Eclesiastés 8 - Li Santil hu

¹ Ma̱ ani ta̱ru̱k tixjuntakꞌe̱ta rib riqꞌuin li cuan xnaꞌleb. Li ani cuan xnaꞌleb naxnau cꞌaꞌut nak nacꞌulman li cꞌaꞌak re ru saꞌ ruchichꞌochꞌ. Lix naꞌleb naxqꞌue chi sahocꞌ lix chꞌo̱l ut najala li riloba̱l xban nak sa chic saꞌ xchꞌo̱l.

² Cheba̱nuhak li cꞌaꞌru tixye e̱re li rey joꞌ queye nak queba̱nu li juramento chiru li Dios.

³ Nak tex-e̱lk chiru li rey, ba̱nuhomak saꞌ xya̱lal. Incꞌaꞌ tex-e̱lk saꞌ junpa̱t. Ut mex-oquen saꞌ xya̱nkeb li nequeꞌxba̱nu li incꞌaꞌ us xban nak aꞌan naru naxba̱nu e̱re li cꞌaꞌru naraj.

⁴ Li ra̱tin li rey, aꞌan cuan xcuanquil. Ut ma̱ ani naru ta̱yehok re nak incꞌaꞌ us naxba̱nu.

⁵ Li ani naxba̱nu li natakla̱c cuiꞌ xban li rey, ma̱cꞌaꞌ tixcꞌul. Ut li ani cuan xnaꞌleb naxnau jokꞌe ut chanru nak tixba̱nu li natakla̱c cuiꞌ.

⁶ Cuan jun li ho̱nal re xba̱nunquil chixjunil li cꞌaꞌak re ru ut cuan ajcuiꞌ li naꞌleb re xcꞌoxlanquil chanru xba̱nunquil. Abanan cuan jun li chꞌaꞌajquilal saꞌ xbe̱n li junju̱nk,

⁷ xban nak ma̱ ani naxnau cꞌaꞌru tixcꞌul, chi moco cuan ta junak naru tixye cꞌaꞌru ta̱cꞌulma̱nk mokon.

⁸ Ma̱ ani junak nacuan xcuanquil saꞌ xbe̱n lix musikꞌ li junju̱nk. Moco ta̱ru̱k ta tixye nak toj ta̱cua̱nk lix yuꞌam xban nak ma̱cuaꞌ aꞌan yal re saꞌ xbe̱n lix yuꞌam. Chi moco cuan junak cuan xcuanquil saꞌ xbe̱n li ca̱mc xban nak ma̱ ani naru nacoleꞌ chiru li ca̱mc. Li incꞌaꞌ us xnaꞌleb incꞌaꞌ ta̱colekꞌ xban li ma̱usilal naxba̱nu.

⁹ Chixjunil aꞌin quinqꞌue retal nak quin-oc chixtzꞌilbal rix li cꞌaꞌru nacꞌulman saꞌ ruchichꞌochꞌ. Quinqꞌue retal nak cuanqueb li cui̱nk cuanqueb xcuanquil saꞌ xbe̱neb li ras ri̱tzꞌin ut nequeꞌxba̱nu raylal reheb.

¹⁰ Ut ninqꞌue ajcuiꞌ retal nak eb li incꞌaꞌ useb xnaꞌleb nequeꞌqꞌueheꞌ xlokꞌal nak nequeꞌmukeꞌ. Abanan li nequeꞌxic rajlal saꞌ li templo, ma̱ ani nacꞌoxlan re li ti̱quilal li queꞌxba̱nu saꞌ li tenamit. Chixjunil aꞌin ma̱cꞌaꞌ na-oc cuiꞌ.

¹¹ Ut xban nak incꞌaꞌ nequeꞌxcꞌul chi ticto xtojbal rix li ma̱usilal li nequeꞌxba̱nu, joꞌcan nak kꞌaxal cuiꞌchic nequeꞌraj xba̱nunquil li ma̱usilal li jun chꞌol chic.

¹² Usta nanumta li ma̱usilal li nequeꞌxba̱nu laj ma̱c ut usta najt rok lix yuꞌameb arin saꞌ ruchichꞌochꞌ, la̱in ninnau nak eb li nequeꞌxucuan ru li Dios us teꞌxcꞌul chiruheb aꞌan.

¹³ Ac chꞌolchꞌo nak eb li nequeꞌxba̱nu li ma̱usilal incꞌaꞌ us teꞌxcꞌul xban nak yal nequeꞌxnumsi lix yuꞌameb chi ma̱cꞌaꞌ rajbal. Incꞌaꞌ nequeꞌxqꞌue xlokꞌal li Dios ut incꞌaꞌ nequeꞌxxucua ru.

¹⁴ Cuan jun chic li naꞌleb na-uxman saꞌ ruchichꞌochꞌ incꞌaꞌ nintau ru. Aꞌan nak eb li cha̱bileb xnaꞌleb nequeꞌxcꞌul raylal. Ut li raylal nequeꞌxcꞌul eb aꞌan, reheb raj li incꞌaꞌ useb xnaꞌleb. Ut eb li incꞌaꞌ useb xnaꞌleb, usilal nequeꞌxcꞌul. Ut li usilal li nequeꞌxcꞌul, aꞌan reheb raj li cha̱bileb xnaꞌleb. La̱in ninye nak aꞌin ma̱cꞌaꞌ na-oc cuiꞌ.

¹⁵ Joꞌcan nak la̱in ninye nak li cui̱nk tixsicꞌ li sahil chꞌo̱lej arin saꞌ ruchichꞌochꞌ. Ta̱cuaꞌak ta̱ucꞌak ut ta̱sahokꞌ saꞌ xchꞌo̱l xban nak caꞌaj cuiꞌ aꞌan naru tixba̱nu re nak tixyal xsahil li cꞌanjel li naxba̱nu nak toj cuan lix yuꞌam saꞌ ruchichꞌochꞌ li naqꞌueheꞌ re xban li Dios.

¹⁶ Nak quinkꞌaxtesi cuib chixtzolbal ut chixtzꞌilbal rix li cꞌaꞌak re ru nacꞌulman saꞌ ruchichꞌochꞌ, chi kꞌek chi cutan incꞌaꞌ nachal incuara.

¹⁷ Ut quinqꞌue retal nak ma̱ ani nataꞌoc ru li cꞌaꞌru naxba̱nu li Dios. Li cui̱nk ma̱ jokꞌe tixtau ru li cꞌaꞌru naxba̱nu li Dios saꞌ ruchichꞌochꞌ, usta tixtacuasi rib chixsicꞌbal. Li cuan xnaꞌleb naru naxye nak naxnau, abanan ma̱ jokꞌe tixtau ru.