Esdras 6 - Li Santil hu

¹ Ut li rey Darío quixtakla xsicꞌbal saꞌ li hu li xocbil saꞌ li palacio aran Babilonia.

² Quitauman jun li botbil hu aran Acmeta saꞌ li palacio li cuan Media. Aꞌan aꞌin li tzꞌi̱banbil chiru li hu. Chijultica̱k aꞌin:

³ —Yo̱ xbe̱n chihab roquic chokꞌ rey laj Ciro nak quixqꞌue li chakꞌrab aꞌin chirix lix templo li Ka̱cuaꞌ Dios li quicuan Jerusalén: Teꞌxqꞌue li cimiento re lix templo li Dios, ut teꞌxyi̱b cuiꞌchic re nak teꞌmayejak aran. Cuukub xcaꞌcꞌa̱l metro xteram li tzꞌac teꞌxqꞌue nak teꞌxyi̱b ut cuukub xcaꞌcꞌa̱l metro li ru. Teꞌxyi̱b li tzꞌac chi cha̱bil re nak cau ta̱cana̱k.

⁴ Nak teꞌxyi̱b li tzꞌac teꞌxqꞌue oxib tzol li ni̱nki pec ut jun tzol li cheꞌ toj acꞌ. Ut li rey, aꞌan li ta̱tojok re chixjunil li ta̱sachma̱nk.

⁵ Ut li secꞌ oro ut li secꞌ plata li quirisi chak li rey Nabucodonosor saꞌ lix templo li Ka̱cuaꞌ aran Jerusalén li quixcꞌam Babilonia, aꞌan ta̱kꞌaxtesi̱k reheb laj judío. Ta̱cꞌamekꞌ cuiꞌchic Jerusalén ut ta̱qꞌuehekꞌ saꞌ lix naꞌajeb saꞌ lix templo li Dios, chan saꞌ li hu.

⁶ Ut anakcuan, at Tatnai, la̱at li nacattaklan saꞌ xbe̱neb li tenamit li cuan jun pacꞌal li nimaꞌ Éufrates, joꞌ ajcuiꞌ laj Setar-boznai ut eb le̱ rochben, la̱in tinye e̱re nak tex-e̱lk aran Jerusalén.

⁷ Canabomak li cui̱nk li nataklan saꞌ xbe̱neb joꞌqueb ajcuiꞌ li nequeꞌcꞌamoc be saꞌ xya̱nkeb riqꞌuin li cꞌanjel li yo̱queb chixba̱nunquil. Canabomakeb re nak teꞌxyi̱b lix templo li Dios saꞌ lix naꞌaj li quicuan cuiꞌ junxil.

⁸ La̱in xinqꞌuehoc re li chakꞌrab aꞌin chanru te̱ba̱nu nak te̱tenkꞌaheb li nequeꞌcꞌamoc be saꞌ xya̱nkeb laj judío re xyi̱banquil lix templo li Dios. Li toj li nequeꞌxqꞌue chak aran jun pacꞌal li nimaꞌ chokꞌ re li rey, aꞌan li ta̱qꞌuema̱nk rajlal reheb li cui̱nk aꞌan re xtenkꞌanquileb re nak incꞌaꞌ ta̱xakli̱k li cꞌanjel.

⁹ Rajlal ta̱qꞌuema̱nk reheb laj tij li cuanqueb Jerusalén li cꞌaꞌru ta̱cꞌanjelak chiruheb joꞌ li toro, li carner, ut li carner li toj sa̱jeb re xcꞌatbal chokꞌ xmayej chiru li Ka̱cuaꞌ Dios li cuan saꞌ choxa, joꞌ ajcuiꞌ li trigo, li atzꞌam, li vino malaj li aceite. Ta̱qꞌuehekꞌ reheb chi cuulaj cuulaj chi incꞌaꞌ ta̱paltok.

¹⁰ Ta̱qꞌuehekꞌ reheb re nak ta̱ru̱k teꞌxqꞌue li mayej li ta̱cuulak chiru li Dios li cuan saꞌ choxa ut teꞌtijok chicuix la̱in li rey ut chirixeb ajcuiꞌ li cualal incꞌajol.

¹¹ La̱in xinqꞌue li chakꞌrab aꞌin: Li ani ta̱kꞌetok re li chakꞌrab li xinqꞌue, ta̱isi̱k jun li tzꞌamba re li rochoch ut chiru ajcuiꞌ li cheꞌ aꞌan ta̱camsi̱k. Ut li rochoch ta̱cana̱k chi jun tu̱b chi mul.

