Esdras 5 - Li Santil hu

Queꞌoc cuiꞌchic xyi̱banquil li templo

¹ Li profeta Hageo ut li profeta Zacarías li ralal laj Iddo queꞌxye reheb laj judío li cuanqueb Judá joꞌqueb ajcuiꞌ li cuanqueb Jerusalén li cꞌaꞌru quiyeheꞌ reheb xban li Ka̱cuaꞌ, lix Dioseb laj Israel li natenkꞌan reheb.

² Ut laj Zorobabel li ralal laj Salatiel rochben laj Jesúa li ralal laj Josadac, queꞌoc cuiꞌchic chixyi̱banquil lix templo li Ka̱cuaꞌ aran Jerusalén. Ut eb lix profeta li Ka̱cuaꞌ Dios cuanqueb rochbeneb ut yo̱queb chixtenkꞌanquileb.

³ Saꞌ eb li cutan aꞌan laj Tatnai li nataklan saꞌ li tenamit li cuan jun pacꞌal li nimaꞌ Éufrates quicuulac riqꞌuineb. Queꞌcuulac ajcuiꞌ riqꞌuineb laj Setar-boznai joꞌqueb ajcuiꞌ li rochben. Ut queꞌxye reheb: —¿Ani xqꞌuehoc e̱lese̱ns nak xex-oc cuiꞌchic chixyi̱banquil li cab aꞌin ut li tzꞌac? chanqueb.

⁴ Ut queꞌxpatzꞌ ajcuiꞌ: —¿Ani xcꞌabaꞌeb li yo̱queb chi yi̱ba̱nc re?—

⁵ Abanan li Ka̱cuaꞌ Dios yo̱ chi iloc reheb li yo̱queb chi cꞌamoc be chiruheb laj judío ut incꞌaꞌ quixakaba̱c li cꞌanjel. Quitakla̱c jun li hu riqꞌuin li rey Darío re nak tixsume chak ut tixye reheb ma teꞌxcanab li cꞌanjel malaj ut incꞌaꞌ.

⁶ Joꞌcaꞌin naxye li hu li queꞌxtakla riqꞌuin li rey Darío laj Tatnai ut laj Setar-boznai rochbeneb li nequeꞌtaklan saꞌ li naꞌajej li cuan jun pacꞌal li nimaꞌ Éufrates saꞌ li oeste li na-oc cuiꞌ li sakꞌe.

⁷ Aꞌan aꞌin li tzꞌi̱banbil saꞌ li hu: —At rey Darío, nakatakla xsahil a̱chꞌo̱l.

⁸ Nakaj xyebal a̱cue nak xocuulac saꞌ li naꞌajej Judá chirilbal lix templo li nimajcual Dios li yo̱queb chixyi̱banquil. Yo̱queb chixyi̱banquil li templo riqꞌuin ni̱nki pec. Li cheꞌ ac qꞌuebil saꞌ xnaꞌaj saꞌ li tzꞌac. Yo̱queb chixse̱banquil ribeb ut li cꞌanjel us yo̱ chi e̱lc chiruheb.

⁹ Xkapatzꞌ reheb laj cꞌamol be li yo̱queb chi jolomi̱nc re li cꞌanjel ani xqꞌuehoc xlese̱nseb chixyi̱banquil li cab ut li tzꞌac.

¹⁰ Xkapatzꞌ ajcuiꞌ ani xcꞌabaꞌeb re nak totzꞌi̱bak a̱cuiqꞌuin, at rey, ut takaye a̱cue aniheb li yo̱queb chi jolomi̱nc re li cꞌanjel.

¹¹ Eb aꞌan queꞌxye ke chi joꞌcaꞌin, “La̱o aj cꞌanjel chiru li Dios li kꞌaxal nim xcuanquil joꞌ saꞌ choxa joꞌ saꞌ ruchichꞌochꞌ. Yo̱co cuiꞌchic chixyi̱banquil li templo li quixakaba̱c najter xban jun lix nimal ru rey li quicuan Israel.”

¹² Ut queꞌxye ajcuiꞌ, “Eb li kaxeꞌto̱nil yucuaꞌ queꞌxchikꞌ xjoskꞌil li Dios li cuan saꞌ choxa. Joꞌcan nak li Dios quixkꞌaxtesiheb saꞌ rukꞌ laj Nabucodonosor laj Caldea lix reyeb laj Babilonia. Li rey aꞌan quixjucꞌ li templo ut quixchapeb ut quixcꞌameb Babilonia li kaxeꞌto̱nil yucuaꞌ.

¹³ Abanan yo̱ chic xbe̱n chihab roquic chokꞌ rey aran Babilonia laj Ciro nak quixqꞌue cuiꞌchic kalese̱ns chixyi̱banquil lix templo li Dios,” chanqueb.

¹⁴ Ut xeꞌxye ajcuiꞌ nak li rey Ciro quirisi saꞌ xnaꞌajeb lix dioseb laj Babilonia chixjunil li secꞌ oro ut plata li quixxoc chak laj Nabucodonosor saꞌ lix templo li Ka̱cuaꞌ aran Jerusalén. Quixkꞌaxtesiheb li secꞌ re laj Sesbasar li nataklan saꞌ xbe̱neb laj Judá.

¹⁵ Ut quixye re, “Cꞌam li secꞌ aꞌin ut tatxic Jerusalén bar quicuan cuiꞌ li templo. Ut te̱yi̱b cuiꞌchic li templo saꞌ lix naꞌaj li quicuan cuiꞌ,” chan laj Ciro.

¹⁶ Joꞌcan nak quicꞌulun laj Sesbasar ut quixqꞌue li cimiento re lix templo li Dios li cuan Jerusalén ut queꞌxtiquib xyi̱banquil li templo. Ut chalen anakcuan toj ma̱jiꞌ ajcuiꞌ nayaloꞌ.

¹⁷ Joꞌcan nak cui nacacuaj xba̱nunquil aꞌin, at rey, nakatzꞌa̱ma cha̱cuu nak ta̱sicꞌ saꞌ li hu li cuan saꞌ li palacio aran Babilonia. Ta̱tzꞌil a̱tin chirixeb re rilbal ma ya̱l nak li rey Ciro quiqꞌuehoc xlese̱nseb chixyi̱banquil lix templo li Dios aran Jerusalén. Ut chaba̱nu usilal, chatakla resil li cꞌaꞌru ta̱cuaj takaba̱nu, chanqueb.