Esdras 1 - Li Santil hu

Li rey Ciro quixcanabeb chi sukꞌi̱c saꞌ xtenamiteb laj Israel

¹ Yo̱ xbe̱n chihab roquic chokꞌ rey aran Persia laj Ciro nak quicꞌulman li cꞌaꞌru quixye li profeta Jeremías joꞌ quiyeheꞌ re xban li Ka̱cuaꞌ Dios. Li Ka̱cuaꞌ quixtochꞌ xchꞌo̱l li rey Ciro nak tixtakla li resil aꞌin saꞌ chixjunil li tenamit li cuanqueb rubel xcuanquil. Ut quixtakla li resil riqꞌuin a̱tin ut chi tzꞌi̱banbil.

² Aꞌan aꞌin li resil li quixtakla: —Joꞌcaꞌin naxye laj Ciro lix reyeb laj Persia: Li Ka̱cuaꞌ Dios li cuan saꞌ choxa xqꞌue rubel incuanquil chixjunileb li tenamit li cuanqueb saꞌ ruchichꞌochꞌ. Ut xqꞌue ajcuiꞌ saꞌ inbe̱n xyi̱banquil li templo aran Jerusalén xcue̱nt Judá.

³ Joꞌcan nak cui la̱ex xcomonex lix tenamit li Dios, ayukex saꞌ li tenamit Jerusalén xcue̱nt Judá ut aran te̱yi̱b li rochoch li Ka̱cuaꞌ, lix Dioseb laj Israel. Aꞌan li tzꞌakal Dios li nequeꞌxlokꞌoni aran Jerusalén. Ut aꞌ taxak li Ka̱cuaꞌ chicua̱nk e̱riqꞌuin.

⁴ Ut li joꞌ qꞌuial chic teꞌcana̱k cheꞌxtenkꞌaheb li xiqueb re chi cablac riqꞌuin xqꞌuebal li plata, li oro, ut li cꞌaꞌak re ru ta̱cꞌanjelak chiruheb. Teꞌxqꞌue li queto̱mk ut teꞌxqꞌue lix mayejeb li joꞌ qꞌuial ta̱ala̱k saꞌ xchꞌo̱leb xqꞌuebal re lix templo li Ka̱cuaꞌ Dios aran Jerusalén.—

⁵ Ut li Ka̱cuaꞌ Dios quixtochꞌ lix chꞌo̱leb li nequeꞌcꞌamoc be saꞌ xya̱nkeb li ralal xcꞌajol laj Judá ut laj Benjamín joꞌqueb ajcuiꞌ laj tij ut eb laj levita. Ut queꞌxcauresi ribeb chi xic Jerusalén re xyi̱banquil lix templo li Ka̱cuaꞌ.

⁶ Ut chixjunileb li cuanqueb chi nachꞌ riqꞌuineb queꞌxtenkꞌaheb. Queꞌxqꞌue li plata, queꞌxqꞌue li oro ut li cꞌaꞌak re ru li ta̱cꞌanjelak chiruheb. Queꞌxqꞌue li xul li nequeꞌi̱kan ut nabal li cꞌaꞌak re ru terto xtzꞌak. Ut queꞌxqꞌue ajcuiꞌ lix mayej aꞌ yal joꞌ nimal x-ala chak saꞌ xchꞌo̱l li junju̱nk.

⁷ Ut li rey Ciro quirisi chak li secꞌ li nacꞌanjelac saꞌ li rochoch li Dios, li queꞌelkꞌa̱c ut queꞌqꞌueheꞌ saꞌ rochocheb lix dioseb laj Babilonia xban li rey Nabucodonosor.

⁸ Li rey Ciro quixye re laj Mitrídates laj xocol tumin nak ta̱rajlaheb li secꞌ. Nak ac xrajlaheb, quixkꞌaxtesiheb re laj Sesbasar li gobernador re Judá.

⁹ Aꞌin xqꞌuial li secꞌ li quixkꞌaxtesi li rey: laje̱b xcaꞌcꞌa̱l (30) li ni̱nki secꞌ oro; jun mil (1,000) li ni̱nki secꞌ plata; bele̱b xcaꞌcꞌa̱l (29) li chꞌi̱chꞌ;

¹⁰ laje̱b xcaꞌcꞌa̱l (30) li secꞌ oro; ca̱hib ciento riqꞌuin laje̱b (410) li secꞌ plata ut jun mil (1,000) li yalak cꞌaꞌru chi secꞌul.

¹¹ Chixjunil li secꞌ li quikꞌaxtesi̱c re laj Sesbasar, aꞌan o̱b mil riqꞌuin ca̱hib ciento (5,400) li secꞌ oro ut li secꞌ plata. Ut queꞌxcꞌam li secꞌ nak queꞌel Babilonia li chapcho̱queb cuiꞌ ut queꞌsukꞌi cuiꞌchic Jerusalén.