Esdras 10 - Li Santil hu

Quilajeꞌrisi saꞌ lix tenamiteb chixjunileb li jalaneb xtenamit li queꞌsumla cuiꞌ

¹ Nak yo̱ chi tijoc laj Esdras, cuikꞌcuo chiru lix templo li Dios. Yo̱ chi ya̱bac ut yo̱ chixpatzꞌbal xcuybal xma̱queb li tenamit. Queꞌcuulac riqꞌuin jun chꞌu̱taleb laj Israel, joꞌ cui̱nk, joꞌ ixk, joꞌ cocꞌal. Yo̱queb chi ya̱bac chi cꞌajoꞌ xrahil xchꞌo̱leb.

² Ut laj Secanías li ralal laj Jehiel xcomoneb laj Elam quia̱tinac ut quixye re laj Esdras: —La̱o xoma̱cob chiru li kaDios xban nak xosumla riqꞌuineb li ixk li jalan xtenamiteb. Abanan toj naru teꞌcolekꞌ laj Israel.

³ Anakcuan la̱o takaba̱nu jun li contrato riqꞌuin li Dios. Takacanabeb li ixk aꞌan rochbeneb li kacocꞌal li cuan riqꞌuineb. Takaba̱nu joꞌ ta̱cuaj la̱at joꞌqueb ajcuiꞌ li nequeꞌxxucua ru li naxye li Dios. Chi-uxma̱nk taxak joꞌ tzꞌi̱banbil saꞌ li chakꞌrab.

⁴ Xaklin, at Esdras, xban nak saꞌ a̱be̱n tenebanbil xba̱nunquil aꞌin ut la̱o tatkatenkꞌa. Cacuubresi a̱chꞌo̱l ut ba̱nu li tento xba̱nunquil, chanqueb.

⁵ Joꞌcan nak laj Esdras quixakli ut quixye reheb li xbe̱nil aj tij ut eb laj levita, joꞌqueb ajcuiꞌ chixjunileb laj Israel nak riqꞌuin juramento teꞌxye ma teꞌxba̱nu joꞌ queꞌxye. Ut eb aꞌan queꞌxba̱nu li juramento ut queꞌxsume xba̱nunquil li cꞌaꞌru queꞌxye.

⁶ Laj Esdras qui-el chiru lix templo li Dios ut co̱ saꞌ lix cuariba̱l laj Johanán li ralal laj Eliasib. Nak cuan aran incꞌaꞌ quicuaꞌac chi moco qui-ucꞌac xban nak cꞌajoꞌ xrahil xchꞌo̱l xban li ma̱usilal li queꞌxba̱nu laj Israel li queꞌsukꞌi cuiꞌchic Jerusalén.

⁷ Quixtakla xchꞌutubanquileb aran Jerusalén chixjunileb li cuanqueb Judá joꞌqueb ajcuiꞌ li cuanqueb Jerusalén.

⁸ Eb li cuanqueb saꞌ xcuanquil ut eb li nequeꞌcꞌamoc be saꞌ xya̱nkeb laj judío queꞌxcꞌu̱b ru nak li ani incꞌaꞌ ta̱cuulak chiru oxib cutan, ta̱isi̱k chiru chixjunil li cꞌaꞌru cuan re ut ta̱isi̱k ajcuiꞌ aꞌan saꞌ xya̱nkeb laj Israel li queꞌsukꞌi Jerusalén.

⁹ Joꞌcan nak chiru li oxib cutan chixjunileb li cui̱nk xcomoneb laj Judá ut laj Benjamín queꞌxchꞌutub ribeb aran Jerusalén saꞌ li junmay xbe li xbele po re li chihab aꞌan. Ut chixjunileb queꞌcꞌojla saꞌ li neba̱l re lix templo li Dios. Nequeꞌsicsot xbaneb xxiu riqꞌuin li ta̱cꞌulma̱nk ut xban ajcuiꞌ li cacuil hab li quichal saꞌ xbe̱neb.