¹² Aꞌ taxak li Dios, li quisicꞌoc ru Jerusalén chokꞌ xnaꞌaj, aꞌan taxak chisachok ruheb li rey malaj ut li tenamit li teꞌraj chꞌiꞌchꞌiꞌi̱nc malaj ut teꞌraj xsachbal ru lix templo li Dios. La̱in, li rey Darío, xinqꞌue li chakꞌrab aꞌin. Ut chi-uxma̱nk chi junpa̱t joꞌ xinye.—

Queꞌrakeꞌ xyi̱banquil li templo ut queꞌxkꞌaxtesi saꞌ rukꞌ li Dios

¹³ Joꞌcan nak laj Tatnai li nataklan saꞌ eb li tenamit li cuanqueb jun pacꞌal li nimaꞌ Éufrates, ut laj Setar-boznai joꞌqueb ajcuiꞌ li rochben queꞌxba̱nu chi tzꞌakal joꞌ quixye li rey Darío.

¹⁴ Ut eb laj cꞌamol be saꞌ xya̱nkeb laj judío yo̱queb chi cablac ut yo̱ chi e̱lc chi us lix cꞌanjeleb joꞌ quiyeheꞌ reheb xbaneb li profeta Hageo ut li profeta Zacarías li ralal laj Iddo. Queꞌcablac ut queꞌxchoy lix cꞌanjeleb joꞌ quixye li Ka̱cuaꞌ lix Dioseb laj Israel ut joꞌ queꞌxye lix reyeb laj Persia, laj Ciro, laj Darío ut laj Artajerjes.

¹⁵ Oxib xbe li po Adar nak queꞌxchoy xyi̱banquil lix templo li Dios. Ac yo̱ chic xcuak chihab roquic chokꞌ rey laj Darío aran Persia.

¹⁶ Chixjunileb laj Israel ut eb laj tij joꞌ eb ajcuiꞌ laj levita li queꞌsukꞌi cuiꞌchic Jerusalén queꞌxkꞌaxtesi re li Dios li templo li queꞌxyi̱b. Queꞌxninkꞌei chi cꞌajoꞌ xsahil xchꞌo̱leb.

¹⁷ Nak queꞌxninkꞌei ru lix templo li Dios, queꞌxmayeja jun ciento li toro, cuib ciento li carner, ut ca̱hib ciento li carner li toj sa̱jeb. Ut queꞌxmayeja ajcuiꞌ cablaju li te̱lom chiba̱t re xtzꞌa̱manquil xcuybal xma̱queb chixjunileb laj Israel. Queꞌxmayeja li cablaju chi chiba̱t xban nak cablaju xte̱paleb li ralal xcꞌajol laj Israel.

¹⁸ Eb laj tij queꞌqꞌueheꞌ saꞌ xcꞌanjeleb chi xjunju̱nkaleb. Joꞌcan ajcuiꞌ laj levita. Ac xcꞌanjel xcꞌanjel li junju̱nk queꞌqꞌueheꞌ re teꞌcꞌanjelak chiru li Dios joꞌ tzꞌi̱banbil retalil saꞌ li chakꞌrab xban laj Moisés.

¹⁹ Chixjunileb laj Israel li queꞌsukꞌi cuiꞌchic Jerusalén queꞌxba̱nu ajcuiꞌ li ninkꞌe Pascua saꞌ li ca̱laju xbe li xbe̱n po re li chihab.

²⁰ Eb laj tij ut eb laj levita queꞌxcauresi ribeb re xba̱nunquil li ninkꞌe Pascua, joꞌ cꞌaynakeb xba̱nunquil. Eb laj levita queꞌxmayeja li carner saꞌ xcꞌabaꞌeb chixjunileb li queꞌsukꞌi cuiꞌchic Jerusalén. Queꞌxmayeja ajcuiꞌ saꞌ xcꞌabaꞌeb laj tij jun chꞌol chic, ut saꞌ xcꞌabaꞌeb ajcuiꞌ eb aꞌan.

²¹ Queꞌcuaꞌac chixjunileb laj Israel, eb li queꞌchapeꞌ ut queꞌcꞌameꞌ saꞌ jalan tenamit li queꞌsukꞌi cuiꞌchic Jerusalén. Queꞌcuaꞌac ajcuiꞌ chixjunileb li ma̱cuaꞌeb aj judío li queꞌxcanab xba̱nunquil li ma̱usilal ut queꞌoc saꞌ xya̱nkeb laj judío ut queꞌxqꞌue xlokꞌal li Ka̱cuaꞌ, lix Dioseb laj Israel.

²² Cuukub cutan queꞌninkꞌei̱c chi sa saꞌ xchꞌo̱leb ut queꞌxcuaꞌ li caxlan cua li ma̱cꞌaꞌ xchꞌamal, joꞌ nequeꞌxcuaꞌ saꞌ li ninkꞌe aꞌan. Cꞌajoꞌ xsahil xchꞌo̱leb xban nak li Ka̱cuaꞌ quixjal xcꞌaꞌux lix reyeb laj Persia ut aꞌan quixtenkꞌaheb chixyi̱banquil lix templo li Ka̱cuaꞌ, lix Dioseb laj Israel.