ta̱xakab aj rakol a̱tin ut ta̱xakab aj cꞌamol be re nak aꞌaneb chic teꞌtakla̱nk saꞌ xbe̱neb chixjunileb li tenamit li cuanqueb jun pacꞌal li nimaꞌ Éufrates. Ta̱cua̱nk xcuanquileb saꞌ xbe̱neb chixjunileb li nequeꞌxnau li cꞌaꞌru naxye saꞌ li chakꞌrab li quiqꞌueheꞌ reheb xban li Ka̱cuaꞌ la̱ Dios. Ut eb li incꞌaꞌ nequeꞌxnau li chakꞌrab, la̱at ta̱cꞌut chiruheb.

²⁶ Ut li ani incꞌaꞌ tixba̱nu chi tzꞌakal li naxye saꞌ lix chakꞌrab li Ka̱cuaꞌ la̱ Dios, ut li chakꞌrab li xinqꞌue la̱in, chirakekꞌ a̱tin saꞌ xbe̱n li jun aꞌan chi junpa̱t. Ut chiqꞌuehekꞌ chixtojbal rix lix ma̱c. Ta̱camsi̱k, malaj ta̱isi̱k saꞌ li naꞌajej cuan cuiꞌ, malaj tixtoj rix lix ma̱c riqꞌuin tumin, malaj ut ta̱qꞌuehekꞌ saꞌ tzꞌalam, chan li rey.

²⁷ Laj Esdras quitijoc ut quixye chi joꞌcaꞌin: —Lokꞌoninbilak taxak li Ka̱cuaꞌ lix Dioseb li kaxeꞌto̱nil yucuaꞌ, xban nak aꞌan xcꞌutuc chiru li rey nak tixqꞌue xlokꞌal li templo, li cuan Jerusalén, li nakalokꞌoni cuiꞌ li Ka̱cuaꞌ li kaDios.

²⁸ Nimanbil taxak ru li Ka̱cuaꞌ li qui-osobtesin cue chiru li rey, joꞌ ajcuiꞌ chiruheb laj qꞌuehol naꞌleb ut chiruheb ajcuiꞌ chixjunileb li nequeꞌcꞌanjelac chiru li rey. Xban nak li Ka̱cuaꞌ cuan cuiqꞌuin ut quixqꞌue xcacuil inchꞌo̱l, la̱in quinsicꞌ ruheb li teꞌcꞌamok be chiruheb laj Israel re nak teꞌxic Jerusalén cuochben, chan laj Esdras.