¹⁰ Qui-oc chi a̱tinac laj Esdras laj tij ut quixye reheb: —La̱ex xexma̱cob xban nak xecꞌam chokꞌ e̱rixakil li ixk jalan xtenamiteb. Joꞌcan nak xnumta le̱ ma̱c la̱ex aj Israel.

¹¹ Anakcuan ut qꞌuehomak xlokꞌal li Ka̱cuaꞌ lix Dioseb le̱ naꞌ e̱yucuaꞌ. Cheba̱nu joꞌ naraj li Ka̱cuaꞌ. Isihomak e̱rib saꞌ xya̱nkeb li jalaneb xtenamit ut jachomak e̱rib riqꞌuineb li ixk aꞌan, chan.

¹² Queꞌchakꞌoc chixjunileb li chꞌutchꞌu̱queb aran ut queꞌxye chi cau xya̱b xcuxeb: —Takaba̱nu joꞌ xaye la̱at.

¹³ Abanan kꞌaxal nabal li tenamit ut cau li hab. Incꞌaꞌ naru cua̱nko chirix cab chiru li hab chi moco ta̱ru̱k takacꞌu̱b ru chiru jun malaj cuib cutan xban nak nabalo li xoma̱cob riqꞌuin xba̱nunquil li ma̱c aꞌan.

¹⁴ Naru teꞌcana̱k li nequeꞌtaklan saꞌ kabe̱n chi a̱tinac chikix la̱o li joꞌ qꞌuialo cuanco arin. Ut li ani queꞌxcꞌam chokꞌ rixakileb li ixk li jalan xtenamiteb naru nequeꞌchal jokꞌe teꞌyehekꞌ reheb nak teꞌcha̱lk. Teꞌcha̱lk li cuanqueb saꞌ li junju̱nk chi tenamit rochbeneb laj rakol a̱tin ut eb li nequeꞌtaklan saꞌ xbe̱neb. Takaba̱nu chi joꞌcaꞌin re nak ta̱e̱lk xjoskꞌil li Dios saꞌ kabe̱n, chanqueb.

¹⁵ Laj Jonatán li ralal laj Asael ut laj Jahazías li ralal laj Ticva, ut cuib reheb laj levita, laj Mesulam ut laj Sabetai, incꞌaꞌ queꞌxcꞌul xchꞌo̱leb li cꞌaꞌru queꞌxye li jun chꞌol chic. Caꞌaj cuiꞌ eb aꞌan li incꞌaꞌ queꞌxcꞌul xchꞌo̱leb.

¹⁶ Qui-uxman joꞌ queꞌxye li tenamit. Laj Esdras, laj tij quixsiqꞌueb ru li cui̱nk li teꞌtenkꞌa̱nk re. Aꞌaneb li nequeꞌjolomin re li junju̱nk cabal. Quixbokeb xcꞌabaꞌ chixjunju̱nkaleb. Saꞌ li xbe̱n cutan re li xlaje po queꞌxtiquib tzꞌiloc a̱tin chirixeb li tenamit.

¹⁷ Ut saꞌ li xbe̱n cutan re li xbe̱n po queꞌrakeꞌ chi tzꞌiloc a̱tin chirixeb chixjunileb li queꞌxcꞌam rixakileb jalaneb xtenamit.

¹⁸ Aꞌaneb aꞌin li ralal xcꞌajoleb laj tij li queꞌxsicꞌ rixakileb saꞌ xya̱nkeb li jalaneb xtenamit: xcomoneb li ralal laj Jesúa, ralal laj Josadac, ut xcomoneb li ri̱tzꞌin, aꞌaneb laj Maasías, laj Eliezer, laj Jarib ut laj Gedalías.

¹⁹ Ut queꞌxqꞌue li rukꞌ chi ribileb rib re xcꞌutbal nak teꞌxba̱nu li cꞌaꞌru queꞌxye. Ut queꞌxye chi tzꞌakal nak teꞌxcanab li rixakil ut teꞌxmayeja jun li carner re xtzꞌa̱manquil xcuybal xma̱queb.

²⁰ Xcomoneb li ralal xcꞌajol laj Imer, aꞌaneb laj Hanani ut laj Zebadías.

²¹ Xcomoneb li ralal xcꞌajol laj Harim, aꞌaneb laj Maasías, laj Elías, laj Semaías, laj Jehiel, ut laj Uzías.

²² Xcomoneb li ralal xcꞌajol laj Pasur, aꞌaneb laj Elioenai, laj Maasías, laj Ismael, laj Natanael, laj Jozabad ut laj Elasa.

²³ Xcomoneb li ralal xcꞌajol laj levitas, aꞌaneb laj Jozabad, laj Simei, laj Kelaía (aꞌan laj Kelita), laj Petaías, laj Judá ut laj Eliezer.

²⁴ Xcomoneb laj bichanel, aꞌan laj Eliasib; xcomoneb li nequeꞌcꞌacꞌalen saꞌ li oqueba̱l re li templo, aꞌaneb laj Salum, laj Telem ut laj Uri.

²⁵ Eb laj Israel (li incꞌaꞌ queꞌcꞌanjelac saꞌ li templo), aꞌaneb aꞌin: xcomoneb li ralal xcꞌajol laj Paros, aꞌaneb laj Ramía, laj Jezías, laj Malquías, laj Mijamín, laj Eleazar, laj Malquías ut laj Benaía.

²⁶ Xcomoneb li ralal xcꞌajol laj Elam, aꞌaneb aꞌin: laj Matanías, laj Zacarías, laj Jehiel, laj Abdi, laj Jeremot ut laj Elías.

²⁷ Xcomoneb li ralal xcꞌajol laj Zatu, aꞌaneb aꞌin: laj Elioenai, laj Eliasib, laj Matanías, laj Jeremot, laj Zabad, ut laj Aziza.

²⁸ Xcomoneb li ralal xcꞌajol laj Bebai, aꞌaneb aꞌin: laj Johanán, laj Hananías, laj Zabai ut laj Atlai.

²⁹ Xcomoneb li ralal xcꞌajol laj Bani, aꞌaneb aꞌin: laj Mesulam, laj Maluc, laj Adaía, laj Jasub, laj Seal ut laj Ramot.

³⁰ Xcomoneb li ralal xcꞌajol laj Pahat-moab, aꞌaneb aꞌin: laj Adna, laj Quelal, laj Benaía, laj Maasías, laj Matanías, laj Bezaleel, laj Binúi, ut laj Manasés.

³¹ Xcomoneb li ralal xcꞌajol laj Harim, aꞌaneb aꞌin: laj Eliezer, laj Isías, laj Malquías, laj Semaías, laj Simeón,

³² laj Benjamín, laj Maluc, ut laj Semarías.

³³ Xcomoneb li ralal xcꞌajol laj Hasum, aꞌaneb aꞌin: laj Matenai, laj Matata, laj Zabad, laj Elifelet, laj Jeremai, laj Manasés ut laj Simei.

³⁴ Xcomoneb li ralal xcꞌajol laj Bani, aꞌaneb aꞌin: laj Madai, laj Amram, ut laj Uel,

³⁵ laj Benaía, laj Bedías, laj Quelúhi,

³⁶ laj Vanías, laj Meremot, laj Eliasib,

³⁷ laj Matanías, laj Matenai, laj Jaasai,

³⁸ laj Bani, laj Binúi, laj Simei,

³⁹ laj Selemías, laj Natán, laj Adaía,

⁴⁰ laj Macnadebai, laj Sasai, laj Sarai,

⁴¹ laj Azareel, laj Selemías, laj Semarías,

⁴² laj Salum, laj Amarías, ut laj José.

⁴³ Ut xcomoneb li ralal xcꞌajol laj Nebo, aꞌaneb aꞌin: laj Jeiel, laj Matatías, laj Zabad, laj Zebina, laj Jadau, laj Joel ut laj Benaía.

⁴⁴ Chixjunileb aꞌan queꞌxcꞌam rixakileb jalaneb xtenamit. Abanan queꞌxcanab li rixakileb rochbeneb lix cocꞌal.